Chisu chimwing, in Isarel amubwambwila kand Yehova ni asambisha kwifukwil anzamb amakasu. Mu mivu sambwad, in Madian iyang annam a in Isarel ni asheshang mbut jau. Mulong wa kuyichin in Madian, in Isarel ajingamang mu mandam ni mu mikandu. Amwilembina Yehova chakwel ayikwasha. Chawiy Yehova watuma mwangel kud nsand umwing dijin dend Gedeyon. Mwangel wamuleja anch: ‘Yehova wakutondin ey kwikal mwin kurish njit wa usu.’ Gedeyon wamwipula anch: ‘Mutapu ik nikutwisha kuyipandish in Isarel? Nid kwam muntu wa chamwamu.’

Mutapu ik wafanyinay Gedeyon kwikal nich kashinsh anch Yehova ndiy wamutonda? Wateka mavuj ma nnam pansh ni wamuleja Yehova anch: ‘Pamanch, anch mavuj amatalesh kud maum pakwez pansh palik kutalal, chawiy nikwijik anch ukatin niyipandish in Isarel.’ Mukwacha, mavuj mading matalalang kal pakwez pansh pading paumin! Chawiy Gedeyon wamuleja anch damashik pamanch, mavuj mikal maumina ni pansh patalela. Pasadika yom yiney, Gedeyon wikala chad ni kashinsh anch Yehova wamutondin kal. Wakumangeja amasalay end mulong wa kurish nau in Madian.

Yehova wamuleja Gedeyon anch: ‘Nikuyinkish in Isarel usu wa kuwin. Pakwez mulong ukwet amasalay avud, ukutwish kutong anch ukuwin njit ku usu wa amwiney. Muleja muntu win mwawonsu ukweta wom achirika kwol kwend.’ Chawiy amasalay 22 000 achirika ku yikumbu yau, ni amasalay 10 000 awiy ashala. Kupwa Yehova walonda anch: ‘Amasalay achid kal avud. Yitwala ku wit ni yileja asambish kuna mem. Lam ching anila mem oku akat kutal mukankuny.’ Ching kwau amasalay 300 awiy ading ababela pading panilau mem. Yehova washilamu anch antu inay akemp akuyiwin amasalay a in Madian ada uvud wa 135 000.

Uchuku winiwa, Yehova wamuleja Gedeyon anch: ‘Katat chawiy chisu chiwamp cha kuyirishikish in Madian!’ Gedeyon wayinkisha antwend miseng ni ansab ajim ni ma torsh mading majindjikinau mukach mwa ansab. Wayileja anch: ‘Ntalany mutapu nisadina, ni salany kamu mud mutapu nikusala.’ Gedeyon wapepa mu museng, wabarila nsab yend, wakwata torsh wend ku chikas, ni watoya dizu da piur anch: ‘Mpak ya musamun ya Yehova ni ya Gedeyon!’ Amasalay end awonsu 300 asala mutapu umwing. In Madian azala ni achinina ku mitambu yawonsu. Mu kanrumbangesh kinak, asambisha kurish ayinau. Kapamp kakwau kand, Yehova wayikwasha in Isarel kuyiwin akankuny au.

Mwin Isarel utazukinau anch Elikana wading ni amband aad, Ana ni Penina, pakwez wading umukatin nakash Ana. Penina wamusipang Ana chisu chawonsu, mulong Ana kadingap nau an pakwez Penina ndiy wading nau an avud. Muvu ni muvu, Elikana wasendang dijuku dend mulong wa kuya kwifukwil ku dizang ku Silo. Chisu chimwing padingau kwinikwa, Elikana wamana anch mukatish nend Ana ukwet ushon. Wamwela anch: ‘Ana lik kudil amboku. Ud niyamam. Nikukatin.’

Kupwa, Ana waya amwinend mulong wa kulembil. Wadandamenang kudil pamwitangay Yehova mulong wa kumukwash. Washilamu anch: ‘Yehova, anch wanginkish mwan, nikukwinkishay, ni ukukusadin machuku mawonsu ma mwom wend.’

Mwin Kupesh Mujim, Eli, wamumana Ana wazadish lel milamu yend, ni watonga anch wanang kal maar. Ana wamwakula anch: ‘Bwat nsalejam nanangap maar. Nikwet mulong ujim, ni nimulejin Yehova mulong winou.’ Eli wamana anch wamurumbukin kal ni wamuleja anch: ‘El Nzamb akwinkisha yawonsu ukimbina.’ Ana wiyova nawamp ni waya. Mu muvu umwing, Ana wavala mwan ikundj ni wamupila anch Samwel. Ukutwish kutong mutapu wovay Ana musangar?

Ana kavuramenap kushilamu kwend kwasalay kud Yehova. Pamusumunay Samwel ku mayel, wamutwala kusadin ku dizang. Wamuleja Eli anch: ‘Ndiy winou mwan nalembilang mulong wa kumuval. Ukumusadin Yehova machuku mend mawonsu.’ Elikana ni Ana ayangang kumutal Samwel muvu ni muvu ni kumutwadin masun masu. Yehova wamwinkisha kand Ana an amakundj asatu ni an amband aad.