1-3. Yipul ik yipwilingau antu avud piur pa rufu, ni mutapu ik wakwilinga marelijon mamwing?

BIBIL utukanin anch dichuku dimwing “kukez kikalip kand rufu.” (Kujingunik 21:4) Mu Shapitre wa 5, twilejin anch difut ditukwashin etu kutambul mwom wa chikupu. Pakwez antu adandamedin kufa. (Mulej 9:5) Chawiy lel chipul chimwing chijim tukata kwiyipul chawiy ech: Chom ik chikata kutushiken pitukata kufa?

² Chakul ku chipul chinech chidi kamu cha usey pafilinga mukatish netu. Tukutwish kwiyipul anch: ‘Kwisu kwayay kal? Ov, utumen? Ukutwish kutukwash? Tukez kumuman kand?’

³ Marelijon makwil ku yipul yiney mu mitapu yishalijadina. Mamwing mafundishin anch, ang udi muntu muwamp, ukuya mwiur ni anch udi muntu muyimp, ukutem mu karung ka kasu. Amwing alondining anch, anch wafa ukwikal spiritu ni ukushakam pamwing ni anamakwey afa kal. Akwau niyawiy alondining anch kupwa kwa kufa kwey, ni kukurumburish, ukez kavadik kand, ap kuchirik ku mwom nich mujimbu windjing, pamwing ap mudi muntu windjing ap mudi nnam.

4. Chitongijok ik cha pa dishin chifundishininga marelijon piur pa rufu?

⁴ Marelijon mamekeshin anch mafundishin yom yishalijadina nakash. Pakwez mawonsu mafundishin chitongijok cha pa dishin chimwing. Afundishining anch, anch muntu wafa, chikunku chimwing cha mujimbu wend chikatap kufa. Chinech chidi kamu chakin?

KWISU TUKATA KUYA PITUFILING?

5, 6. Chom ik chikata kutushiken pitukata kufa?

⁵ Yehova wij chikata kutushiken pitukata kufa, ni watuleja anch, anch muntu wafa, kadiakwapu kand. Rufu ridi chinyim ni mwom. Chawiy lel anch muntu wafa, yovil yend ni usu wa kuvurik yom yikatap kudandamen kusal ndond yikwau.a Pitukata kufa tukutwishap kuman, tukutwishap kutesh, ni tukutwishap kutong chom ap chimwing.

⁶ Mwant Salomon wafunda anch: “afu kijap chom.” Afu kakutwishap kukat ap kukis, ni ‘kwikil midimu, ap yitongijok, ap ronganyin, ap manangu mwi nzay, ndond yiuyila.’ (Tang Mulej 9:5, 6, 10.) Mu Kuseng 146:4, TMK, Bibil utulejin anch, anch muntu wafa, “yitongijok yend” yikat kufa.

YALONDAY YESU PIUR PA RUFU

7. Chom ik chalonday Yesu piur pa rufu?

⁷ Pafay murund nend Lazar, Yesu wayileja in kwilej end anch: “Murund netu Lazar walalang kal mu tul.” Pakwez Yesu kalondap anch Lazar wading wiswedishin. Yesu walonda kand anch: “Lazar wafang kal.” (Yohan 11:11-14) Chawiy, Yesu wafanakesha rufu ni kulal tul. Kalondap anch Lazar wading mwiur ap ni anamakwend afa kal. Ni kalondap anch Lazar wading umen mar mu karung ka kasu ap wavadika kand mudi muntu windjing ap mudi nnam bwat. Chading mudi anch Lazar wading mu tul tukash. Maverse makwau mafanikeshin rufu ni tul tukash. Bibil ulondin anch pafay Stefan, “walala mu rufu.” (Midimu 7:60, NWT) Kambuy Paul niyendiy wafunda anch in Kristu amwing “alala kal mu rufu.”—1 Korint 15:6, NWT.

8. Mutapu ik twija anch Nzamb kayitangap antu chakwel afa?

⁸ Nzamb wamutanga Adam ni Ev chakwel ashikena kamu ku kufa? Bwat! Yehova wayitanga chakwel ikala ni mwom wa chikupu nich ukash wa mujimbu uwanyidina. Yehova payitangay antu, wayinkisha maswir ma kushakam chikupu. (Mulej 3:11) Anvaj kakatiningap kuyiman anau ananapa ni kufa, ni Yehova woviling chilik chimwing piur petwetu. Pakwez anch Nzamb watutanga mulong wa kushakam chikupu, mulong wak tukat kufa?

