Antu avud alika kal kukumangan mu yikumangan ya in relijon mulong katanidinamup umutakel wa muspiritu ap rongoj. Ov, mulong wak ey ufanyidin kukumangan ku yikumangen ya Ukristu yitenchikinau kudi Atuman a Yehova? Ov, chom ik ukeza kutan kwin kwa?

Musangar wa kwikal mwin kukat ni kuyibangin antu. Mu mivu chitot ya kusambish, in Kristu atenchika mukach mwa yikumangen ni awiy ading ni kukumangan mulong wa kumwifukwil Nzamb, kwilej Mifund, ni kukasikeshijan umwing ni mukwau. (Hebereu 10:24, 25) Mulong wa kulam chirungil cha rukat, awiy amana anch ading mu urund wakin—ni akadivar nau a muspiritu. (2 Tesalonik 1:3; 3 Yohan 14) Tulondwil kand chilakej chimwing ech cha in Kristu a mu mivu chitot ya kusambish ni tutanining musangar wa chilik chimwing.

Usey wa kwilej mutapu wa kusadil yany ya mu Bibil. Mudi muyadinga yakin mu chirung chafundau Bibil, amakundj, amband, ni an awonsu akumangananga pamwing. Alej ayifuvu asadidining Bibil mulong wa kutukwash chakwel tujingunyina mutapu wa kusadil yany yiney pichuku-pichuku mu mashakamin metu ma mwom. (Kuvurik Yijil 31:12; Nehemiy 8:8) Antu awonsu akutwish kwiyandjik mu minsamb ni kuwang pamwing, mulong wa kumekesh ruchingej retu ra Ukristu.—Hebereu 10:23.

Chiyukish cha kwikal ni ritiy rey mudiay Nzamb chikukukasikesh. Kambuy Paul wisambina pa chikumangen chimwing cha pa chirung chend anch: “Niswiridin nakash kukumananyaku, . . . Chakwel kwikal kukasikeshijan kwa michim mukach mwen, muntu ni mukwau kusutil ku ritiy ra umwing ni mukwau, renen ap ramam.” (Rom 1:11, 12, nwt) Kutanijan kwetu kwa machuku mawonsu ku yikumangan nau ambay akaritiy kukasikeshining ritiy retu ni mupak wetu wa kushakam kwambatan nich yany ya mu Bibil.

Ov, mulong wak witiyijinap diladikij dined dia kukumangan ku chikumangan chetu chikwau cha chikumangen ni weza wimena amwiney yom yiney? Tukez kukwak nich chirungil. Yikumangan yawonsu yidi kwau ya kwandam pakad kufut—kwikiling kwau kufut nfalang ja milambu.

• Ov, chilakej ik chilondwilinga yikumangan yetu ya chikumangen?

• Ov, mutapu ik tukutwisha kutaninamu ayinetu ku kukumangan ku yikumangan ya Ukristu?

Ap anch tuyil mwinjil yikweta yikokujol yivud ap yipwichikin ni chirung chikash, tukumangangening pakad kujing ku yikumangan yetu ya Ukristu. Chikalap nchik yikokujol yiney ya mwom ni kuziy kupwa kwa mudimu wa pichuku, ov, mulong wak Atuman a Yehova asadining usu mudi winou wa kukumangan nau ambay akaritiy?

Chidi chiwamp mulong wa mashakamin metu mapandakena kuwap. Pafunday Paul anch: “Tutalijanany muntu ni mukwau,” ndiy wisambina piur pa antu ayilinga kukumangan ku chikumangen. (Hebereu 10:24) Dizu dined dirumburikin ‘kutongijokin nakash,’ chawiy chikutwisha kutushikij ku kwijikijan umwing ni mukwau. Chawiy lel, mazu ma kambuy matukasikeshin kwikal in kuyibangin akwau. Kusutil ku kwijikijan ni majuku makwau ma in Kristu, tukujingunin anch amwing pakach pau apandakana yikokujol ya chilik chimwing ni yetwetu ni akutwish kutukwash kupandakan mu mutapu uwamp.

