DILEJAN DIA 44
Ov, Misambu Yawonsu Yimusangareshining Nzamb?
Yehova ukatin anch tusangera mwom ni kusal misambu yisu yimwing. Pakwez, ov, misambu yawonsu yimusangareshining? Mutapu ik tukutwisha kumekesh anch tumukatin Yehova pa mulong winou?
1. Mulong wak misambu yivud yimukisishining Yehova?
Ukutwish kushimok anch wajingunin anch misambu yivud yikwatijadinap kwau ni mafundish ma Bibil ni yidiokil ku mafundish ma upagan. Misambu mud yiney yidiokil ku relijon wa makasu. Yikutwish kukwatijan ni yom ya ayilembil ap nich chitongijok chilondina anch mupim ukufangap. Misambu yimwing yimedin pa yishankur ya makasu ni kwitiyij mu katok. (Isay 65:11) Yehova uyibabeshin in kumwifukwil end anch: “Aurikany nau. Kangal wapukunany ku yom yijondila.”—2 Korint 6:17.a
2. Mutapu ik ukatay Yehova kwiyov piur pa misambu yiyitumbishina antu?
Yehova utubabeshin chakwel kangal twawil mu mupit wa ‘kuyichingejin an a antu kwau.’ (Tang Jeremiy 17:5.) Misambu yimwing yikat kuyitumbish antakel ap amasalay. Misambu yikwau yikat kusadik mulong wa kulimish yijingidij ya ngand ap dichuku diakolika ngand mu uswik. (1 Yohan 5:21) Yikwau kand yikat kukasikesh yitenchik ya politik ap ya antu. Mutapu ik ukwiyovay Yehova anch twamutumbish muntu ap yitenchik kanang, pakampwil yikasikeshina chitongijok chakad kukwatijan ni rusot rend?
3. Yaku ik yikutwisha kuyipish misambu?
Bibil ukangeshin ‘kukwachik maar, misambu yisutina chipim, [ni] kwichuch kuna.’ (1 Pita 4:3) Ku misambu yimwing antu akat kusal yom pakad kwilam ni akat kusal yom ya masandj. Mulong wa kudandamen kwikal arund a Yehova, tufanyidin kwipuk nakash yom yiney yijondila.
ILEJA CHIKURIKINA
Jingunin mutapu ukutwisha kumusangaresh Yehova mu kukwat mipak ya manangu piur pa misambu.
4. Lik misambu yakad kumutumbish Yehova
Tang Efes 5:10, kupwa isambinay yipul ey:
Yom ik tufanyidina kushinshikin kurutu kwa kukwat mupak wa kusal musambu kanang?
Misambu ik yivulijadina nakash kwi ndond ushicha?
Ov, utongin anch misambu yiney yimusangareshining Yehova?
Chilakej, ov, wiyipwilap kal yom yitonginay Nzamb piur pa misambu ya dichuku dia kuvadik? Bibil kajimbwilap kashalapol ap umwing wa Yehova wasala musambu wa dichuku diavadikay, pakwez ulejen rusangu ra antu aad akad kumusadin Nzamb asala musambu wa dichuku diavadikau. Tang Disambishil 40:20-22 ni Mateu 14:6-10. Kupwa, isambinany yipul ey:
Yom ik yimwing yasadika ku misambu yiney yaad ya kuvadik?
Kukwatijan ni nsangu jinej ja Bibil, ov, utongin anch mutapu ik wiyovilay Yehova piur pa misambu ya kuvadik?
Pakwez ukutwish kwiyipul anch ‘Ov, Yehova ukunenganan kamu anch naya ku misambu ya kuvadik ap ku misambu yikwau yakad kukwatijan ni Bibil?’ Tang Kubudik 32:1-8. Kupwa, talany VIDEO ni isambinany yipul ey:
Mulong wak tufanyidin kwijik yom yikatinay Yehova?
Mutapu ik tukutwisha kusal mwamu?
Mutapu wa kwijik anch musambu kanang umusangareshinap Nzamb
Ov, wimedin pa mafundish makad kwikal mu Bibil? Mulong wa kujingunin, shinshikin kuusambishidina musambu winou.
