El Kwitudish Kwikal Usu Wey

1. Chipul ik chikutwishau kutwipul ku mudimu ap ku shikol?

MUTAPU ik ukata kwiyov anch ambay ney a ku mudimu ap ambay ney a shikol akwipul piur pa yitiyij yey? Ov, ukat kujiman? Antu avud pakach petu akat kusal mwamu. Pakwez chipul cha mutapu mud winou chikutwish kutukwash kwijik yitiyij ya muntu mukwau, ni chikutwinkish mutapu wa kumulej rusangu ruwamp. Pakwez, yisu yimwing, muntu mukwau ukutwish kwipul chipul mulong wa kutusarumun. Tufanyidinap kukashimuk mulong wa chom chinech. Mulong antu amwing akat kulond mwamu mulong ateshap kal yitongijok yiyimp yikatau antu amwing kulond piur pa yitiyij yetu. (Mid. 28:22) Chikwau kand, mulong tushich mu ma “machuku ma kwisudiel,” chisu chidau antu avud “akad kwovijan” ap kand in “chisum.”​—2 Tim. 3:1, 3.

2. Mulong wak tufanyidin kwikal antu itudishina?

² Pamwing ap ukutwish kwiyipul anch, ‘Mutapu ik nikutwisha kwikal witudishina ni mwin ranaken anch muntu wanjimeshish mulong wa yitiyij yam?’ Yom ik yikutwisha kukukwash? Mu wiswimp​—kud kwitudish. Muntu witudishina kakatap kujiman swa pakwez ukat kuninet anch amusarumun ap anch kijap nawamp mutapu wa kwakul. (Jnsw. 16:32) Pakwez, chiswapelinap kamu chisu chawonsu kwikal muntu witudishina. Mutapu ik ukutwisha kukudish mwikadil wa kwitudish? Mutapu ik ukutwisha kwakul anch muntu walond nayimp piur pa yitiyij yey? Ni anch ud nvaj, Mutapu ik ukutwisha kuyikwash aney kulondin ritiy rau nich kwitudish? El tushinshikinany.

MUTAPU WA KUKUDISH KWITUDISH

3. Mulong wak tulondin anch kwitudish kukuletangap kuziy pakwez kukat kulet usu? (2 Timote 2:24, 25)

³ Kwitudish ud mwikadil ukata kulet usu, kadiap kuziy. Chifanyidin kwikal ni usu winou wa mukach mulong wa kulik kuzazat anch kwashiken chom chipakina kwitudish. Kwitudish ud mwikadil udiokila ku ‘dibuj dia spiritu utumbila.’ (Gal. 5:22, 23) Dizu dia Grek dikarumwinau anch “kwitudish” adisadinang yisu yimwing mulong wa kurumburil piur pa kabar wa mu masuku upitinau kud muntu. Tong bil piur pa kabar wa mu masuku wasambisha kal kwitudish. Ap anch witudishin katat, pakwez ukwet usu. Mutapu ik tukutwisha kwikal itudishina, ni chisu chawiy chimwing kwikal akash? Tukutwishap kusal mwamu kusutil usu wetu ayinetu. Tufanyidin kulembil mulong wa kwit spiritu utumbila, ni kumwit Nzamb chakwel atukwasha kukudish mwikadil winou upandakena kuwap. Kud antu avud ilejina kal kwikal itudishina. Chilakej Atuman avud ikasikeshin kal kwakul nich kwitudish chisu chayisarumunau. Chinech chayikwasha antu akwau kwikal ni chitongijok chiwamp piur pa atuman a Yehova. (Tang 2 Timote 2:24, 25.) Mutapu ik ukutwisha kusal anch kwitudish kwikala usu wey?

4. Yom ik twilejidina ku chilakej cha Isak piur pa kwitudish?

⁴ Bibil ukwet nsangu jivud jimekeshina usey wa kwikal itudishina. Shinshikin chilakej cha Isak. Chisu chashakamay mwi ngand ya in Filistin ku Gerar, amutej nend ova ris ra majiy ma mem mapundau atushalapol a tatukwend ni amashikidina. Pa ndond ya kutendin kwau ndond yiney, Isak washemunikina kulemp ni wapunda majiy makwau kwinikwa. (Dis. 26:12-18) Pakwez chimeken kand anch majiy minam mading ma in Filistin. Chikalap nchik mwamu, Isak wakulang mu mutapu wa chisambu. (Dis. 26:19-25) Yom ik yamukwasha kushal witudishina ap chisu chamusarumunangau kud antu akwau ? Wimburija chilakej cha anvaj en, wilejina ku mitapu yamekeshangay Aburaham chisambu ni “muchim udimukina wa kwitudish” wa Sara.​—1 Pita 3:4-6; Dis. 21:22-34.

