-
Want wa Nzamb Chom ik?Sanger Mwom Chikupu!—Ileja Bibil
-
-
DILEJAN DIA 31
Want wa Nzamb Chom ik?
Uruu wa usey nakash udia mu Bibil utadin Want wa Nzamb. Yehova ukusadin Want winou mulong wa kuwanyish rusot rend ra kusambish piur pa divu. Want chom ik? Mutapu ik twija anch wasambishin kal kuyikel? Want winou wasadin kal yom ik? Ni ukusal yom ik mu machuku ma kurutu? Dilejan dined ni makwau maad mambakedinap makwakul ku yipul yiney.
1. Want wa Nzamb chom ik, ni nany udia Mwant wa Want winou?
Want wa Nzamb ud guvernema watekau kud Yehova Nzamb. Mwant ud Yesu Kristu ni uyikedin kudiokal mwiur. (Mateu 4:17; Yohan 18:36) Bibil ulondin piur pa Yesu anch: “Ukez kikal Mwant . . . chikupu.” (Luka 1:32, 33) Mulong ud Mwant wa Want wa Nzamb, Yesu ukuyiyikel antu awonsu pa divu.
2. Anany akuyikela pamwing ni Yesu?
Yesu kakuyikelap amwinend. Antu adiokila ku “michid yawonsu, ni a jindim jawonsu, ni a majuku mawonsu, ni a mangand mawonsu . . . akez kayikel pa mangand.” (Kujingunik 5:9, 10) Antu inch akuyikela ni Kristu? Kudiosh kwezinay Yesu pa divu, mamiliyon ma in Kristu avud ikadin kal in kwilejend. Pakwez ching kwau antu 144 000 awiy akuya mwiur mulong wa kuyikel pamwing ni Yesu. (Tang Kujingunik 14:1-4.) In Kristu akwau awonsu pa divu akwikal an a ngand a Want.—Kuseng 37:29.
3. Mulong wak Want wa Nzamb usutinamu maguvernema ma antu?
Ap anch antu ayikedina akat kupakish kusal yom yiwamp, pakwez kakwetap usu wa kusal yom yawonsu yikatinau. Kupwa akat kuyiswinkan kud anyikel akwau akad kuyibangin antu. Pakwez Yesu udia Mwant wa Want wa Nzamb, kakumuswinkanap kud muntu mukwau. Nzamb “[watekin kal] want . . . wakad kez kikal nich disudiel chikupu.” (Daniel 2:44) Yesu ukuyikel pa mangand mawonsu ni kakwikalap mwin katond. Ud mwin rukat, muwamp, ni utentamin ni ukuyifundish antu kusalijadin yom mu mutapu wa rukat, uwamp ni utentamina.—Tang Isay 11:9.
ILEJA CHIKURIKINA
Tal mulong wak Want wa Nzamb usutinamu maguvernema mawonsu ma antu.
4. Guvernema wa usu nakash ukuyikel pa divu diawonsu
Yesu Kristu ukwet usu wa kuyikel kumusutamu nyikel win mwawonsu wa pa divu. Tang Mateu 28:18, kupwa isambinany chipul ech:
Usu wa Yesu wa kuyikel nich ushalijadin mutapu ik ni wa an a antu?
Yisu yivud maguvernema ma antu makat kuswimp, ni want ni want ukat kuyikel kwau kachikunku kakemp ka divu. Chad chid nchik piur pa Want wa Nzamb? Tang Daniel 7:14, kupwa isambinany yipul ey:
Mulong wak chisangareshin kwijik anch Want wa Nzamb ‘kiukez kapwap’?
Mulong wak chisangareshin kwijik anch ukuyikel pa divu diawonsu?
5. Winyikel wa antu afanyidin kuuswinkesh
Mulong wak Want wa Nzamb ufanyidin kumaswinkan mant ma antu? Talany VIDEO, kupwa isambinany chipul ech:
Winyikel wa antu waletin kal yibudikin ik?
