BIBLIOTEK Udia pa Kapend
BIBLIOTEK
UDIA PA KAPEND
Uruund
  • BIBIL
  • MIKAND
  • YIKUMANGAN
  • lv p. 219 ​-​ p. 221
  • Chilondilay Bibil Piur pa Kujip Uruw ni Kwaurik

Kwikil video ukimbina

Video winou umukimbinap amboku nawamp.

  • Chilondilay Bibil Piur pa Kujip Uruw ni Kwaurik
  • “Ilamany Ayinen Mu Rukat ra Nzamb”
  • Yom Yifanakena
  • Limish “Antu Abombakeshay Kal Nzamb”
    Chinong cha Kalam Chilejen Want wa Yehova—2018
  • Yipul Ya In Kutang
    Chinong cha Kalam Chilejen Want wa Yehova (Cha Kwilej)—2022
“Ilamany Ayinen Mu Rukat ra Nzamb”
lv p. 219 ​-​ p. 221

WENJIL

Chilondilay Bibil Piur pa Kujip Uruw ni Kwaurik

Yehova usotin anch ambay atijadina afanyidin kushal ashinshamena ku machip mau ma uruw. Chisu chatekay ikundj wa kusambish ni mband pamwing, Yehova walonda anch: “Ikundj ukez . . . kulamat kudi mukajend, chad awiy aad akwikal mujimbu umwing.” Kupwa, Yesu wachirikina mazu minam ni kulond kand anch: “Chabombakeshay kal Nzamb wachinung, pikil muntu wachauril.” (Disambishil 2:24; Mateu 19:3-6) Chawiy, ku mutambu wa Yehova ni Yesu, uruw ufanyidin kulab djat ni pakufay mbay umwing. (1 Korint 7:39) Chidia uruw chom chitumbila, chawiy lel, kuujip kudiap chom cha kusengan nich bwat. Chakin kamu, Yehova ukisin kujip uruw pakad diyingish dimedina pa mifund ya Bibil.​—Malakiy 2:15, 16.

Kwambatan nich Bibil, pa mupak ik umwing witiyikina kujip uruw? Chidi chiwamp amboku kwijik anch Yehova ukisin masandj ni usund. (Disambishil 39:9; 2 Samwel 11:26, 27; Kuseng 51:4) Mulong masandj chidi chisal chikisinau kudi Yehova, diawiy diyingish dimwing kusu ditiyijinay chakwel uruw ufa. (Chakwel wijika chirumburikina masandj, tang shapitre 9, paragraf 7 wa buku winou.) Pakwez, Yehova witijin mband ap ikundj wakad kwend masandj kukwat mupak wa kumulikishin mbay nend chakwel ashakama nend ap ajipa uruw. (Mateu 19:9) Chawiy, anch mbay wa uruw wakad kusal masandj wakwat mupak wa kujip uruw, ndiy kasadinap chom chikisinau kudi Yehova. Chikwau kand, chikumangen cha in Kristu chifanyidinap kumubachik mbay mwin mwawonsu kujip uruw. Pakwez, kudi mikadil yikutwisha pamwingap kumubachik mbay wa uruw kushal ni mbay nend, pakampwil anch mbay winou wamekesh dikarumuk diakin. Ching mbay wa uruw amwinend ukweta mbay nend wasadila masandj ndiy ukweta mbil ya kukwat mupak wa kujip uruw ap bwat ni ufanyidin kwitiyij yibudikin yawonsu yikutwisha kubudikaku.​—Galatia 6:5.

Pa yisu yimwing ya mashakamin mayimp, in Kristu akwatining mupak wa kwaurik ap kujip uruw ap anch mbay nend wa uruw kasadinap masandj. Kusutil ku mashakamin minam, Bibil umulejin mbay wamulika kal mbay nend anch: “Kangal kand wachik, ching anch wachirik kudi nfumwend.” (1 Korint 7:11) Mwin Kristu mudi winou kafanyidinap kumwendil muntu mukwau mulong wa kwatijan nend bwat. (Mateu 5:32) Tushinshikinany amboku mikadil yimwing ya mu mashakamin yikutwisha kuyishikij ambay a uruw ku kwaurik.

