Ikalany Nich Kuchingejin Kwisikena, ni Sangarany

“NAKANGANY kal kand!” Tupamp twinch walondap kal dizu mudi dined mulong kiwatwishap kusal chom chiwitekina kusal? Maku umwing changadim mwin Kristu ukutwish walondil yovil yiney mulong wiyovil anch kabas wend wavadikina umwitin asala yom yivud nakash ni mwong wamukwat anch kakutwishap wata nakash muchim ku yisakin ya muspiritu. Mwin Kristu mukwau ukutwish wiyov anch katwishinap mulong wa mutapu wamulilau ni ukutongin anch kasadilap chom mu chikumangen. Kaman wananapa kal ukutwish wiyov mudi akat kumuwembujok mulong katwishinap kand kusal muchifanyidina mijikit ya Ukristu yadinga ni kusanger padingay uchikwet usu ni kwendangan. Christine ulondil anch: “Diskur dikasikeshidina mudimu wa uchibol dikat kwididishang,” mulong mwikadil wa dijuku diend umukangeshin asala yivud mu mudimu wa Yehova mudi mukatay kutongin.

Mutapu ik tukutwisha kura nich yovil mudi yiney? Ov, mutapu ik watwishau in Kristu amwing kukudish yitongijok yiwamp piur pa mikadil yau? Ov, wisu ukwash wa kwikal nich kuchingejin kwisikena?

Itudishany

Kambuy Paul watuleja cha kusal chakwel tulama musangar wetu palonday anch: “Sangarany mu Mwant machuku mawonsu; nikulond kand anch, Sangarany! Ranaken ren rijikan kudi antu awonsu.” (Filip. 4:4, 5) Chakwel twikal nich musangar ni mazang mu mudimu wetu utumusadidila Nzamb, tufanyidin twikal nich ruchingej risikena kukwatijan nich nkeu ni mikadil yetu. Anch twasot kushiken jintong jakad kwisikan kwikalap nchik yibudikin yau, tukwiyakamish ayinetu chamwamu. Ku mutambu ukwau, tufanyidin tubabala kangal twasambish kwipipesh ayinetu, nich kusadil yikangesh yetu yimekena mudi diyingishin dia kuchirikin kwinyim mu mujikit wa Ukristu mu mutapu wakad kufanyin.

Chikalap nchik mikadil yetu, Yehova witin anch tumwinkisha chipandakenamu kuwap chetu—mudimu utusadila nich mupim wetu wawonsu ni muchim wetu wawonsu. (Kol. 3:23, 24) Anch twikal mu choziu cha kumwinkish Yehova yikemp nakash kupandakanamu chitukutwisha kusal, tukutwishap twalond anch tushich kukwatijan nich kwipan kwetu kudi ndiy. (Rom. 12:1) Chikwau, tukutwish twiletin ayinetu mazang majim, musangar wakin, ni yiyukish yikwau yiwamp yidiokilinga mu mudimu utusadila nich muchim wetu wawonsu.—Jinsw. 10:22.

Dizu diakarumunau ‘kwisikan’ mu Bibil dikwet chitongijok cha kukwat nich kalimish. Dirumburikin dizu ku dizu “kwitudish.” (Yak. 3:17) Dizu dined dikwet kand chitongijok cha kulik kwikal mukash. Chawiy lel, anch tudi isikena, tukutwish twikal nich manangu misikena pa mikadil yetu. Ov, chom chinech chikasiken kusal? Pa yisu yimwing chiding chikash, ap anch chitwishikin kuyikwat antu akwau nich kalimish. Chilakej, anch murund wa piswimp wamekesh yijingidij yimekeshina anch uziyil mulong wasalang yom yivud nakash, ov, kitukusotap kumukwash chakwel amana mutapu wa kwitenchik mu mwom wend? Chawiy chimwing, tufanyidin twileja mutapu wa kujingunin yijingidij yikutwisha kutwijikish anch tupandakeshin pa usu wetu.—Jinsw. 11:17.

Chikutwish chikal kwikal nich kuman kwisikena pa yikangesh yetu anch atulila kudi anvaj akash. Amwing iyoviling pachidiau anikanch anch chiyifanyidin asala yom yivud ap yikash chakwel lel anvaj au ayikata. Anch mwamu chadinga ku mutambu wetu, tukutwish twikal nich chitong chiyimp piur pa mutapu utumenay Yehova. Yehova utukatin mulong wa mudimu utumusadidila nich muchim wetu wawonsu. Dizu dia Nzamb ditwinkishin kashinsh anch Yehova “wij mwatutangilay, ukat kuvurik anch tudi kwetu rufunfut.” (Kus. 103:14) Ndiy wij yikangesh yetu ni utukatin pitumusadidila nich mushiku kwikalap nchik yikangesh yiney. Kuvurikang anch Nzamb wetu kadingap nsalej wa mudimu uswejininga kukutukwash twikepish mu yom yituchingejina ayinetu kusal, oku ni kwijik yikangesh yetu.—Mika 6:8.

