Ov, Atuman a Yehova inch wija? Amwing a pakach petu akutwish kwikal amutej ney, ambay ney a mudimu, ap ambay ney a shikol. Ap twisambap kal ney minsamb ya mu Bibil. Ov, chakin kamu tudi anany, ni mulong wak tulejeninga yitiyij yetu patok?

Tudi mudi antu awonsu. Tudiokidil ku jindond ni mu mikadil ya mashakamin kushalijan. Amwing a mukach mwetu adinga mu marelijon kushalijan chisu chadinga antu akwau ni kulik kwitiyij Nzamb. Pakwez, kurutu kwa kwikal Atuman, antu a mukach mwetu atambula chisu cha kushinshikin nawamp win kamu malejan ma mu Bibil. (Midimu 17:11) Twitiyija yom yitwileja, ni kupwa ayinetu twatonda kumwifukwil Yehova Nzamb.

Tutanidiningamu mu kwilej Bibil. Mudi muntu mwin mwawonsu, turishining nich milong mudi kuziy kwetu. Pakwez, kusutil ku kwiyijidish kusadil yany ya mu Bibil mu mashakamin metu ma machuku mawonsu, twarijekin mikadil yetu ya usey mu mwom. (Kuseng 128:1, 2) Dined didi diyingish dimwing dimekeshina mulong wak tulejeninga kudi antu akwau yom yiwamp twilejininga kusutil mu Bibil.

Tudi mu mashakamin mambatena nich yany ya mu Bibil. Yany yiney ya usey, mudi muyilejenau mu Bibil, kwikal ni mashakamin makwatijadina ni Bibil kututwadining ku mashakamin mawamp, ma kalimish nau antu akwau, ni kusongining mabuj mudi kashinsh ni kudimuk. Yany yiney ya mu Bibil yibachikining kand kukudish ukash wa mujimbu ni kusong mabuj mawamp mu chisak cha antu, ni yikasikeshining uumwing wa mu dijuku ni mwikadil uwamp. Nich kashinsh anch ‘Nzamb kakwetap kasolikany,’ twimening ayinetu mutapu tudia mu dijuku dia akadivar a pa mangand mawonsu adia mu uumwing mu yitiyij yetu pakad kasolikany, ulombu wa chikit ni mimbu ya chipolitik. Ap anch tudi mudi antu awonsu, tuding antu a chisak chimwing.—Midimu 4:13; 10:34, 35.

• Ov, chom ik chisadiningau Atuman a Yehova chakwel ikal mu kwovijan ni yisak ya antu akwau?

• Ov, yom ik ya usey yilejeningau Atuman kusutil ku kwilej Bibil?

Antu avud atongining anch Atuman a Yehova didi dijin dia relijon musu. Pakwez, pasutin kal mivu 2 700, ching atushalapol a Nzamb wakin awiy ijikau mudi “atuman” end. (Isay 43:10-12) Kudiok mu muvu wa 1931, adinga atwij mudi in Kwilej a Bibil. Ov, mulong wak twitiyijin dijin dia Atuman a Yehova?

Didi dijin dilejeninga Nzamb wetu. Kwambatan nich mani- skri wa mifund ya pasak, dijin dia Nzamb, Yehova, diding tunan tuvud mu Bibil. Mu ma Bibil mavud makarumunau kal, dijin dined adidiosha ni afunda yijiken, mudi Mukaleng ap Nzamb. Chawiy, Nzamb wakin walejana amwinend kudiay Moses dijin diend, Yehova, palonday anch: “Dined didi dijin diam dia chikupu.” (Kubudik 3:15) Mu mutapu winou, ndiy wiyaurila amwinend ni anzamb akwau awonsu a makasu. Chawiy, tudi ni musangar upandakena wa kulejan dijin dia Nzamb ditumbila.

Didi dijin dilejeninga chisend chetu. Mu mivu ya antu a pakur kusambishil pa muntu utentamina Abel, awiy alejana patok uman wa ritiy rau mudiay Yehova. Mu kusut kwa yitot ya mivu, Nowa, Aburaham, Sara, Moses, David, ni antu akwau inunga ku “chisak chijim cha atuman.” (Hebereu 11:4–12:1) Mudi mukutwishay muntu kanang kupan kamu uman wa chikunku piur pa muntu wakad mulong, etu twakwatin mupak wa kwijikish uyakin piur pa Nzamb wetu.

Tukat kumwimburij Yesu. Bibil umutazukining anch: “kaman ushishamen ni wakin.” (Kujingunik 3:14, TMK) Yesu amwinend walonda anch ndiy ‘usadil chakwel dijin dia Nzamb adijik’ ni udandamedin ‘kupan uman wa uyakin’ piur pa Nzamb. (Yohan 17:26; 18:37) Chawiy lel, in kwitiyij akin a Kristu afanyidin kulejan dijin dia Yehova ni kudijikish. Chom chinech chawiy chiyibachikininga Atuman a Yehova kusal mwamu.

• Ov, mulong wak in Kwilej a Bibil atambula dijin dia Atuman a Yehova?

• Ov, mu kusut kwa mivu yinch yasadika chakwel Yehova ikala ni atuman pa divu?

• Ov, nany udia Kaman mujim wa Yehova?