Tang Mulej 8:9, kupwa isambinany yipul ey:
Ov, utongin anch Want wa Nzamb ufanyidin kuswinkan maguvernema ma antu? Mulong wak?
6. Want wa Nzamb ukwet anyikel atwija nawamp
Mulong Mwant wetu Yesu, wading niyend muntu, ukutwish kamu “kutwovil riy mulong wa kuziy kwetu.” (Hebereu 4:15) Amakundj ni amband ashinshamena 144 000 akuyikela pamwing ni Yesu ayitonda kud Yehova ni adiokil ku ‘michid yawonsu, jindim jawonsu, majuku mawonsu, ni mangand mawonsu.’—Kujingunik 5:9.
Ov, utongin anch chikasikeshin pa kwijik anch Yesu ni antu akuyikelay nend ij nawamp chirumburikina kwikal muntu? Mulong wak?
Yehova wayitondin kal amakundj ni amband a mitapu kushalijan chakwel ayikel pamwing ni Yesu
7. Want wa Nzamb ukwet yijil yiwamp nakash
Maguvernema makat kutek yijil mulong wa uwamp wa an a ngand yau ni mulong wa kuyichidij. Want wa Nzamb niyau ukwet yijil yifanyidinau an a ngand kulimish. Tang 1 Korint 6:9-11, kupwa isambinany yipul ey:
Utongin anch mangand makwikal mutapu ik chisu chikulimishau antu awonsu yijil ya Nzamb?a
Ov, utongin anch Yehova ukwet mbil ya kuyit an a Want kulimish mbil jinej? Mulong wak?
Yom ik yimekeshina anch antu akad kulimish yijil yiney akutwish kuswimp?—Tal verse wa 11.
Maguvernema makat kutek yijil mulong wa uwamp wa an a ngand yau ni mulong wa kuyichidij. Want wa Nzamb ukwet yijil yiwamp nakash mulong wa kuyichidij an a ngand ni mulong wa uwamp wau
ANCH MUNTU WAKWIPUL ANCH: “Want wa Nzamb chom ik?”
Ukwakul nchik?
YOM TWILEJA KAL
Want wa Nzamb ud guvernema wakin udia mwiur ukuyikela pa divu diawonsu.
Ov, uvurikin?
Anany adia anyikel a Want wa Nzamb?
Want wa Nzamb usutinamu mutapu ik maguvernema mawonsu ma antu?
Yom ik yimwing yikatinay Yehova anch an a Want asala?
JINGUNIN KAND
Tal yom yafundishay Yesu piur pa kwindond kudia Want.
“Ov, Want wa Nzamb Uding mu Muchim Wey?” (Mutu wa mulong udia pa jw.org)
Mulong wak Atuman a Yehova akat kutond kwikal ashinshamena ku Want wa Nzamb kusutamu ku mant ma antu?
Tal yom yilejenay Bibil piur pa antu 144 000 atondinau kud Yehova mulong wa kuyikel pamwing ni Yesu.
Yom ik yamwinkisha mband umwing wading mu rukan kashinsh anch ching kwend Nzamb ndiy ukutwisha kulet mangand matentamina?
“Mutapu Natana Yakul Piur pa Kuburen Kutentam” (Lankany!, wa Ngond wa 11, 2011)
a Tukwisambin piur pa yijil yimwing yiney mu Chikunku cha 3.
-
-
Want wa Nzamb Wasambishin kal Kuyikel!Sanger Mwom Chikupu!—Ileja Bibil
-
-
DILEJAN DIA 32
Want wa Nzamb Wasambishin kal Kuyikel!
Want wa Nzamb wasambisha kuyikel mwiur mu muvu wa 1914. Wawiy muvu wasambisha kand machuku mansudiel ma winyikel wa antu. Mutapu ik twija mwamu? Shinshikin uprofet wa Bibil, yom yisadikina mu mangand ni yaku ya antu yafanyina kumekan kudiosh mu muvu wa 1914.