Kukasikeshining urund uwamp. Ku yikumangan yetu, tukumangening pamwing, chidingap mulong wa kwijikijan kusu, pakwez chiding mulong wa kusal chisak cha arund awamp. Yisu yimwing, tusutishining chisu pamwing mu kwipuwangej ni muchim umwing. Ov, chibachikin ik chikwetinga urund mudi winou? Twilejining usey wa kusanger umwing ni mukwau kupandakan, ni ukasikeshining uumwing wa rukat. Kupwa, parishiningau akadivar ni anambaz netu nich yikokujol, tuding tayad ni kuyikwash mulong tukasikeshining urund winou uwamp. (Jinswir 17:17) Kusutil ku kukumangan ni yidi yawonsu ya chikumangen chetu pamwing, tumekeshining anch tukwet mitapu ya “kulamijan chimwing ni chikwau.”—1 Korint 12:25, 26.

Tukukasikeshin chakwel utonda arund ney asadiniga rusot ra Nzamb. Ukez kutan arund mudi inay mukach mwa Atuman a Yehova. Kangal amboku walikidil chom ap chimwing chikukangesha kwinung pamwing netu.

• Ov, mulong wak chidia cha usey kupandakan kudia etu kukumangan pamwing ku yikumangan?

• Ov, chisu ik usotina kwijikijan ni chikumangen chetu?

Pasak, yikumangan ya in Kristu yading yimedin pa miminy, malembil, ni kutang ni kwisambin pa Mifund—yawonsu pakad kulondul chaku kanang. (1 Korint 14:26) Ukutwish waman chom kanang chidia kamu chilik chimwing ni yikumangan yetu.

Yany yimedining pa Bibil ni yidi ya kusadil. Pa kupwa kwa rubing, chikumangen ni chikumangen chikumangening mulong wa kutesh diskur dia mu Bibil dia minit 30 dilejeninga mutapu wisambidina Mifund piur pa mashakamin metu ma mwom ni mu chirung chinech tushicha. Atukasikeshining etu awonsu kulondul ayinetu mu ma Bibil metu. Kupwa kwa diskur, kuding saa umwing mulong wa Dilejan dia “Chinong cha Kalam,” ni yid ya chikumangen ayikasikeshining kwisambin minsamb ya mutu wa mulong udia mu dichap dia Chinong cha Kalam cha kwilej. Minsamb yiney yitukwashining kusadil umutakel wa Bibil mu mashakamin metu ma mwom. Dichap dined dia mutapu umwing adilejinining mu yikumangen kusut 120 000 mu mangand mawonsu.

Atukwashining kukudish ukaliweny wetu wa kufundish. Niyetu kand tukumangening pamwing urel mukach mwa rubing mulong wa program wa yikunku yisatu utazukinau anch Mudimu ni Mashakamin ma In Kristu, wimedina pa yom yidia mu Mudimu ni Mashakamin ma in Kristu Mukand wa Chikumangan. Chikunku cha kusambish cha chikumangan chinech achitazukin anch Yom ya Usey Yidia mu Dizu dia Nzamb, chitukwashining kwijik nawamp chikunku cha Bibil chifanyidina chikumangen kutang kurutu kwa chisu. Chikunku chikwau chikweta mutu wa mulong ulondina anch Ipana mu Mudimu wa Kulejan chikwet yakumenaku piur pa mutapu wa kwisambin Bibil pamwing nau antu akwau. Mwin kuyulan ukutwish kupan yiyul mulong wa kutukwash kuwapish ukaliweny wetu wa kutang ni wa kulond. (1 Timote 4:13) Chikunku cha nsudiel chikweta mutu wa mulong ulondina anch Mashakamin ma Mwin Kristu chikat kushinshikin mutapu wa kusadin mbil ja Bibil mu mwom wetu wa dichuku diawonsu. Chikunku chinech chikweting kand misamb ya yipul ni yakul yitukwashina nakash kutesh Bibil.

Pakad kwidjidjek, chisu ukweza ku yikumangan, ukusanger kamu ni mafundish mawamp ma mu Bibil miukwilejaku.—Isay 54:13.

