Tuyifutiningap amakurump adia mu dirijek dietu. Pakwez, chisu chasambisha chikumangen cha in Kristu, amakurump atonda atulam awanyishina yitinau chakwel ikal “atufung a in Chikumbu cha Nzamb.” (Midimu 20:28) Amakurump inay adi antu akudilakal muspiritu ni atakedining mu chikumangen ni mu mudimu wa ukafung, “kangal mulong wa kusot kwa yom, pakwez ni kutakaman.” (1 Pita 5:1-3) Ov, mudimu ik usadiningau mulong wa ukwash wetu?

Atubangidining ni atukingining. Amakurump atakedining ni akwashining kuking chikumangen muspiritu. Chakin kamu, Nzamb uyichingedining mulong wa chisend chinech cha usey, chawiy, amakurump kakatap kuyikel antwend, pakwez awiy ipanining mulong wa ukash ni musangar wetu. (2 Korint 1:24) Mudi kafung wa mushiku ukata kubangin mukoku ni mukoku wend, amakurump asadining usu wa kwijikijan ni chid chawonsu cha chikumangen.—Jinswir 27:23.

Atufundishining mutapu wa kusal rusot ra Nzamb. Rubing rawonsu, amakurump atakedining yikumangan ya chikumangen mulong wa kukasikesh ritiy retu. (Midimu 15:31, 32) Amakundj inay in kwipan atakedining kand mijikit ya kulejan, asadining pamwing netu ni atwijidishining mu milad yawonsu ya mudimu wa kulejan.

Atwinkishining dikasikesh dia muntu ipend. Chakwel atukwasha kukasikesh urund wetu wa pakampwil ni Yehova, amakurump a pol petu atwishining kutwendil ku yikumbu yetu mulong wa kwisamb netu ap isambining kand netu ku Chot cha Want mulong wa kutwinkish ukwash ni rongoj ra mu Mifund.—Jakobu 5:14, 15.

Kuwejaku midimu yau ya mu chikumangen, amakurump avud akweting kand midimu yau ya ku mujimbu ni yisend ya dijuku yitining chisu ni manangu mau. Chawiy lel, tufanyidin kuyinkish amakurump inay asadininga mudimu ukash kalimish ketu.—1 Tesalonik 5:12, 13.

• Ov, chisu chisend cha amakurump mu chikumangen?

• Ov, mu jinjil ik mumekeshiningau amakurump kutubangil kwau kwa pakampwil?

Bibil wisambidin pa yisak yaad ya amakundj in Kristu akwetinga yisend mu chikumangen—‘amakurump ni ankwash a mudimu.’ (Filip 1:1) Yisu yivud, kuding amakundj ni ankwash a mudimu avud asadininga mu chikumangen ni chikumangen. Ov, mudimu ik uwamp usadiningau ankwash a mudimu mulong wa ukwash wetu?

Akwashining chisak cha amakurump. Ankwash a mudimu ading mu urund wa piswimp ukash pamwing ni Yehova, adi antu akuchingejin, ni adi amakundj akweta kom kawamp, ansand amwing ni amapal akwau. Awiy alamining yom ya usey pakwez yisu yivud kuding midimu yimekeninga ku mes yifanyidinau kusal mu chikumangen. Chinech chawiy chiyikwashininga amakurump kushinshikin pa yisend yau ya kufundish ni ya ukafung.

Asadining midimu ya ukwash. Ankwash a mudimu amwing asadining mudi in kwak angendj mu kuyezishaku antu awonsu ezina ku yikumangen. Amwing asadining mudimu wa kurijek mikro, kupan mikand, kulam yipau ya chikumangen, ni kusal mudimu wa kwangan teritwar wa kulejan kudi yid ya chikumangen. Akwau akwashining kand ku mudimu wa kulam Chot cha Want. Amakurump akutwish kuyit chakwel ayikwasha amakurump akwau. Ankwash a mudimu asadining kwa kwisotin chikalap nchik yisend yiney yiyinkishinau, ni chikumangen chiyilimishining pa midimu yau yikash yisadiningau.—1 Timote 3:13.

Amekeshining chilakej chiwamp mudi amakundj in Kristu. Ankwash a mudimu ayitondining mulong wa mikadil yau yiwamp ya muspiritu. Chisu chiyinkishiningau yikunku ya kusal, awiy akasikeshining ritiy retu. Kusutil ku kumekesh chilakej chiwamp mu mudimu wa kulejan, ankwash a mudimu atukwashining kwikal ni mushiku uvud. Chakwel ikal nich spiritu wa kwovijan pamwing ni amakurump, awiy akwashining kwikal ni musangar ni kwikal kand mu uumwing. (Efes 4:16) Yisu yimwing, awiy akutwish kand kuwanyish yitinau chakwel asal mudi amakurump.