1. Uprofet wa Bibil umekeshin ik?
Mukand wa Daniel wasambela kulejan anch Want wa Nzamb wafanyina kusambish kuyikel kwinsudiel kwa chirung chitazukinau anch “mivu sambwad.” (Daniel 4:16, 17) Kupwa kwa yitot ya mivu, Yesu niyend wachitazuka chirung chinech anch ‘yisu yatenchikau ya akamichid,’ ni wafundisha anch chading kandikal chipwa. (Luka 21:24) Mud mutapu tukumana, mivu sambwad yapwa mu muvu wa 1914.
2. Yom ik yasambisha kusadik ni yaku ik yikalau nich antu kusambish mu muvu wa 1914?
In kwilej a Yesu amwipula anch: “Chijingidij ik chikeza kalejan chisu cha kushik kwey, ni cha disudiel dia mangand?” (Mateu 24:3) Mu chakul chend, Yesu walejana yom yivud yafanyina kusambish kusadik kupwa kwendendiy kusambish kuyikel mwiur mud Mwant wa Want wa Nzamb. Pakach pa yom yiney pad njit, kamungun ni kuzal kwa divu. (Tang Mateu 24:7.) Bibil wasambela kand kulejan yaku yikwikalau nich antu mu “machuku ma kwisudiel” yikusala anch mwom wikala wa “mar nakash.” (2 Timote 3:1-5) Yom ni yaku yiney yasambisha pakampwil kumekan mu muvu wa 1914.
3. Mulong wak yom yayipin kal kudiosh kwasambishina Want wa Nzamb kuyikel?
Chisu chikemp kupwa kwa Yesu kwikal Mwant wa Want wa Nzamb, warisha nend Satan nau ayilembil end. Satan amupandikana. Bibil ulondin anch: “Amudjibula pa mangand pamwing nau aruwend.” (Kujingunik 12:9, 10, 12) Satan ukwet ujim nakash mulong wij anch akumujiyish piswimp ap. Chawiy ukat kuletish kusansan ni mar nakash pa mangand mawonsu. Chawiy chisadina anch yom yiyip nakash pa mangand! Pakwez Want wa Nzamb ukupwish milong yawonsu yiney.
ILEJA CHIKURIKINA
Shinshikin yom yimekeshina anch Want wasambisha kuyikel mu muvu wa 1914. Tukwilej kand mutapu tukutwisha kumekesh anch twitiyijin anch Want wasambishin kal kuyikel.
4. Uprofet wa Bibil umekeshin anch Want wasambisha kuyikel mu muvu wa 1914
Nzamb wamulatisha Mwant Nebukadinesar wa mu Babilon wa pasak chilat chikweta yom ya uprofet. Chilat chinech ni mutapu wachirumburilau kud Daniel yamekesha anch yading yitadin winyikel wa Nabukadinesar ni Want wa Nzamb kand.—Tang Daniel 4:17.a
Tang Daniel 4:20-26, kupwa sadin tablo mulong wa kwakul ku yipul ey:
(A) Yom ik yamanay Nebukadinesar mu chilat chend?—Tal verse wa 20 ni 21.
(B) Yom ik yaushikena mutond?—Tal verse wa 23.
(C) Yom ik yafanyina kushiken kwinsudiel kwa “mivu sambwad”?—Tal verse wa 26.
Kukwatijan Kudia Pakach pa Mutond wa mu Chilat ni Want wa Nzamb
UPROFET (Daniel 4:20-36)
Want
(A) Mutond ujim
Kwimik Want
(B) “Ukatula mutond,” ni pasuta “mivu sambwad”
Kuchirish Want
(C) “Ukez kikalany kand mwant”
Mu kuwanyin kwa kusambish kwa uprofet winou . . .
(D) Mutond wading umekeshin nany?—Tal verse wa 22.
(E) Want wend awimika mutapu ik?—Tang Daniel 4:29-33.
(F) Yom ik yamushikena Nabukadinesar kwinsudiel kwa “mivu sambwad”?—Tang Daniel 4:34-36.