• Ov, chom ik chikutwisha kukukwash chakwel utesha ku yikumangan ya Atuman a Yehova?

• Ov, yikumangan yetu ik ya pa rubing ukusota kukumangan?

Ov, umen yipich yidia mu broshir winou mutapu Atuman a Yehova udjitinau nawamp win kamu chisu chidiau mu yikumangan yau ya chikumangen? Ov, mulong wak tushinshikidininga kudjal ni kwileng kwetu mu mutapu winou?

Mulong wa kumekesh kalimish kudi Nzamb wetu. Chidi chakin kamu anch Nzamb utadining untu wetu wa mukach. (1 Samwel 16:7) Pakwez, chisu tukumangeninga mulong wa kumwifukwil, muchim wetu usotining kumekesh kalimish ketu kawonsu kudiay ndiy ni kudi ambay netu in kwifukwil. Anch twiman kurutu kwa nkalansambu mulong wa dirumburish, tufanyidin kwikal nich kashinsh anch mutapu wetu wa kudjal umekeshin kalimish ku mutambu wend. Chilik chimwing kand, mutapu wetu wa kumekan ku yikumangan umekeshining kalimish ketu kudiay “Nkalansambu wa mangand mawonsu,” Yehova Nzamb, ni ndond yitukata kumwifukwil.—Disambishil 18:25.

Mulong wa kumekesh usey wa mashakamin ma mwom. Bibil uyikasikeshin in Kristu chakwel adjala “kwakad kwimekesh ni kwibaz nich.” (1 Timote 2:9, 10, TMK) Kudjal “kwakad kwimekesh” kurumburukin kwipuk kudjal maswin mapwitininga jinkeu padi etu chakwel atuman, malangwishininga maku mayimp, ap mamekeshininga mujimbu. Chikwau kand, kudjal maswin makad ma “kwibaz nich” kutukwashining kutond maswin makad kupwitang jinkeu jilangwishininga maku mayimp ap makash. Yany yiney yiding mu mashakamin ma antu piur pa mutapu ujim wa kutond kwa muntu panrend. Pakad kuwejinaku ku mazu metu, mutapu wetu wa kupwit jinkeu pa mutapu wetu wa kudjal ni wa kurijek chifu chetu ukutwish kumekesh ‘katumb ka malejan metu ni ka Nzamb Mupandish wetu.’ (Titus 2:10; 1 Pita 2:12) Kudjal kwetu mu mutapu uwamp mulong wa yikumangan, kukweting yibachikin padi antu akwau chakwel aman difukwil dia Yehova mu mutapu uwamp.

Kangal walikidil maswin mey makukangesh kukumamgan ku Chot cha Want. Maswin metu maswiridinap kwikal ma usey ukash ap ma kuchim mu mutapu upandakena kuwap nakash, pakwez, mafanyidin kwikal mawamp ni mawanyidina.

• Ov, mulong wak chidia cha usey tudjalang nawamp chisu tukata kumwifukwil Nzamb?

• Ov, yany ik yikutwisha kutukwash chakwel tutonda mutapu wetu wa kudjal ni kwileng?

Anch wilejining Bibil ni umwing wa Atuman a Yehova, ukutwish kupakish kuchirikin malejan ma kwilej pa rubing kurutu kwa chisu. Chakwel utaninamu nakash, chidi chiwamp kusal mwamu kurutu kwa kuya kukumangan ku chikumangen. Chikwikal nich yibudikin yiwamp anch twatenchik program muwamp.

Kukwat mupak wa chisu ni kwindond kwa kwilejin. Ov, chisu ik ukutwisha kutong nawamp win kamu? Ov, chidi chisu cha pamanch nakash, kurutu kwa kusambish mudimu wey wa pichuku ap kupwa kwa urel ni kupwa kwa an kuya kulal tul? Ap anch ukutwishap kwilej chisu chilemp, kwat mupak chakwel wijik uvud wa saa ukutwisha kusutish, ni kangal chom kanang chipakisha kukukangesh. Kimb ndond yakad masok, ni diosh yom yawonsu yikutwisha kukuzuwol ni jim radio, televizio, ni telefon wey. Kulembil kurutu kwa kwilej kukez kukukwash chakwel ujingunin yakamish ya pichuku-pichuku ni chawiy ukutwisha kutongin nakash pa Dizu dia Nzamb.—Filip 4:6, 7.