Ov, ukat kuyitumbish antu, yitenchik, ap yijingidij ya ngand? Tukat kumutumbish Yehova kusutamu yom yawonsu ni kuchingej anch ndiy ukupwisha milong ya mangand.
Ov, yishankur ni yaku yau yipwitamijadin ni mbil ja Bibil? Tufanyidin kwikal ishitwila mu yom tulondina, tusadina ni tutongina.
5. Yikwasha antu akwau kulimish yitiyij yey
Chikutwish kukukasiken kulik anch antu akwau akubachik kusal misambu yakad kumusangaresh Yehova. Shimpish muchim ni sadin nkeu pauyilejina mipak yey. Mulong wa kuman chilakej chimwing piur pa mutapu wa kusal mwamu, talany VIDEO.
Tang Mateu 7:12, kupwa isambinany yipul ey:
Kukwatijan ni verse winou, ov, ufanyidin kuyikangesh anamakwey akad kwikal Atuman kusal misambu?
Yom ik ukutwisha kusal mulong wa kuyinkish anamakwey kashinsh anch ap anch ukusalap nau musambu pamwing, pakwez uyikatin ni uyibangidin?
6. Yehova ukatin anch twikal ni musangar
Yehova ukatin anch tusutisha yisu yiwamp nau anamakwetu ni arund netu. Tang Mulej 8:15, kupwa isambinany chipul ech:
Mutapu ik umekeshinay verse winou anch Yehova ukatin twikala ni musangar?
Yehova ukatin anch antu end ipuwangej ni asanger yisu yiwamp pamwing. Talany VIDEO mulong wa kuman mutapu yom yiney yikata kusadik ku yitentam yetu ya pa mangand mawonsu.
Tang Galatia 6:10, kupwa isambinany yipul ey:
Ov, tufanyidin kuchingel ching dichuku dia misambu yijikena nakash mulong wa kuyisadin antu akwau ‘yom yiwamp’?
Mutapu ik wa kupan ukutwisha kukuletin musangar—ov, kud kupan kwa kukushindin mulong wa musambu kanang anch kud kupan kudiokila ku muchim?
Yisu yimwing Atuman avud akat kutenchik tumisambu tumwing mulong wa anau ni akat kuyinkish yipan. Anch ukwet an, yom ik ya pakampwil ukutwisha kuyisadin?
ANCH MUNTU WAKWEL ANCH: “Disambishin dia musambu dikwetap kwau mulong. Kud kwau kusutish chisu chiwamp nau anamakwetu ni arund netu.”
Ey ukwakul mutapu ik?
YOM TWILEJA KAL
Yehova ukatin anch tusutisha yisu yiwamp pamwing nau arund ni anamakwetu. Pakwez usotin kand anch twipuka misambu yakad kumusangaresh.
Ov, uvurikin?
Yipul ik tukutwisha kwiyipul mulong wa kwijik anch musambu kanang umusangareshinap Yehova?
Mutapu ik tukutwisha kuyikwash anamakwetu ni arund netu kwov kurumburik kwa mupak wetu piur pa misambu?
Mutapu ik twija anch Yehova ukatin anch tusangar ni twipuwangej?
JINGUNIN KAND
Shinshikin misambu yimwing yakadingau in Kristu kusal.
“Mulong wak Atuman a Yehova Kakusalangap Misambu Yimwing?” (Mutu wa mulong udia pa jw.org)
Tal mayingishin manying matubachikina kwitiyij anch misambu ya dichuku dia kuvadik yimusangareshiningap Nzamb.
Tal yom yasalay nsand umwing nich nkeu pamusipau ku shikol mulong wa yitiyij yend piur pa Nowel.
Mutapu wa Kwakul Nich Nkeu Anch Akusip (2:04)
In Kristu avud kakusalangap musambu wa Nowel. Mutapu ik utonginau piur pa mupak wau?
“Ajingunina Chom Chimwing Chiwamp Nakash” (Chinong cha Kalam cha 1 Ngond wa 12, 2012)
a Tal Mazu ma Kwinsudiel 5 mulong wa kwijik yom ya kusal piur pa misambu yimwing.