MULONG WAK TUKAT KUFA?

9. Mulong wak chijil chayinkishau Adam ni Ev kudi Yehova chading chiswapel?

⁹ Mu chir cha Eden, Yehova wamuleja Adam anch: “Ukutwish kudia kwey mabuj ma mitond yawonsu ya mu chir. Pakwez dibuj dia mutond ou wa ronganyin ra kuwap ni kuyip kangal kudidia. Mulong dichuku diukeza kudidia, chakin ukez kufa.” (Disambishil 2:9, 16, 17) Chijil chinech chovikena chadingap chikash kuziyil, ni Yehova wading ni mbil ya kumulej Adam ni Ev chom chidia chiwamp ni chidia chiyimp. Mu kumuziyil Yehova, ela kumekesh kudi ndiy anch aziyidil ku umutakel wend. Ela kand kumekesh kudi ndiy kujikitish kwau mulong wa yom yawonsu yayinkishay.

10, 11. (a) Satan wamudimba Adam ni Ev mutapu ik? (b) Mulong wak kwadingap dilikishin piur pa chom chasalay Adam ni Ev?

¹⁰ Cha ushon, Adam ni Ev atonda kumubwambwil Yehova. Satan wamuleja Ev anch: “Ov, komb, Nzamb wakulejinany anch: Kangal wadiany mitond ya mu chir?” Ev wakula anch: “Tukutwish kudia kwetu mabuj ma mitond ya mu chir. Pakwez Nzamb watulejin anch: ‘Kangal wadiany mabuj ma mutond udia mukach mwa chir, ap kusu kupukunaku, chamwamu ukufany.’”—Disambishil 3:1-3.

¹¹ Kupwa Satan walonda anch: “Kiukufanyap kwen, bwat. Mulong Nzamb wij anch dichuku diukez kudiany mabuj minima, mes men makez kuburik, niyen ukez kwikalany mudi Nzamb, in kwijik kuwap ni kuyip.” (Disambishil 3:4-6) Satan wakimba Ev atonga anch ukutwish kukwat mupak amwinend piur pa kuwap ni kuyip. Pa chisu chawiy chimwing, wadimbana piur pa yom yikushikena anch wabwambwil. Satan walonda anch Ev kakufap, chawiy lel Ev wadia dibuj dimwing ni kupwa wamwinkishaku nfumwend. Adam ni Ev ading ij anch Yehova wayileja kulik kudia dibuj. Padidiau, atonda kubwambwil ku chijil chiswapela. Padiau, amekesha anch Kamulimishinap Tatukwau wa mwiur mwin rukat. Kwadingap mutapu wa kuyilikishin mulong wa chom chinech chasalau!

12. Mulong wak chading cha ushon kudi Yehova pamubwambwilau kudi Adam ni Ev?

¹² Kwading kurumbuk mud ik kwa anvaj etu a kusambish pamuburenau Sakatang wau kalimish! Ukwiyov nchik anch wasal usu mulong wa kumulil mwaney ikundj ap mband ni kupwa akubwambwil chad asambish kusal yom yakad kukwatijan ni yiuyitina kusal? Ukovap kuyip ku muchim wey?

13. Chom ik chakimbay Yehova kulond palonday anch “ukez kuchirik kand kwey ku rufunfut”?

¹³ Pabwambwilau, Adam ni Ev ashadisha ruchingej ra kushakam chikupu. Yehova wamuleja Adam anch: ‘Mulong ey udi kwey rufunfut, ukez kuchirikin kand kwey ku rufunfut.’ (Tang Disambishil 3:19.) Chirumburikin anch Adam ukwikal kand rufunfut, mudi padingau kandikal amutanga. (Disambishil 2:7) Kupwa kwa Adam kusal chitil, wafa ni kikalapaku kand.