Tek tushony pa yakul, ni irijeka chakwel weza wakul. Piwirijekina, sambishin kujingunin chitongijok cha mutu wa mulong wa kwilej. Tongin piur pa tumitu twa milong tukemp ap shapitre, shinshikin mutapu kamutu ni kamutu ka mulong karumburila mutu wa mulong winou, shinshikin yipich ni yipich, ni chirikin manans majim ma yipul yiney. Kupwa, tang paragraf ni paragraf, ni kimb chakul cha chipul chipwilau. Kimb ni tang mifund yijimbwilau, ni tongin pa mutapu mifund yiney yikasikeshina malejen minam. (Midimu 17:11) Chisu ukutana chakul ku chipul chipwilau, tek kashony ap fund dinans dijim dikasikeshinau mu paragraf ukeza kulet chakul mu manangu mey amwiney. Kupwa, ku chikumangan, ukutwish kutek muny wey piur anch usotin ni ukimbin kurumburul chakul mu wiswimp mu mazu mey amwiney.

Kusutil ku kushinshikin mitu ya milong kushalijan yikezau kwisambin pa rubing ni rubing mu yikunangan, ni ukez kuwejinaku kand yiitongijok yisu mu “chipau” chey cha ronganyin ra Bibil.—Mateu 13:51, 52.

• Ov, chaku ik ukutwisha kwitekin chakwel urijekang yikumangan?

• Ov, mutapu ik ukutwisha kwirijek amwiney chakwel upana yakul ku chikumangan?

Kudiok pa chirung cha pasak, Yehova wading usotin anch dijuku ni dijuku disutishang chisu pamwing mulong wa kukasikesh mwikadil wadi wa muspiritu ni kukasikesh chikumbu chau. (Kuvurik Yijil 6:6, 7) Chawiy, Atuman a Yehova atekining chisu pa rubing ni rubing mu dijuku mulong wa kwifukwil pamwing—isambidining, mu mutapu wa kwipuwangej, malejan ma muspiritu ma pakampwil kwambatan nich maswir mau. Ap anch ushiching amwiney, ukutwish kusutish nawamp chisu mudi chinech pamwing ni Nzamb kusutil ku kutenchik dilejan dia Bibil ukutwisha kutond.

Chiding chisu cha kusej piswimp kudi Yehova. “Sejany piswimp kudi Nzamb, chad niyend ukusej piswimp ni yenen.” (Jakobu 4:8) Tukushiken ku kumwijik Yehova nawamp win kamu chisu twilejininga yom yivud piur pa untu wend ni yisal yend kusutil ku Dizu diend diafunday. Njil yimwing yiswapela kusambish kwifukwil mu dijuku yidi kusutish chisu chimwing mu kutang Bibil pamwing nich dizu dia piur, pamwing ap kulondul program wa pa rubing wa Mudimu ni Mashakamin. Akutwish kwinkish chid ni chid cha mu dijuku chikunku cha kutang, ni kupwa yid yawonsu yikutwish kwisambin yom yilejinau mu mifund.

Chiding chisu cha kusej piswimp kudi yid ya mu dijuku. Chidiau anvaj awamp ni an, amakundj ni amband akasikeshining uumwing wau umwing ni mukwau chisu chilejiningau Bibil mu dijuku. Chisu chinech chifanyidin kwikal cha musangar, chisu cha chisambu ni cha kukasikeshan pa rubing ni rubing. Kwambatan nich mivu ya anau, anvaj akutwish kutond mitu ya milong ya kwisambin, pamwing ap akusadil mitu ya milong yidiokidila mu Chinong cha Kalam ni Réveillez-vous ! Ukutwish wisambinany pa milong yirishiningau nich aney ku shikol ni mutapu wa kuyipwish. Ukutwish kand kutalany program wa pa ngond wa JW Télédiffusion (tv.jw.org) ni kumwisambin pamwing. Ukutwishany kusangerany kwilej miminy yikezau kuwang ku yikumangen ya pa rubing ni kusutish chisu cha kwipuwangej kupwa kwa difukwil dia mu dijuku.