Chikwau, antu amwing amening anch chidi chikash kukudish ngikadil yiney yisikena. Anch mwamu chidia ku mutambu wey, ov, mulong wak ulikina kumwit ukwash mwin Kristu umwing wamana kal yom yivud ukwija nawamp? (Jinsw. 27:9) Chilakej, ov, usotil usala mudi chibol wa rawonsu? Riner ridi rutong riwamp nakash! Ov, ukwet yikangesh ya kuriwanyish? Pamwing ap uswiridin ukwash chakwel upipeshaku mwom wey. Ap anch wamuchingejina murund mwin Kristu ukutwisha kwisamb ney ap anch yisend yey yivud ya dijuku anch yikukutwishish pa chisu chinech usala mudimu wa uchibol. Ndiy ukutwish wakukwash umana anch mijikit yikwau yiusotila kusal anch ukuyitwish ap anch kwitenchik ik ufanyidina kusal chakwel utwisha. Ngatan ukutwish wamukwash mukajend chakwel asala chom chambatena nich manangu mend. Chilakej, ukutwish wamuyul anch ukutwish wapimaku kurutu kwa kusambish ngond ukusalay mijikit yivud. Kusal mwamu kukutwish kwamuletin usu uvud ni kumukwash alama musangar wend mu mujikit.

Sot Yom Yiukutwisha Kusal

Upal ap mayej ma ku mujimbu yikutwish yakukangesh kusal yiwadia usotila kusal mu mudimu wa Yehova. Anch udi nvaj, ukutwish waman mudi anch dilejan diey ni yikumangan ya Ukristu yikusakidin pakemp mulong chisu chey chivud ni usu wey uvud yiyil kudi aney. Pakwez, ov, chitwishikin anch kukungin manangu mey pa yikangesh yey kukutwish pa chisu chinech kukukangesh umana yiukutwisha kusal?

Tunan twa mivu twasutila kal, mwin Levi umwing wamekesha maku mend madinga makash kudi ndiy kuwanyish. Witapila dilau dia kusadil ku tempel mbing jaad pa muvu. Pakwez, wamekesha nich dizu dia piur anch usotil ashakama chikupu piswimp ni chintambu. (Kus. 84:1-3) Chom ik chamukwasha ikundj winou ushinshamena chakwel ikala nich musangar? Ndiy wajingunina anch ap dichuku dimwing mu rupang ra tempel radinga kwitapin dilau dijim dia pakampwil. (Kus. 84:4, 5, 10) Chawiy chimwing, pa ndond pa kwimen ching pa yikangesh yetu, tufanyidin kusal usu wa kutal ni kusanger yisend yitukutwisha kuwanyish.

Chilakej, Nerlande, nambaz mwin Kristu wa mu Canada. Uding kwend ching mu chitwam cha kulangumun ni wiyova anch ukwet yikangesh nakash mu yikutwishay kusal mu mujikit. Pakwez, wakarumuna richingej rend patonginay anch makashing madinga piswimp ni kuday ndiy teritwar wend ukulejenay. Urumburil anch: “Nadinga ni kushakam mu chitwam cham cha kulangumun piswimp ni chibas chadinga mu makashing. Nova musangar wa kuyilej antu adinga ni kwez kushakamap mu kachisu kanang.” Kusalang mudimu winou wa usey kwamwinkisha Nerlande mazang makash.

Sal Yitenchik Anch Chiswiriken

Waat ukutwish waya mau kulondulijan nich rinkind rikwatina mu disun dia kuwendish nich. Pakwez, anch mwin kukwat mutond kudia disun dined wamana anch rinkind mukash ututinaku, ukusal usu wend wawonsu chakwel atenchika disun dia waat wend. Ndiy kakwetap usu pa rinkind mukash, pakwez anch wasala yitenchik, ukutwish wikal nich usu pa mutapu uyila waat wend. Chawiy chimwing, chisu chivud kitukwetingap usu pa mikadil yidinga mudi rinkind mukash yitukata kutan mu mwom. Pakwez tukutwish twikal nich usu pa mwom wetu mudi mututwishina kusutil ku kutenchik mutapu tusadidila usu wa mujimbu wetu, manangu metu ni yovil yetu. Anch twayishinshikin mikadil yetu yisu, tukez kutwish kulam mazang ni musangar wetu mu mudimu wa Nzamb.—Jinsw. 11:2.