14. Tufiling mulong wak?

¹⁴ Anch Adam ni Ev amuziyila Nzamb, ing adandamena kwikal ni mwom djat ni nlel unou. Pakwez, pamubwambwilau, asala chitil, ni ashikena ku kufa. Chitil chidi mudi mayej makash twaswana kudi anvajetu akusambish. Etu awonsu twavadika twikala akayitil, ni chawiy tukata kufa. (Rom 5:12) Pakwez chinech chadingap chitongijok cha Nzamb mulong wa antu. Nzamb kakimbap anch antu afa, ni Bibil utazukin rufu anch “mukankuny.”—1 Korint 15:26.

UYAKIN UTUKWODIN

15. Mutapu ik utukwodina uyakin piur pa rufu?

¹⁵ Kwijik uyakin piur pa rufu kutukwodin ku yitongijok yivud ya makasu. Bibil utufundishin anch afu kameningap mar ap kwov runeng. Tukutwishap kwisamb nau, niyawiy kakutwishap kwisamb netu. Tukutwishap kuyikwash afu, ni afu kakutwishap kutukwash. Kakutwishap kutusal nayimp, chawiy lel, tufanyidinap kuyov wom. Pakwez, marelijon mavud mafundishin anch afu adi aom mwi ndond kanang ni anch tukutwish kuyikwash anch twayifut amwimpel nfalang ap antu amenau mudi ansant. Pakwez anch twijik uyakin piur pa rufu, kakutwishap kutudimb nich makasu minam.

16. Marelijon mavud mafundishin makasu ik piur pa afu?

¹⁶ Satan ukat kusadin marelijon ma makasu chakwel atudimb ni kutubachik tutonga anch afu adandamedin kwikal aom. Chilakej, marelijon mamwing mafundishin anch, anch twafa, chikunku chetu chimwing chikat kudandamen ni mwom ndond yikwau. Mwamu mukufundishiningay relijon wey bil anch ufundishining yilondinay Bibil piur pa rufu? Satan usadidin makasu mulong wa kuyipumbul antu mwi njil ya Yehova.

17. Mulong wak chitongijok cha kuyosh antu mu karung ka kasu chidi kumusaal Yehova?

¹⁷ Yom yifundishina marelijon mavud yiyipin nakash. Chilakej, amwing afundishin anch antu ayimp will akuyosh chikupu mu karung ka kasu. Makasu minam kudi kumusaal Yehova. Kakezap ap pakemp kulik antu amana mar mutapu winou! (Tang 1 Yohan 4:8.) Mutapu ik ukutwisha kwiyov piur pa muntu kanang upupina mwanend kusutil ku kwandjik makas ma mwan mu kasu? Ukumuman anch udi muntu wa chisum nakash. Ukukatishap kumwijik. Satan ukimbin chakin kamu anch twova mwamu piur pa Yehova!

18. Mulong wak tufanyidinap kuyov afu wom?

¹⁸ Marelijon mamwing matulejining anch, anch antu afa, akat kwikal aspiritu. Marelijon ma mutapu winou mafundishin anch tufanyidin kuyilimish ni kuyov wom aspiritu inay mulong akutwish kwikal kand arund ap akankuny akweta usu nakash. Antu avud itiyijining makasu minam. Ayoviling afu wom, chawiy lel akat kuyifukwil pa ndond pa kumwifukwil Yehova. Vurik anch afu kakutwishap kwov chom ap chimwing, chawiy tufanyidinap kuyov wom. Yehova ndiy Sakatang wetu. Udi Nzamb wakin, ni tufanyidin kumwifukwil ching ndiy.—Kujingunik 4:11.

19. Mulong wak kwijik uyakin piur pa rufu kutukwashin?

¹⁹ Kwijik uyakin piur pa rufu, kutukodil ku makasu ma marelijon. Uyakin winou utukwashin kutesh kushilamu kupandakena kuwap kwa Yehova piur pa mwom wetu ni pa machuku ma kurutu.

20. Yom ik tukwileja mu shapitre ulondwilaku ou?

²⁰ Pasak, kashalapol umwing wa Nzamb utazukinau anch Job wipula anch: “Anch muntu wafa kal, ukutwish kwikal kand mwom?” (Job 14:14) Chikutwish kwikal chakin kamu kudi muntu wafila kal kwikal kand mwom? Chakul chitwinkishinay Nzamb mu Bibil chisangareshin nakash. Tukuman mulong winou mu shapitre ulondwilaku ou.