Chisu chinech cha pakampwil cha kusutish rubing rawonsu mulong wa kumwifukwil Yehova pamwing chikez kukwash antu awonsu mu dijuku chakwel asangera kwilej Dizu dia Nzamb, ni ndiy ukez kuyukish nakash mausu men.—Kuseng 1:1-3.

• Ov, mulong wak twitekidininga chisu cha kwifukwil mu dijuku?

• Ov, mutapu ik ukutwisha anvaj kusal chakwel chisu chinech chikal chisu chisangareshina antu awonsu mu dijuku?

Ov, mulong wak antu inay ading ni musangar mudi winou? Ayiling kukumangan ku chimwing cha yitentam yetu. Mudi atushalapol a Nzamb a pasak, inkishau yany ya kukumangan tupamp tusatu pa muvu, tukimbining kukumangan pamwing mu yisak yijim. (Kuvurik Yijil 16:16) Muvu ni muvu, tukweting yinship yisatu: yitentam ya munyingumuku yaad ya dichuku dimwing ni chitentam cha region cha machuku masatu. Ov, mutapu ik tutanidiningamu mu yikumangan yiney?

Yikasikeshining ukadivar wetu wa win Kristu. Mudi mwasangera kamu in Isarel kumushiman Yehova “mu kukumangan,” niyetu tusangering kumwifukwil pamwing ku yinship ya pakampwil. (Kuseng 26:12; 111:1) Yinship yiney yitwinkishining chisu cha kukumangan ni kwinung ni Atuman adiokidila ku yikumangen yikwau ap ku jingand jikwau. Pa chisu cha midi, tusangering kudia pamwing mu jindond ja chitentam, kukasikesh chirungil cha urund uwamp pa yisu yiney ya muspiritu. (Midimu 2:42) Ku yitentam yiney yijim tumening ayinetu rukat riyitekininga ‘anamakwetu in Kristu’ adia pa divu mu uumwing.—1 Pita 2:17.

Yitukwashining kuya kurutu muspiritu. In Isarel ataninamu kand kusutil ku ‘kutesh mazu’ ma Mifund mayirumburilau. (Nehemiy 8:8, 12) Niyetu, tusangarendining kand umutakel wa mu Bibil tutambwilinga ku yitentam yetu. Program ni program wengamidin pa mutu wa mulong wa mu Mufund. Kusutil ku madiskur masangareshina, masempozium ni yakumenaku, twilejining mutapu wa kusal rusot ra Nzamb mu mwom wetu. Atukasikeshining chisu tuteshininga uman wa antu apandakana yikokujol yatanijanau nich mu mashakamin mau ma win Kristu mu yisu yiney yikash. Ku yitentam ya region, kuding dram wa kusengan ulejeninga rusangu ra Bibil ra mwom wakin kudi etu ni utufundishing malejan ma usey. Ku chitentam chawonsu, kuding dibabatish dia antu asotina kumekesh kwipan kwau kudi Nzamb.

• Ov, mulong wak yitentam yiding yisu ya musangar?

• Ov, mutapu ik tukutwisha kutaninamu mu kukumangan ku chitentam?

Piswimp ni rufu rend, Yesu walonda anch: ‘Rusangu riner ruwamp ra want akez kurilejan ku mangand mawonsu, rikez kikal uman kudi michid yawonsu; chawiy lel disudiel dikweza.’ (Mateu 24:14) Chad mutapu ik ukutwisha kuwanyin mudimu winou wa kulejan pa mangand mawonsu? Kusutil ku kulondul chilakej chashay Yesu chisu chadingay pa divu.—Luka 8:1.

