1, 2. Chom ik chamanau atulam a munyingumuku mu yikumangen yivud?

KALAM wa munyingumuku wading piswimp ni kupwish chikumangan ni chisak cha amakurump. Wayitala ku mes mau ni wamekesha rukat rikash mulong wa mudimu wau ukash wasalau wa ukafung, amwing pakach pau ading chipim cha tatukwend. Pakwez, witeka pa ndond yau, ni wayipul anch, “Akadivar, ov, yom ik ukata kusalany mulong wa kuyifumb antu akwau chakwel ikal ni yisend mu chikumangen?” Avurika nawamp anch payendinay kalam wa munyingumuku mu machuku ma kwinyim am wayikasikesha anch afanyidin kusutish yisu yivud mu kuyifumb antu akwau. Chawiy lel, mukurump umwing walonda anch: “Chakin, twasadin yom yikemp.” Amakurump akwau alonda niyawiy chilik chimwing.

² Anch udi mukurump mu chikumangen, pamwing ap ukutwish niyey kulond mwamu. Atulam a munyingumuku a pa mangand mawonsu, ashikedin ku kuman anch yikumangen yivud yikwet kuswir nakash kwa kuyifumb antu akwau​—ansand ni amakurump—​mulong wa kuyikwash chakwel alama chikumangen. Pakwez chikasikening kusal mwamu. Mulong wak mwamu?

3. (a) Mutapu ik umekeshina Mifund usey wa kuyifumb antu akwau, ni mulong wak etu awonsu tufanyidin kubangin mulong winou? (Tal mazu ma kwinshin.) (b) Mulong wak amakurump amwing amening anch chikasiken kuyifumb antu akwau?

³ Chiudia kafung, wij anch chidi cha usey nakash kusutish chisu chivud mulong wa kuyifumb antu akwau.a Ijik anch akadivar avud akweting kuswir kwa kukasikesh chikumangen muspiritu ni kuyikwash chakwel asala yikumangen yisu mu machuku ma kurutu. (Tang Isay 60:22.) Ijik kand anch dizu dia Nzamb dikulejin anch ‘yifundisha antu akwau.’ (Tang 2 Timote 2:2.) Ap anch chidi mwamu, chilik chimwing ni amakurump twajimbulanga kwisambishil, ukutwish kuman anch chikasiken kusal mwamu. Ukutwish kubangin maswir ma dijuku diey, yisend ya mudimu wey wa kumujimbu, ya ku chikumangen ni yom yikwau kand, chawiy lel, chimeken anch ukwetap chisu cha kuyifumb antu akwau. Anch chidi mwamu, komb el tushinshikinany mulong wak chidi cha usey kwitekin chisu mulong wa kuyifumb antu akwau.

KUFUMB KUKWET USEY

4. Mulong wak amakurump akutwish yisu yimwing kulab pa kuyifumb akadivar?

⁴ Mulong wak chikutwish kukasikan kusutish chisu chivud mulong wa kuyifumb akadivar a mu chikumangen? Antu amwing akutwish kutong anch: ‘Kufumb kukwet usey, pakwez chifanyidinap, mulong anch niyifumbinap akadivar mu mutapu uwamp, chikumangen chikezap kutaninamu.’ Ap anch chidi mwamu chimeken anch milong yivud yitining kuyibabel swa, mulong kulabish kufumb kukutwish kwayipish mwikadil wa muspiritu wa chikumangen.

5, 6. Chom ik tukutwisha kwilejin ku chilakej cha mwin kwendish motak ni mutapu ukatay kulam motak wend nawamp, ni mutapu ik ufanikeshinau chilakej chinech ni kuyifumb antu mu chikumangen?

⁵ Tongin chilakej chinech: Mwin kwendish motak wijing anch mulong wa kulam nawamp motak ni moter wend, ufanyidin kuswimpang many chisu ni chisu. Pakwez, ufanyidin kwijik anch chidi cha usey kwizwish esans mu divumu dia motak chamwamu motak ukulik kwend. Ukutong anch ‘ang nalik kwitekin chisu cha kuswimp many, moter ukudandamen kusal, pakwez mu chisu chikemp.’ Chad ubaj ik udiaku? Anch mwin kwendish walabish kuswimp many ma moter, dichuku dimwing motak ukez kafa nayimp. Anch chasadik mwamu, ukusutish chisu nakash ni ukushesh nfalang jivud chakwel arijekisha motak. Ov, chom ik twilejina ku chilakej chinech?