1-3. Chom ik chatuteka etu awonsu mu rukan, ni mutapu ik ukutukamuninay Yehova?

TONG BIL anch akufish nich ni akutek mu rukan ra rawonsu mulong wa uyimp wakad ey kusal. Kwikil mutapu wa kukudiosh mu rukan. Machuku mey ma kurutu mameken kwikal makad ruchingej, ni kwikil chom ukutwisha kusal piur pa mulong winou. Pakwez piushadishina kamu ruchingej rawonsu, watesh anch muntu umwing ukwet usu wa kukudiosh mu rukan ni washilamu anch ukukukwash! Ukwiyov nchik?

² Etu awonsu tudi antu a rukan ra rufu. Kwikil chom tukusala, ni kwikil mutapu wa kukamunik. Pakwez, Yehova ukwet usu wa kutukamunin kutudiosh ku rufu. Ni washilamu anch: “mukankuny wa kwisudiel ukez kusheshay udi rufu.”—1 Korint 15:26.

³ Tong bil mutapu ukwikala ni musangar piukulika kwiyakamish piur pa kufa! Yehova kakezap ching kudiosh rufu, pakwez ukuyichirish kand antu afila kal ku mwom. Tongin bil piur pa kurumburik kwa chom chinech kudi ey. Washilamu anch antu “akad usu mu rufu” akwikal kand aom. (Isay 26:19, NWT) Chawiy chitazukinay Bibil anch divumbuk.

ANCH MUKATISH NETU WAFA

4. (a) Chom ik chikutwisha kutukasikesh anch muntu wa mu dijuku dietu ap murund netu wafa? (b) Anany adinga arund amwing a piswimp a Yesu?

⁴ Anch muntu wa mu dijuku dietu ap murund netu wa piswimp wafa, tukat kwov kusansan ni runeng nakash. Tukat kuziy. Kwikil chom ap chimwing tukutwisha kusal mulong wa kumuchirish muntu winou ku mwom. Pakwez Bibil utukasikeshin chakin. (Tang 2 Korint 1:3, 4.) Tushinshikinany chilakej chimekeshina mutapu ukimbinay nakash Yehova ni Yesu kuyichirish akatish netu ku mwom. Padingay Yesu pa divu, wayanga yisu yivud kumutal Lazar ni ampanyend, Mart ni Mariy. Awonsu asatu adinga arund nakash a Yesu. Bibil ulondin anch: “Yesu wamukata Mart, ni mwanamakwend Mariy, ni mwanamakwau Lazar.” Chad, dichuku dimwing, Lazar wafa.—Yohan 11:3-5.

5, 6. (a) Chom ik chasalay Yesu payimanay anamakwend a Lazar ni arund anenganen? (b) Mulong wak chitukasikeshin kwijik mutapu wovay Yesu piur pa rufu?

⁵ Yesu waya kumukasikesh Mart ni Mariy. Pateshay Mart anch Yesu wezin, waya pol pa musumb mulong wa kumusankan. Wasangara kumuman Yesu, pakwez wamuleja anch: “Anch ey wadi kunoku, ing mwanamakwam kafilap.” Mart watonga anch Yesu weza chisu chasutang kal. Kupwa kwa chinech, Yesu wamumana Mariy ukat kudil. Pamanay ushon wau, wova nayimp ni wadila. (Yohan 11:21, 33, 35) Wova kusansan nakash kutwovilinga pitukata kushadish muntu tukatina.

⁶ Kwijik anch Yesu woviling mutapu utukata kwov piur pa rufu kutukasikeshin. Ni Yesu udi kamu mudi Tatukwend. (Yohan 14:9) Yehova ukwet usu wa kudiosh rufu chikupu, chawiy chom chikusalay kurutu oku piswimp ap.

“LAZAR, BUDIK!”

7, 8. Mulong wak Mart kitiyijap kudiosh diyal kwi nzay kwamujikau Lazar, pakwez chom ik chasalay Yesu?

⁷ Pashikay Yesu kwi nzay kwamujikau Lazar, ku chis ading apatinaku ni diyal dijim. Yesu walonda anch: “Dioshany diyal.” Pakwez Mart kitiyijap kudiosh diyal. Mujimbu wa Lazar wading walal kal mwi nzay machuku manying. (Yohan 11:39) Kadingap wija chom chikusalay Yesu mulong wa kumukwash mwanamakwend.