Tupakishining kuyendil antu ku yikumbu yau. Yesu wayifumba in kwilej end chakwel alejan rusangu ruwamp ku chis ni ku chis. (Mateu 10:11-13; Midimu 5:42; 20:20) In kulejan a mu mivu chitot ya kusambish ayinkisha chisend cha pakampwil cha kuya kulejan mu teritwar. (Mateu 10:5, 6; 2 Korint 10:13) Chawiy chimwing ni nlel unou, mudimu wetu wa kulejan udi wa kutenchik nawamp win, ni chikumangen ni chikumangen chikwet chisend cha kwizwish teritwar wachinkishau. Chinech chitin kudi etu tuwanyish mbil ya Yesu ya “kurumburil Rusangu Ruwamp kudi antu, ni kumekesh uman wetu.”—Midimu 10:42.

Tusadining usu wa kuyikimb antu kwindond kwawonsu kudingau. Yesu washa kand chilakej cha kulejan kudi antu patok, mudi ku chikumu cha karung ap pa ndond yidia antu avud. (Marko 4:1; Yohan 4:5-15) Niyetu kand, twambambining ni antu kwindond kwin kwawonsu piur pa Bibil—mu mikombil, mu jindond ja kwisak, mu jindond ja kwipuwangej, ap ku telefon. Tupanining kand uman kudi amutej netu, ambay netu a mudimu, ambay netu a shikol, ni kudi anamakwetu a kumujimbu pitumeninga chisu chifanyidina. Antu awonsu asadining mausu ma kusal mwamu pichitwishikininga chakwel mamiliyon ma antu adia pa divu diawonsu atesha “rusangu ruwamp ra dipandish.”—Kuseng 96:2.

Ov, ukutwish kuvurik muntu kanang wakuleja rusangu ruwamp ra Want wa Nzamb ni chom ik chirumburikina mutu wa mulong wa rusangu riner? Kangal walam amwiney rusangu riner ra ruchingej. Rilejana mudi chitwishikina kurilejan!

• Ov, “rusangu ruwamp” ik tufanyidina kulejan?

• Ov, mutapu ik Atuman a Yehova wimburijiningau mulad wa kulejan wa Yesu?

Yisu yivud dizu “chibol” disambidining antu akata kujingunin materitwar masu ni kubol njil chakwel ambay akwau ayilondula. Yesu wadinga chibol wa mutapu winou, amutuma pa divu mulong wa kusikesh kwipan mu mudimu wa kulejan ni kubol njil ya dipandish. (Mateu 20:28) Nlel unou, in kumulondul end amwimburijining kusutil ku kusutish chisu chivud mudi chitwishikina mu mudimu wa ‘kwikadish in kwilej.’ (Mateu 28:19, 20) Antu amwing akutwish kwiyandjik mu mudimu tutazukininga anch mudimu wa uchibol.

Chibol uding mwin kulejan wa chisu chawonsu. Atuman a Yehova awonsu ading in kulejan a rusangu ruwamp. Pakwez, amwing arijekining mashakamin mau chakwel asala mudi ayibol a rawonsu, asutishining asaa 70 pa ngond ni ngond mu mudimu wa kulejan. Chakwel kusal mwamu, antu avud akepishining chisu cha kusal midimu yau ya kumujimbu. Akwau ayitonda chakwel asal mudi ayibol a pakampwil mu materitwar mudia maswir majim ma in kulejan Want, ni ipanining mulong wa kuwanyish pa ngond ni ngond asaa 130 ap kusut mu mudimu wa kulejan. Ayibol asangering kwikal ni mashakamin ma mwom maswapela, nich ruchingej anch Yehova ukez kuyikwash ku maswir mau ma mwom. (Mateu 6:31-33; 1 Timote 6:6-8) Antu akad kusalang mudimu wa chisu chawonsu akutwish kusal mudi wa ayibol ankwash anch chitwishikin, ni atanduriling mujikit wau wa kulejan mu kuwanyishang asaa 30 ap 50 pa ngond.