⁶ Amakurump afanyidin kusal swaa piur pa yom yikweta usey nakash; chamwamu, chikumangen chikwendap nawamp. Mudi mwin kwendish motak twalondang mu chilakej chetu cha kwinsambishil ukata kuswimpang many ni kwinzwish esans mu divumu dia motak wend, amakurump afanyidin ‘kubangin yom yikweta usey nakash.’ (Fil. 1:10) Pakwez, amakurump amwing akwatiken kwau ni milong yikwau ni akat kudiul kuyifumb antu akwau​—chidi mudi kulik kutek many mu moter. Anch amakurump alabish kuyifumb akadivar, kurutu kwa machuku, kukwikalap akadivar awanyidina mulong wa kulam ni kuwanyish maswir ma chikumangen.

7. Ov, mutapu ik tufanyidina kuyiman amakurump akata kwitekin chisu mulong wa kuyifumb antu akwau?

⁷ Tufanyidinap ap pakemp kutong anch kuyifumb antu akwau kukwetap usey. Amakurump akata kwipanang mulong wa kutongin piur pa chikumangen mu machuku ma kurutu ni kwitekin chisu cha kuyifumb antu akwau ading kamu atushalapol akweta manangu ni usey kudi akadivar ni anambaz a mu chikumangen. (Tang 1 Pita 4:10.) Ov, mutapu ik ukutwisha chikumangen kutaninamu?

KUSADIN CHISU KWA MANANGU

8. (a) Ov, mikadil ik yikata kuyibachik amakurump kuyifumb antu akwau? (b) Ov, chisend ik chikwetau amakurump asadina mudi “angendj” mwi ndond yikwau? (Tal mushet “Mudimu Uwamp Nakash.”)

⁸ Ap amakurump akweta ukaliweny avud nakash afanyidin kwijik nich kwikepish anch, ang ananap kakutwishap kand kusal midimu yivud mu chikumangen. (Mike 6:8) Chikwau kand, amakurump afanyidin kwijik anch ‘yisu ni yirungu yakad kuchingejin’ yikutwish yayishiken ni kuswimp mutapu wau wa kuwanyish yisend yau ya mu chikumangen. (Mul. 9:11, 12; Jak. 4:13, 14) Chawiy lel, mulong ayikatin ni akat kuyibangin amikoku a Yehova, amakurump akusal mudimu nakash wa kuyifumb akadivar ansand chakwel ikala ni ukaliweny wa yom yilejau awiy.​—Tang Kuseng 71:17, 18.

9. Ov, yom ik yikusadika machuku ma kurutu yimekeshina anch kuyifumb antu akwau kudi kwa usey?

⁹ Ov, mulong wak tukutwish kulond anch amakurump akata kuyifumb antu akwau ading chiyukish kudi amikoku? Akat kukasikesh chikumangen. Mutapu ik? Usu usadinau amakurump mulong wa kuyifumb antu akwau ukat kuyikwash akadivar chakwel akwasha chikumangen chishala mu umwing ni kushinshaman kudi Nzamb, nakash kamu mu machuku minam ma kwinsudiel ni chisu chikusambisha mar makash. (Ezek. 38:10-12; Mike 5:5, 6) Chawiy lel, amakurump akatish, itekinany amboku chisu cha kuyifumb antu akwau kusambish nlel.

10. Mulong wa kwikal ni chisu cha kuyifumb antu akwau, ov, chom ik chifanyidinay mukurump kusal?

¹⁰ Pakwez, twij anch program winou uwanyidin kamu mulong ubangidinany yom yikweta usey mu chikumangen. Chad, ufanyidinany kwitekin chisu ni kuchisadin mulong wa kuyifumb antu akwau. (Mul. 3:1) Kusal mwamu kwawiy kusadin chisu kwa manangu.

KIMB YISU YIWAMP

11. (a) Ov, chom ik chidia cha usey pa yiyul yapanau kudi amakurump a mwi jingand kushalijan piur pa kufumb? (b) Kukwatijan nich Jinswir 15:22, ov, mulong wak chidi cha usey kushinshikin yiyul yapanau kudi amakurump amwing?

¹¹ Machuku masutina am, ayipula amakurump amwing mutapu wasalau mulong wa kutwish kuyifumb antu akwau chakwel atwisha kusal yivud mu chikumangen.b Chikalap nchik mashakamin kushalijan ma akadivar inay, awonsu alonda yom ya mutapu umwing. Ov, mazu minam mamekeshin ik? Kufumb kwinoku kwimedina mu Bibil kudi kwa usey kudi antu afumbinau “kwawonsu ni mu [yikumangen, NWT] yawonsu”​—mudi muchadinga kand mu machuku ma kambuy Paul. (1 Kor. 4:17) Chawiy lel, mu mutu wa mulong winou ni ulondwilaku, tukushinshikin yiyul yimwing yasadinau amakurump inay. (Jinsw. 15:22) Mu mitu ya milong yiney ayitazukin in kuyifumb antu akwau anch “alej” ni antu atambwila kufumb kwinoku anch “antu afumbinau.”

