“Mes” Ma Yehova Makat Kuyipapat An A Antu
“Mes [ma Yehova] matadil pansh, mpal yend yikat kuyipapat an a antu.”—KUS. 11:4.
1. Antu a mutapu ik tukata kusanger?
OV, WOVILING nchik piur pa antu akata kukusanger chakin kamu? Akwinkishining chitongijok chiwamp anch wayit chiyul. Piuswiridina ukwash, akukwashining kamu. Anch waswiriken chiyul, akuyudiling kamu nich rukat. (Kus. 141:5; Gal. 6:1) Ov, chikusangareshiningap kuyijik antu inay? Mwaning, mwamu mudiay Yehova ni Mwanend. Chakin kamu, kukusanger kwau kupandakenamu kwa muntu ap wisu, ni yitongijok yau yiding yiwamp; asotin akukwasha “chakwel [ulamat, NW] kupand kudia kamu kupand kwakin.”—1 Tim. 6:19; Kubur. 3:19.
2. Mu chilik ik chikatay Yehova kuyisanger atushalapol end?
2 David wafunda kuseng wisambina piur pa kutusanger kukatay kutusanger Yehova, palonday anch: “Mes [ma Yehova] matadil pansh, mpal yend yikat kuyipapat an a antu.” (Kus. 11:4) Mwaning, Nzamb kakatap kututal chamwamu; pakwez ukat kutupapat. David wafunda kand anch: “Ey wapaka muchim wam, wezang uchuku kudi am watala mu muchim wam, kiwatanamup mulong.” (Kus. 17:3) Chakin kamu, David wadinga wij nawamp kamu anch Yehova umusangaredin nakash. Wadinga kand wij anch ukutwish wamunenganesh Yehova ni Ukumupup anch walik kulik yitongijok Yend ya yitil ap anch wakudish muchim uyimp. Ov, chakin kamu Yehova udi wakin kudi ey mudi mwadingay kudiay David?
Yehova Umen Muchim
3. Mutapu ik ukatay Yehova kumekesh kwisikan kwetu piur pa kurumbok kwetu?
3 Yehova ukat kubangin bil muntu wa mukach—chitudia chakin kamu mu muchim. (Kus. 19:14; 26:2) Mulong wa rukat rend, kakatap kwimen pa tumilong twetu tukemp-tukemp. Chilakej, pa chisu Sara, mband wa Abraham, chamudimbay mwangel wakarumuka wikal muntu, mwangel wamana patok kamu anch Sara wova wom ni usany, chawiy mwangel wamupupa pakemp. (Dis. 18:12-15) Pa chisu chiyingishay Yob “amwinend kurutu kwa Nzamb,” Yehova kalikap kumuyukish, mulong ndiy wadinga wij anch Yob amumeshin mar makash kudiay Satan. (Yob 32:2; 42:12) Chilik chimwing, Yehova kamujimenap mwad-a-mufu wa ku Sarafet mulong wa kulond kwend kwakin kwamulonday muprofet Eliya. Nzamb wamutesha mulong wova kusansan pa chisu chafay mwanend umwing kusu.—1 Ant. 17:8-24, NW.
4, 5. Ov, mutapu ik wamekeshay Yehova ranaken mu mutapu wamusadilay Abimelek?
4 Mulong Yehova ukat kupapat muchim, ukat kuyilimish ap antu akad kwitiyij. Tushinshikinany mutapu wamusadilay Abimelek, mwant wa in Filistin wa mu ul wa Gerar. Abimelek, kadingap wij anch Abraham ni Sara atijadin, wamusenda Sara ikal mukajend. Pakwez, kurutu Abimelek aya kulemp, Yehova wamuleja mu chilat anch: “Mwawiy nijik kal anch wasadil kwey chom chinech ni muchim uwamp, yawiy nakulikishanga kusal chitil kudi am, chad nakukangeshang kand ey kumupukun ndiy. Chawiy katat, muchirisha mband wa muntu mwinou, mulong ndiy udi muruu wa Nzamb. Ndiy ukeza kukulembidil ey, chakwel wikal ni mwom.”—Dis. 20:1-7.