⁸ Yesu wamuleja Lazar anch: “Lazar, budik!” Chom chamanay Mart ni Mariy chading chishimokishena. “Ndiy wabudika. Makas ni mend mading ma kuvung mu maswin mamujikau nich.” (Yohan 11:43, 44) Lazar amuchirisha ku mwom! Anamakwend ni arund nend amwaka nakash. Amubwikata, kumukwat ni makas, ni kwambamb nend. Chilay mud ik! Yesu wamuvumbula Lazar.

“MWAN MBAND, NAKULEJ ANCH, ‘LANK!’”

9, 10. (a) Nany wamwinkisha Yesu usu wa kuyivumbul antu? (b) Mulong wak jinsangu ja divumbuk jidi ja usey kudi etu?

⁹ Yesu wayivumbula antu ku usu wend amwinend? Bwat. Kurutu amuvumbula Lazar, Yesu wamulembila Yehova ni Yehova wamwinkisha usu wa kumuvumbul Lazar. (Tang Yohan 11:41, 42.) Lazar kadingap muntu kusu umwing wavumbulau. Bibil utulejin piur pa changadim wa mivu 12 wading uyedina nakash. Tatukwend, Yayirus, kadingap ni ruchingej, ni wamutazuka Yesu mulong wa kumwok mwanend. Wading mwanend kusu umwing. Pading pambambinay ni Yesu, muntu umwing weza walond anch: “Mwaney mband wafa kal. Ing, mulong wak umuswidioshina kand Mulej.” Pakwez Yesu wamulej Yayirus anch: “Kangal wov kwey wom, chom chijim, ikal kwey nich ritiy.” Kupwa waya pamwing ni Yayirus ku chikumbu chend. Pashikau piswimp ni ku chikumbu, Yesu wamana ni watesha antu akat kudil. Yesu wayileja anch: ‘Likany kudil, mwan winou kafilap, ulel kwend tul!’ Tatukwend ni makwend ading afanyindin kwiyipul piur pa chom chikimbinay Yesu kulond. Yesu wayibudisha antu awonsu pol ni wandama pamwing ni tatukwend ni makwend mu kapalikany mwadingay mwan. Yesu wamukwata mwan ku chikas chend ni wa mwela anch: “Mwan mband, nakulej anch, ‘lank!’ “ Tong bil, anvajend ova musangar mudi ik palankay kapamp kamwing ni kusambish kwend! Yesu wamulangwisha mwanau mband. (Marko 5:22-24,35-42; Luka 8:49-56) Kudiosh pa dichuku dinidia, pamumanangau mwanau mband, adinga ni kuvurik yom yayisadilay Yehova kusutil kudi Yesu.a

¹⁰ Antu achirishay Yesu ku mwom afa kand kwinyim kwa machuku. Pakwez yitutangina piur pa antu inay yidi ya usey mulong yitwinkishin ruchingej rakin. Yehova ukimbin kuyivumbul antu, ni ukez kuyivumbul.

YITWILEJIDINA KU JINSANGU JA DIVUMBUK

11. Chom ik chitufundishinay Mulej 9:5 piur pa Lazar?

¹¹ Bibil ulejen patok anch: “afu, kijap kwau chom ap chimwing.” Chading chakin piur pa Lazar. (Mulej 9:5) Mudi kamu mwalonday Yesu, chading mudi anch Lazar wading ulel tul. (Yohan 11:11) Padingay mwi nzay, Lazar kadingap wija “chom ap chimwing.”

12. Mutapu ik twija anch Lazar amuvumbula chakin kamu?

¹² Pamuvumbulau Lazar kudiay Yesu, antu avud amana. Ap akankuny a Yesu ijika anch wasala chilay chinech. Lazar wading mwom, ni chinech chamekesha anch amuvumbula chakin kamu. (Yohan 11:47) Chikwau kand, antu avud eza kumutal Lazar, mudi chibudikin, asambisha kwitiyij anch Yesu amutuma kudi Nzamb. Akankuny a Yesu kakatishap chom chinech, chawiy lel akwata mpung ya kuyijip awonsu aad, Yesu ni Lazar.—Yohan 11:53; 12:9-11.

