Mutapu Ukutwisha Rukat ra Yehova Kutukwash Kupandakan Wom

1. Wom wa mutapu ik ukutwishau antu awonsu kwov?

SHINSHIKIN rusangu rakin ra yom yasadika. Nestor ni mukajend María, adinga akatin kusadin kwi ndond kwading maswir nakash.b Mulong wa kuwanyish mupak winou, chading chitin kwilej mutapu uwamp wa kusadin nfalang jau. Pakwez ova wom anch kwikal ni nfalang jikemp kwafanyinap kuyiletin musangar. Chisu chikalay Biniam Kaman wa Yehova mwi ngand mwading murishikishinau mudimu wetu, wajingunina anch afanyina kumuzengol mulong ud Kaman wa Yehova. Chinech chamwovisha wom. Pakwez wova kand wom nakash piur pa mutapu wafanyinau antu a mu dijuku diend kusal anch ajingunin anch waswimpang ka relijon. Valérie amukwata kanser mukash, ni wabinda nakash pa kuman dokter wafanyina kulimish yitiyij yend yimedina pa Bibil pantaliken ni mash. Chakin kamu, wova wom anch ukufa kwend.

2. Mulong wak tufanyidina kusal usu wa kupandakan wom wetu?

² Ov, wovilap kal wom wa mutapu winou? Chid mwamu kud avud pakach petu. Anch twalik kwilej kuyikel wom wetu, tukutwish kukwat mipak yiyimp yikutwisha kwikal ni yibudikin yiyimp pa urund wetu ni Yehova. Riner rawiy ridia rusot ra Satan. Ukat kusal kand usu wa kusadin wom wetu mulong wa kutubachik kubwambwil ku yijil ya Yehova, kuwejaku ni mbil yitwinkishinay ya kulejan rusangu ruwamp. (Kuj. 12:17) Satan ud mwin chisum wakad ranaken, ni ukweta usu. Pakwez ukutwish kwiking amwiney ku kurishikish kwend. Mutapu ik?

3. Yom ik yikutukwasha kupandakan wom?

³ Anch twikal nich kashinsh anch Yehova utukatin—ni anch ud netu—Satan kakutwishap kutwovish wom. (Kus. 118:6) Chilakej, nfund a Kuseng 118 warisha ni yikokujol yimwing yikash kushalijan. Wading ni akankuny avud, kuwejaku antu amwing ajim (verse wa 9, 10). Yisu yimwing warisha ni rupompat rikash (verse wa 13). Ni amupupa nakash kud Yehova (verse wa 18). Pakwez ap mwamu, nfund a kuseng winou weza kuwang anch: “Kinikovap kwam wom.” Yom ik yamukwasha kwiyov anch ud mu diking mwamu? Wading wij anch Yehova wading umukatin nakash ap anch wamupupap nchik. Nfund a kuseng wading ukwet kashinsh anch chikalap nchik chikokujol chikutwishay kurish nich, Nzamb wend wa rukat wafanyina kumukwash.—Kus. 118:29.

4. Mitapu ik ya wom tukutwisha kupandakan anch twikal nich kashinsh anch Nzamb utukatin?

⁴ Tufanyidin kwikal nich kashinsh anch Yehova utukatin pakampwil. Kwikal nich kashinsh kinak kukutukwash kupandakan mitapu ya wom yisatu yilondwilaku ey: (1) wom wa kukangany kuwanyish maswir ma dijuku, (2) wom wa antu, ni (3) wom wa rufu. Antu twisambinang mu paragraf wa kusambish atwisha kupandakan wom winou mulong ading nich kashinsh anch Nzamb uyikatin.