5. Chilakej ik chimekeshina anch anvaj in Kristu akutwish kuyifundish anau kwijik usey wa kwikal itudishina?

⁵ Anvaj in Kristu, ikalany ni kashinsh anch niyen ukutwishany kuyifundish anen kwijik usey wa kwikal itudishina. Shinshikin chilakej cha Maxence, ukweta mivu 17. Watwisha kujijamen antu adinga ni ujim ku shikol ni mu mudimu wa kulejan. Nich kushimpish muchim anvajend amufundisha kwikal muntu witudishina. Anvajend alondin anch, “Maxence washikedin kwijik anch nlel chiswapel kumwakul muntu ni ujim ap mu mutapu wa chisum, pakwez muntu ukweta usu ukat kwakul nich kwitudish.” Cha musangar, Maxence wilejin kwikal muntu witudishina.

6. Mutapu ik ukutwisha malembil kutukwash kukudish mwikadil wa kwitudish?

⁶ Yom ik tukutwisha kusal anch antu akwau atusarumun, chilakej anch muntu walond nayimp piur pa dijin dia Yehova ap watadik yom yilondinay Bibil? Tufanyidin kumwit Yehova spiritu ni manangu mend chakwel twakula nich kwitudish. Chikwikal nchik anch twajingunin anch twakwilap mu mutapu uwamp? Tukutwish kand kulembil kapamp kakwau pa mulong winou ni kutong mutapu tukutwisha kusal nawamp mu machuku ma kurutu. Anch twasal mwamu, Yehova ukutwinkish spiritu wend utumbila chakwel tutwisha kuyikel yovil yetu ni kwikal antu itudishina.

7. Kulam mu manangu maverse mamwing ma Bibil kukutwish nchik kutukwash kwakul nich kwitudish? (Jinswir 15:1, 18)

⁷ Maverse ma Bibil mavud makutwish kutukwash anch chitukasikedin kulond nich kwitudish. Spiritu wa Nzamb ukutwish kutukwash kuvurik maverse minam. (Yoh. 14:26) Chilakej, mbil tutanina mu buku wa Jinswir jikutwish kutukwash kwikal antu itudishina. (Tang Jinswir 15:1, 18.) Buku winou umekeshin kand mulong wak tufanyidin kwikal antu itudishina anch atusarumun.​—Jnsw. 10:19; 17:27; 21:23; 25:15.

MUTAPU UKATA MANANGU KUTUKWASH KWIKAL ANTU ITUDISHINA

8. Mulong wak tufanyidin kushinshikin yom yimubachikina muntu kwipul chipul piur pa yitij yetu?

⁸ Manangu makutwish kand niyau kutukwash. (Jnsw. 19:11) Muntu ukweta manangu ukat kulik kuninet anch kwikal kupwitamijan ni muntu mukwau piur pa yitiyij yend. Tongin bil pa chilakej ech, anch twatal mukandu udia mu mem tumening kwetu ching musong, pakwez chikunku chijim chid mu mem. chilik chimwing anch muntu watwipul chipul tukutwishap kamu kwijik nawamp mayingishin mamubachikina kwipul chipul chinech.​—Jnsw. 16:23.

9. Mutapu ik wamekeshay Gedeyon manangu ni kwitudish chisu Chayakulay in Efirayim?

⁹ Shinshikin mutapu wayakulau in Efirayim kuday Gedeyon. Amwipula nich ujim anch mulong wak kuyitazukap chakwel eza amukwash kuyirishikish akankuny a in Isarel. Pakwez mayingishin ik mayibachika kujiman? Chikalap nchik diyingishin, Gedeyon wamakesha anch ukwet manangu ni wakula nich kwitudish. Kupwa Bibil utulejin anch “palonday dizu dined awiy apwisha ujim wau.”​—Ank. 8:1-3.

10. Yom ik yikutukwasha kuyakul antu atadikishina yitiyij yetu (1 Pita 3:15)

¹⁰ Pamwingap mbay netu wa ku mudimu ap wa ku shikol ukutwish kutwipul mulong wak tukat kuziyin kwi mbil ja Bibil. Tukusal usu wetu wawonsu wa kulond piur pa yitiyij yetu, pakwez tufanyidin kand kulimish yitongijok ya muntu twisambina nend. (Tang 1 Pita 3:15.) Chawiy pa ndond pa kutong anch utwipwil mulong wa kutusarumun, tongin mutapu ukutwisha chipul chend kukukwash kwijik yom yisotilay kwijik. Chikalap nchik diyingishin dimubachikina muntu kwipul chipul tufanyidin kwakul nich kwikepish. Chakul chetu chikutwish kumukwash kushinshikin nakash piur pa yitongijok yend. Ap anch muntu twambambina nend uswingin ap wakwil mu mutapu uyimp, tufanyidin chisu chawonsu kumwakul mu mutapu witudishina.​—Rom 12:17.