Tushinshikinany yilakej yimwing. Anch tukwet usu wisikena, tukutwish twaman anch chitufanyidin twiyepa kusal midimu ya kutuziyishang nakash kwisambishil kwa muten chakwel anch tweza twikal nich usu wa kuya kukumangan ku yikumangan ya Ukristu ya urel. Chom chinech chikututwishish twisakina nakash urund wetu ni ambay netu in Kristu. Ap anch maku katwishinap kulejan ku chikumbu ni chikumbu mulong mwanend uyedil, ukutwish waman anch chifanyidin amutazuka nambaz mwin Kristu kolikwend asala nend pamwing mudimu wa kulejan ku telefon pachilelay mwanend.

Ov, chikwikal nchik anch mikadil yey yikutwishishinap wileja kurutu kwa chisu chom ni chom chikushinshikinau ku yikumangan ya chikumangen? Ukutwish wakwat mupak wa kutal yom yinch ukutwisha kurijek ni yirijeka muchitwishikina. Kusutil ku kutenchik jintong jetu, tukutwish twasal mudimu ni kwikal nich musangar.

Kutenchik jintong jetu kukutwish kwit kukwat mupak ni usu. Serge ni Agnès, ambay atijadina a mu France, chayifanyina aswimpa yom yivud nakash mu yitenchik yau. Serge ulondil anch: “Pitwijika anch Agnès sot avala mwan, rutong retu ra kwikal amishoner rafa.” Katat udi tatuku wa ayangadim aad antas, Serge urumburil mutapu witekinau rutong rikwau mudi ambay atijadina. Serge ulondil anch: “Kukangany kusadil mwi ngand yindjing, ‘twikala amishoner’ mu manangu metu mwi ngand yetu. Twandama mu chirund chadinga chisadidila rudim ridjing.” Ov, atanyinamu pitekinau rutong riner risu? Serge ulondil anch: “Twiyova anch atusadidil nakash mu chikumangen.”

Odile, nambaz mwin Kristu wa mu France wawanyishina kal mivu 70 ni kusut uyedil musong wa tubokas mu manungun, kakutwishap wiman chisu chilemp. Waziya nakash mulong mayej mend mamukangesha kusal mudimu wa kulejan ku chikumbu ni chikumbu. Pakwez, kalikap kulejan. Ndiy watenchika mijikit yend kusutil ku kulejan ku telefon. Ndiy ulondil anch: “Kwadinga kuswapel ni kusangareshin nakash kupandakanamu munadinga ni kutongin!” Mutapu winou wa kulejan kwamuchirishina kand usu wa kulejan.

Kuchingejin Kwisikena Kuletining Yiyukish

Kwikal nich manangu misikena ma yom yitukutwisha kusal kukez kutudiosh ku ushon uvud. Kusutil ku kwitekin jintong jisikena, tukwikal nich chovil cha kuwanyish yitusotila kwikalap nchik yikangesh. Chawiy tukata kusanger nakash pa yitukutwisha kusal, ap anch yidi kwau yikemp.—Gal. 6:4.

Mudi mutukudishina manangu mawamp ku mutambu ik ayinetu, ku kutukutwisha kuyilimishin ambay netu in Kristu. Kwijik yikangesh yau, tukutwish twikal in kujikitish piur pa yom yitusadidilau. Kusutil ku kusanger ukwash win wawonsu utwinkishinau, tuwejidin ku mwikadil wa kusadil mu kwovijan. (1 Pita 3:8) Vurikany anch, chidiay Tatuku mukarukat, Yehova kakatap kutwit yom yakad etu kutwish kusal. Ni pitukweta yitongijok yisikena ni anch twitenchik jintong jitukutwisha kuwanyish, mijikit yetu ya muspiritu yikutuletin mazang makash ni musangar ujim.

[Chipich chidia pa paj wa 29]

Chakwel twikala nich musangar ni mazang mu mudimu wetu tumusadidila Nzamb, tuswiridin ruchingej risikena rambatena nich nkeu jetu ni mikadil yetu

[Chipich chidia pa paj wa 30]

Nerlande watana musangar mu kusal yatwishay mu mujikit

[Chipich chidia pa paj wa 31]

Ilejany “kutenchik disun dia kwendish nich waat”

[Dizu dirumburila]

© Wave Royalty Free/age fotostock

[Chipich chidia pa paj wa 32]

Serge ni Agnès ataninamu pitekinau jintong jindjing