In Isarel amubwambwila kand Yehova ni asambisha kwifukwil anzamb amakasu. Chisu chayirishikishau in Isarel kud in Amon, anzamb inay amakasu kayikwashap. Mu mivu yivud, in Isarel amana mar. Kupwa, amuleja Yehova anch: ‘Twasadin kal chitil. Twilemb amboku tukamuninaku mu makas ma akankuny etu.’ In Isarel awupola akish au ni asambisha kand kumwifukwil Yehova. Yehova kakatap kuyiman akat kudandamen kuman mar.

Mwin kurish njit utazukinau anch Jefite amutonda mulong wa kuyitakel antu aya kurish nau in Amon. Wamuleja Yehova anch: ‘Ang watukwash kuwin njit, nashilamu kal anch pinikuchirika ku chikumbu, nikukwinkish muntu wa kusambish ukubudika mu chikumbu cham mulong wa kwez kwinsankan.’ Yehova watesha malembil ma Jefite ni wamukwasha kuwin njit.

Pachirikay Jefite ku chikumbu, muntu wa kusambish weza kumusankan wading mwanend mband, ndiy kwend mwan umwing wadingay nend. Wading ukat kuja maj ni kubul ngam. Jefite wafanyina kusal yom ik? Wavurika kushilamu kwend ni walonda anch: ‘A! Mwanam mband! Wanletin kal mar nakash ni kwingandjik mu ushon, mulong nachipil kal kurutu kwa Yehova. Mulong wa kulam machip minam, nifanyidin kukutum uya usadin mu dizang ku Silo.’ Pakwez mwanend mband wamwakula anch: ‘Tatuku anch wachipin kal kud Yehova ufanyindin kuwanyish machip minam. Pakwez nlika bil mwa angond aad chakwel niya nikwendanganaku ku mikandu nau arund nam amband. Kupwa nikuya.’ Mwan mband wa Jefite wasadina mu dizang nich kushinshaman mu mwom wend wawonsu. Muvu ni muvu, arund nend ayangang ku Silo mulong wa kumutal.

Mwin Kupesh Mujim Eli wading ni an aad amakundj asalang mud in kupesh mu dizang. Majin mau Hofini ni Fines. Kaziyinangap ku yijil ya Yehova, ni ayisadinanga antu mu mutapu uyimp. Chisu chaletangau in Isarel yakupesh mulong wa Yehova, Hofini ni Fines asendang mbij jiwamp ja awiy. Eli wateshang piur pa yom yasalangau anend, pakwez kasalap chom pa mulong winou. Ov, Yehova walika yom yiney yidandamena kusadik?

Ap anch Samwel wading mwanikanch kusutamu Hofini ni Fines, kayimburijap. Yehova wamusangera Samwel. Uchuku umwing pading palelay, Samwel watesha dizu datazuk lel dijin dend. Walanka, waya mau kud Eli, ni walonda anch: ‘Am ou!’ Pakwez Eli wamwakula anch: ‘Nikutazukinap. Chirik ulala.’ Samwel wachirika pa ulal. Amutazuka kand kapamp kakwau. Pateshay Samwel dizu kapamp ka kasatu, Eli wajingunina anch Yehova ndiy umutazukina Samwel. Wamuleja Samwel anch ang watesh kand dizu kapamp kakwau, ufanyidin kulond anch: ‘Yehova lond kwey. Kashalapol wey ukuteshin.’

Samwel wachirika pa ulal. Kupwa watesha amutazuk anch: ‘Samwel! Samwel!’ Wakula anch: ‘Lond kwey, mulong kashalapol wey ukuteshin.’ Yehova wamuleja anch: ‘Muleja Eli anch nikumupup ndiy ni dijuku dend, mulong wij anch anend asadin yom yiyimp mu dizang dam, pakwez kasadinap chom pa mulong winou.’ Mukwacha Samwel wazurila chis cha ku dizang, mud mwasalangay. Wading wovil wom wa kumulej mwin kupesh mujim yom yalonday Yehova. Pakwez Eli wamutazuka ni wamwipula anch: ‘Mwanam ikundj, yom ik yakulejangay Yehova? Nleja yom yawonsu.’ Chawiy Samwel wamuleja Eli yom yawonsu.

Pading payilay Samwel mu kupam, Yehova wadandamena kwikal nend. Mwi ngand yawonsu, in Isarel awonsu ijika anch Yehova wamutondin Samwel kwikal muprofet ni nzwij.