WOM WA KUKANGANY KUWANYISH MASWIR MA DIJUKU

5. Yishiken ik yikutwisha kumwakamish nakash ntakel wa dijuku? (Tal chipich cha pa chibur.)

⁵ Mwin Kristu udia ntakel wa dijuku ukwatining nich usey chisend chikwetay cha kuwanyish maswir ma ku mujimbu ma dijuku diend. (1 Tim. 5:8) Anch ud ntakel wa dijuku, pamwing ap wiyakamisha pa chisu cha chipupu anch ukushadish mudimu wey. Pamwing ap wiyakamisha anch chikutwish kukukasiken kuland yakudia mulong wa dijuku diey. Pamwing ap wova kand wom anch ang washadish mudimu wey, ukutwishap kand kutan ukwau. Ap mud Nestor ni María ajimbulangau kwiur oku, pamwing ap widjidjeka anch ukutwishap kusal kuswimp kanang mu mudimu wey wa ku mujimbu, kukutwisha kwikal ni yibudikin kanang mu mwom wey. Satan watwishin kal kuyoz antu avud mu kusadin mitapu ya wom yiney.

6. Satan usadin usu wa kutubachik kutong ik?

⁶ Satan ukat kusal usu wa kutubachik kutong anch Yehova kakatap kutubangin pa kampwil, ni anch kakutwishap kutukwash kuwanyish maswir ma dijuku dietu. Mud chibudikin, tukutwish kutong anch tufanyidin kusal yawonsu tukutwisha mulong wa kuchidij mudimu tukweta, ap anch kusal mwamu kukutwish kutushikij kudiul mbil jimwing ja Bibil.

7. Yesu utwinkishin kashinsh ik?

⁷ Yesu umwija Yehova nawamp kutusutamu etu awonsu utwinkishin kashinsh anch Nzamb wetu ‘wij kal yom yituswiridina pitwakad kal kumwipulay.’ (Mat. 6:8) Ni Yesu wij anch Yehova ud kwaku mulong wa kutuwanyishin maswir metu. Mulong tud in Kristu, tud yid ya dijuku dia Nzamb. Tukutwish kwikal nich kashinsh anch mulong niyend ud ntakel wa dijuku, Yehova ukulimish mbil jafundikishay mu 1 Timote 5:8.

8. (a) Yom ik yikutukwasha kupandakan wom wa kukangany kuwanyish maswir ma dijuku dietu? (Mat 6:31-33) (b) Mutapu ik tukutwisha kwimburij chilakej cha ambay a uruw adia pa chipich, ayila kumwinkish nambaz yakudia?

⁸ Anch twikal nich kashinsh anch Yehova utukatin ni ukatin dijuku dietu, tukwiyakamishap ni kutong anch tukutanap yom tukweta nich kuswir. (Tang Mateu 6:31-33.) Yehova ukatin kutuwanyishin maswir metu, ni ud mwin rukat ni Mwin Kupan mujim mud ik! Patangay divu, wasala kand yom yivud nakash kusutamu kwau kwimen pa kutwinkish yom tuswirikedina mulong wa kwikal ni mwom. Nich rukat, wizwisha divu too nich yom yikutwisha kutuletin musangar nakash. (Dis. 2:9) Ap anch tukwet kwetu yom yikemp mulong wa kuwanyish maswir metu, chid cha usey kuman anch tukat kwibulibul mulong wa kuwanyish maswir ma usey mu mwom. Tufanyidin kuvurik anch Yehova ndiy watwinkishang yom yiney. (Mat. 6:11) Tufanyidin kulam mu manangu anch yom yikutwinkishay Nzamb wetu wa rukat katat ni mu machuku ma kurutu yid ya usey kupandakanamu yom ya kumujimbu tukutwisha kulikap katat. Winou wawiy uyakin wajinguninay Nestor ni María.​—Isay 65:21, 22.