• Ov, ankwash a mudimu adi antu a mutapu ik?

• Ov, mutapu ik ukwashiningau ankwash a mudimu kusal mudimu wa usey mu chikumangen?

Yisu yivud, Mifund ya Grek ya in Kristu yisambidining piur pa Barnabas ni kambuy Paul. Amakundj inay asalanga mudi atulam in kwendangan, adinga ni kwendil yikumangen ya pasak. Ov, mulong wak? Mulong awiy ading ni kubangil chakin kamu pa mwikadil uwamp wa muspiritu wa akadivar nau. Paul walonda anch ndiy wasota ‘achirik ni kuyital akadivar’ chakwel ashinshik mutapu udiau. Ndiy wela kuya mu weny wa kwisotin wa makilometre chitot makum musamban ni umwing mulong wa kuya ni kuyikasikesh. (Midimu 15:36) Riner rawiy rusot ridingau nich atulam etu in kwendangan nlel unou.

Ezining mulong wa kutukasikesh. Kalam ni kalam wa munyingumuku wendidining yikumangen piswimp ni 20, ni usutishining rubing rumwing mu chikumangen ni chikumangen pa muvu tupamp twaad. Tukutwish kutaninamu nakash kusutil ku uman wa akadivar inay ni anch aten, pamwing ni akajau. Awiy asadining usu wa kwijikijan ni ansand pamwing kand ni amakurump, ni asotining kuya netu mu mudimu wa chingand ni kuya kand nau ku malejan metu ma Bibil. Atuman inay ayikwashining amakurump kusal mudimu wa ukafung, ni atukasikeshining, asadining madiskur makasikeshina ku yikumangan ni ku yitentam.—Midimu 15:35.

Amekeshining musangar wau kudi antu awonsu. Atulam a munyingumuku asangaredining nakash pa mwikadil wa muspiritu wa yikumangen. Akumangening pamwing ni amakurump ni ankwash a mudimu mulong wa kushinshikin mutapu wa kuya kurutu ni kuyinkish chiyul cha kusadil chakwel awanyisha yisend yau. Ayikwashining ayibol chakwel ikal nich yibudikin yiwamp mu mudimu wau wa kulejan, asangaredining kand kwijikijan nau akadivar asu mu uyakin ni kutesh yom yayikwasha chakwel aya kurutu muspiritu. Akadivar ni akadivar inay ipanining ayinau kwa kwisotin mudi ‘ambay in mudimu mulong wa yisakin yetu.’ (2 Korint 8:23) Tufanyidin kwimburij ritiy rau ni kwipan kwau kudi Nzamb.—Hebereu 13:7.

• Ov, rutong ik rendidiningau nich atulam a munyingumuku ku yikumangen?

• Ov, mutapu ik tukutwisha kutaninamu kusutil ku kwendil kwau?

Chisu chishikedina mar, pakad kulab, Atuman a Yehova irijekining mulong wa kupan ukwash wau kudi akadivar nau akwachikina nich. Usu mudi winou umekeshining rukat retu rakin kudi muntu ni mukwau. (Yohan 13:34, 35; 1 Yohan 3:17, 18) Ov, mu jinjil ik tupanininga ukwash?

Pitukata kupan milambu ya nfalang. Chisu chashikena kamungun mujim mu Yudeya, in Kristu akusambish a mu Antiosh atuma nfalang mulong wa kuyikwash akadivar nau a muspiritu. (Midimu 11:27-30) Chilik chimwing, pituteshininga anch akadivar netu adia mu jingand jimwing arishin nich mar makash, tutumining nfalang kusutil ku chikumangen cha pol petu ku ukwash wa yom ya kumujimbu mulong wa kuyikwash antu adia mu maswir makash.—2 Korint 8:13-15.

Tupanining ukwash uwamp. Amakurump adia mwindond yirishina nich mar minam akutwish kwijik chid ni chid cha chikumangen chakwel ikal nich kashinsh anch muntu mwawonsu amuchindin ni wapandin. Komite wa ukwash ukutwish pamwing ap kutakel mutapu wa kupan ukwash wa yakudia, mem mawapina kuna, maswin, ndond ya kulal, ni mutapu wa kutan ukwash wa mwon wa kuna. Atuman avud akweta ukaliweny aswiridining kwa kwisotin kuya kwindond kudia mar chakwel niyau asalaku midimu ya ukwash ap kurijek yikumbu ni Yot ya Want yasheshikina. Uumwing winou utusangareshining mu dirijek, uman tukweta wakin utubachining kusal pamwing ni utukwashining kupan ukwash swa mu yisu ya maswir. Ap anch tupanining ukwash wetu kudi “anamakwetu in ritiy,” tuyikwashining kand antu akwau chisu chitwishikina, chikalap nchik relijon wau.—Galatia 6:10.

