Dichuku dimwing uchuku Nebukadinezar walata chilat chamwakamisha nakash. Chawiy chayitazukay antu end awonsu in manang chakwel arumburil chilat chinech. Pakwez, kwikil muntu ap umwing watwisha kurumburil. Kupwa mwant wamutazuka Daniel.

Nebukadinezar wamuleja Daniel anch: ‘Pinada nilatina, namanang chishimushimu cha mutond. Mutond winou wajimbang ni walepang djat ni mwiur. Antu awonsu a pa mangand atwishang kuuman. Wading ni mayij ma ufun ni wasongang mabuj mavud. Annam a mu masuk alalang mu urel wa mutond winou ni atujil atungang yinswal ku mitiy yau. Kupwa, mwangel washirikang mwiur. Walond anch: Katulany mutond winou ni sakurolany mitiy yau. Pakwez, chifanyidin kusha chishij ni mij yach kupwa kuchikas nich muyolal wa utad ujal ni utad wa bronze. Rudung rend rukuswimp rikal ra nnam kushik ni pakupwila mivu sambwad. Chawiy, antu awonsu akwijik anch Nzamb ud Mwant ni ukutwish kupan want wend kud muntu mwawonsu ukutonday.’

Yehova wamuleja Daniel kurumburik kwa chilat chinech. Pajinguninay Daniel kurumburik kwa chilat chinech wova wom nakash. Ni walonda anch: ‘A Mwant!, nikatin anch chilat chinech chikala cha akankuny ney pakwez, chid mulong weyey. Mutond ujim wakatulangau yeya mwant. Ukushadish want wey ni ukuda masuk mud nnam wa mu masuk. Pakwez, mulong mwangel walondang kusha chishij, chirumburikin anch ukutwish kwikal kand mwant.’

Pasuta muvu, Nebukadinezar wading ni kwendangan piur pa chikumbu cha want, mu Babilon. Walonda anch: ‘Tal kujimb kwa musumb natungina. Tal usu wam!’ Padingay ni kulond, dizu dadokala mwiur ni dalonda anch: ‘Nebukadinezar! Katat washadish kal want wey.’

Pa chisu chinicha, Nebukadinezar washadisha manang mend ni wikala mud nnam wa mu masuk. Amwopata pakad kulab mu chipang ni waya kushakam ni annam. Nsuch ja Nebukadinezar jalepa jikal mud masal ma mbur ni jinzal jend jalepa mud ja atujil.

Pikwasuta mivu sambwad, manang ma Nebukadinezar machirika, kupwa Yehova wamwikadisha kand mwant wa Babilon. Chawiy, Nebukadinezar walonda anch: ‘Namushiman kal Yehova, Mwant uda Mwiur. Katat nijik kal anch Yehova ud Mwant. Ukat kuyishikumwish antu akata kwitutul ni ukutwish kupan want wend kud muntu mwawonsu ukutonday.’

Pikalay Belishasar mwant wa mu Babilon, dichuku dimwing uchuku watazuka antu kanan mulong wa kwez ku musambu ujim. Wayituma atushalapol end chakwel aleta jimpas ja utad wa or jabuway Nebukadinezar mu tempel wa Yehova. Belishasar ni antu atazukay ku musambu winou anila maar mu jimpas jinej ni asambisha kushiman anzamb au. Kukashimuk, chikas cha muntu chasambisha kufund mazu mamwing mashimokishena ku rubumbu ra chikumbu cha kudil.

Belishasar wova wom nakash. Watazuka in kupong end ni wayileja anch: ‘Muntu mwawonsu ukutwisha kwinlej kurumburik kwa mazu minam, nikumutek muntu winou kwikal muntu wa kasatu ukweta usey mu Babilon.’ Apakisha kurumburil pakwez kwikil muntu watwisha kurumburil. Kupwa mband wa mwant weza walonda anch: ‘Kud muntu umwing dijin dend Daniel warumburila yom yalatay Nebukadinezar. Muntu winou ukutwish kukurumburil mazu minam.’

Daniel weza kuday mwant. Belishasar wamuleja anch: ‘Anch watwish kutang mazu minam ni kumarumburil nikukudjik usang wa utad wa or mwi nshing ni ukwikal muntu wa kasatu ukweta usey mu Babilon.’ Daniel wakula anch: ‘Nikwetap kwamu kuswir kwa yipan yey, pakwez nikukulej kurumburik kwa mazu minam. Tatukwey, Nebukadinezar, wading mwin kwitutul pakwez Yehova wamushikumwisha. Oku, ey wij nawamp yom yawonsu yamushikena, pakwez niyey umulimishinap kwey Yehova mulong ukat kunil maar mu jimpas jabuway tatukwey ku tempel. Chawiy, chafundangay Nzamb mazu minam anch: Mene (Chind), Mene (Chind), Tekel (Ilik) ni Parsin (Angan). Mazu minam marumburikin anch in Mediy ni in Peris akez kukwat Babilon, ni ukwikalap kand mwant.’

Chamekana anch kwikil muntu ap umwing wela kukwat Babilon. Musumb winou ading aunyingumwishin nich mbumbu jikash ni wit ujim ukurikina. Pakwez, uchuku nakash in Mediy ni in Peris aukwata musumb winou. Sirus Mwant wa in Peris wapumbula wit chawiy amasalay end auka. Pashikau mu musumb, yis yading yawash! Amasalay anyingumuka musumb ni aukwata kupwa amujipa mwant. Chawiy, Sirus wikala mwant wa mu Babilon.

Kupwa kwa muvu, Sirus walonda anch: ‘Yehova wanlejin kutunguril tempel mu Yerusalem. Muntu mwawonsu ukatina kwipan ku mudimu winou eza.’ Chawiy, mud mwashilayimu Yehova, in Yuda avud achirika mu Yerusalem kupwa kwa mivu 70 pamusheshau. Sirus wachirisha utad wa or ni jimpas ja utad wa argent ni yom yawonsu yabuway Nebukadinezar mu tempel. Umen mutapu Yehova wamusadinay Sirus mulong wa kuyikwash antu end?