9. Yom ik tukutwisha kwilejin ku chilakej cha Nestor ni María?

⁹ Nestor ni María ading ni mashakamin mawamp nakash mu Kolombi. Alonda anch: “Twatongijokina piur pa kupipej mwom ni kutanduril mudimu wetu wa kulejan. Pakwez twova wom anch kwikal ni nfalang jikemp kwafanyinap kutuletin musangar.” Yom ik yayikwasha kupandakan wom winou? Atongijokina pa mitapu kushalijan yayimekeshinau rukat kud Yehova. Alikap mudimu wau wayifutangau nfalang jivud, mulong ading nich kashinsh anch Yehova ukudandamen kuwanyish maswir mau. Alandisha chikumbu chau ni abuukina kwi ndond kwading maswir nakash ma in kulejan. Mutapu ik wiyovau piur pa mupak wau? Nestor ulondina anch: “Twamana kashinsh ka uyakin wa mukand wa Mateu 6:33. Kandikal tuburenangap chom cha ku mujimbu. Ni tukwet katat musangar nakash.”

WOM WA ANTU

10. Mulong wak chidiap chishimokishina pa kuman antu akat kuyov akwau wom?

¹⁰ An a antu ayil kal katumb kayimp ka kusalijan nayimp nakash amwing ni akwau. (Mul. 8:9) Chilakej, in kutakel akat kusadin nayimp ulabu wau, ambwitan akat kuyisadin akwau yom ya chisum, in dizaz ku shikol akat kuyisaal akwau ni kuyizengol, ni antu amwing akat kuyilond anamakwau a mu majuku kwa kuyizazumokin. Chawiy, chitushimokishinap pa kuman muntu ukat kumwov mukwau muntu wom! Chad mutapu ik ukatay Satan kusadin wom winou wa antu mulong wa kutwoz?

11-12. Mutapu ik ukatay Satan kusadin wom wa antu mulong wa kutwoz nich?

¹¹ Satan ukat kusal usu wa kutubachik kuyov antu wom chakwel twimik mudimu wa kulejan ap kusal yom yikwau yitwitinay Yehova kusal. Satan ukat kubachik maguvernema kukangesh mudimu wetu ni kutuzengol. (Luka 21:12; Kuj. 2:10) Antu avud a mu mangand ma Satan akat kupalangesh nsangu jiyimp ni ja makasu piur pa Atuman a Yehova. Antu akata kwitiyij makasu minam akutwish kutusip, ap kand kuturishikish. (Mat. 10:36) Ov, mipit yiney ya Satan yikat kutushimokish? Bwat kamu. Wayisadina kand mu mivu chitot yakusambish.​—Mid. 5:27, 28, 40.

¹² Wom wa rupompat ra maguvernema wawiyap kusu mupit umwing ukatay kusadin Satan. Antu amwing akat kwovang wom nakash piur pa yom yikutwishau kusal antu a mu dijuku anch ajingunin anch ikalang kal Atuman a Yehova. Ni wom winou uding ukash kusutamu wom ukutwishau kov piur pa yibul ap piur pa kuyisadin mu mutapu uyimp. Ayikatin nakash anamakwau, ni akatin anch niyau ashiken ku kumwijik ni kumukat Yehova. Chiyovishining nayimp nakash kuyitesh anamakwau akat kumulond Nzamb wakin nayimp ni atushalapol end. Pakwez, yisu yimwing antu a mu majuku ayipompatang anamakwau ading Atuman ashikena niyau kwikal atuman mu kusut kwa machuku. Chawiy, tong bil mud anch anamakwetu a mu dijuku atulik mulong wa yitiyij yetu yisu. Mutapu ik ukusala?

13. Kwikal nich kashinsh anch Nzamb utukatin kukutukwash mutapu ik kujijaman anch antu a mu dijuku atulik? (Kuseng 27:10)

¹³ Tukutwish kutan rongoj mu uyakin uwamp nakash kupandakan udia mu Kuseng 27:10. (Tang.) Anch twavurik kusu mutapu utukatinau nakash kud Yehova, tukwiyov anch tud mu diking chisu turishina ni rupompat. Ni tukwikal nich kashinsh anch ukutufut mulong wa kujijaman kwetu. Yehova ukutuwanyishin nawamp nakash maswir metu ma ku mujimbu, ma mu manangu, ni ma mu spiritu, kusutamu mutapu ukutwishay kusal mwan a muntu! Winou wawiy uyakin wajinguninay Biniam wajimbulangau kwiur oku.