Bibil wabwaka anch kupwa kwa rufu ra Kristu, alej a makasu akez kulank mukach mwa in Kristu a kusambish ni kujondish uyakin wa mu Bibil. (Midimu 20:29, 30) Pasuta machuku, kubwak kwinoku kwawanyina kamu. Awiy abombakesha pamwing mafundish ma Yesu nich yitongijok ya marelijon ma apagan, ni ntad ja in kupumbwok jakula mu chisak cha in Kristu a pasak. (2 Timote 4:3, 4) Ov, mutapu ik tukutwisha kwikal nich kashinsh anch nlel unou tukwet yovil yiwamp ya yom yifundishinay chakin kamu Bibil?

Chisu chawanyin kal cha Yehova kumekesh uyakin. Ndiy wabwaka anch mu ‘chisu cha kwinsudiel, ronganyin rakin rikez kupandakan.’ (Daniel 12:4) Mu muvu wa 1870, kachisak kakemp ka in kukimb uyakin amana anch yishankur ya maegliz mavud yadingap yilejen uyakin wa mu Bibil. Chawiy, asambisha kukimbijol mulong wa kwov nawamp mafundish ma Bibil ma nsambishil, ni Yehova wayiyukisha nich kurumburik kuwamp kwa mifund.

Antu a kashinsh ileja Bibil nawamp win kamu. In Kwilej Bibil inay a mushiku atusambelaku, alondula milad ya kwilej yitusadininga djat ni nlel unou. Isambinanga mutu ni mutu wa mulong wa mu Bibil. Chisu chatanangau verse wa mu Bibil wadinga ukasiken kutesh kwov, awiy akimbanga maverse makwau chakwel mamurumburil. Pashikangau kwinsudiel kwa kukimbijol kwau, anch kwambaten nich yikunku yikwau ya Mifund, awiy amufundanga verse winou. Kupwa kwa kulik Bibil arumburila amwinend, awiy ajingunina kand uyakin piur pa dijin dia Nzamb ni Want, rutong rend piur pa antu ni divu, mwikadil wa afu, ni ruchingej ra divumbuk. Kukimbijol kwau kwayidiosha mu usuk wa yitiyij ni yisal yivud ya makasu.—Yohan 8:31, 32.

Mu muvu wa 1879, in Kwilej a Bibil ajingunina anch chisu chawanyin kal cha kupalangesh uyakin mu mangand mawonsu. Chawiy, mu muvu winou, awiy asambisha kubudish gazet tusadidina djat ni nlel unou, Chinong cha Kalam Chilejen Want wa Yehova. Katat tulejen uyakin wa mu Bibil kudi antu mu jingande 240 ni kusut ni mu mazu 900 ni kusut. Ronganyin rakin kandikal ripandakanap kuvulijan mudi riner!

• Kupwa kwa rufu ra Kristu, ov, chom ik chashikena ku uyakin wa mu Bibil?

• Ov, chom ik chatukwasha kujingunin kand uyakin wa Dizu dia Nzamb?

Pasutin kal dikum dia mivu, Atuman a Yehova asadina, achapa ni apalangesha ma Bibil mavud kushalijan. Kupwa twamana kuswir kwa kubudish dikarumun disu diela kuyikwash nawamp antu kwilej ni “kwijik uyakin,” mulong rawiy rutong ra Nzamb padiay muntu mwin mwawonsu. (1 Timote 2:3, 4) Chawiy, mu muvu wa 1950, twasambisha kubudish yikunku ya Bibil mu ridim retu ra katat, Traduction du monde nouveau. Bibil mwinou amukarumuna nich kashinsh ni mu mutapu uwamp mu mazu 170 ni kusut.

Bibil wading ufanyidin kwovikan nawamp. Chisu ni chisu jindim jiswimpining, ni yikarumun ya Bibil yivud yikwet mazu makad kwovikan ap makur makasikena kutesh. Chikwau kand, atana maniskri makur mavud makin madinga piswimp ni ma kwinsambishil, ni maleta kwovikan kupandakena kuwap kwa Bibil mu ridim ra in Hebereu, mu Arameyen ni Grek.

Dikarumun diading difanyidin kwikal dishinshamena ku dizu dia Nzamb. Pa ndond pa kukarumun nich want ipau mifund ya Nzamb yapepilau, in kukarumun a Bibil adinga afanyidin kwikal ashinshamena ku mifund ya nsambishil. Pakwez, mu yikarumun yivud, dijin dia Nzamb, Yehova, kadisadidinap mu Mifund Yitumbila.

Bibil wading ufanyidin kupan katumb kudi Sakatang wend. (2 Samwel 23:2) Mudi mumumekeshinau chilakej chidia kwishin oku, mu Traduction du monde nouveau, dijin dia Yehova adichirisha tupamp 7 000 mudi mwadifundau mu maniskri makur ma Bibil. (Kuseng 83:18) Mudi chibudikin cha mivu ya kukimbijol kwa mushiku, Bibil winou usangareshin kumutang mulong umekeshin patok chitongijok cha Nzamb. Ap anch ukwet Traduction du monde nouveau mu ridim rey ap bwat, tukukasikeshin kwikal ni chaku chiwamp cha kutang Dizu dia Yehova dichuku diawonsu.—Joshua 1:8; Kuseng 1:2, 3.

• Ov, mulong wak twakwata mupak anch dikarumun disu dia Bibil diading diswirikedina?

• Ov, chom ik chiwamp cha pichuku-pichuku chifanyidina kusal muntu mwin mwawonsu usotina kwilej rusot ra Nzamb?