5 Chakin kamu, Yehova wela kumusal nayimp Abimelek, mwin kwifukwil anzamb a makasu. Pakwez Nzamb wamana anch wasala ni muchim uwamp pa mulong winou. Yehova wamana chom chinech nich ranaken, chawiy wamuleja mwant chifanyidinay kusal chakwel ikala ‘ni mwom.’ Ov, winou kadiap Nzamb ufanyidina ey kwifukwil?
6. Yesu wamwimburija Tatukwend mu jinjil ik?
6 Yesu wamwimburija Tatukwet mudi muchifanyidina, chatalay ching kusu pa kuwap kwa in kwilej end chawiy chadingay tayad kuyilikishin kurumbok kwau. (Mar. 10:35-45; 14:66-72; Luka 22:31, 32; Yoh. 15:15) Mikadil ya Yesu yadinga yikwatijadin nich mazu mend madia mu Yohan 3:17 (Manswik Masu) anch: “Mulong Nzamb kamutumap Mwanend pa mangand mulong wa kuyifish nich antu, pakwez wamutuma mulong wa kuyipandish.” Inge, rukat ritukatinay Yehova ni Yesu ridi rijim nakash ni rakad kukarumukang. Rimeken mu rutong rau ra kwel anch tutambula mwom. (Yob 14:15) Rukat riner rilejen mulong wak Yehova ukat kutupapat, mutapu utumenay, ni mutapu usadilingay kukwatijan nich yimenay.—Tang 1 Yohan 4:8, 19.
Ayipapata Nich Mes ma Rukat
7. Yehova ukat kutupapat nich yitongijok ik?
7 Chidi kurumbuk mudi ik, kutongin anch Yehova udi mudi mpurish udia mwiur utadila pansh chakwel atukwata pitusadila yitil! Satan ndiy ukwetinga yitongijok yiyimp, ni ukat kututal nich dis dia kutufund nich. (Kubur. 12:10) Ukat ap kututongin yitongijok yiyimp ap pa chisu chiyakad kwikalaku! (Yob 1:9-11; 2:4, 5) Piur pa Nzamb, nfund a kuseng wafunda anch: “Anch Ey wading ni kuvurik yisalijok yawonsu yiyimp, ing nany lel ukwiman kurutu kwey, A [Yehova, NW]?” (Kus. 130:3) Chakul chakin chidi anch, kwikil ap umwing! (Mul. 7:20) Pakwez, Yehova ukat kututal nich ranaken, nich mes ma riy ma nvaj usotila kuyichidij anend akatishinay ku ubaj. Chisu ni chisu ukat kutubabesh piur pa kurumbok kwetu ni kuziy kwetu chakwel anch kangal twiyandjika ayinetu mu ubaj.—Kus. 103:10-14; Mat. 26:41.
8. Ov, mutapu ik utufundishinay Yehova ni kuyipup atushalapol end?
8 Rukat ra Nzamb rimekedining kusutil ku malejan ni ku dipup yidia mu Mifund ni mu yakudia ya muspiritu yiletiningay “kashalapol ushinshamena ni kubabal.” (Mat. 24:45; Heb. 12:5, 6) Yehova utwinkishining kand ukwash kusutil ku chikumangen cha Ukristu ni kusutil kudi “yom ya matangal kudi antu.” (Efes 4:8, MM) Chipandikena, Yehova ukat kutumanang mutapu tumukwatinap mudi tatukwetu ukata kutufundishang, ni ukat kutuman chakwel atukwasha. Kuseng 32:8 ulondil anch: “Am nikez kukwijidish ni kukulej mwi njil yiukeza kuya, nikez kuyul padi ey ni dis diam.” Chidi cha usey, pa chinech, anch tumuteshin Yehova! Tuswirikedin kwilam ayinetu mu kwikepish kurutu kwendendiy, ni kwijikang anch udi Mulej ni Tatuku mwin rukat.—Tang Mateu 18:4.
