Mulong Wak Kulembil Mu Dijin Dia Yesu?

YESU walejananga chisu ni chisu piur pa malembil. Pa dichuku diend, antakel in Yuda alembilanga “mu mansang a njil.” Ov, mulong wak? “Mulong ayimana kudi antu.” Choviken patok anch, asota antu ayitumbisha. Avud au adinga ni kulond malembil malemp, achirikina-chirikina yom yawiy yimwing, mudi kulond anch “kuvudish mazu” kwawiy kukusal anch malembil mitiyika. (Mateu 6:5-8) Yesu wasaula yisal yiney mudi ya chamwamu, chawiy lel kuyikwash antu akin ijika yik yifanyidinau kwipuk pakatau kulembil. Pakwez, wasala yivud kuwejin pa kulejan mutapu wa kulembil wakad kufanyin.

Yesu walejana anch malembil metu mafanyidin kwijikish maswir metu chakwel dijin dia Nzamb ditumba, Want Wend weza, ni rusot Rend risadika. Yesu walejana kand anch chiwapidil tumwita Nzamb atukwasha mu milong yetu. (Mateu 6:9-13; Luka 11:2-4) Pasadilay yishimu, Yesu walejana anch tuswiridin kujijaman, mu ritiy, ni kwikepish anch tusotil ang malembil metu mitiyika. (Luka 11:5-13; 18:1-14) Ni wakasikeshina malejan mend nich chilakej chend amwinend.—Mateu 14:23; Marko 1:35.

Pakad chinshilend, malejan minam mayikwasha in kwilej a Yesu chakwel awapisha malembil mau. Chikwau, Yesu wachingela djat pa uchuku wend wa nsudiel pa divu chakwel ayinkisha in kwilejend dilejan dijim piur pa malembil.

“Chom Chisu mu Rusangu ra Malembil”

Yesu wasutisha chisu chilemp cha uchuku wend wa nsudiel mu kuyinkish antwimbuy end ashinshamena dikasikesh. Chawiy chisu chadinga chifanyidina kuyijingunin chom chisu. Yesu walonda anch: “Yam njil ni uyakin ni mwom; kwikil ukwiyezila kudi Tatuku ching kudi am.” Kupwa wayinkisha kushilamu kwa kashinsh anch: “Yawonsu yiukeza kwitilany mu dijin diam yawiy nikusala, chakwel Tatuku akumutumbishil mu Mwan; Anch en witilany chom mu dijin diam chawiy chinikeza kusal.” Piswimp ni kupwish minsamb yend yiney, walonda kand anch: “Pinap en kiwitilanyip chom mu dijin diam; itany, ukez kwakany kwen, chakwel musangar wen akuwizwish.”—Yohan 14:6, 13, 14; 16:24.

Mazu minam madinga majim nakash. Buku umwing umarumburil mudi “chom chisu mu rusangu ra malembil.” Yesu kadingap nich rutong ra kwel anch asambisha kumulembil ndiy pa ndond pa Nzamb. Pakwez, wadinga ulejen mutapu usu wa kumushejin Yehova Nzamb.

Chakin kamu, Nzamb uteshining chisu chawonsu malembil ma atushalapol end ashinshamena. (1 Samwel 1:9-19, Les Saintes Écritures — Traduction du Monde Nouveau; Kuseng 65:2) Pakwez, kudiosh pa chisu chikalay Isarel antu a manswik a Nzamb, antu asota anch malembil mau amatesha chayifanyidina itiyija anch Isarel wadinga muchid watonday Nzamb. Ni kwinyim, kusambishin pa chisu cha Salomon, afanyidina kwijik tempel mudi ndond ya kupanin milambu yatonday Nzamb. (Kuvurik Yijil 9:29; 2 Jinsangu 6:32, 33) Pakwez, mutapu winou wa kwifukwil wadinga wa kachisu. Mudi mwafunday kambuy Paul, Chijil chamwinkishau Isarel ni milambu yapanau ku tempel yadinga “mwizwizwimb wa yom yiwamp yisotila kwez, kiyidip mudi mudia yom yakin.” (Hebreu 10:1, 2) Uyakin wadinga ufanyidin kuuswinkan mwizwizwimb. (Kolosay 2:17) Kudiosh pa muvu wa 33 C.C., urund wa muntu ni Yehova wengamidinap kand pa kulam Chijil cha Moses. Pakwez, wengamidin pa kumuziyil muntu wadinga wisambidinau mu Chijil—Kristu Yesu.—Yohan 15:14-16; Galatia 3:24, 25.

Dijin “Didia Piur pa Majin Mawonsu”

Yesu walejana diyingish dijim dia kumusejin Yehova, wiyijikisha amwinend mudi murund mwin usu, muntu ukutwisha kwanzuril njil ya malembil metu chakwel amatesha ni amitiyija kudi Nzamb. Chom ik chamutwishisha Yesu atusadila mwamu?

Mulong etu awonsu twavadikina mu chitil, kwikil yom tukutwisha kusal ap milambu yitukutwisha kupan yikutwisha kututokish ku matayeng ap kutwinkish mbil ya kwikal nich urund ni Nzamb wetu utumbila, Yehova. (Rome 3:20, 24; Hebreu 1:3, 4) Pakwez, Yesu walambula mwom wend wa chiuntu uwanyidina ni wafuta mulong wa yitil ya antu akutwishau kukol. (Rome 5:12, 18, 19) Awonsu asotila kusal mwamu katat, akwet mutapu wa kwishitul ku mes kwa Yehova ni kusanger “kuya kurutu kwa Nzamb wakad wom”—pakwez ching anch itiyij mulambu wa Yesu ni kulembil mu dijin diend.—Efes 3:11, 12.