KUWANYIN KWA KUSAMBISH
Want
(D) Nebukadinesar Mwant wa Babilon
Kwimik Want
(E) Kupwa kwa muvu wa 606 K.C.C., Nebukadinesar washadisha manangu ni katwishap kuyikel mu mivu sambwad yin kamu
Kuchirish Want
(F) Nebukadinesar wachirisha manangu ni wasambisha kand kuyikel
Mu kuwanyin kwa kaad kwa uprofet winou . . .
(G) Mutond wading umekeshin anany?—Tang 1 Jinsangu 29:23.
(H) Want wau awimika mutapu ik? Mutapu ik twija anch ading awimikin kal ap chisu chadingay Yesu pa divu?—Tang Luka 21:24.
(I) Chisu ik ni kwisu kwachirishinau want winou?
KUWANYIN KWA KAAD
Want
(G) Ant in Isarel ading amekeshin want wa Nzamb
Kwimik Want
(H) Yerusalem amushesh kal, want wa in Isarel awimik kal mu mivu 2520
Kuchirish Want
(I) Yesu wasambish kal kuyikel mwiur mud Mwant wa Want wa Nzamb
Mivu sambwad yikwet kulep ik?
Yikunku yimwing ya Bibil yikat kutukwash kutesh yikunku yikwau. Chilakej, buku wa Kujingunik ulejen anch mivu yisatu ni chikunku yikwet machuku 1 260. (Kujingunik 12:6, 14) Chinech chirumburikin anch kukwatijan ni uprofet wa Bibil, muvu umwing ukwet machuku 360. Chawiy, “mivu sambwad” yikwet machuku 2 520. Yisu yimwing Bibil ukat kusadin dizu “dichuku dimwing” mulong wa kwisambin muvu umwing. (Ezekiel 4:6) Chilik chimwing ni mivu sambwad yisambidinau mu buku wa Daniel—yimekeshin mivu 2 520.
5. Mangand maswimpa kudiosh muvu wa 1914
Yesu wasambela kulejan mutapu ukwikala mangand kupwa kwendendiy kwikal Mwant. Tang Luka 21:9-11, kupwa isambinany chipul ech:
Yom ik yimwing pakach pa yom yiney wamena kal ap wateshina kal?
Kambuy Paul walejana mutapu ukwikalau antu mu machuku ma nsudiel ma winyikel wa antu. Tang 2 Timote 3:1-5, kupwa isambinany chipul ech:
Yaku ik yimwing yikwetau antu nlel umena?
6. Mekesh anch witiyijin anch Want wasambishin kal kuyikel
Tang Mateu 24:3, 14, kupwa isambinany yipul ey:
Mudimu ik wa usey umekeshina anch Want uyikedin?
Mutapu ik ukutwisha niyey kwipan mu mudimu winou?
Want wa Nzamb uyikedin, ni dichuku ukuyikela pa divu diakabuj did piswimp ap. Tang Hebereu 10:24, 25, kupwa isambinany chipul ech:
Yom ik tufanyidina etu awonsu kusal ‘pitumena anch dichuku dikat kusej piswimp’?
Yom ik ukusala anch wij chom kanang chikutwisha kuyikwash ni kuyipandish antu akwau?
ANCH MUNTU WAKWIPUL ANCH: “Mulong wak Atuman a Yehova akat kulondang anch muvu wa 1914 ud wa usey nakash?”
Ey ukumwakul nchik?
YOM TWILEJA KAL
Uprofet wa Bibil ni yom yisadikina mu mangand yimekeshin anch Want wa Nzamb uyikedin. Tumekeshin anch twitiyijin mwamu mu kulejan piur pa Want ni kukumangan ku yikumangan.
Ov, uvurikin?
Yom ik yashikena kwinsudiel kwa mivu sambwad yilejenau mu buku wa Daniel?
Yom ik yikwinkishina ey kashinsh anch Want wa Nzamb wasambisha kuyikel mu muvu wa 1914?
Mutapu ik ukutwisha kumekesh anch witiyijin anch Want uyikedin?