9. Mikadil ik tufanyidina kuchin, ni mulong wak?
9 Pa chinech, kitufanyidinap kwikalang in kwitutul, kushadishang ritiy, ap kand “ku makasu ma yitil.” (Heb. 3:13; Yak. 4:6) Komb, mwikadil mudi winou ukat kusambishang anch muntu wasambish kutongin manangu madia mayimp ap maswir mayimp. Ukushiken katat kudjibul chiyul cha Mifund. Chipandakena, ukwikal katat ni mwikadil udia uyimp ukumwikadisha katat mukankuny wa Nzamb—mashakamin makwatishena wom! (Jinsw. 1:22-31) Shinshikin chilikej cha Kain, mwan wa kusambish wa Adam ni Eve.
Yehova Umening Yawonsu ni Ukat Kusal Kukwatijan Nich
10. Mulong wak Yehova walika mulambu wa Kain, ni Kain mutapu ik wasalay?
10 Chisu Kain nend Abel chaletau milambu kudi Yehova ndiy kasangerap kusu mulong wa yipan mudi yiney pakwez wamana yibachikin yau. Mud chibudikin, Nzamb witiyija mulambu wa Abel walambulay nich ritiy, pakwez walika wa Kain mulong ndiy wadinga uburedin ritiy. (Dis. 4:4, 5; Heb. 11:4) Pa ndond pa kwilej yom yamekana ni kuswimp mwikadil wend, Kain wizulijana ni ujim mulong wa mukadivar nend.—Dis. 4:6.
11. Mutapu ik wamekeshay Kain muchim wa wimpongirik, ni dilejan ik tukutaninaku?
11 Yehova wamana ubaj wadingay nich Kain ni kulond kwend kwalondangay wamuleja anch anch wasal yom yiwamp akutwish kukutumbish. Cha ushon, Kain wavuramena chiyul cha Sakatang wend ni wamujipa mwanchend. Muchim uyimp wa Kain wamekesha kamu mwikadil wa kuburen kalimish pakulay chipul chamwipulau kudi Nzamb anch: “Mwanchey Abel udi kwisu?” Kain wakula anch: “Kinijap kwam. Ov, komb, yam nidia kalam wa mwancham?” (Dis. 4:7-9) Muchim udi mpongirik mudi ik—kushiken kamu ni pa chipim cha kulik chiyul cha Nzamb! (Yer. 17:9) El katat twileja jinsangu jinej ni chakwel tukutwish kuswakal kudjibul yitongijok yiyimp ni maswir mayimp. (Tang Yakob 1:14, 15.) Anch twatambul chiyul cha Mifund tukutwish kupan kujikitish ni kuchiman mudi ridi rukat rakin ra Yehova.
Kwikil Chitil Chijingamina
12. Mutapu ik usadilingay Yehova pantaliken nich yisal yiyimp?
12 Amwing akat kutongang anch anch wasal kwend uyimp pakad kumuman, ukutwish kwend wajingam. (Kus. 19:12) Pa chinech, kwikil chitil chijingamining. “Yom yawonsu yiburikin, yilel kurutu kwa mes kwend, ni yetu tukez kwakul kudiay ndiy ku mwom wetu.” (Heb. 4:13) Yehova udi Nzwij ukata kupapat yibachikin yetu yikurikina, ni ukat kwakulang ku mwikadil udia uyimp mu kusadilang kutentam kwend. Udi “Nzamb wa ranaken ni mwin riy, wakad kwovang ujim swa, wizwila sens nich rukat ni uyakin.” Pakwez kudi muntu wakad kukarumuk “kakez kumuyingishap muntu mwin kufa nich” anch antu ‘adandamedina kusal yitil’ ap amekeshina muchim uyimp, ngikadil yiyimp. (Kub. 34:6, 7; Heb. 10:26) Yiney yamekana mutapu wasalay Yehova padiay Akan nend Ananias nend Safira.