Tupanining ukwash wa muspiritu ni wa kumujimbu. Pakampwil, antu adinga mu mar aswiridining ukwash. Pa yisu mudi yiney, tutambwiling usu kudiay Yehova, “Nzamb wa kwongoj kwawonsu.” (2 Korint 1:3, 4) Tusangaredining kulejan yakushilamu ya mu Bibil kudi antu akad ruchingej, ni kuyilej nich kashinsh anch piswimp ap Want wa Nzamb ukez kupwish yom yawonsu yiyimp yiletininga mar.—Kujingunik 21:4.

• Ov, mulong wak Atuman afanyidin kwakul swa mu yisu ya mar?

• Ov, rongoj ik ra muspiritu tukutwisha kumekesh kudi antu apandina?

Piswimp ni rufu rend, Yesu wisamba pamwing ni in kwilejend anying ku ujindj—Pita, Jakobu, Yohan ni Andare. Yesu padingay ni kulond piur pa chijingidij cha kushik kwend mu machuku ma nsudiel, ndiy wipula chipul cha usey anch: “Kashalapol ushishamena ni kubabal, watekau kal pa mutu pa a mu chikumbu, ukuyinkish yakudia pa chisu chau, ndiy nany?” (Mateu 24:3, 45, TMK; Marko 13:3, 4) Yesu wayileja in kwilejend nich kashinsh anch mudi “mwant wa mudimu” wau, ndiy wafanyidina kutond antu inay adinga afanyidin kupan yakudia yiwanidina ya muspiritu kudi in kwilejend mu machuku mansudiel. Ov, nany wela kwikal kashalapol winou?

Awiy adi in kwilej akin a Yesu azizidilau many. “Kashalapol” wangening yakudia ya muspiritu pa chisu chiwanyidina kudi ambay in kumwifukwil Yehova. Tudi atakedinau kudi kashalapol mwinou kashalapol ushishamena chidandamedina kutwinkish “yakudia pa chisu chiwanyidina.”—Luka 12:42.

Awiy asadining mu chikumbu cha Nzamb. (1 Timote 3:15) Yesu wamwinkisha kashalapol chisend chijim cha kusal mudimu wa chikunku cha pa divu cha dirijek dia Yehova—kulam mapit ma ku mujimbu, kutakel mudimu wa kulejan, ni kutufundish kusutil ku yikumangen yetu. Chakwel atwinkisha yom yituswiridina pa chisu chifanyidina, “kashalapol ushishamena ni kubabal” wangening yakudia ya muspiritu kusutil ku mikand tusadidininga mu mudimu wetu wa kulejan, pamwing ni maprogram masadikininga ku yikumangan yetu ni ku yitentam.

Kashalapol ushishamening mu uyakin wa Bibil ni ukwet chisend cha kulejan rusangu ruwamp, ni udi kand mwin kubabal piur pa mutapu ubangidiningay pa divu yisak ya Kristu nich manangu. (Midimu 10:42) Yehova uyukishining mudimu wend chakwel utandurik ni wikal nich yakudia yivud ya muspiritu.—Isay 60:22; 65:13.

• Ov, nany winkishau chisend kudi Yesu cha kuyidish in kwilejend muspiritu?

• Ov, mu jinjil ik kashalapol udi ushishamena ni kubabal?

Mu chirung cha mivu chitot ya kusambish, ka chisak kakemp ka ‘atwimbuy a Yesu nau amakurump a mu Yerusalem,’ asalanga mudi chisak chitakedina mulong wa kukwat mipak ya usey piur pa chikumangen cha in Kristu awonsu azizidilau many. (Midimu 15:2) Chisu chakwatangau mupak pamwing, awisambinanga kusutil ku Mifund ni ku kukimb umutakel wa spiritu wa Nzamb. (Midimu 15:25) Chawiy chilakej chilondwilau nlel unou.

