Mu musumb wa Asiriya wa Niniv mwading antu ayimp nakash. Yehova wamuleja muprofet wend Yona kuya ku Niniv mulong wa kuyibabesh antu chakwel aswimpa mashakamin mau. Pakwez, Yona kitiyap kuya. Waya ni waat ujim utazukinau anch bato wading uyila ku Tarsis ni ku ditung.

Pading payilau pa karung, rinkind mukash watuta ni in kwendish waat ova wom nakash. Asambisha kulembil kud anzamb au anch: ‘Mulong wak yom yiney yatushiken kal?’ Kupwa, Yona wayileja anch: ‘Yama nikweta mulong. Nichinin kusal yom yanlejay Yehova kusal. Ndjibwilany kwam mu karung chakwel rinkind aduta.’ In kwendish waat kakatap kumudjibul Yona mu karung, pakwez amwinend wadandamena kuyilej anch amudjibula. Pamudjibulau mu karung, pakad kulab rinkind waduta.

Yona watonga anch ukufa. Padingay ni kushikumuk kwinshin kwa karung, wamulembila Yehova. Kupwa Yehova watuma insh mujim nakash. Wamuminya Yona pakwez, kamujipap. Padingay mwivum mwa insh winou Yona walembila anch: ‘Nashilamu kal anch nikudandamen kukuziyil yisu yawonsu.’ Yehova wamulama Yona mwivum mwa insh mu machuku masatu kupwa insh winou wamurika Yona ku chikum cha karung.

Pamupandishau Yona kud Yehova, ov, Yona wafanyina kand kulik kuya ku Niniv? Bwat. Yehova wamuleja kand Yona kuya ku Niniv. Pa chisu chinicha Yona waziyina. Waya ni wayileja antu ayimp anch: ‘Mu machuku 40, Niniv ukusheshik.’ Pakwez, kwading chom chimwing chisangareshina—In Niniv atesha ni akarumuka. Mwant wa mu Niniv wayileja antu anch: ‘Mwitany Nzamb ni likany yitil yen. Pamwing ap kakutusheshap.’ Pamanay Yehova anch antu a mu Niniv akarumuk kal, kayisheshap.

Yona wajimana nakash mulong musumb winou kausheshap. Tong bil: Yehova washimpisha muchim ni wamwovila Yona riy pakwez, Yona kayovilap antu a ku Niniv riy. Kupwa waya pol pa musumb ni washakama mwinshin mwa chifukis mulong wa kwot urel. Palipa chifukis chinech Yona wajimana nakash. Chawiy Yehova wamuleja anch: ‘Ey ukatin nakash chifukis chinech kusutamu in Niniv. Nayovidin riy ni nikatin apanda.’ Chom ik chading cha usey? Antu a mu Niniv ading akwet usey kusutamu chifukis chin chawonsu.

Want wa in Asiriya wakwata michid dikum ya want wa Isarel. Pakwez, mwant Sanakerib wa Asiriya wakata kukwat kand michid yaad ya want wa Yuda. Wasambisha kukwat misumb ya Yuda umwing ku umwing. Pakwez, musumb wakatay nakash wading musumb wa Yerusalem. Sanakerib kadingap wij anch Yehova wading ukingin musumb wa Yerusalem.

Ezekias mwant wa Yuda wamufuta Sanakerib nfalang jivud mulong asha musumb wa Yerusalem. Ap anch Sanakerib watambula nfalang jinej, ndiy wadandamena kutum amasalay end akweta usu mulong wa kurishikish Yerusalem. Antu a mu musumb ova wom mulong in Asiriya asambisha kusej piswimp nakash ni musumb. Chawiy Ezekias wayileja anch: ‘Kangal wovany wom. In Asiriya akwet usu, pakwez Yehova ukutusal anch twikala ni usu kuyipandakanamu awiy.’

Sanakerib watuma kashalapol wend, Rabishakey kuya ku Yerusalem mulong wa kuyiswingish antu. Rabishakey wimana pol pa musumb ni watoya anch: ‘Yehova kakukukwashanyap kwen. Pikil walikany Ezekias akudimbany. Kwikil nzamb ap umwing ukutwisha kukukingany mu makas metu.’

Pakwez, Ezekias wamwipula Yehova yom yifanyidinay kusal. Yehova wamwakula anch: ‘Kangal kwov wom mulong wa yom yalondinay Rabishakey. Sanakerib kakukwatap Yerusalem.’ Kupwa, Ezekias watambula mikand yadokala kuday Sanakerib. Mikand yiney yalonda anch: ‘Likap kwey. Yehova kakukupandishap.’ Ezekias walembila anch: ‘Yehova, tupandishaku amboku, chakwel antu awonsu ijika anch yeya Nzamb wakin.’ Yehova wamwakula anch: ‘Mwant wa Asiriya kakwezap kukwat Yerusalem. Nikuking musumb wam.’

Sanakerib wading ni kashinsh anch Yerusalem ukwikal musumb wend. Pakwez, Yehova watuma mwangel uchuku pa ndond padingau amasalay pol pa musumb. Mwangel winou wajipa amasalay uvud wa 185 000! Mwant Sanakerib washadisha amasalay end awonsu akweta usu nakash. Kamanap chom cha kusal ni wachirika kwol kwend ni usany wawonsu. Yehova wamukinga Ezekias ni wakinga kand Yerusalem mud mwakanay. Anch niyey wading mu Yerusalem, wela kumuchingejin Yehova?