14. Yom ik ukutwisha kwilejin ku chilakej cha Biniam?

¹⁴ Biniam wakwata mupak wa kwikal Kaman wa Yehova ap anch wading wijap nchik anch ukurish ni rupompat rikash. Shinshikin mutapu kwikal nich kashinsh anch Yehova umukatin kwamukwasha Biniam Kupandakan wom wa antu. Ulondin anch: “Atuzengola mu mutapu wakad kutwish kutongin. Pakwez wom nading novila nakash, wadingap wa kuzengol kwa guvernema, pakwez wa rupompat ra mu dijuku. Nova wom anch mupak wam wa kwikal Kaman wa Yehova wafanyina kumunenganesh tatuku wading wakad kwikal Kaman, ni anch dijuku diam diafanyina kwinman anch anshadish kal.” Ap mwamu, Biniam wading nich kashinsh anch Yehova ukat kudandamenang kuyibangin antu end akatinay. Urumburil anch: “Natongijokina pa mutapu Yehova wayikwashay antu akwau kujijamen yikokujol yidiokila ku kuburen nfalang, kasolikany, ni chisum. Nading nij anch ang namulamat Yehova, ukwinyukish. Yisu yankasau tupamp tuvud ni kwinzengol, namana kapamp ka kusambish mutapu ukatay kukwash Yehova pa chisu chiwanyidina anch twashal ashinshamena kud ndiy.” Yehova wikala Tatuku wakin wa Biniam, ni Atushalapol End amekana kwikal dijuku diakin kud ndiy.

WOM WA RUFU

15. Mulong wak chiyipinap kwau kwikal ni wom wisikena piur pa rufu?

¹⁵ Bibil utazukin rufu anch mukankuny. (1 Kor. 15:25, 26) Tukutwish kwov wom wa rufu, pakampwil anch muntu tukatina uyedin nakash. Mulong wak twovila wom wa rufu? Mulong Yehova watutanga nich impu ya kushakam chikupu. (Mul. 3:11) Kwikal ni wom wisikena piur pa rufu kukutwish kutukwash kuchidij mwom wetu. Chilakej, wom winou ukutwish kutubachik kukwat mipak yiwamp piur pa yom tufanyidina kudia ni kutond masengan mawamp mulong wa kwijidish mujimbu, kukimb ukwash wa mwingang ni kuland mon anch chid cha usey, ni kwipuk yom yikutwisha kutek mwom wetu mu ubaj.

16. Mutapu ik usadiningay Satan usu wa kusadin wom wetu wa chivadik piur pa rufu?

¹⁶ Satan wij anch tukatin mwom nakash. Chawiy, ulondin anch tukutwish kulikap yom yin yawonsu—ap urund tukweta ni Yehova—mulong wa kuchidij mwom tukweta katat. (Job 2:4, 5) Satan ud mukamakasu nakash! Pakwez, mulong “[ukwet] ukash wa kulet rufu,” Satan ukat kusadin wom wa chivadik tukweta piur pa rufu mulong wa kutubachik kumulik Yehova. (Heb. 2:14, 15) Yisu yimwing, antu a Satan akat kuyilej atushalapol a Yehova anch akuyijip anch alik kutun ritiy rau. Yisu yikwau, anch tuyedin nakash ni chitin kutwok pakad kulab, Satan ukutwish kusadin chisu chinech mulong wa kutubachik kwitiy milad yiyimp ya kwiyokish. Adokter ni anamakwetu akad kwikal Atuman akutwish kutushindin chakwel atutek mash, yom yikutwisha kutushikij kujip chijil cha Nzamb. Ap muntu mukwau ukutwish kusal usu wa kutubachik kwitiy mulad wa kwiyokish wakad kukwatijan ni mbil jidia mu Mifund.