Asambishin kal kuchisadin kudi Nzamb chakwel chisala rusot rend. Akadivar azizidilau many asadina mu Chisak Chitakedina asangaredining nakash mu Dizu dia Nzamb ni akwet uman uvud wa kupwish milong yisadikininga ni ya muspiritu. Awiy akumangening rubing ni rubing mulong wa kushinshikin maswir ma akadivar a pa mangand mawonsu. Mudi mu chirung cha mivu chitot ya kusambish, umutakel wengamidina mu Bibil aupana kusutil kand ku mikand ap kusutil kudi atulam in kwendangan ni antu akwau. Chinech chiyikwashining antu a Nzamb kutongijok ni kusal mu uumwing. (Midimu 16:4, 5) Atulam a Chisak Chitakedina arijekining yakudia ya muspiritu, ayikasikeshining antu awonsu kutek pa ndond ya kusambish mudimu wa kulejan wa Want, ni kutakel mudimu wa kuyitond akadivar afanyidina kwikal ni yisend.

Chitiyijin ku umutakel wa spiritu wa Nzamb. Chisak Chitakedina chichingejining mudiay mwant Mwin Mangand, Yehova ni Mutu wa chikumangen Yesu, mulong wa kuyitakel. (1 Korint 11:3; Efes 5:23) Yid yiney yimeningap ayinay mudi antakel a antu a Nzamb. Awiy pamwing ni in Kristu awonsu azizidilau many, akat “kumulondul Mwan a Mukoku [Yesu] kwawonsu kuyilay.” (Kujingunik 14:4) Chisak Chitakedina chisangaredining nakash pitukata kulembil mulong wau ni wa mudimu wau.

• Ov, anany adinga mu chisak chitakedina cha mu chirung cha mivu chitot ya kusambish?

• Ov, mutapu ik Chisak Chitakedina nlel unou chikimbininga umutakel wa Nzamb?

Betel, didi dizu dia Hebereu dirumburikina anch “Chikumbu cha Nzamb.” (Disambishil 28:17, 19) Didi dizu diwanyidina kamu mulong wa chikumbu chijim ap yikumbu yisadidiningau midimu nich rutong ra pakampwil kudi Atuman a Yehova chakwel atakela ni akasikesha mudimu wa kulejan usadikina pa mangand mawonsu. Chisak Chitakedina chisadidining mudimu ku biro mujim mu New York, mu États-Unis, ni kwawiy kutakediningau midimu ya mabiro ma mitiy madia mu jingand jivud. Mudi chisak, antu inay asadininga midimu yiney ayij mudi yidi ya dijuku dia Betel. Mudi mudinga dijuku, antu inay ashiching ni asadining pamwing, asangaredining kudia pamwing, ni kwilej Bibil pamwing mu uumwing.—Kuseng 133:1.

Ndond ya pakampwil ya antu amekeshininga mwikadil wa kwipan. Ku Betel mwin mwawonsu kuding amakundj ni amband in Kristu ipanina chakwel asal rusot ra Nzamb ni kusadil pakampwil yisakin ya Want chisu chawonsu. (Mateu 6:33) Kwikiling muntu pakach pau utambwilinga difut, pakwez antu awonsu ayinkishining yikumbu ya kulal ni yakudia ni nfalang jikemp ja mu dibeng mulong wa kufutin yom ya muntu ipend. Muntu mwin mwawonsu usadininga ku Betel ukwet chisend, amwing asadining mu mabiro, kwimpish, ap mu chikumbu cha kudil. Amwing asadining mu chikumbu cha kuchapin mikand ap cha kuyikungij, ap kukomb yikumbu, kutut maswin, kulam ni kurijek yom kushalijan, ap yom yikwau.

Ndond ya midimu yivud mulong wa kukwash mudimu wa kulejan Want. Rutong ra Betel mwin mwawonsu riding ra kwijikish uyakin wa mu Bibil kudi antu avud anch chitwishikin. Broshir winou udi chilakej chimwing cha midimu yiney. Amufunda kwimbil ya Chisak Chitakedina, kusutil ku kumutum ku kasu ka nzembu kudi yitot ya in kukarumun adia pa mangand mawonsu, amuchapa ku mashiny majim machapininga swa ku ma Betel mavud machapininga ni amutuma mu yikumangen kusut 120 000. Pa chisu ni chisu chisadikininga midimu yiney, yid ya dijuku dia Betel ayikwashining nich ukwash mulong wa kuswapej midimu yawonsu—kulejan rusangu ruwamp.—Marko 13:10.

• Ov, anany asadininga mudimu ku Betel, ni mutapu ik uyikwashiningau?

• Ov, mudimu ik wa kuswapej usadikininga ku Betel ni Betel?

Yid ya dijuku dia Betel yisadining mu madepartema kushalijan, yishinshikidining pa mudimu wa kulejan wa mwingand yimwing ap jivud. Akutwish kusal mu yisak ya in kukarumun, ya in kuchap magazet, kukungij mikand, kusal mu chikumbu cha kulamin mikand, asadining mudimu wa kubudish maband video ap maband kaset, ni ashinshikindining kand pa milong yikwau ya mwingand.