Uchibol ubachikining kwikal ni rukat ra Nzamb ni ra antu. Mudi Yesu, twij anch antu avud arishining nich maswir ma kwijik yom piur pa Nzamb ni rutong rend. (Marko 6:34) Pakwez twij anch tukutwish katat kuyikwash nawamp ni kuyinkish ruchingej rikash piur pa machuku ma kurutu. Rukat piur pa mutej netu rimubachikining chibol chakwel apana nich musangar chisu chend ni usu wend mulong wa kuyikwash antu akwau muspiritu. (Mateu 22:39; 1 Tesalonik 2:8) Mudi chibudikin, ayibol ashinshamena ikasikeshining, asejining piswimp ni Nzamb, ni atanining musangar uvud.—Midimu 20:35.

• Ov, mutapu ik ukutwisha kwisambin dizu chibol?

• Ov, chom ik chiyibachikininga antu amwing chakwel asal mudimu wa uchibol wa chisu chawonsu?

Pasutin kal mivu, kwilej kwa uteokras kuding chijingidij cha Atuman a Yehova. Atenchikin mashikol ma pakampwil mulong wa atushalapol ipanininga chisu chawonsu mu mudimu wa kulejan Want chakwel atwisha ‘kuwanyish mudimu wau wa kulejan mudi muchifanyidina.’—2 Timote 4:5.

Shikol ya Mudimu wa Uchibol. Kwinsudiel kwa muvu wa kusambish wa mudimu wend wa chisu chawonsu, chibol wa rawonsu ukutwish kwifundish ku shikol wa machuku musamban ukusadikin ku Chot cha Want chidia piswimp nend. Rutong ra shikol winou riding ra kumukwash chibol chakwel aseja piswimp ni Yehova, ikala mwin kulejan chifuvu mu mitapu yawonsu ya mudimu wa kulejan ni adandamena mu mudimu ushinshamena.

Shikol ya in Kulejan Want. Shikol yiney yikatau kwilej mu angond aad yidiaku mulong wa kuyifumb ayibol akweta ronganyin asotining kudiokal kwol kwau chakwel aya kusadil kwawonsu kuyiswiridinau. Awiy akat kulond anch: “Yam unou, ntuma.” Mu kumwimburij Mwin Kulejan mujim wasala mudimu panap pa divu, Yesu Kristu. (Isay 6:8; Yohan 7:29) Kuya kulemp nakash ni ndond yen kwitining pamwing ap kupipesh mashakamin mey ma mwom. Yaku, yirung ni yakudia yikutwish kushalijan nakash ni ya mu teritwar wen. Chitwishikin kand pamwing ap kwilej rudim risu. Shikol winou uyikwashining akadivar ni anambaz ajich ni ambay atena akweta mivu 23 djat ni mivu 65 chakwel akudisha mikadil ya muspiritu yiswiridikina mu yisend yau ni ukaliweny ukeza kuyikwash kusadil nakash kusutil kudiay Yehova ni dirijek diend.

Shikol ya Bibil ya Gilead. Mu rudim ra Hebereu, dizu “Gilead” dirumburikin “Chisak cha Atuman.” Kudiok mu muvu wa 1943, uvud kupandakan wa amishoner afumbau ku Gilead 8 000 ayituma kuya kupan uman mu mutapu uwamp kushik “ni kwisudiel kwa divu.” (Midimu 13:47, TMK) Chisu chashikau amishoner etu kapamp ka kusambish mu Pérou, kimwadingap yikumangen mwingand yin yang. Katat kuding yikumangen 1 000 ni kusut. Pasambishau amishoner etu kusal mudimu mu Japon, mwadinga Atuman akemp mwishin mwa dikum mwingand yin yang. Katat kudi uvud wa Atuman 20 0000 ni kusut. Mafundish ma angond atan ku Gilead makwet dilejan dikash dia Dizu dia Nzamb. In kulejan asadininga mudi ayibol a pakampwil ap amishoner, adia ku mabiro ma mitiy ap adia mu mudimu wa munyingumuku ayitazukin ku shikol winou mulong wa kutambul diyiy dipandakena dikweta rutong ra kujikish ni kukasikesh mudimu wa pa mangand mawonsu.

• Ov, chom ik chitiningau kudi amishoner?

• Ov, shikol ik ya pakampwil yidingaku mulong wa amishoner etu?