12. Ov, chom ik chifanyidinay mulej kusal, ni mulong wak?

¹² Mulej ufanyidin kuwapish mikadil ya kufundish nich. Mudi mukwetingay ndim kuswir kwa kurijek divu kurutu kwa kukun mbut, mulej niyend ukweting kuswir kwa kurijek muchim wa muntu ufundishinay kurutu kwa kumufundish yom yisu. Chad, mutapu ik ukutwishay mulej kuwapish mikadil mulong wa kuyifumb antu akwau? Pa kulondul chilakej chiwamp cha muprofet wa pakur Samwel mulej wading ni ukaliweny. Ov, chiyul ik chidiamu?

13-15. (a) Ov, Yehova wamuleja Samwel kusal ik? (b) Ov, mutapu ik wamurijekau Saul kudi Samwel chakwel asala chisend chisu? (Tal chipich cha kwinsambishil.) (c) Ov, mulong wak rusangu riner ra mu Bibil piur pa Samwel ridi wa usey nakash kudi amakurump a nlel?

¹³ Pasutin kal mivu 3 000, Yehova wamuleja Samwel muprofet ipal dichuku dimwing anch: “Diamashik mudi katat nikumutum muntu umwing wa mwi ngand ya Benjamin, chad ey ukumuzizil many, ndiy ukwikala mwant wa antu am in Isarel.” (1 Sam. 9:15, 16) Samwel wijika anch kafanyinap kudandamen kutakel muchid wa Isarel amwinend ni wijika kand anch Yehova wamwinkish mbil ya kumuzizil mwant musu many. Samwel wafanyina kwiyipul anch ‘Ov, mutapu ik Nikutwisha kumufumb muntu mulong wa chisend chinech?’ Samwel wikala nich chitongijok ni witenchika.

¹⁴ Samwel chamumanay Saul dichuku dialondulaku, Yehova wamuleja anch: “Ndiy muntu winou nakulejina.” Pawiy pinipa Samwel wasala mudi mwatenchikay. Wamutazukina Saul yakudia mu chikumbu chend. Samwel wamwinkisha Saul ni kashalapol wend ndond yiwamp ya kushakam ni wayinkisha yakudia yiwamp ni wayileja anch: “Diang, mulong adi ayikutekidin ni kushik pa chisu charijekau chakwel ukutwish kudia pamwing ni antu natazukanga.” Kupwa kwa kudia, Samwel waya pamwing ni Saul ku chikumbu chend, ading akat kwambamb payilau. Samwel wasota kusadin nawamp chisu chinicha chadiau yakudia yiwamp ni wasadina mambamb mawamp. Samwel wandama nend mu chikumbu. Urel, Samwel ‘wadandamena kwambamb ni Saul piur pa chikumbu palalela’ pafanyinau kulal. Chikwacha, Samwel wamuzizila Saul many, wamubwikata, ni wamuleja yom yivud ya kusal. Kupwa kwa yom yiney, wamulika waya​—wamutenchika mulong wa yom yikusadika kurutu.​—1 Sam. 9:17-27; 10:1.

¹⁵ Chitwishikin kumuzizil muntu many chakwel ikala mwant, pakwez yishalijadin nakash ni kumufumb muntu chakwel ikal mukurump ap nkwash a mudimu mu chikumangen. Ap anch chidi mwamu, amakurump akutwish kutambul malejan ma usey madia mu chilakej cha Samwel. Tushinshikinany bil piur pa malejan maad.

ALEJ IPANINA NI ADIA ARUND AKIN

16. (a) Ov, mutapu ik wiyovay Samwel pamulejau kudi in Isarel anch twinkisha mwant? (b) Ov, mutapu ik wasalay Samwel pamulejau kudi Yehova anch muzizila Saul many?

¹⁶ Ipana, pakad kwidjidjek. Pateshay Samwel kapamp ka kusambish anch in Isarel akwet kuswir kwa mwant wa ukauntu, waziya ni wamana anch antu amulik kal. (1 Sam. 8:4-8) Tupamp tusatu Yehova wamuleja anch tesh mazu mamulejau antu mulong wading widjidjekin pa kuyitondin mwant. (1 Sam. 8:7, 9, 22) Ap anch Samwel wading ni chitongijok chinech, kamwovilap mwant musu mukau ap ujim. Pamulejay Yehova anch muzizila Saul many, muprofet waziyila, chidiap anch mulong wading ufanyidin kusal mwamu, pakwez mulong wading umukatin Yehova.