11-12. (a) Yom ik tufanyidina kushinshikin kurutu kwa kwakul ku chipul chikash? (Tal kand chipich.) (b) Let chilakej chimekeshina mutapu ukutwisha chipul cha muntu kutukwash kusambish mambamb piur pa Bibil.

¹¹ Chilakej, anch mbay netu wa mudimu wipul mulong wak tukusalangap misambu ya dichuku dia kuvadik. Sal usu wa kwijik mayingishin mamubachikina kwipul chipul chinech. Ov, wipwil mulong wa kwijik anch tukat kusutishang chisu mulong wa kwisangaresh? Ap ov, utongin anch ang tusadinap musambu wa kuvadik chinech chikutwish kuyipish urund pakach pa a mbay a mudimu? Tukutwish chakusambish kumukasikesh mbay netu wa mudimu kudandamen kuyibangin antu akwau ni kupwa kumwinkish kashinsh anch niyetu tukatin kushakam nawamp nau ambay netu a mudimu. Chinech chikutwish kutwinkish mutapu wa kwambambin yom yilondinay Bibil piur pa misambu ya machuku ma kuvadik.

¹² Tukutwish kwakul mutapu umwing anch muntu mukwau watwipul chipul chikasikena. Mbay netu wa ku shikol ukutwish kulond anch Atuman a Yehova afanyidin kuswimp yitongijok yau piur pa utun. Ov, ulondin mwamu mulong kateshinap nawamp yitiyij ya Atuman a Yehova piur pa utun? Ap wipwil mwamu mulong ukwet mwan amakwend ap murund nend udia mwin utun? Ov, utongin anch tuyikisining antu in utun? Tufanyidin kumwinkish kashinsh anch tukat kuyibangin antu a mitapu yawonsu ni tukat kulimish want ipend ukwetay muntu mulong wa kukwat mipak yend.b (1 Pita 2:17) Tukutwish chad kwikal ni mutapu wa kumulej yom yilondinay Bibil ni mutapu tukutwisha kwikal ni mashakamin mawamp anch twasadin yom yiney.

13. Mutapu ik ukutwisha kumukwash muntu wakad kwitiyij mudiay Nzamb?

¹³ Anch muntu watutadik nakash, tufanyidinap kapamp kamwing kulond anch twij yitiyij yend. (Titus 3:2) Chilakej, chid nchik anch mbay ney wa ku shikol walond anch kwitiyij mudiay Nzamb ud usup? Ov, tufanyidin kulond kapamp kamwing anch muntu winou witiyijin mu dikarumuk ni wij yom yiney nawamp? Chid chakin anch, ukutwish kuchirikin yom yateshinay kud muntu kanang. Pa ndond pa kusambish kulond yom yifundishinay siyans, ukutwish kumwinkish mbay ney wa ku shikol chom chikutwishay kutongijokin chisu chikwau. Pamwing ap ukutwish kumulej mikand ni mavideo madia pa jw.org misambidina piur pa yitang. Ukutwish pamwing ap mu kusut kwa chisu kwisambin mutu wa mulong ap video udiap. Inge, anch twamekesh kalimish mu mutapu winou, chikutwish kumukwash chakwel akata kwilej yom yivud piur pa yom yilondinay Bibil.

14. Mutapu ik wasadinay Niall kapend ketu mulong wa kumukwash nich murund nend wa ku shikol ni yitongijok ya makasu piur pa Atuman a Yehova?

¹⁴ Niall nsand umwing wasadina kapend ketu mulong wa kuyilej antu anch yom yitonginau piur pa Atuman a Yehova yid ya makasu. Ulondin anch “Mbay nam wa ku shikol wangelang chisu chawonsu anch nitiyijiningap mu yom yilondinay siyans mulong uchingejidin buku wizwila too nich nsangu ja pakur pa ndond pa kuchingejin yom yimekena ni mes.” Chisu chamukangeshangay mbay nend kumurumburil piur pa yitiyij yend, Niall wasalang usu wa kumutum pa jw.org mu chikunku “Siyans ni Bibil.” Kupwa, Niall wajingunina anch mbay nend winou wasala usu wa kwandam pa kapend ni wading ukatin kamu kwisambin piur pa muntu watanga mwom. Niyey ukutwish kwikal ni yibudikin ya mutapu winou.