JINGUNIN KAND
Tal yom yilondinau in kufund nsangu ja pakur ni antu akwau piur pa mutapu waswimpa mangand kudiosh muvu wa 1914.
“Chisu Chaswimpa Yaku ya Antu Kapamp Kamwing” (Lankany!, wa Ngond wa 4, 2007)
Tang mutapu uprofet udia mu Mateu 24:14 waswimpa mashakamin ma ikundj umwing.
“Nakata Masengan ma Tenis Kusutamu Yom Yawonsu” (Chinong cha Kalam No. 3 2017)
Mutapu ik twija anch uprofet udia mu Daniel shapitre wa 4 wisambidin piur pa Want wa Nzamb?
Yom ik yimekeshina anch “mivu sambwad” yisambidinau mu Daniel shapitre wa 4 yapwa mu muvu wa 1914?
a Tal mitu ya milong yaad ya nsudiel yidia mu “Jingunin Kand” mu dilejan dined.
-
-
Want wa Nzamb ukusal yom ik?Sanger Mwom Chikupu!—Ileja Bibil
-
-
DILEJAN DIA 33
Want wa Nzamb Ukusal yom ik?
Want wa Nzamb wasambishin kal kuyikel. Piswimp ap ukuswimp yom yivud nakash pa divu. El tushinshikin yom yimwing yiwamp ukutwisha kuchingej mu umutakel wa Want.
1. Mutapu ik ukuchirisha Want wa Nzamb chisambu ni kutentam pa divu?
Yesu, Mwant wa Want wa Nzamb ukujiyish antu ayimp ni maguvernema kwi njit ja Harmagedon. (Kujingunik 16:14, 16) Chisu chinicha, kushilamu oku kwa Bibil kukuwanyin: “Kwashal kal ka chisu kakemp, chad antu ayimp kakwikalakup kand.” (Kuseng 37:10) Kusutil Want, Yesu ukulet chisambu ni kutentam pa divu diawonsu.—Tang Isay 11:4.
2. Mashakamin makwikal mutapu ik chisu chikusadika rusot ra Nzamb pa divu?
Pakuyikela Want wa Nzamb, “mwin kutentam mwawonsu ukez kaswan ngand, ukez kashakamamu chikupu.” (Kuseng 37:29) Tong bil anch ushich mu mangand mudia antu atentamina ni awonsu amukatin Yehova ni akatijadin umwing ni mukwau! Kwikil muntu mwin kuyel, ni antu awonsu akushakam chikupu.
3. Want wa Nzamb ukusal yom ik kupwa kwa kuyijiyish antu ayimp?
Kupwa kwa kuyijiyish antu ayimp, Yesu ukuyikel mu mivu 1 000. Pa chisu chinicha, ndiy ni antu 144 000 akuyikelay nend akuyikwash antu pa divu kwikal awanyidina ni akad yitil. Kwinsudiel kwa chirung chinicha, divu diawonsu dikwikal paradis muwamp nakash, ni antu awonsu akwikal ni musangar mulong akuziyin ku yijil ya Yehova. Kupwa Yesu ukumuchirishin Tatukwend Yehova Want. ‘Dijin dia [Yehova] akuditumbish’ mu mutapu uwamp nakash wakadingap kal kusadikang. (Mateu 6:9, 10) Chikumekan kamu patok anch Yehova ud Nyikel muwamp ukata kuyibangin atushalapol end. Kupwa Yehova ukumujiyish chad Satan, ayilembil ni antu awonsu abwambwidina ku winyikel wend. (Kujingunik 20:7-10) Mashakamin mawanyidina makuletau kud Want wa Nzamb makushal chikupu.
ILEJA CHIKURIKINA
Shinshikin mulong wak tukwet kashinsh anch Nzamb ukusadin Want wend mulong wa kuwanyish kushilamu kwawonsu kudia mu Bibil mulong wa machuku ma kurutu.