17. Ov, mutapu ik ukatau amakurump kwimburij chilakej cha Samwel nlel, ni musangar ik ukwetau?

¹⁷ Kudi amakurump akweta ukaliweny uvud nakash nlel amwimburijina Samwel ni ayifumbina antu akwau nich rukat. (1 Pita 5:2) Amakurump inay kafanyidinap kwov wom wa kuyifumb antu akwau anch mulong akwanganijan nau yisend ya mu chikumangen. Amakurump kafanyidinap kuyiman akadivar afumbinau mudi akankuny, pakwez afanyidin kuyiman mudi in “kusal mudimu pamwing” nau​—mudi chipan cha usey mu chikumangen. (2 Kor. 1:24; Heb. 13:16) Musangar mudi ik kudi amakurump inay akad choy pamenau mutapu usadidinau akadivar afumbau ukaliweny wau mulong wa uwamp wa chikumangen!​—Mid. 20:35.

18, 19. Ov, mutapu ik ukutwishay mukurump kutenchik muchim wa muntu ufumbinay, ni mulong wak chidi cha usey kusal mwamu?

¹⁸ Ikal murund, kulik kwikal ching mulej. Dichuku diasankanijanay Samwel ni Saul, muprofet wela kumuzizil Saul many pa muntu kapamp kamwing, ni kumulikaku mwant musu chakwel aya—kumuzizil kamu many pakad kumufundish nawamp. Pakwez, Samwel witekina chisu cha kutenchik pakemp pakemp muchim wa Saul. Kudia yakudia yiwamp, kwend pamwing, kwambamb nakash, ni kupim nawamp pamwing kwamukwasha muprofet kwijik chisu chiwamp cha kumuzizil Saul many.

¹⁹ Chilik chimwing, kurutu kwa kusambish kumufumb mukadivar, mukurump ufanyidin kwitekin chisu ni kusal usu wa kuta nend urund. Yom yikutwishay mukurump kusal chakwel anch urund wend ni muntu ufumbinay wikala uwamp, yikutwish kushalijan mwi ngand ni yikwau, ni yikutwish kukwatijan ni mashakamin ma kwol kwau. Pakwez, chikalap ndond yiushicha, anch udi mukurump ukwatikena nich mudimu nakash, anch witekin program wa kusutish chisu ni muntu ufumbina, muntu winou ukuman anch “Umukwatin nich usey.” (Tang Rom 12:10.) Chakin kamu, antu afumbinau akwikal ni kujikitish kukash mulong wa kubangin kwa rukat kuyimekeshidinau kudi amakurump.

20, 21. (a) Ov, yom ik yisadiningay mulej muwamp? (b) Ov, chom ik tukwambambina mu mutu wa mulong ulondwilaku ou?

²⁰ Amakurump, vurikany anch: Mulej muwamp kadingap ching muntu ukatining kuyifumb antu akwau, pakwez uyikatining kand antu afumbinay. (Ilikej ni Yohan 5:20.) Mwikadil winou usadidinay mukurump akutwish kuujingunin swa kudi antu afumbinay ni ukwikal ni yibudikin yiwamp piur pa kufumb kutambwilau. Chawiy lel, en amakurump akatish, pauyifumbinanya antu akwau, ikalany kamu mudi alej awamp​—ikalany arund awamp.​—Jinsw. 17:17; Yoh. 15:15.

²¹ Kupwa kwa kutenchik muchim wa muntu ukufumbau, mukurump umwing ukutwish kusambish kumufumb muntu winou. Ov, milad ik yikutwishay mukurump kusadil? Chakul chinech tukuchambambin mu mutu wa mulong ulondwilaku ou.

1. (a) Ov, chom ik chajinguninau atushalapol a Nzamb kudiosh pakuru piur pa kufumb, ni mutapu ik usadidinau chom chinech nlel? (b) Ov, chom ik tukwambambina mu mutu wa mulong winou?