Komite wa Mutiy utakedila mudimu. Chisak Chitakedila chikwet ruchingej pa mudimu usadikininga mu komite ni komite wa mutiy chakwel mu Komite wa Mutiy mwikala amakurump asatu ap avud awanyishina yitinau. Komite winou udandamedining kwijikish jinsangu ku Chisak Chitakedila piur pa kuya kurutu kwa mudimu wa ngand ni ngand yidia mwinshin mwa umutakel wa mutiy winou ni kupwish mulong win wawonsu ukutwisha kulank. Marapor mudi minam makwashining Chisak Chitakedila chakwel chikwata mupak piur pa milong yifanyidinau kushinshikin mu mikand ya mu machuku ma kurutu, ni ku yikumangan ni ku yitentam. Antimesh a Chisak Chitakedila ayitumining chisu chawonsu mulong wa kwendil ku mabiro ma mutiy ni kupan umutakel ku Makomite ma Mitiy chakwel awanyisha yisend yau. (Jinswir 11:14) Program winou wa pakampwil uding ni diskur disadiningay ntimesh wa biro mujim wa mangand mawonsu ni amutenchikining mulong wa kuyikwash antu asadininga mu biro wa mutiy wa teritwar ushichau.

Ukwash upaniningau ku yikumangen ya pol pen. Akadivar akweta yisend adia mu komite wa mutiy akat kwitiy kusambish kwa yikumangen yisu. Akadivar inay atakedining kand mujikit wa ayibol, amishoner, ni atulam a munyingumuku asadininga mu teritwar utakedinau ku biro wa mutiy. Atenchikining yitentam ya pakampwil, yitentam ya munyingumuku ni yitentam ya distrikt, atakedining mudimu wa kutung Yot ya Want yisu, ni ashinshikidining mikand yituminingau ku yikumangen mulong wa kuwanyish maswir may. Mudimu wawonsu usadikininga ku biro wa mutiy udingaku mulong wa kupan ukwash wa kuwanyish mudimu wa kulejan.—1 Korint 14:33, 40.

• Ov, mutapu ik upanininga Makomite ma Mutiy ukwash ku Chisak Chitakedina?

• Ov, yisend ik yitakediningau ku biro wa mutiy?

Chakwel tusal nawamp mudimu wetu wa kulejan “rusangu ruwamp” kudi “antu a mangand mawonsu, ni a michid yawonsu, ni a jindim jawonsu,” tubudishining mikand mu mazu mavud kupandakan 900. (Kujingunik 14:6) Ov, mutapu ik tuwanyishininga mudimu winou ukash? Tuuwanyishining nich ukwash wa yisak ya in kukarumun adia mu jingand jawonsu—ni awonsu adi Atuman a Yehova.

Mufund wa kusambish aurijekin mu Inglish. Chisak Chitakedina chitakedining mudimu wa Departema wa Kufund ku biro wetu mujim wa mangand. Departema winou utakedining midimu ya in kukarumun asadininga ku biro mujim ni ku mabiro makwau ma mitiy. Kwikal ni chisak cha in kukarumun kushalijan kutukwashining kufund mitu ya milong yikutwisha kwikal nich chibachikin chikash kudi antu adia pa mangand mawonsu.

Mufund autumining kurutu kwa chisu ku yisak ya in kukarumun. Kupwa kwa kufund yom yikutwishau kubudish ni kuyitiyij, ayitumining kusutil ku elektronik kudi yisak ya in kukarumun asadina pa mangand mawonsu, akat kukarumun, kutang ni kushinshikin yilim ya mifund. In kukarumun inay asadining usu wa kutond ‘mazu makin’ makeza kuyikwash chakwel atesha kurumburik kwa Inglish mu rudim rau ra chivadik.—Mulej 12:10.

Ordinater udi mulad wa kuswapej. Ordinater kakutwishap kuswinkan in kufund ni in kukarumun. Pakwez, midimu yau yikutwish kusadik swa kusutil ku kusadil madikisioner madia mu ordinater, yom ya kukimbijol nich mu rudim ni mutapu wa kuyikimb. Atuman a Yehova abudisha système électronique d’édition multilingue (MEPS) ukutwisha kwandjik mufund umwing mu jindim yitot, kuwejaku yipich ni kuyirijek mulong wa kuyichap.

Ov, mulong wak tusadininga usu winou wawonsu, ap anch jindim ajilondining kudi tunan twa antu akemp kusu? Mulong ridi rusot ra Yehova ra “antu awonsu [ku]pand ni kwijik uyakin.”—1 Timote 2:3, 4.