17. Kukwatijan ni Rom 8:37-39, mulong wak tufanyidinap kwov nakash wom wa rufu?

¹⁷ Ap anch tukatinap kufa, twij anch Yehova ukudandamen kutukat ap anch twafap nchik. (Tang Rom 8:37-39.) Anch arund a Yehova afa, ukat kudandamen kuyilam mu manangu mud padiau aom. (Luka 20:37, 38) Ukwet impu nakash ya kuyichirish ku mwom. (Job 14:15) Yehova wafuta difut dipandakena kujimb chakwel tutwisha “kwikal nich mwom wa chikupu.” (Yoh. 3:16) Twij mutapu utukatinay Yehova chikurikina ni mutapu utubangidinay. Pa ndond pa kumulik Yehova anch tuyedina nakash, ap anch atulejin anch akimbin kutujip, tufanyidin kumukungamen ndiy chakwel atwongoj, atwinkish manangu, ni usu. Winou wawiy kamu mutapu wasalay Valérie ni nfumwend.​—Kus. 41:3.

18. Yom ik ukutwisha kwilejin ku chilakej cha Valérie?

¹⁸ Padingay ni mivu 35, Valérie amukwata kanser muyimp nakash. Shinshikin mutapu rukat ra Yehova ramukwasha kupandakan wom wa rufu. Ulondin anch: “Pankwatau mayej ma kanser, chinech chaswimpa mwom wetu mu mutapu wakad kutwish kutongin. Chita kwimbaril chitat chijim nakash chakwel nipanda. Naya kud adokter avud, pakwez awonsu alika anch kakutwishap kwimbaril pakad kwintek mash. Nading novil wom nakash, pakwez kukwatijan ni chijil cha Nzamb, nalika kwitiy mash! Yehova wanmekeshidin kal rukat rijim nakash mu mwom wam. Pa chisu chinicha, niyam nading katat ni dilau dia kumumekeshin rukat. Chisu chawonsu chanlejangau nsangu jiyimp piur pa mayej mam, chinech chakasikeshang mupak wam wa kumusangaresh Yehova pa ndond pa kumusangaresh Satan. Kwinsudien ambarila nawamp pakad kwintek mash. Pa chirung chawonsu cha mayej mam, Yehova watuwanyishina yom yawonsu twading tuswirikedina. Chilakej, kurutu ankwata mayej minam, twilej ku yikumangan mutu wa mulong ulondina anch: ‘Kurish Nich Mar ma Katat Nich Mushiku.’c Mutu wa mulong winou watukasikesha nakash. Twautanga twautangiril kand. Mitu ya milong mud yiney ni program muwamp wa mu spiritu yatuletina am ni nfumwam chisambu cha mu manangu, ni yatukwasha kwikal isikena ni kukwat mipak yiwamp.”

TUKUTWISH KUPANDAKAN WOM WETU

19. Yom ik yikusadika piswimp ap?

¹⁹ In kristu pa divu diawonsu atwishin kal Kupandakan yikokujol yikash ni kurishikish kwa Djabul kusutin ukwash wa Yehova. (1 Pita 5:8, 9) Niyey ukutwish kusal mwamu. Piswimp ap, Yehova ukumwinkish Yesu pamwing ni antu akuyikelay nend mbil ya “kushesh midimu ya Sakudimban.” (1 Yoh. 3:8) Ni kashalapol wend mwawonsu ukwikala pa divu ‘kakwovap wom wa chom ap chimwing ni kakez kubangap chakamish ap chimwing.’ (Isay 54:14; Mike 4:4) Kurutu chisu chinech chishika, tufanyidin kudandamen kusal usu wa Kupandakan wom wetu.

20. Yom ik yikutukwasha kupandakan wom wetu?

²⁰ Tufanyidin kudandamen kukasikesh kashinsh ketu anch Yehova uyikatin ni ukat kuyichidij atushalapol end. Yikutukwasha kusal mwamu kud kutongijokin ni kulond piur pa mutapu Yehova wayikwashay atushalapol end pasak. Ni tufanyidin kulam mu manangu mutapu watukwashay etu pakampwil kurish ni yikokujol yikash. Nich ukwash wa Yehova, tukutwish kupandakan wom wetu!​—Kus. 34:4.