ATUSHALAPOL a Nzamb ijing kwawonsu oku anch kufumb kutwadining mudimu kurutu. Nshankur Aburaham ‘wayitonda antu ading afumbinay kal nawamp’ mulong wa kuya kumukwol Lot​—ni antu inay awina. (Dis. 14:14-16) Pa chirungu cha Mwant David, in kuwang miminy mu chikumbu cha Nzamb ‘ading antu afumbau mulong wa kumuwangil Yehova’ ni ading kumushiman kamu Nzamb. (1 Jnsg. 25:7) Nlel, tufanyidin kurish njit ja muspiritu nenday Satan ni mangand mend. (Efes 6:11-13) Chikwau kand, tusadin mudimu ukash mulong wa kumushiman Yehova pa kulond piur pa dijin diend kudi antu akwau. (Heb. 13:15, 16) Chawiy lel, mudi atushapol a pasak, mulong wa kutwish, tufanyidin kwikal afumbinau. Mu chikumangen, Yehova uyinkishin amakurump chisend cha kuyifumb akwau. (2 Tim. 2:2) Ov, mitapu ik yimwing yikatau amakurump kusadil mulong wa kuyifumb antu akwau chakwel ikala nich ukaliweny wa kulam amikoku?

YIKASIKESHA MUSPIRITU ANTU UFUMBINA

2. Kurutu kwa kumufumb muntu ukweta ukaliweny ukemp, ov, chom ik chikutwishay mukurump kusal, ni mulong wak?

² Chiudia mukurump ukutwish kwikal mudi ndim. Kurutu kwa kukun mbut, ndim ufanyidin kuwejaku yom yakufukish nich divu chakwel angula yom yivud. Chilik chimwing, kurutu kwa kumufumb mukadivar ukweta ukaliweny ukemp, ufanyidin kwijik maswir ma muspiritu makwetay nich kuswir chakwel ashikena ku kusadin yilejinay.​—1 Tim. 4:6.

3. (a) Ov, mutapu ik ukutwisha kusadin mazu ma Yesu madia mu Marko 12:29, 30 mu mambamb mey ni muntu ufumbina? (b) Ov, usu ik ukutwisha kwikal nich malembil ma mukurump padiay muntu ufumbinay?

³ Chakwel anch ujingunina yitongijok ni yisal ya muntu ufumbina piur pa uyakin wa Want, ukutwish kumwipul anch, ‘Ov, kwipan kwey kudiay Yehova kwaswimpa nchik mutapu wey wa kusadin mwom wey?’ Chipul chinech chikutwish kushikish ku mambamb malondina piur pa mutapu ukutwishay kumusadin Yehova nich muchim wend wawonsu. (Tang Marko 12:29, 30.) Pamwing ap kwinsudiel kwa mambamb men, ukutwish kulembil nend mulong wa kumwit Yehova chakwel amukwasha mukadivar nich mwiku utumbila chakwel asangera kufumb kwinoku. Pakuteshay mukadivar mutapu ulembila mulong wendendiy, chikumukasikesh mudi ik!

4. (a) Pan yilakej ya jinsangu ja mu Bibil yikutwisha kumukwash muntu ufumbinau kuya kurutu. (b) Ov, rutong ik rufanyidinau amakurump kwikal nich payifumbinau antu akwau?

⁴ Anch wasambish kumufumb mukadivar, chiwapin kwambamb nend jinsangu ja mu Bibil jikutwisha kumukwash nakash chakwel ikala muntu wa kuchingejin ni witudishina. (1 Ant 19:19-21; Neh. 7:2; 13:13; Mid. 18:24-26) Mikadil mudi yiney yidi ya usey kudi muntu ufumbina mudi muding yom yifukishiningau nich divu. Yom yiney yikumukwash chakwel akula muspiritu. Jean-Claude, mukurump wa mu France walonda anch: “Rutong ram ra pakampwil ridi ra kuyikwash antu nifumbina chakwel akula muspiritu. Nikat kukimbang yisu tukutwisha kutang nend verse wovikena nawamp mulong wa ‘kuburil mes’ mend chakwel ‘ijika nawamp yom yishimokishina’ ya mu Dizu dia Nzamb.” (Kus. 119:18) Ov, mitapu ik yikwau yidiaku ya kumukasikesh nich muntu ufumbinau?

MULEJA CHIFANYIDINAY KUSALNI MAYINGISH

5. (a) Ov, kwambamb ni muntu ufumbina kukwet usey ik piur pa jintong jend ja muspiritu? (b) Ov, mulong wak amakurump afanyidin kuyifumb akadivar pachidiau kal ansand? (Tal mazu ma kwinshin.)

