DILEJAN DIA 19
Ov, Atuman a Yehova Awiy in Kristu Akin?
Etu Atuman a Yehova tukat kwitiyij anch tud in Kristu akin. Mulong wak? Shinshikin musul wa yitiyij yetu, dijin tukweta, ni mutapu tukatijadina amwing ni akwau.
1. Kwisu kudioshinau Atuman a Yehova yitiyij yau?
Yesu walonda anch: “Dizu [dia Nzamb] diawiy uyakin.” (Yohan 17:17) Mud Yesu, Atuman a Yehova akat kudioshang yitiyij yau ching mu Dizu dia Nzamb. Chilakej, shinshikin rusangu ra Atuman a Yehova atazukangau pakur anch In Kwilej a Bibil. Mu mivu ya 1870, chisak cha in kwilej a Bibil chasambisha kwilej nawamp Bibil. Yitiyij yau yading yimedin pa yom yatanangau mu Bibil, ap anch yading yishalijadin ni yom yading yitiyinau mu marelijon makwau. Kupwa asambisha kuyilej antu akwau uyakin wading utaninau mu Bibil.a
2. Mulong wak twipila anch Atuman a Yehova?
Yehova ukat kuyitazuk in kumwifukwil end anch Atuman end, mulong akat kulejan uyakin piur pend. (Hebereu 11:4–12:1) Chilakej, pakur Yehova wayileja antu end anch: “Udiany atuman am.” (Tang Isay 43:10.) Yesu niyend amutazukin anch “Kaman Ushinshamena.” (Kujingunik 1:5, TMK) Chawiy, mu muvu wa 1931 twipila anch Atuman a Yehova. Tukwet musangar nakash wa kwikal ni dijin dined.
3. Mutapu ik wimburijinau Atuman a Yehova rukat ra Yesu?
Yesu wading uyikatin nakash in kwilejend, ni wayimanang mud antu a mu dijuku diend. (Tang Marko 3:35.) Chilik chimwing, Atuman a Yehova ad mu uumwing, asadin dijuku didia pa mangand mawonsu. Chawiy tukat kutazukijan anch akadivar ni anambaz. (Filimon 1, 2) Tukat kuziyin kand kwi mbil yilondina anch: “Yikatany anamakwen in Kristu [awonsu].” (1 Pita 2:17) Atuman a Yehova akat kumekesh rukat riner mu mitapu yivud, chilakej kusutil kuyikwash akadivar ni anambaz nau adia pa mangand mawonsu pa chisu chikwetau kuswir kwa ukwash.
ILEJA CHIKURIKINA
Shinshikin nawamp rusangu ra Atuman a Yehova ni kimb uman ukwau umekeshina anch tud in Kristu akin.
Yitiyij ya in Kristu akin yimedining pa Bibil ni akat kuyilejan kud antu akwau
4. Yitiyij yetu yimedin pa Bibil
Yehova wasambela kulejan anch uyakin wa Bibil ukez kwovakan nawamp. Tang 2 Korint 4:6, kupwa isambinany chipul ech:
Nzamb wafanyina kuyinkish atushalapol end yom ik padandamedinau kwilej Bibil?
Shinshikin mutapu wilejangau in kwilej a Bibil Dizu dia Nzamb pamwing ni Charles Russell. Talany VIDEO, kupwa isambinany chipul chilondwilaku.
Mu video winou, Charles Russell ni In Kwilej a Bibil akwau ilejang mutapu ik Bibil?
Ov, wij?
Yisu yimwing tukat kuwapish yitiyij yetu yimwing. Mulong wak? Mud mutapu tukata kuman nawamp yom padandamedina muten kukaninik pakemp pakemp, Nzamb ukat kutukwash kwov nawamp Dizu diend pakemp pakemp. (Tang Jinswir 4:18.) Ap anch Bibil kakuswimpangap, pakwez padandamedina kukul ronganyin retu ra Bibil tukat kuwapish yitiyij yetu.
