Kulimish Dibendel, Vot ni Midimu Yakad Kwikal ya Usalay

Kulimish Dibendel. Atuman a Yehova itiyijining anch antu ifukwidining ap alimishining dibendel nakash nakash pawanginingau muminy wa ngand. Kusal mwamu kudi kwifukwil kumekeshininga anch dipandish didiokidinap kudi Nzamb, pakwez didiokidining kwi ngand ap kudi antakel a ngand. (Isay 43:11; 1 Korint 10:14; 1 Yohan 5:21) Umwing wa ku antakel inay wadinga Mwant Nebukadinesar, mwant wa Babilon mukur. Chakwel ashikija antu ku kuziyil ku umutakel wend ni ku kumwifukwil, ndiy wasadisha chirumbidij chilemp ni wayishindila antu end awonsu chakwel ifukwila ku chirumbidij chinech pateshangau miminy yawangangau mudi muminy wa ngand kamu. Pakwez, in Hebereu asatu​—Shadirak, Meshak, ni Abed Nego—​alika kwifukwil mukish winou ap anch adinga ij kurutu anch akez kuyijip mulong wa chisal chinech.​—Daniel, shapitre 3.

Mwin kufund jinsangu ja pakur Carlton Hayes wafunda anch: mu machuku tudia am, “dibendel didi chijingidij chijim cha rukat ra wan a ngand ni chom chijim cha kwifukwil. Anch muntu usutidin piswimp ni dibendel, ufanyidin kudiosh chiful ku mutu; ni in kufund miminy afundininga miminy ya kutumbish nich dibendel pamwing ni anau afanyidin ni yawiy kudiwangil muminy.” Carlton walonda anch: “Wan a ngand ukwet ni wawiy machuku matumbila,” mudi dichuku dia dipandans disadiningau mu machuku 30 ma ngond wa musamban mu Congo-Kinshasa. Kuding kand machuku ma “ayifuvu” mifukwidilingau, kuya ku “jinzay” jau jirijekinau nawamp win kamu. Pasalau musambu kanang mwingand ya Brésil, mukurump wa amasalay walonda anch: “Antu alimishining dibendel ni akat kudifukwil . . . mudi mwifukwidilingau ngand.” Mu buku mukwau alondinamu anch: “Dibendel ni diawiy diding ditumbila mudi dikurus.”​—The Encyclopedia Americana.

Buku winou wisambidin kand machuku madia pansh am piur pa miminy ya ngand anch: “Mazu ma miminy yiney malejen wan a ngand, ni mading mudi malembil mamulembidiningau Nzamb chakwel alama antu ni ayitakela kand ant a ngand.” Chawiy, pameninga Atuman a Yehova kulimish dibendel ni kuwang muminy wa ngand mudi difukwil, kasadiningap chilim. Buku mukwau ulondin mutapu ulikininga Atuman a Yehova kulimish dibendel ni kwichip machip mu mashikol ma ku États-Unis anch: “Mu milong yivud yakatulau mu matribinal majim ma dirumburish, twitiyijanga anch chisal chinech chisadiningau pichuku pichuku chidi mutapu umwing wa difukwil.”​—The American Character.

Ap anch Atuman a Yehova kasadiningap misambu ya ngand yimeningau anch yidi yiyimp kwambatan nich chifundishinay Bibil, awiy kalikishiningap antu akwau kuyisal. Alimishining kand dibendel mudi chimwing cha ku yijijingidij ya ngand ni itiyijining muyitakedilingau kudi “in kutakel” mudi ‘in mudimu a Nzamb.’ (Rom 13:1-4) Chawiy, Atuman a Yehova aziyidining chiyul cha kuyilembidil “ant ni antu awonsu akata kutakel.” Tusadining mwamu chakwel “[tutwisha] kushakam zong mu chisambu nich mwom utumbila ni yaku ya zwang.”​—1 Timote 2:2.