• Ov, mutapu ik usadikininga mudimu wa kufund mikand yetu?

• Mulong wak tukarumwining mikand yetu mu jindim jivud?

Dirijek dietu dichapining ni dipalangeshining yitot ya tutikit twa ma Bibil ni mikand yikwau muvu ni muvu pakad difut. Tutungining ni tulamining Yot ya Want pamwing ni mabiro ma mutiy. Tukwashining tunan twa yid ya Betel ni amishoner, ni tupanining kand ukwash pa yisu ya mar. Chawiy, ukutwish kwiyipul anch: ‘Ov, kwisu kudiokilinga nfalang jisadininga midimu yiney yawonsu?’

Tupaniningap cha dikum, tuswimpiningap nfalang, ap kusang nfalang. Ap anch usey wa kukwash mudimu wetu wa kulejan uding wa piur nakash, twitiningap nfalang. Pasutin kal chitot cha mivu, nimero wakaad wa Chinong cha Kalam walonda anch twitiyijin anch: “Yehova ndiy utukwashininga” ni anch: “Tukutwishap kwilemb ap kwit ukwash wa antu”—ni kand kal tusalap mwamu!—Mateu 10:8.

Mijikit yetu yisadikining nich yipan ya kwikatin. Antu avud asangaredining mudimu wetu wa kufundish Bibil ni apanining ukwash ku mudimu winou. Atuman ayinau asangaredining kupan chisu chau, usu wau, nfalang jau, ni mapit mau makwau mulong wa kusal rusot ra Nzamb pa divu diawonsu. (1 Jinsangu 29:9) Ku Chot cha Want, kuding mishet ya milambu yikutwishau kutek milambu yiney kudi antu asotina kuyipan. Ap tukutwish kand kupan yipan kusutil kapend ketu ka web ka jw.org. Yisu yivud, nfalang jipaniningau jidiokiling kudi antu akad kwikal nich mapit mavud, mudi mwadiamufu kazwendj wisambinay Yesu anch ndiy wateka makut makemp maad mu chipau cha ku tempel. (Luka 21:1-4) Chawiy, muntu mwin mwawonsu ukutwish chisu chawonsu kutek “chikunku cha nfalang kuns” mulong wa “kupan mudi mutongilay amwinend.”—1 Korint 16:2; 2 Korint 9:7.

Tukwet ruchingej anch Yehova ukez kudandamen kubachik michim ya antu asotina ‘kumushiman nich yom yau ya usey’ mu kupan ukwash ku mudimu wa Want, chakwel rusot rend reza riwanyina.—Jinswir 3:9.

• Ov, chom ik chisadina dirijek dietu dikala dishalijadina ni marelijon makwau?

• Ov, mutapu ik usadidiningau milambu ya kwikatin?

Mudi mulejena dijin dined Chot cha Want, yidi ndond ya mufulandal wa kwisambidiningau mafundish ma mu Bibil mengamidina pa Want wa Nzamb—mutu wa mulong wa mudimu wa kulejan wa Yesu.—Luka 8:1.

Yidi ndond ya difukwil diakin mu chisak cha antu. Mwindond yiney, mwawiy mutenchikidiningau mudimu wa kulejan rusangu ruwamp ra Want. (Mateu 24:14) Yot ya Want yishalijadining mu kujimb ni mu mutapu wa kuyitung, pakwez yot yawonsu ayitungining mu mutapu uwamp ni wikepishina, yivud ayitungining mulong wa chikumangen chimwing ap yivud. Mu mivu yiney ya katat, twatungin makum ma tunan twa Yot ya Want yisu (mwayen wa Yot yitan pa dichuku ni dichuku) mulong wa kulam uvud wa in kulejan kwambatan nich maswir ma yikumangen yetu. Ov, mutapu ik utwishikina mudimu winou?—Mateu 19:26.

Ayitungining nich ukwash wa nfalang. Yipan yiney akat kuyitum ku biro wa mutiy chakwel nfalang jinej jikutwish kukwash kutung ap kutungiril Yot ya Want mulong wa yikumangen yidia mu maswir.

