Hulda Wawanyisha Rutong Rend

ANCH wendina ditung dikemp dia Sangir Besar mu endonezi pasutil kal mivu, pamwing ap wakimba kuyiman anambaz asatu in Kristu ku mem. Ijiken nakash pa ditung dinda mulong wa mudimu wau wa kulejan akat kuyikwash antu kutesh Bibil. Pakwez mu chisu chinicha asalang yom yikwau yishalijadina.

Chakusambish andama bil mu mem, ni anona mayal amabudish kwimpat. Mayal mamwing madinga majim kusutamu ndundu. Kupwa amband ashakama pa tuyitwam twa mitond ni asambisha kubarol mayal kumabaril twikal tukemp tukemp mud, may ma nzol. Kupwa ateka tumayal twinetu mu yitung ya plastik ni amazambula ni kumashikij djat kamu kwi ndond kwadingau amband inay. Kupwa ateka mayal minam mwa ansak ajim afanyinau kukandjik ku motak chakwel aya amasadin mud yamu ya kutung nich njil.

Umwing wa pakach pa anambaz inay wading Hulda. Yisu yimwing wasutisha chisu mulong wa kusal mudimu winou pamwing nau akwau. Wasadina nfalang jend jamanangay mulong wa kuland yom yading yiswirikedinau mu dijuku diend. Pakwez, pa chisu chinech wasota kusadin chikunku cha nfalang jend nich yom yindj. Wakata kuland tablet wafanyina kumukwash kwandamang nich pa Application wa JW Library^®. Hulda wading wij anch mavideo ni yom yikwau yidia pa Application yafanyina kumukwash kuyilej nich antu akwau, ni kumukwash kutesh Bibil chikurikina.

Hulda wabarilang mayal mwa asa aad pamanch pawonsu mwi ngond umwing ni chikunku mulong wa kwizwish kachilangumun kamotak. Yawiy yom yamukwasha kwikal ni nfalang ja kuland tablet.

“Ap anch naziya mulong wa kwikasikesh kubaril mayal, Hulda ulondina anch navuramena mar minam ni yikatal, chisu nasambisha kusadin tablet winou musu mulong wa kwinkwash kwikal ni ukaliweny mu mudimu wa kulejan ni kurijek yikumangan mu mutapu uswapela.” Ulondin kand anch tablet wamukwasha kand pa chirung cha chipupu, mulong mijikit yawonsu ya chikumangen yasadikinang pa videoconferens. Tusanger pamwing ni Hulda mulong wawanyisha rutong rend.