Mavot mu milong ya chipolitik. In Kristu akin alimishining mbil yikwetinga antu akwau ya kutond antakel a ngand. Awiy, kalikishiningap antu kusal mavot, ni ayiziyidining antakel atondiningau kudi antu akwau. Pakwez, Atuman a Yehova kiyandijikingap mu milong ya chipolitik ya ngand. (Mateu 22:21; 1 Pita 3:16) Ov, chom ik chikusalay mwin Kristu anch amusadishin muntu mwin mwawonsu ku usu chakwel avota, ap anch ayimen antu alikina kuvot mudi akankuny? Twijikany amboku anch, Shadilak, Meshak ni Abed Nego aya djat ni mu dibur dia Dura. Chawiy, mwin Kristu udia mu kupakiu kwa mutapu winou ukutwish kukwat mupak wa kuya kwindond kuvotinau anch kom kend kitiyijin kusal mwamu. Pakwez, ikala udimukina chakwel alika kwandam mu milong ya chipolitik. Ndiy ufanyidin kuvurik yany musamban yilondwilaku ey:

1. In kwilej a Yesu ‘kadingap a mangand.’​—Yohan 15:19.

2. In Kristu ading antimesh a Kristu ni Want wend.​—Yohan 18:36; 2 Korint 5:20.

3. Chikumangen cha in Kristu chiding nich malejan ma mutapu umwing ni yid yach yikatijadining nakash mudi mwadingay Kristu uyikatin in kwilej end.​—1 Korint 1:10; Kolosay 3:14.

4. Antu amutondininga muntu kanang akwet dibaz dia yisal yend yisadiningay.​—Tal chitongijok chidia mu mazu mafundau mu 1 Samwel 8:5, 10-18 ni mu 1 Timote 5:22.

5. Yehova wajingunina anch in Isarel amutuna Ndiy chisu chakatau kwikal ni mwant windjing.​—1 Samwel 8:7.

6. In Kristu afanyidin kwikal atakamena chisu chilejenau kudi antakel a chipolitik rusangu piur pa Want wa Nzamb.​—Mateu 24:14; 28:19, 20; Hebereu 10:35.

Midimu yakad kwikal ya usalay. Mu jingand jimwing, mburamatad utekinamu mbil piur pa muntu mwin mwawonsu ulikina kusal mudimu wa usalay chakwel ndiy asala midimu yindjing yakad kwikal ya usalay machuku kanang. Anch twatanijan nich chikokujol cha mutapu winou, tufanyidin kulembil mulong wach ni pamwingap kusal usu wa kwambamb nend mwin Kristu waswila kal kurutu kwa kukwat mupak ukwatijadina nich chitulejina kom ketu.​—Jinswir 2:1-5; Filip 4:5.

Dizu dia Nzamb ditulejin “kuyiziyil in kutakel ni akweta ulabu, ikala kand awanyidina mulong wa kusal yom yawonsu yiwamp, . . . [isikena].” (Titus 3:1, 2) Chawiy, kurutu kwa kukwat mupak tufanyidin kwiyipul yipul yiney anch: ‘Ov, mudimu winginkishinau kusal ou, ukutwish kwingandjik mu milong ya chipolitik? Ov, ukutwish kuvundangesh yitongijok yam ni kwingandjik mu difukwil dia makasu?’ (Mike 4:3, 5; 2 Korint 6:16, 17) ‘Ov, mudimu winou ukez kwintambulang chisu chivud chinifanyidina kuwanyish yisend yam ya win Kristu ni kwinkangesh kuyisal?’ (Mateu 28:19, 20; Efes 6:4; Hebereu 10:24, 25) ‘Ov, mudimu winou ukez kand kwinkwash chakwel nikala nich chisu chivud cha kulejan, ni kwikal pamwingap mu mudimu wa chisu chawonsu?’​—Hebereu 6:11, 12.

Anch muntu wakwat mupak wa kusal midimu yakad kwikal ya usalay pandond pa kumukwat kumutek mu rukan, ambay nend in Kristu afanyidin kulimish mupak wend. (Rom 14:10) Pakwez, anch waman anch kakwetap mutapu wa kusal midimu yiney, ambay nend in Kristu afanyidin kand kulimish mupak wend winou.​—1 Korint 10:29; 2 Korint 1:24.