Kupwa kwa kuyitakel antu a Yehova mu mivu yivud, Joshua wafa ni mivu 110. Padingay mwom, in Isarel amwifukwilang Yehova. Pakwez pafay Joshua, asambisha kwifukwil akish, mud mwifukwilangau in Kanan. Mulong in Isarel kadandamenap kumulondul Yehova, chawiy wamulika mwant wa in Kanan utazukinau anch Jabin chakwel ayimesha mar. Antu amwilembina Yehova chakwel ayikwasha. Chawiy Yehova wayinkisha ntakel musu dijin diend, Barak. Wafanyina kuyikwash antu chakwel achirik kud Yehova.

Debora, muprofet mband, amutuma kuya kud Barak. Wading ukwet rusang ra kumulej Barak ridokila kud Yehova anch: ‘Send antu 10 000, ni yang usankanijan ni yisak ya amasalay a Jabin ku wit wa Kison. Kwinikwa ukumuwin Sisera mukurump wa chisak cha amasalay a Jabin.’ Barak wamuleja Debora anch: ‘Nikuya pakwez ching twaya ney pamwing.’ Debora wamwakula anch: ‘Tukuya ney. Pakwez ijik anch kayeyap ukumujipa Sisera. Yehova walonda anch akumujip kud muntu mband.’

Debora waya pamwing ni Barak ni amasalay end ku Mukandu wa Tabor chakwel irijek mulong wa njit. Pateshay Sisera piur pa yom yiney, wakumangeja matemb mend ma njit ni antu end, aya mwi nkurubuk. Debora wamuleja Barak anch: ‘Nlel diawiy dichuku dikukwinkishay Yehova usu wa ku win.’ Barak ni antwend 10 000 ashirika ku mukandu mulong wa kusankanijan ni yisak ya usu ya amasalay a Sisera.

Kupwa Yehova wasala anch wit wa Kison wizul. Matemb ma njit ma Sisera majama mu malau. Sisera washa ditemb diend ni wachina mau. Barak ni amasalay end awina yisak ya amasalay a Sisera, pakwez Sisera wachina! Wachina ni wajingama mu mwinkand wa mband umwing utazukinau anch Jayel. Mband winou wamwinkisha mayel chakwel ana ni kupwa wamubwika mbulangech. Mwin kurish njit winou walala tul. Kupwa, Jayel wamuzomba pakemp pakemp ni wamupampa mubur ku mutu wend, chad wafa.

Barak waya kumukimb Sisera. Jayel wabudika mu mwinkand ni wamwela anch: ‘Andam. Nikukulej muntu ukimbina.’ Barak wandama ni wamumana Sisera ulel wafang kal. Barak ni Debora amutumbisha Yehova ni miminy mulong wayinkisha in Isarel usu wa kuyiwin akankuny au. Mu mivu 40 yalondulaku, in Isarel ading mu chisambu.

Chisu kwading nzal mu Isarel, mwin Isarel utazukinau anch Nawom waya mwi ngand ya Mowab pamwing ni nfumwend ni anau amakundj aad. Kupwa, nfumwend a Nawom wafa. Anend amakundj ata amband in Mowab, majin mau Rut ni Oripa. Cha ushon, pikwasuta machuku, an amakundj a Nawom afa.

Pateshay Nawom anch nzal mu Isarel yapwil, wakwata mupak wa kuchirik kwol kwend. Rut ni Oripa aya nend pamwing, pakwez padingau mwi njil akat kuya, Nawom wayileja anch: ‘Wadingana amband awamp a anam ni amawenam awamp. Nikatin anch akwatan kand kudi amakundj akwau. Chirikan kwol kwen ku Mowab.’ Amband inay amwakula anch: ‘Tukukatin! Tukukushap.’ Nawom wadandamena kuyilej anch achirika. Kupwa, Oripa wachirika, pakwez Rut washala. Nawom wamuleja anch: ‘Oripa wachirik kal kud antwend ni kud anzamb end. Yang nend pamwing, chirikany ku yikumbu ya amakwen.’ Pakwez Rut wakula anch: ‘Nikukushap. Antwey akwikal antwam, ni Nzamb wey ukwikal Nzamb wam.’ Utongin anch Nawom wova mutapu ik pamulejau mwamu kud Rut?

Rut ni Nawom ashika mu Isarel pa chisu cha kwangul mbut. Dichuku dimwing, Rut waya kunonijol mbut mu chir cha ikundj utazukinau anch Bowaz mwan a Rahab. Watesha anch Rut wading mwin Mowab washala ushinshamena kud Nawom. Wayileja in kusal mudimu alika kupwish mbut jawonsu mu chir chakwel Rut niyend akumangej jikushala.

Urel winiwa, Nawom wamwipula Rut anch: ‘Mu chir cha nany wasalang mudimu nlel?’ Rut wakula anch: ‘Mu chir cha muntu umwing dijin dend Bowaz.’ Nawom wamuleja anch: ‘Bowaz ud muntu wa mu dijuku da nfumwam. Dandamen kusal mudimu mu chir chend pamwing nau akwen amband. Ukwikal nawamp.’

Rut wadandamena kusal mudimu mu chir cha Bowaz kushik ni papwishinau kwangul mbut. Bowaz wamana anch Rut wading usadin mudimu nakash ni wading kamu mband muwamp. Mu machuku minima, anch ikundj wafa pakad kuval ni mukajend, mwanamakwend ukumuswan mwadamufu winou. Chawiy Bowaz wamwata Rut. Avala mwan dijin dend Obed, wikala ngakend a Mwant David. Arunend a Nawom ova musangar nakash. Alonda anch: ‘Chakusambish, Yehova wakwinkishay Rut uda muntu muwamp kud ey, chad katat ukwet mwijukur. El Yehova atumba.’