IRIJEKANY PAMWING MU DIJUKU

15. Mutapu ik ukutwishau anvaj kuyikwash anau kwakul nich kwitudish anch ambay nau a ku shikol atadikish yitiyij yau?

¹⁵ Anvaj akutwish nich rukat kuyifundish anau mutapu ukutwishau kwakul nich kwitudish anch antu alond nayimp piur pa yitiyij yau. (Jak. 3:13) Anvaj amwing akat kusal mwamu chisu cha difukwil dia mu dijuku. Akat kushinshikin mitu ya milong yikutwishau kuyipul anau ku shikol, ni kwisambin mutapu ukutwishau kwakul ni kuyifundish anau kulond nich kwitudish mu mutapu usangareshina.​—Tal mushet “Kwirijek Kurutu Kukutwish Kukwash Dijuku Diey.”

16-17. Mutapu ik ukutwisha kwilej yom ya kusal kuyikwash ansand?

¹⁶ Kwilej yom yakusal kukutwish kuyinkish ansand ayinau kashinsh ni kuyikwash kuman mutapu ukutwishau kuyirumburil antu akwau piur pa yitiyij yau. Mitu ya milong yida mu chikunku “Yipul Yikatau Ansand Kwiyipul” yidia pa jw.org kuwejaku ni mafish ma kutong nich ma ansand, yidiaku mulong wa kuyikwash nich asand kukasikesh kashinsh mu yitiyij yau ni kuyikwash kurijek yakul mu mazu mau ayinau. Anch etu awonsu twilej mitu ya milong yiney mu dijuku, etu awonsu tukutwish kwilej mutapu wa kulondin ritiy retu nich kwitudish mu mutapu usangareshina.

¹⁷ Ansand utazukinau anch Matthew urumburil mutapu umukwashina kwilej yom ya kusal. Mu difukwil diau dia mu dijuku, Matthew ni anvajend akat kukimbijol chisu chawonsu mitu ya milong yikutwishau kwisambin ku shikol. Ulondin anch: “Tukat kutongin pa yipul yikutwishau kwingipul, ni kurijek mutapu wa kuyakul. Anch nijik nawamp yom nifanyidina kusal, nikat kwiyov anch nid mu diking, ni nikat kuman anch chinswapedin kwikal muntu witudishina chisu nisambinang nau antu akwau.”

18. Kolosay 4:6 umekeshin usey wa chom ik?

¹⁸ Ap anch twarumburil yom mu mutapu uwamp nich kashinsh kawonsu, kadiap muntu mwawonsu ukwitiya yom tukulonda. Pakwez kulond mu mutapu uwamp ni witudishina kukutwish kutukwash. (Tang Kolosay 4:6.) Kumurumburil muntu piur pa yitiyij yetu kukutwish kwikal mud kusengan ndundu. Tukutwish kusengan ndundu pakemp pakemp ap kwas ni mau mau. Anch twasengan ndundu nawamp, muntu tusengena nend ukutwish kumwimik ni kudandamen kusengan. Chilik chimwing, anch twarumburil yitiyij yetu mu mutapu uwamp ni kwitudish, antu akutwish kutesh nawamp ni kudandamen nich mambamb. Chakin kamu, anch muntu ukimbin kwend kututadikish ap kulond nayimp piur pa yitiyij yetu, chidiap kamu cha usey kudandamen nich mambamb. (Jnsw. 26:4) Pakwez chimeken anch antu avud kakusalangap mwamu. Chakin kamu antu avud akutwish kusanger kututesh.

19. Yom ik yifanyidina kutubachik kwikal antu itudishina chisu tulondina piur pa yitiyij yetu?

¹⁹ Chakin kamu, chid cha usey nakash kwikal muntu witudishina. Mulembila Yehova chakwel akwinkisha usu uswirikedina mulong wa kushal witudishina chisu wakwila kuyipul yikusarumwinau nich ap yiletishina ntad ja chamwamu. Vurik anch, mwikadil wey wa kwitudish ukutwish kukangesh ntad ja chamwamu. Ni kwakul kwey kwa kwitudish ni kwa kalimish kukutwish kuyikwash antu akwau kuswimp yitongijok yau piur petu ni pa uyakin udia mu Bibil. “Machuku mawonsu ikalany awanyidina kumwakul muntu mwawonsu ukukwipulany[a] kurumburil mulong wa ruchingej riukwetany[a] mu michim yen.” (1 Pita 3:15) Inge, El kwitudish kwikal usuwey!