13. Mulong wak tukutwish kwikal ni kashinsh anch Yehova ukuyivumbul afu?

¹³ Yesu walonda anch: “awonsu adia mwi nzay ya chivurikish” akez kuvumbuk. (Yohan 5:28, NWT) Chinech chirumburikin anch antu awonsu adia mu manangu ma Yehova akez kuyichirish ku mwom. Pakwez, pakwel anch Yehova amuvumbula muntu, ufanyidin kuvurik yom yawonsu piur pa muntu winou. Ukutwish chakin kamu kusal mwamu? Mwaning, kudi mamiliyar ma atutumbu mwiur. Bibil ulondin anch Yehova wij katumbu ni katumbu pa dijin. (Tang Isay 40:26.) Anch ukutwish kuvurik katumbu ni katumbu pa dijin, chawiy lel ukutwish chakin kuswapal kuvurik yom yawonsu piur pa antu awonsu akezay kuchirish ku mwom. Cha usey nakash,Yehova watanga yom yawonsu, chawiy twija anch ukwet usu wa kuyichirish antu ku mwom.

14, 15. Mazu ma Job matufundishin ik piur pa divumbuk?

¹⁴ Job muntu ushinshamena witiyija divumbuk. Wipula anch: “Anch muntu wafa kal, ukutwish kwikal kand mwom?” Kupwa wamuleja Yehova anch: “Ukez katazuk, niyam nikez kakwakul. Ukez kaswir kwinman kand, yam kamu mudimu wa makas mey.” Mwaning, Job wading wij anch Yehova uchingedin chisu chikezay kuyivumbul afu.—Job 14:13-15.

¹⁵ Mutapu ik wiyovila piur pa ruchingej ra divumbuk? Ukutwish kwiyipul anch: ‘Chikwikal nchik piur pa anamakwam ni arund nam afila kal, akez niyawiy kuvumbuk?’ Chitukasikeshin kwijik anch Yehova ukimbin chakin kuyichirish afu ku mwom. Tushinshikinany chilondinay Bibil piur pa ndond yikezau kushakam ni nany ukezau kuvumbul.

AKUTESH “DIZU DIEND NI AKUVUMBUK”

16. Antu akuvumbulau mulong wa kushakam pa divu akwikal ni mwom wa mutapu ik?

¹⁶ Pasak, antu avumbuka ashakama pamwing ni anamakwau ni arund nau panap pa divu. Chawiy chikusadika kand mu machuku ma kurutu, pakwez chikwikal nawamp nakash. Mulong wak? Mulong antu akuchirishau ku mwom pa divu akwikal ni mutapu wa kushakam chikupu ni kakufap kand. Ni akushakam mu mangand mashalijadina nakash ni matushicha katat. Kukwikalap njit, yisal yiyimp, ni mayej.

17. Anany akuvumbulau?

¹⁷ Anany akuvumbulau? Yesu walonda anch: “awonsu adia mwi nzay ya chivurikish akutesh dizu diend ni akuvumbuk.” (Yohan 5:28, 29, NWT) Ni Kujingunik 20:13, utulejin anch: ‘Karung wa mem wabudisha afu adingamu, ni rufu ni nzay yabudisha afu adingamu.’ Mwaning, mamiliyar ma antu akwikal kand aom. Kambuy Paul walonda kand anch: “antu atentamina ni antu akad kutentam” akuvumbuk. (Tang Midimu 24:15, NWT.) Chinech chirumburikin ik?

18. Anany “antu atentamina” akuvumbulau?

¹⁸ “Pakach pa “antu atentamina” padi atushalapol ashinshamena a Yehova ashakama kurutu kwa kwez kwa Yesu pa divu. Antu mudi Nowa, Aburaham, Sara, Moses, Rut, ni Ester akuvumbuk mulong wa kushakam panap pa divu. Ukutwish kutang piur pa amakundj ni amband inay amwing mu Hebereu shapitre wa 11. Chikwikal nchik piur pa atushalapol ashinshamena a Yehova afila pa chirung chetu? Niyawiy adi “antu atentamina,” chawiy lel akuyivumbul.