Anch ikundj kasotinap kuwanyish yisend yend ya mu dijuku. In mu dijuku akutwish kushik ku kuman mar nakash anch ikundj kasotinap kuwanyish chisend chend cha kuyidish chisu chichidiay nich usu. Bibil ulondil anch: “Anch muntu walik . . . kulam dijuku diend pakampwil, muntu mwinou washadikin kal ritiy rend.” (1 Timote 5:8) Anch ikundj ulikin kukarumuk, mband ukutwish kukwat mupak wa kuya kwa mburamatad chakwel amwitiyijina kwaurik ni nfumwend mulong wa kwilam ni kulam an. Amakurump afanyidin kutal nawamp ikundj mwinou ufundinau kudi mukajend mulong wa kulik kukwash dijuku diend. Mwin Kristu ulikina kuwanyish yisend ya mu dijuku diend akutwish kumwopat mu chikumangen.

Anch umumeshining mar ni kumubul nakash. Ikundj ap mband ukutwish kwikal nich chisum chikash chikutwisha kumushikij ku kumumesh mbay nend mar ni kumubul mu mutapu wa kutek mwom wend mu ubaj. Anch ambay a uruw inay awonsu aad adi atuman a Yehova, amakurump a chikumangen akwet chisend cha kushinshikin mulong wau nawamp win kamu. Muntu ukweta chaku cha kwov ujim nakash ni kubulan akutwish kumwopat mu chikumangen.​—Galatia 5:19-21.

Anch urund uwamp wa mbay wa uruw nenday Nzamb udi mu ubaj ukash. Yisu yivud, mband ap ikundj ukutwish kukimb mutapu wa kumukangesh mbay nend kumwifukwil Nzamb ap kumushikij ku kujiril yany kanang ya Nzamb. Pa chisu chin chang, mbay wa uruw usadinau mwamu ukutwish kuya kwa mburamatad chakwel amwitiyijina kwaurik ni mbay nend pamenay anch chawiy chifanyidinay kusal chakwel ‘amuziyila Nzamb kupandikan kuyiziyil antu.’​—Midimu 5:29.

Mu mashakamin mayimp nakash mudi matwisambina kal am, muntu ap umwing kakwetap mbil ya kumulej mbay wasadidinau nayimp kudi mbay nend chakwel aurika nend ap ashala nend bwat. Arund in Kristu ap amakurump akutwish kupan yiyul ya mu Bibil pakwez awiy kijap yom yawonsu yisadikininga pakach pa ukundj ni mband bwat. Ching Yehova amwinend ndiy umeninga yawonsu. Pakwez, mband ap ikundj mwin Kristu kamutumbishinap Yehova palimishinay uruw chisu chijimbishinay milong yikwetau mu uruw chakwel alikijana. Yehova wij yom yawonsu yikutwisha kuyibachik ambay a uruw ku kwaurik, ap anch umwing wa ku ambay inay wayijindjikap nchik. Chakin kamu, “ndiy ukat kuman yom yawonsu zwang, kudi ndiy kwawiy kutukeza kurumburil yisalijok yetu yawonsu.” (Hebereu 4:13) Anch mashakamin mayimp madandamedin mu uruw, mwin Kristu ap umwing kafanyidinap kulond nayimp piur pa mwin Kristu ukwatina mupak wa kwaurik ni nfumwend ap ni mukajend bwat. Kupwa, twijikany amboku anch: “Etu awonsu tukez kwiman kurutu kwa dirumburish dia Nzamb.”​—Rom 14:10-12.

    Mikand ya Uruund (1999-2025)
    Budik
    Andam
    • Uruund
    • Kwangan
    • Yom ukatina
    • Copyright © 2025 Watch Tower Bible and Tract Society of Pennsylvania
    • Mbil ja Kusadin
    • Mbil ja Ujindj
    • Paramètres de confidentialité
    • JW.ORG
    • Andam
    Kwangan