13. Mutapu ik chitongijok chiyimp chamushikija Akan ku kwikal ni mwikadil uyimp?
13 Mu kujip chijil cha Nzamb, Akan wanona rupit mu musumb wa Yeriko ni warijindjika mu mwinkand wend, pamwingap ni dijuku diend. Pijikana kal chitil chend, Akan wamekesha anch wadinga kamu ni mulong wasalay, mulong walonda anch: “Am nasadil kal chitil kurutu kwa [Yehova] Nzamb.” (Yosh. 7:20) Mudi Kain, Akan wapamisha kamu muchim uyimp. Mutapu wasalay Akan, ris rawiy ramubachika ni ramushikija ku kudimban makasu. Mulong rupit ra mu Yeriko radinga rumutadin Yehova, chad Akan ndiy wamwiyar ni yamushikisha ku kushadish mwom wend ni wa dijuku diend.—Yosh. 7:25.
14, 15. Mulong wak Ananias nend Safira adinga afanyidin kamu dipup dia Nzamb, ni dilejan ik tukutaninaku?
14 Ananias ni mukajend, Safira, adinga yid ya chikumangen cha kusambish cha win Kristu mu Yerusalem. Mu chisu cha Pentekot wa 33 C.C., ateka chipau cha pamwing mulong wa maswir ma ku mujimbu ma kuyikwash in kwitiyij asu adiokala jindond jilemp mulong wa kwez kushakam mu Yerusalem. Chipau chinech achisala nich milambu ya kwisotin. Ananias walandisha chir ni wapana chikunku cha nfalang mu chipau. Pa chinech, nend mukajend akwata chitongijok chimwing anch, twapan kal nfalang jawonsu. Pakad ntad, ambay inay aswirikena kamu kwikal nich ntumb ya pakampwil mukach ka chikumangen. Pakwez chisal chau chadinga cha makasu. Mu chishimushimu, Yehova wajingunina makasu minam kusutin kudiay mupostol Pita, ndiy wamusambisha Ananias mulong wa kurumbuk kwend. Pa chinech, Ananias wawa pansh ni wafa. Pasuta ka chisu kakemp, Safira ni ndiy wafa.—Mid. 5:1-11.
15 Ananias nend Safira katonginap kwau yom yikutwisha kuyishiken. Asala madifu mau mulong wa kuyidimb apostol. Pachinech, ‘amudimba spiritu utumbila nend Nzamb.’ Yehova wamekesha kamu anch ufanyidin kuking chikumangen mulong wa rubabek. Komb, “chidi chom cha wom pakuwa mu makas ma Nzamb mwom”!—Heb. 10:31.
Lam Kushinshaman Chisu Chawonsu
16. (a) Mutapu ik usadilay Satan mulong wa kuyiyipish antu a Nzamb? (b) Milad ik yisadidinay Djabul mulong wa kuyiyipish antu adia mu teritwar wen?
16 Satan usadil yom yawonsu mulong wa kutuyipish ni kushadish kwitiyik kwetu kud Yehova. (Kubur. 12:12, 17) Yitongijok yiyimp ya Djabul yimeken kamu patok mu mangand, yimekedin mu kutongin pa masandj ni uyimp usadikina. Pornografi umekedin katat kusutil ku ordinater ap kand ku yamu yikwau. Kangal tuwany mu mipit ya Satan. Pakwez, kwiyovu kwetu kufanyidin kwikala mud kwa mwin kuseng David, wafunda anch: “Nikalam njil yitentamin. Pa muten ik ukez kudi am? Nikedil mu kashinsh ka uyakin wa muchim wam mu chikumbu cham.”—Kus 101:2.
17. (a) Mulong wak Yehova ukat kujingunishang yitil patok? (b) Yom ik kamu yitufanyidina kusal?