5. Tukat kushakam kukwatijan ni dijin dietu
Mulong wak twipila anch Atuman a Yehova? Talany VIDEO, kupwa isambinany chipul chidia kwinshin oku.
Mulong wak dijin Atuman a Yehova dituwanyidin?
Mulong wak Yehova wayitonda antu kwikal Atuman end? Mulong akulejan anch ndiy udia Nzamb wakin ap anch antu amudimbedin kal makasu mavud. Tushinshikinaku kwetu yilakej yaad ya makasu minam.
Marelijon mamwing makat kuyifundish antu au anch Nzamb ukatin kumwifukwil kusutil yifatul. Pakwez, tang In Levi 26:1, kupwa isambinany yipul ey:
Wisu uyakin? Mutapu ik ukatay Yehova kuman atupwany?
Antakel amwing a marelijon akat kuyifundish antu anch Yesu ndiy Nzamb. Pakwez, tang Yohan 20:17, kupwa isambinany yipul ey:
Wisu uyakin? Ov, Nzamb ni Yesu isiken?
Mutapu ik wiyovila pa kwijik anch Yehova ukat kutumang Atuman end mulong wa kulejan uyakin piur pend ni piur pa Mwanend?
6. Tukatijadin
Bibil uyifanakeshin in Kristu ni yid kushalijan ya mujimbu. Tang 1 Korint 12:25, 26, kupwa isambinany yipul ey:
Yom ik yifanyidinau kusal in Kristu akin anch atesh anch in Kristu akwau amen mar?
Yom ik wamenap kal piur pa rukat rikwetau Atuman a Yehova pakach pau?
Anch mar mayishiken Atuman a Yehova adia kwi ndond kanang, Atuman akwau adia pa mangand mawonsu akat kuyikwash pakad kulab. Mulong wa kuman chilakej chimwing, talany VIDEO. Kupwa isambinany chipul chidia kwinshin oku.
Usu ukatau kusal Atuman a Yehova mulong wa kuyikwash akwau adia mu mar umekeshin mutapu ik rukat?
In Kristu akin akat kuyimekeshin ambay nau in Kristu adia mu maswir rukat
ANCH MUNTU WAKWEL ANCH: “Relijon wa Atuman a Yehova wasambishin kwend katat.”
Chisu ik chasambishay Yehova kuyitazuk in kumwifukwil end anch atuman?
YOM TWILEJA KAL
Atuman a Yehova ad in Kristu akin. Tusadin dijuku didia pa mangand mawonsu dia in kwifukwil akweta yitiyij yimedina pa Bibil, ni akata kulejan uyakin piur pa Yehova.
Ov, uvurikin?
Mulong wak twipila anch Atuman a Yehova?
Mutapu ik tukata kusalijadin amwing ni akwau?
Ov, witiyijin anch Atuman a Yehova ad in Kristu akin?
JINGUNIN KAND
Ileja yom yivud piur pa rusangu retu.
Atuman a Yehova Akat Kumekesh Ritiy Rikash, Chikunku cha 1: Kudiokal mu Mididim (1:00:53)
Tal chilakej chimekeshina mutapu Atuman a Yehova mwasaulau patok mafundish ma makasu.
Tal yakul ku yipul ukutwisha kwiyipul piur pa Atuman a Yehova.
“Yipul Yikatau Antu Kwiyipul Nakash Piur pa Atuman a Yehova” (mutu wa mulong udia pa jw.org)
Stephen wading uyikisin nakash antu a ulombu wa yikit yindj ni wayirishikishang. Jingunin chom chamanay pakach pa Atuman a Yehova chamubachika kuswimp.
“Mwom Wam Wading Udandamedin Kuyip Nakash” (Chinong cha Kalam cha 1 Ngond wa 7, 2015)
a Mukand wetu utazukinau anch Chinong cha Kalam, wasambisha kupalangesh uyakin wa Bibil kudiosh mu muvu wa 1879.