⁵ Mwipula muntu ufumbina anch, ‘Mukadivar, ov, jisu jitong jey ja muspiritu?’ Anch kakwetap jintong mu manangu mend, mukwasha chakwel itekinap rutong rumwing ni asala usu wa kuriwanyish. Muleja piur pa rutong rumwing ra pakampwil ra muspiritu riwitekina ey, ni muleja nich musangar mutapu wiyova pawaruwanyisha. Mutapu winou wa kusal uswapel, ni uwapin. Victor, mukurump umwing udia kand chibol wa mu Afrik, ulondin anch: “Pinading nsand, mukurump umwing wangipula yipul ya manangu piur pa jitong jam. Yipul yiney yankwasha kusambish kutongijokin nakash piur pa mudimu wam wa kulejan.” Amakurump amwing akweta ukaliweny uvud niyawiy alondin kand anch chifanyidin kusambish kuyifumb akadivar padichau ansand​—mu mivu yau ya usand—​pa kuyinkish yisend mu chikumangen kukwatijan ni mivu yau. Anch ayifumb akadivar pachidau kal ansand, kusal mwamu kukuyikwash kushinshikin pa jintong jau ja muspiritu kushik kamu ni ku ukurump pakad kwikal ni kampuw.​—Tang Kuseng 71:5, 17.a

6. Ov, mutapu ik uwamp wasadilay Yesu mulong wa kuyifumb antu akwau?

⁶ Mulong wa kukasikesh rusot ra muntu ufumbina ufanyidinap kumulej ching yifanyidinay kusal pakwez ufanyidin kumulej mulong wak ufanyidin kusal mwamu. Anch wamwinkish mayingish ukumwimburij Yesu Mulej Mujim. Chilakej, kurutu kwa kuyinkish atwimbuy end mudimu wa kuyikadish antu in kwilej, Yesu wayileja mulong wak afanyina kuziyil. Walonda anch: “Anginkishin kal ulabu wawonsu wa mwiur ni wa pansh.” Wawejaku kand anch: “Yangany kudi antu a michid yawonsu.” (Mat. 28:18, 19) Ov, mutapu ik ukutwisha kwimburij mutapu wa kufumb wa Yesu?

7, 8. (a) Ov, mutapu ik ukutwishau amakurump a nlel kwimburij mutapu wa kufumb wa Yesu? (b) Ov, mulong wak chidi cha usey kumujikitish muntu ufumbina? (c) Ov, yom ik yikutwisha kuyikwash amakurump chakwel ayifumba antu akwau? (Tal mushet “Mutapu wa Kuyifumb Antu Akwau.”)

⁷ Muleja muntu ufumbina mayingish ma mu Bibil mamekeshina usey wa kusal yiumwitina, ni muleja kand mutapu wa kuyisal. Mu mutapu winou umufundishin kusadil yany ya mu Bibil. Chilakej, tong bil anch umulejin mukadivar kutenchik mu Chot cha Want chakwel chikala chinangina. Ukutwish kushinshikin nend pamwing mukand wa Titus 2:10 ni kumurumburil mutapu ukutwisha kwinang kwa Chot cha Want ‘kumekesh katumb ka malejan ma Nzamb, Mupandish wetu.’ Chikwau kand, muleja muntu ufumbina chakwel atongina piur pa mutapu ukutwisha kusal kwinoku kuyikwash amapal a mu chikumangen ni mutapu ukezau kutaninamu mu mudimu winou usadinau. Kwikal ni mambamb mudi minam ni muntu ufumbina kukumukwash kushinshikin nakash piur pa antu kulik piur pa yisend. Mwamu ukez kusanger musangar udiokila ku mutapu ukatau akadivar ni anambaz kutaninamu mu mudimu usadinay.

⁸ Kupwa, sal usu wa kumujikitish muntu ufumbina piur pa mutapu usadidinay yiumulejina. Ov, mulong wak chidi cha usey kusal mwamu? Kujikitish kwakin kukweting yibudikin mudi yikwetinga mem makatau kwichil kwi mutond​—chakwel upamba nawamp.—​Ilikej ni Mateu 3:17.

CHIKOKUJOL CHIKWAU

9. (a) Piur pa kufumb, ov, yikokujol ik yikatau amakurump amwing kurish nich mu jingand ja mapit mavud? (b) Ov, mulong wak ansand avud katekiningap kumusadil Nzamb pa ndond ya kusambish mu mwom wau?

⁹ Amakurump a mu jingand ja mapit mavud akutwish kurish kand ni chikokujol chikwau: mutapu wa kuyikasikesh akadivar abatishinau kal ni akweta mivu 20 ap 30 chakwel ipana nakash mu midimu ya chikumangen. Twayipwil amakurump a mu jingand piswimp ni 20 ja mwi mputu chakwel atuleja mulong wak akadivar ansand kitiyinap yisend mu chikumangen. Amakurump avud pakach pau akula anch: Payilau ansand ni kukul, anvajau kakatap kuyikasikesh chakwel itekina jintong ja muspiritu. Pakwez, yisu yimwing, ansand itekina jintong jinej, anvajau ayikasikesha chakwel ileja ma shikol ma piur nakash ap chakwel akimba mudimu wa nfalang jivud mu mangand minam! Chawiy lel, kumusadin Nzamb kudingap pa ndond ya kusambish mu mwom wau.​—Mat. 10:24.