Ayitungining kudi antu ipanina adinga mu mashakamin kushalijan pakad kuyifut. Atenchikin kal mu jingand jivud Yirund ya Rutung ra Yot ya Want. Chisak cha atushalapol in kutung ni in kwipan akat kushemunyik kudiokal mu chikumangen chimwing kuya mu chikumangen chikwau mwingand yawiy yimwing mulong wa kutek mu kukwash mijikit ya rutung ni kuyifundish Atuman in ngand mutapu wa kutakel mudimu ni mudimu wa kutung. Mu jingand jikwau, Atuman ayifuvu ayitonda mulong wa kutakel mudimu wa kutung ni wa kutunguril Yot ya Want mwingand kanang yatondau. Amakurump akweta ukaliweny mu kutung atakedining yikumangan pa yirung yawonsu ya mijikit ya rutung, ni in kusal midimu akweta ukaliweny ipanining nich usu wau. Ndond yin yawonsu yitunginau, yid ya chikumangen yipanining mulong wa kusal chisak chijim cha in kwipan asadininga mudimu ukash nich muchim wau wawonsu. Spiritu wa Yehova ni usu usadinau antwend nich muchim wau wawonsu wawiy usadininga midimu yiney yawonsu mudi chitwishikina.—Kuseng 127:1; Kolosay 3:23.

• Ov, mulong wak jindond jetu ja difukwil ajitazukining anch Yot ya Want?

• Ov, mutapu ik chitwishikininga kutung Yot ya Want mu mangand mawonsu?

Chot ni Chot cha Want chin chawonsu cha Atuman a Yehova chilejening dijin ditumbila dia Nzamb. Chawiy, tufanyidin kwipan mu mudimu wa kuchikomb, kuchimekesh chiwamp, ni kuchikadish chinangina mulong chidi chisend ni chikunku cha usey cha difukwil dietu ditumbila. Antu awonsu afanyidin kwipan mu mudimu winou.

Kupwa kwa yikumangan, in kwipan akusal mudimu kanang mulong wa kuchikomb. Kupwa kwa chikumangan ni chikumangan, akadivar ni anambaz asangaredining kusal mudimu wa kukomb Chot cha Want. Mudimu wa kukomb ndond yawonsu usadikining kapamp kamwing pa rubing. Mukurump ap nkwash a mudimu ukutakel mudimu, yisu yivud ukulondwul list wa yom ya kusal. Kwambatan nich maswir, in kwipan awonsu akukomb, akukorap, ap akudiosh yishoshot pansh, akudiosh rufunfut, akurijek yitwamu, akukomb pamwing ni kwichil mwon wa kujip nich atupopu mu kapalikany ka kwowil mem, akwowish ni akukusumun madidish ni makalash, akurijek dishitil, ap akukomb pol pamwing ni kurijek rupang. Kupwa kwa muvu umwing, atenchikining dichuku dimwing dia kusal mudimu wa kukomb wa pakampwil. Kuwejinaku kand anetu mu midimu kanang, tuyifundishining kulimish ndond yetu ya difukwil.—Mulej 5:1.

Kupan ukwash ku maswir ma kulam yom yin yawonsu. Muvu wawonsu, kuding program wa kushinshikin yom yidia mukach ni pol pa Chot cha Want. Kwambatan nich kushinshikin kwinoku, mudimu wa kulam chisu chawonsu usadikining mulong wa kulam chot mu mutapu uwamp, kukwashining kwipuk kushesh nfalang chamwamu. (2 Jinsangu 24:13; 34:10) Chitin kukomb ni kulam nawamp Chot cha Want mulong yidi ndond ya kumwifukwil Nzamb wetu. Kusutil ku kwipan mu mudimu winou, tumekeshining mutapu tudinga piswimp ni Yehova ni tumekeshining kand ndond yetu ya difukwil mu michim yetu. (Kuseng 122:1) Chinech chimekeshining kand chitongijok chiwamp mwingand.—2 Korint 6:3.

• Ov, mulong wak tufanyidinap kudiwul ndond yetu ya difukwil?

• Yitenchik ik yitenchikinau mulong wa kudandamen kukomb Chot cha Want?

Ov, usotin kukimbijol yom kanang chakwel ukudish ronganyin rey ra Bibil? Ov, usotin kwijik nich musangar piur pa mufund umwing wa pakampwil ap piur pa muntu kanang, ndond, ap chom kampand chilejenau mu Bibil? Ap wiyipulap kal anch Dizu dia Nzamb dikutwish kukwash kujingunyin untu wey? Chawiy, ukutwish kusadil bibiliyotek wa Chot cha Want.