19. Anany “antu akad kutentam”? Chom ik chikusalay Yehova mulong wa kuyikwash antu inay chakwel amwijika?

¹⁹ Pakach pa “antu akad kutentam” padi mamiliyar ma antu aburena mutapu wa kumwijik Yehova. Ap anch afa kal, Yehova kayivuramedinap. Ukuyivumbul, ni akwikal ni mutapu wa kwilej piur pendendiy ni kumusadin.

20. Mulong wak antu awonsu kakezap kuvumbuk?

²⁰ Chinech chirumburikin anch antu in awonsu afa kal akuvumbuk? Bwat. Yesu walonda anch antu amwing kakezap kuyichirish ku mwom. (Luka 12:5) Nany ukukwata mupak wakwel anch muntu kanang ukuvumbuk ap bwat? Yehova udi Nzwij wa nsudiel, pakwez wamwinkisha kand Yesu ulabu “mulong wa kuyirumburish antu aom ni afu.” (Midimu 10:42) Muntu mwawonsu ukezau kurumburish mudi muyimp ni wakad kukat kukarumuk kakezap kumuvumbul.—Tal Mazu ma kwinsudiel 19.

DIVUMBUK MULONG WA KUYA MWIUR

21, 22. (a) Kuvumbuk mulong wa kuya mwiur kurumburikin ik? (b) Nany wavumbulau wakusambish mulong wa mwom wa mwiur?

²¹ Bibil utulejin kand anch antu amwing akushakam mwiur. Anch amuvumbul muntu mulong wa kuya mwiur, kakumuchirishap ku mwom nich mujimbu wa mbij. Amuvumbwil mulong wa kushakam mwiur mudi muntu wa muspiritu.

²² Yesu ndiy muntu wakusambish wavumbulau mutapu winou. (Yohan 3:13) Machuku masatu kupwa kwa kumujip Yesu, Yehova wamuvumbula. (Kuseng 16:10; Midimu 13:34, 35) Kamuvumbulap Yesu nich mujimbu mudi wa antu. Kambuy Pita warumburila anch Yesu “amujipa mu mujimbu wa mbij pakwez amuchirisha ku mwom muspiritu.” (1 Pita 3:18, NWT) Yesu amuchirisha ku mwom mudi muntu wa muspiritu ukweta usu! (1 Korint 15:3-6) Pakwez Bibil ulondin anch kakwikalap amwinend kusu.

23, 24. Anany adia “kachisak ka amikoku” alonday Yesu, ni adi uvud wa antu inch?

²³ Piswimp ni rufu rend, Yesu wayileja in kwilej end ashinshamena anch: “Am niyil mulong wa kukurijekinany ndond.” (Yohan 14:2) Chinech chimekeshin anch amwing pakach pa in kwilej end akuvumbuk mulong wa kushakam nend pamwing mwiur. Uvud wa antu inch? Yesu walonda anch akwikal antu akemp, “kachisak ka amikoku.” (Luka 12:32, TMK) Kambuy Yohan walejana kamu uvud wa antu inay pamumanay Yesu “wiminy [mwiur] pa Mukandu wa Sion. Wading nau antu tunan chitot ni makum manying ni tunying.”—Kujingunik 14:1.

²⁴ Chisu ik chikuyivumbulau in Kristu 144000? Bibil utulejin anch chinech chafanyina kusadik kupwa kwa Kristu kusambish kuyikel mwiur. (1 Korint 15:23) Tushich pa chirung chinech katat kamu, ni avud pakach pa antu 144000 ayivumbula kal mulong wa kuya mwiur. Achidia pa divu afila pa chirung chetu akuyivumbul kapamp kamwing mulong wa kushakam mwiur. Pakwez, antu avud akuyivumbul mu machuku ma kurutu mulong wa kushakam mu Paradis panap pa divu.

25. Yom ik tukwileja mu shapitre ulondwilaku ou?

²⁵ Piswimp ap, Yehova ukuyikamunin antu awonsu ku rufu ni rufu rikwikalakwap kand chikupu! (Tang Isay 25:8.) Pakwez antu ayila mwiur ayil mulong wa kusal ik? Bibil urumburil anch akuyikel pamwing ni Yesu mu winyikel wa Want. Tukwilej yom yivud piur pa winyikel winou mu shapitre ulondwilaku ou.