10, 11. (a) Ov, mutapu ik ukutwishay mukurump kumukwash pakemp pakemp mukadivar chakwel aswimpa yitongijok yend? (b) Ov, yitongijok ik yimedina pa Bibil yikutwishay mukurump kusadin mulong wa kumukasikesh mukadivar, ni mulong wak? (Tal mazu ma kwinshin.)

¹⁰ Anch mukadivar umeken anch kasangaredinap kusal yom yivud mu chikumangen, chitin kusal usu uvud nakash ni kushimpish muchim, pakwez chikutwish kusadik. Mudi mukatay ndim kusal chakwel mutond upama utentamina, ukutwish niyey kumukwash pakemp pakemp mukadivar chakwel amana anch ufanyidin kuswimp mutapu wend wa kuman chakwel itiya yisend. Ov, mutapu ik?

¹¹ Itekina chisu cha kuta urund ni mukadivar winou. Muleja patok anch akwet ney kuswir mu chikumangen. Chisu ni chisu, shakam nend mulong wa kwambamb nend piur pa maverse mamwing ma usey makutwisha kumukwash kutongin piur pa mutapu wa kwipan kwend kudi Yehova. (Mul. 5:4; Isay 6:8; Mat. 6:24, 33; Luka 9:57-62; 1 Kor. 15:58; 2 Kor. 5:15; 13:5) Ukutwish kumwipul anch: ‘Ov, yom ik washilamu kudi Yehova chisu wipan kudi ndiy?’ Sal usu wa kumushik ku michim pa kumwipul anch: ‘Ov, utongin nchik piur pa mutapu wiyovay Yehova chisu watambula dibatish?’ (Jinsw. 27:11) ‘Ov, mutapu ik wiyovay Satan?’ (1 Pita 5:8) Kangal wapipej mutapu ukutwishay kwiyov mukadivar chisu ukutanga nend maverse mawamp nakash ma mu Bibil.​—Tang Hebereu 4:12.b

ANTU AFUMBINAU, AFANYIDIN KUMEKESH KUSHINSHAMAN

12, 13. (a) Ov, mwikadil ik wamekeshay Elisha padingau kumufumb? (b) Ov, mutapu ik wamufutau Elisha kudiay Yehova mulong wa kushinshaman kwend?

¹² Akadivar ansand, ov, chikumangen chikwet kuswir nich ukwash wen? Ov, mwikadil ik ukutwisha kukukwash chakwel utwisha kuya kurutu mu mudimu wa Yehova? Mulong wa kutan chakul, el tushinshikin yom yimwing ya pakur yashikena mu mwom wa antu afumbau.

¹³ Pasutin kal mivu piswimp 3 000, muprofet Elija wamutazuka nsand Elisha chakwel ikala kashalapol wend. Kapamp kamwing, Elisha witiya ni wamusadila ipal winou ni kushinshaman nich kwikepish. (2 Ant 3:11) Kwinyim kwa mivu musamban ya kumufumb, Elisha wijika anch mudimu wa Elija mu Isarel wading kwinsudiel. Chisu chinicha, Elija wamuleja muntu wafumbay nawamp tupamp tusatu chakwel alika kumulondul, pakwez Elisha wamwakula Elija tupamp tusatu anch: “Am kinikukushap.” Wading nich kashinsh ka kwikal ching ni mwin kumufumb. Chad, Yehova , wamufuta Elisha mulong wa kushinshaman kwend pa kusal anch amana mutapu wafanyinay Elija kuya mu chinzwizu.​—2 Ant 2:1-12.

14. (a) Ov, mutapu ik ukutwishau antu afumbinau kumwimburij Elisha? (b) Ov, mulong wak muntu ufumbinau ufanyidin kwikal ushinshamena?

¹⁴ Ov, mutapu ik ukutwisha kumwimburij Elisha nlel? Sanger kwitiy yisend, ap anch yimeken anch yidi yakad usey. Mumana muntu ukufumbina mudi murund ney, ni muleja anch ukat kusanger nakash usu wend usadinay mulong wa kukufumb. Mutapu usadina ukumekan mudi umulejin anch: “Am kinikukushap.” Cha usey nakash, send nich usey nakash chisend chawonsu chikwinkinau. Ov, mulong wak chidi cha usey kusal mwamu? Mulong anch wamekesh anch ushinshamen ni usadin mudimu wey nawamp, amakurump akutwish kwikal nich kashinsh anch Yehova usotil anch wikala ni yisend yikwau mu chikumangen.​—Kus. 101:6; tang 2 Timote 2:2.