Utukwashining nakash kukimibijol yom. Chimeken anch ukwetap mikand yawonsu yengamidina mu Bibil yapalangeshau kudi atuman a Yehova mu ridim rey. Pakwez, bibiliyotek wa Chot cha Want ukwet mikand yivud ya katat. Mu bibiliyotek winou mudi kand yikarumun kushalijan ya Bibil, dikishoner muwamp, ni ma referans makwau matukwashina kukimbijol. Kurutu kwa kusambish ni kupwa kwa yikumangan, ukwet want ipau wa kusadil yom yidia mu bibiliyotek. Anch mu bibiliyotek winou mudi ordinater, ukutwish kwikal nich Watchtower Library. Program winou wa kasu ka nzembu ukwet mikand yetu yivud yiruzukinau pamwing ni uswapel kusadil mulong wa kukimbijol mutu wa mulong ukutwisha kutan, dizu, ap mufund kanang.

Udi wa ukwash nakash kudi ansand a ku shikol ya Mudimu ni Mashakamin. Anch wifundishin kal ku shikol, ukutwish kusadil nawamp bibiliyotek wa Chot cha Want pa chisu urijekina yikunku yey. Kalam wa Mudimu ni Mashakamin ndiy ukweta chisend cha kulam bibiliyotek. Chisend chidi cha kushinshikin anch mikand ya katat yidiamu ni ayilongin nawamp. Ndiy ap mulej wey wa Bibil ukutwish kukulej mutapu wa kutan jinsangu jiuswiridina. Pakwez, chifanyidinap kusend mikand kuya nich pol pa Chot cha Want. Chawiy lel, tusotin kulam mikand nawamp kamu ni chifanyidinap kufundamu ap kutekamu kashony.

Bibil urumburil anch chakwel tutana ‘ronganyin ra Nzamb,’ tufanyidin kwa kwisotil kukimbijol mudi mukimbiningau “chipau chijingamina.” (Jinswir 2:1-5) Bibiliyotek wa Chot cha Want ukutwish kukukwash kusambish kukimbijol kwey.

• Ov, yom ik ya kukimbijol nich yidia mu bibiliyotek wa Chot cha Want?

• Ov, nnany ukutwisha kukukwash kusadil nawamp bibiliyotek?

Yesu Kristu wayileja in kwilejend anch: “chifanyidin uman wen ni yisalijok yen yimekan kurutu kwa antu chakwel amushiman Tatukwen udia mwiur.” (Mateu 5:16) Mu chirung chinech cha nsudiel, tusadidining winchij ni Internet mu mutapu wisikena. Kapend ketu ka web, jw.org, yidi ndond yijikena yilejenau musul wa jinsangu piur pa yitiyij ni mijikit ya Atuman a Yehova. Ov, mitu ik ya milong yidiap?

Yakul ya Bibil yipwilingau chisu chivud. Ukutwish kutan yakul ku yipul yimwing ya usey yipwilingau yisu yivud kudi antu. Chilakej, trakt ulondina anch Ov, Mar Makez Kupwa? ni Ov, Chakin Kamu Afu Akutwish Kwikal Kand ni Mwom? madiaku pa Internet mu mazu 900 ni kusut. Ukutwish kand kutang Traduction du monde nouveau mu mazu 170 ni kusut ni uvud wa malejan ma Bibil miwejidinaku, kuwejaku kand buku Chom ik Chitufundishinay Bibil? Ni manimero ma katat ma Chinong cha Kalam ni Réveillez-vous ! Uvud wa mikand yiney akutwish kuyitang ap kuyitesh pa kapend ap kumakwat pa band mulong wa kutesh, mu PDF, ap mu EPUB format. Ukutwish kubudish mapaper makemp ku fotokopi ni kupan kudi muntu umekeshina musangar mu rudim rend! Mavideo madiaku mavud mu rudim ra yijingidij. Ukutwish kukwat dram wa Bibil wakwatau, madram ma Bibil masenganau, ni Mizik yiwamp yisangareshina pa chisu chey cha kwipuwangesh.

Kalejen jinsangu jakin piur pa Atuman a Yehova. Pa kapend kinak atekinap kand jinsangu ja katat ni maband video yisambidina mudimu wetu wa mangand mawonsu, yinship yikash ya Atuman a Yehova, ni mausu metu ma kuyikwash antu. Ukutwish kutanap yijikish ya yitentam yezinaku ni kutambul jinsangu jitadina mabiro metu ma mitiy.

Kusutil ku yom yiney, tukat kumunyik chitokish cha uyakin mu jindond jilemp ja pa divu. Antu adiokidila mu jingand jawonsu kuwejaku antu a mu Antarctique, atanidiningamu. Tukat kulembil anch: “Dizu dia [Yehova] diya kurutu” pa divu diawonsu mulong wa uyaj wa Nzamb.—2 Tesalonik 3:1.

• Ov, mutapu ik kapend ka jw.org kakwashininga antu avud kwilej uyakin wa Bibil?

• Ov, yom ik ukusota kukimbijol pa kapend ketu ka web?