Pitukata kulembil mu dijin dia Yesu, tumekeshin ritiy mu jinjil jisatu ja mudimu wend mu kuwanyish rutong ra Nzamb: (1) Udi “Mwan a mukoku wa Nzamb,” chakupesh chend chawiy mufulandal wa dilikishin dia chitil. (2) Amuvumbula kudi Yehova ni katat udi “mwin kupesh wa pa mutu” mu kusadish yiyukish ya difut. (3) Ndiy kusu udia “njil” ya kumusejin Yehova mu malembil.—Yohan 1:29; 14:6; Hebreu 4:14, 15.

Kulembil mu dijin dia Yesu kumulimishin Yesu. Kalimish kinak kamufanyidin, mulong rusot ra Yehova ridi anch “mu dijin dia Yesu manungin mawonsu mazengaminang . . . , chakwel jindim jawonsu jikwitiyij anch: Yesu ndiy Mwant, ku uyaj wa Nzamb Tatuku.” (Filipoi 2:10, 11) Chijim nakash, kulembil mu dijin dia Yesu kumutumbishin Yehova, ndiy wamupana Mwanend mulong wetwetu.—Yohan 3:16.

Chawiy tukutwish kutesh kurumburik kwa mwaz wa Yesu, Bibil usadidil majin mavud kushalijan mulong wa kurumburil.a Majin minam kushalijan matukwashin tutesha kurumburik kwa yiyukish yivud yitukweta mulong wa yasalay Yesu, yisadilay, ni yikezay kusal kurutu mulong wetwetu. (Tal mushet “Mudimu Ujim wa Yesu,” paj wa 12.) Chakin, Yesu amwinkisha “dijin didia piur pa majin mawonsu.” Ulabu win wawonsu udia mwiur ni pansh amwinkishau kal ndiy.—Filipoi 2:9; Mateu 28:18.

Kulembil mu Dijin dia Yesu Kudiap Chaku Chamwamu

Inge, anch tusotil anch Yehova atesha malembil metu, tufanyidin kulembil mu dijin dia Yesu. (Yohan 14:13, 14) Pakwez tuswiridiningap kuchirikinang mazu “mu dijin dia Yesu” mudi kwau chaku chamwamu. Ov, mulong wak?

Tushinshikinany chilakej. Anch watambul mukand udiokila kudi ngend-a-mushing, ukutwish kupwa anch “tambul kulangwish kwam kwa rukat.” Ov, utongin anch mazu minam malejen yovil yakin ya ngend-a-mushing, ap anch ulondwil kwend mutapu wa kufund mukand? Chakin kamu, kusadil dijin dia Yesu mu malembil metu kuswiridin kwikal kurumburika chakin kamu kupandakanamu mutapu wa kupwish nich mukand wa winsak. Ap anch tufanyidin kulembil “wakad kulik,” tufanyidin kusal mwamu nich “muchim [wetu] wawonsu,” kufanyidinap kwau kwikal kwa chamwamu.—1 Tesalonik 5:17; Kuseng 119:145.

Ov, mutapu ik ukutwisha kwiyep kusadil mazu “mu dijin dia Yesu” mudi kwau kulond kwa chamwamu? Ov, mulong wak tufanyidin kutongijokin nakash pa ngikadil ya Yesu? Tongijokin pa yasalay kal ni yisotinay kukusadil. Mu malembil, mujikitisha Yehova ni kumushiman mulong wa mutapu wamushena wamusadilay Mwanend. Anch wasal mwamu, ukwitiyij kamu kushilamu kwa Yesu anch: “Anch en wez witany chom kudi Tatuku, ndiy ukez kakwinkishanyich mu dijin diam.”—Yohan 16:23.

[Mazu madia kwishin kwa paj]

[Tablo wa jinsangu udia pa paj wa 11]

Tufanyidin kulembil nich “muchim [wetu] wawonsu,” kufanyidinap kwau kwikal kwa chamwamu

[Kamushet kadia pa paj wa 12]

Mudimu Ujim Wa Yesu

Chakwel tutesha mudimu wa Yesu, el tushinshikinany majin mend mamwing ma mudimu, mutapu umurumburilau, ni majin mamupidilau.

Adam wa Kwisudiel.—1 Korint 15:45.

Amen.—2 Korint 1:19, 20; Kuburik 3:14.

Chapakach.—1 Timote 2:5.

Dizu.—Yohan 1:1.

Emanuel.—Mateu 1:23.

Kafung Muwamp.—Yohan 10:11.

Kaman Ushinshamena.—Kuburik 1:5.

Kristu/Mesia.—Mateu 16:16; Yohan 1:41.

Mulej.—Yohan 13:13.

Mupandish.—Luka 2:11.

Mupostol.—Hebereu 3:1.

Murumburish.—Midimu 10:42.

Mutu wa Chikumbu cha Nzamb.—Efes 5:23.

Mwan a Mukoku wa Nzamb.—Yohan 1:29.

Mwan a Muntu.—Mateu 8:20.

Mwan a Nzamb.—Yohan 1:34.

Mwangel Mujim.—1 Tesalonika 4:16; Yuda 9.

Mwan Mwant wa Chisambu.—Isay 9:6, NW.

Mwant.—Kuburik 11:15.

Mwant wa Kupand.—Midimu 3:15.

Mwin Chiyul Ushimokishina.—Isay 9:6, NW.

Mwin Kupesh wa pa Mutu.—Hebereu 4:14, 15.

Mwin Kutakel.—Mateu 23:10, MM.

Nsalejetu.—Yohan 13:13, MM.

Nzamb mwin Ukash.—Isay 9:6, NW.

Tatuku wa Chikupu.—Isay 9:6, NW.