17 Nlel, Yehova kakatap kand kujingunishang yitil mu yishimu shimu ni mwikadil wa makasu mudi mwasalangay mu yisu ya pakur. Pakwez, umening yom yawonsu ni pa chisu chend chiwanyidina ni ukat chad kujingunin yom yadia yijingamina patok. Paul walonda anch: “Yitil ya antu amwing yikat kumekan swa patok pakadiau kal kuyirumburish. Pakwez yitil ya antu akwau yikat kulab pa kumekan.” (1 Tim. 5:24) Chovil cha kusambish cha Yehova mulong wa kubudish yitongijok yiyimp patok chidi mulong wa rukat rend. Ukatin chikumangen ni ukimbin kamu kuchiking ku kwijond. Pachinech, umekeshining riy kud ay asala yitil chadi ezin kand kukarumuk. (Jinsw. 28:13) Komb lel tulamany kamu muchim wetu uwanyidina kudiay Nzamb ni kudjibul kamu yisalijok yawonsu yiyimp.
Lam Kamu Michim Uwanyidina
18. Mutapu ik Mwant David mwasotay ing mwanend wiyovang padiay Nzamb?
18 David wamuleja mwanend Salomon anch: “Ey, mwanam Salomon, Mwijika Nzamb wa tatukwey, ni kumusadil ndiy manangu mey, mawonsu, ni rusot ra manangu mey, mulong Yehova ukat kusand mu muchim yawonsu. Ndiy ukat kwonganyin kurijek kwa muntu ni yitongijok yend yawonsu.” (1 Jins. 28:9) David wasota anch mwanend asala yom yivud pakad kwimen kusu pa kumwitiyij Nzamb. Wakimba anch Salomon ajikitisha mulong wa kwipan kukurikina kwa Yehova mulong wa kashalapol Wend. Niyey ukat kumujikitishang Yehova mu mutapu winou?
19, 20. Kulondwish Kuseng 19:7-11, yom ik yamukwasha David kusej piswimp kudi Nzamb, ni mutapu ik tukumwimburija?
19 Yehova wijing kamu nawamp yitongijok ya antu end ni usejining kudi awiy ni mulong wa ronganyin ra mikadil yau yiwamp rikat kuyisejijang kudi ndiy. Chawiy, Yehova uswirikedin etu tumwijika kamu ni tukwatikana kamu nich kwijik wuntu wend ushimokishina. Mutapu ik tukusala? Mukwilejang Dizu diend ni mu kushinshikinang mayukish mend mu mwom yetu.—Jinsw. 10:22; Yoh 14:9.
20 Ov, ukat kutangang Dizu dia Nzamb dichuku diawonsu ni kulembil chakwel ukukwash kusal mwamu? Umen usey wakushakam kukwatijan nich mbil ja Bibil? (Tang Kuseng 19:7-11.) Anch mwawiy, ritiy rey mudiay Yehova ni rukat rey mulong wendendiy rukudandamen kujimb. Ni ndiy, ukusej kudi ey, ukwendany nend pamwing, kwawonsu kukuyay. (Isay 42:6; Yak. 4:8) Mwawiy, Yehova ukukumekeshin rukat mu kukuyukishang ni kukuking mu spiritu chakwel wendina mu kanjil ka kuya ku womu.—Kus. 91:1, 2; Mat. 7:13, 14.
Ov, Ukutwish Kwakul?
• Mulong wak Yehova ukat kutupapat?
• Yom ik yayishikija antu amwing ku kwikal akankuny a Nzamb?
• Mutapu ik tukumekesha anch Yehova udi wa kashinsh kudi etu?
• Mutapu ik tukulama muchim uwanyidina kudi Nzamb?
[Chipich chidia pa paj wa 4]
Mutapu ik ukatay Yehova kutulam mudi nvaj?
[Chipich chidia pa paj wa 5]
Dilejan ik twilejina kal ku chilikej cha Ananias?
[Chipich chidia pa paj wa 6]
Yom ik yikutukwasha kumusadil Yehova nich muchim uwanyidina?