Kwilam

KWILAM CHOM IK?

Kwilam ud mwikadil wa

• kuchingel kurutu kwa kutambul chom uswirikedina

• kwijik kusop yovil

• wa kusal chom wakad kukat kusal ndjat ni kwinsudiel

• wa kuyitek antu akwau kurutu kweyey

MULONG WAK KWILAM KUD KWA USEY?

An ijing kwilam akat kujijamenang yoziu, ap anch yoziu yiney yimeken anch yid yom yikutwishau kusanger. Pakwez, an akad kwilam akat

• kuswej nakash

• kuziy mu manangu

• kuna ruwand, kuleu maar ap kuna madrog

• kudia cha mwidiwodin

Kukimbijol kumwing kwamakesha anch an akata kwilam, anch apam, kakatap kwikal ni milong yijim ya ukash wa mujimbu, ya nfalang ni ya mburamatad. Kukimbijol kwinoku kwamushikija Profesor Angela Duckworth wa ku iniversite wa Pennsylvanie kulond anch: “Kwilam kuyipinap ap pakemp mulong weyey.”

MUTAPU WA KUYIFUNDISH ANEY KWILAM

Yileja kulond anch bwat ni limish mupak wey.

MBIL YA BIBIL: ‘Dizu dien Inge dirumburika kamu Inge, Bwat wen, Bwat.’​—Mateu 5:37.

An akutwish kupak mupak wa anvajau kusutil kujajiman ap kwidjibol oku ni oku pakach pa antu anch anvajau aliyikin chom kanang. Anch nvaj waziyin, mwan ukujingunin anch kwilengurol ap kujiman wawiy mutapu wa kuswimp yitongijok ya anvajau anch akwet kuswir kwa chom kanang.

Ku mutambu ukwau, anch anvaj alond anch bwat ni alimish mupak wau, mwan ukwilej dilejan dia usey nakash mu mwom​—anch tukutwishap kutambul yom yawonsu tukatina kwikal nich. Dokter David Walsh wafunda anch: “Chimeken anch antu ija dilejan dined akat kutwish mu mwom. Tukat kuyikwash anetu anch twayifundish anch mangand makuyinkishap yom yawonsu yiswirikedinau.”a

Kumwel mwan anch bwat katat kukumukwash mu machuku ma kurutu kulikangap yom yimwing​—chilakej, anch amushindil kuna madrog, kulalijan kurutu kwa kwandam mu uruw ap kusal yom yikwau yiyimp.

Yikwasha aney kutongin piur pa yibudikin ya mipak yau, yikala yiwamp ap yiyimp.

MBIL YA BIBIL: “Yikukunay muntu, yawiy yikez kangulay.”​—Galatia 6:7.

Mwaney ufanyidin kwijik anch yom yisadinay yikwet yibudikin ni anch kuburen kwilam kukutwish kumuletin yibudikin yiyimp. Chilakej, anch mwaney ukat kujimanang swa anch amusarumun, an akwau akusambish kumwiyep. Pakwez, anch wasambisha kwilam chisu chimusarumwinau ap wachingel nich kushimpish muchim kurutu kwa kumukaturij muntu mukwau​—antu akwau akumukat. Mukwash mwaney kwijik anch mwom wend ukwikal uwamp nakash anch wakudish mwikadil wa kwilam.

Yikwasha aney kwijik yom yidia ya usey nakash.

MBIL YA BIBIL: ‘Shinshikinany yom yidia ya usey nakash.’​—Filip 1:10.

Kwilam kwitinap kwau ching kulik kusal yom yidia yiwamp; kwitin kand kusal yom yidia ya usey, ap anch tusangaredinap kusal yom yiney. Chid cha usey kud mwaney kwijik yom yidia ya usey ni kuyisal. Yikwasha aney kusal cha kusambish bil yom yidia ya usey. Chilakej, ufanyidin bil kusal ma devwar kurutu kwa kusengan.

Ikal chilakej chiwamp.

MBIL YA BIBIL: “Am nakwinkishany kal chilik chakwel niyen ukez kusalany mudi munakusalanya kal en.”​—Yohan 13:15.

waney ukuman mutapu ukata kusal anch yom kanang yikusangareshinap ap yikujimeshin. Mekesh kusutil chilakej chey anch kwilam kukat kuletang ching yibudikin yiwamp. Chilakej, anch mwaney wasal chom chiyimp, ov, ukat kujimanang nakash anch ukat kuninetang zong?