YILIMISHA AMAKURUMP

15, 16. (a) Ov, mu mitapu ik mwamekeshay Elisha kalimish kudi muntu wamufumba? (Tal chipich cha kwinsambishil.) (b) Ov, chilakej chinech cha Elisha chayikasikesha nchik aprofet akwau?

¹⁵ Rusangu ra Elisha, mwin kumuswinkan Elija, rimekeshin kand mutapu ukutwishau akadivar kuyilimish amakurump aswila. Kupwa kwa Elija nenday Elisha kuman chisak cha aprofet ading ku Yeriko, antu aad inay aya ku Wit wa Yordan. Kwinikwa, “Elija watambula nkandj wend mulemp, wamuvung, wamubul pa mem, chad mem maurika.” Kupwa kwa kwauk pansh paumina, amakundj inay ‘adandamena kwisamb payangangau.’ Chimeken patok anch, Elisha katongap anch pinap wijik kal yom yawonsu. Kushik ni chisu chamushau kudi Elija, Elisha wamuteshanga muntu wading kumufumb. Kapamp kamwing, Elija waya mu chinzwizu. Kupwa, kwa kuchirik ku Yordan, Elisha wabula pa mem nich nkandj wamwinkau kudi Elija, ni walonda anch: “Kwisu kudiay [Yehova, NWT] Nzamb wa Elija?” Mem maurika kand.​—2 Ant 2:8-14.

¹⁶ Ov, umenap anch Elisha wamwimburija chakin kamu Elija mu chilay chend chakusambish? Ov, chom ik twilejina ku chilakej chinech? Chimeken anch, Elisha katongap anch mulong ndiy wikal kal ni chisend, ufanyidin katat kusal mudi mumenay. Pakwez, mulong wadandamena kusal mudi mwasadinay Elija chisend chend, Elisha wamekesha kalimish kudi muntu wamufumba, ni chinech chayikasikesha aprofet nend. (2 Ant 2:15) Kwinyim kwa mivu 60 ya mudimu wa uprofet wa Elisha, Yehova wamwinka usu wa kusal yilay yivud kumusutamu Elija. Ov, dilejan ik wilejina ey muntu ufumbinau nlel?

17. (a) Ov, mutapu ik ukutwishau nlel antu afumbinau kwimburij mwikadil wa Elisha? (b) Mu machuku ma kurutu, ov, mutapu ik ukutwishay Yehova kuyisadin antu ashinshamena afumbinau?

¹⁷ Anch wikal nich yisend yimwing mu chikumangen, ufanyidinap kuswimp mutapu wa kusal yom​—kusal mu mutapu ushalijadina ni wadingau ni kusal kwinsambishil. Ijik anch chifanyidin kuswimp yom, chidiap anch mulong ey ukatin kuswimp, pakwez chifanyidin kuswimp yom mulong chikumangen chikwet nich kuswir ap mulong wa kulondul yany tutambwila ku dirijek dia Yehova. Ching mudi mwayikasikeshay Elisha aprofet nend kusutil yisal yend ni mwamekeshay kalimish kudi muntu wamufumba pa kudandamen kusadin yadingay Elija kusal, niyey ukutwish kuyikasikesh akaritiy ni ukuyilimish amakurump pa kudandamen kusadil mitapu ya kusal yakulejau yimedina pa Bibil. (Tang 1 Korint 4:17.) Pakwez, anch wikal nich ukaliweny uvud, ukez kusadil kuswimp kwinoku kutwisha kukwash chikumangen chakwel chilondula umutakel wa dirijek dia Yehova mutapu didandamedina kuya kurutu. Chad, mudi mulondinau piur pa Elisha, Yehova ukutwish machuku ma kurutu kuyikwash antu ashinshamena afumbinau chakwel asala midimu yijim mudi yisadinau antu ayifumbina.​—Yoh. 14:12.

18. Ov, mulong wak kuyifumb akadivar a mu chikumangen kudi kwa usey nakash nlel?

¹⁸ Tuchingejin anch yom yilondinau mu mutu wa mulong winou ni wasutina ou anch yikuyibachik amakurump avud chakwel itekina chisu cha kuyifumb antu akwau. Akadivar akwau akutwish kand niyawiy kwitiy kwa kwisotil kufumb kwinoku ni akusadil nich manangu ukwash winou mulong wa kulam amikoku a Yehova. Kusal mwamu kukukasikesh yikumangen ya pa mangand mawonsu ni kukumukwash muntu ni muntu pakach petu kushal ushinshamena mu yirung yikash yezina kurutu oku.