4. Want wa Nzamb ukujiyish maguvernema ma antu
‘Muntu ukat kumuyikel mukwau mulong wa kumumesh mar.’ (Mulej 8:9) Yehova ukusadin Want mulong wa kupwish milong yawonsu yidiokila ku kuburen kutentam.
Tang Daniel 2:44 ni 2 Tesalonik 1:6-8, kupwa isambinany yipul ey:
Yehova ni Mwanend Yesu akumasal nchik maguvernema ma antu ni amakwashina?
Yom wileja kal piur pa Yehova ni Yesu yikwinkishin mutapu ik kashinsh anch yom yikusalau yikwikal yitentamina?
5. Yesu ud Mwant muwamp nakash
Chidiay Mwant wa Want wa Nzamb, Yesu ukusal yom yiwamp yivud nakash mulong wa uwamp wa antu akwikala pa divu. Talany VIDEO mulong wa kuman mutapu wamekeshinay kal Yesu anch ukwet rusot ni usu wamwinkishinau kal kud Nzamb mulong wa kuyikwash antu.
Yom yasalay Yesu padingay panap pa divu yamekesha yom yikusala Want wa Nzamb. Yiyukish ik yilejenau pinap uchingedina kamu ey nakash? Tang maverse malejena yiyukish yiney.
PADINGAY PA DIVU, YESU . . .
PADIAY MWIUR, YESU . . .
wadutisha usu wa yom yatangau.—Marko 4:36-41.
ukupwish milong yawonsu yisadinau antu yisheshina divu.—Isay 35:1, 2.
wayidisha antu avud nakash kusutil chilay.—Mateu 14:17-21.
ukupwish nzal pa divu.—Kuseng 72:16.
wayoka ayej avud.—Luka 18:35-43.
ukuyinkish antu awonsu ukash wa mujimbu uwanyidina.—Isay 33:24.
wayivumbula afu.—Luka 8:49-55.
ukupwish yibudikin ya rufu.—Kujingunik 21:3, 4.
6. Want wa Nzamb ukulet mashakamin mawamp nakash
Want wa Nzamb ukuwanyish kamu rusot radingay nich Nzamb mulong wa antu. Antu akushakam chikupu mu paradis panap pansh. Talany VIDEO mulong wa kuman mutapu Yehova umusadidinay Mwanend Yesu mulong wa kuwanyish rusot rend.
Tang Kuseng 145:16, kupwa isambinany chipul ech:
Wiyovil nchik pa kwijik anch Yehova “[ukuyikutish] awonsu akweta mwom”?
ANCH MUNTU WAKWEL ANCH: “Anch etu awonsu twasal pamwing, tukutwish kupwish milong ya mangand.”
Want wa Nzamb ukupwish milong ik yikangenya maguvernema ma antu kupwish?
YOM TWILEJA KAL
Want wa Nzamb ukuwanyish rusot ra Nzamb. Ukukarumun divu diawonsu kwikal paradis mukwizula antu awamp akumwifukwila Yehova chikupu.
Ov, uvurikin?
Want wa Nzamb ukutumbish mutapu ik dijin dia Yehova?
Mulong wak tukutwish kwitiyij anch Want wa Nzamb ukuwanyish kushilamu kudia mu Bibil?
Pakach pa yom yikusala Want, yom ik uchingedina nakash?
JINGUNIN KAND
Tal chirumburikina njit ja Harmagedon.
“Njit ja Harmagedon Chom ik?” (Mutu wa mulong udia pa jw.org)
Shinshikin yom yikushikena pa chisu cha mivu 1 000 ya winyikel wa Yesu ni kwinsudiel kwa chirung chinech.
Tal mutapu majuku makutwisha kutongijokin pamwing piur pa yiyukish yikuleta Want.
Mu mutu wa mulong “Yipul Yivud Yanrumbangeshang,” jingunin mutapu ikundj umwing wabwambwila ku politik wa ngand yau mwamanay mutapu wa kupwish milong yend.
“Bibil Ukarumwin Mwom ya Antu” (Chinong cha Kalam cha 1 Ngond wa 1, 2012)
-