Yom Yilondiningau Antu Piur Pa Yesu

“Yesu wa ku Nazaret . . . pakad ntad udi muntu mujim mu rusangu ra muntu.” —H. G. Wells, mwin kwilej rusangu ra muntu wa Angleterre.

“Kristu udi wa . . . pakampwil mukach mwa antu awonsu ayifila akwau mu rusangu ra muntu.” —Philip Schaff, mwin kwilej teoloji ni rusangu ra muntu wa mu Swisse.

OV, NANY uwanyidina kumutazuk anch muntu mujim wa yisu yawonsu? Ov, mutapu ik ufanyidinau kwilik kujimb kwa muntu? Ov, chidi kusutil ku ukaliweny wend wa kurish njit? Ov, ku usu wend wa ku mujimbu? Ov, kusutil ku manangu mend? Ap chifanyidin kukwisik kusutil ku usu ukweta mazu ni yisal yend padi antu ni kusutil ku chilik chayishilay?

Tushinshikinany yalondau, in kwilej rusangu ra muntu, in siyans, in manangu in kwilej jinsangu ja Bibil, in kufund, anyikel a chipolitik, ni antu akwau—a pakur ni a katat—piur pa muntu wa ku Nazaret, Yesu Kristu:

“Chakin kamu, chikwit tupampish tuvud tukash, chakwel kutadik anch muntu umwing ukweta usu—kichidiap kusu mu mivu tunan twaad yiney ya rusangu ra muntu—udi Yesu wa ku Nazaret.”—Reynolds Price, mwin kufund wa mu Amerik ni mwin kwilej jinsangu ja Bibil.

“Muntu wadinga wakad mulong wipana kamu amwinend mudi chakupesh mulong wa kuwap kwa antu akwau, pamwing ni akankuny nend ni wikala difut dia mangand. Chadinga chisal chitentamina.”—Mohandas K. Gandhi, ntakel wa chipolitik ni ntakel wa muspiritu wa mu Inde.

“Panadinga mwanikanch, anleja malejan madia mu Bibil ni ma mu Talmud. Nidi Muyuda, pakwez muntu umwing wa ku Nazaret winshimokishin nakash.”—Mwin siyans Albert Einstein, wavadikina mu Allemagne.

“Kudi am, Yesu Kristu, udi muntu upandikena usey mu yisu yawonsu, mu rusangu rawonsu ra muntu, mu yawonsu mudi Mwan a Nzamb ni Mwan a Muntu. Yom yin yawonsu yalonday ap yasalay yidi ya usey kudi etu ilel, ni chitwishikinap walond mwamu piur pa muntu windjing ikala wafa kal ap anch udiaku mwom.”—Sholem Asch, mwin kufund wa mu Pologne mudi mu mujimbwilau mu Christian Herald; awiy atekina kashony.

“Kinadingap niyitiyijina chom ap chimwing, cha chipolitik, chirelijon ap piur pa muntu, mu mivu yam yawonsu makum masatu ni yitan. Kupwa kwa mivu yitan nitiyija. Nitiyija malejan ma Yesu Kristu ni mwom wam wawonsu wakarumuka.”—Count Leo Tolstoy, mwin Russie mwin kufund jingany ni mwin filozofi.

“Mu rusangu rawonsu ra muntu mwikil ukweta usu padi antu mudi [ Yesu] ni usu wend uchidandamedin kushik ni katat.”—Kenneth Scott Latourette, mwin kwilej rusangu ra muntu wa mu Amerik ni mwin kufund.

“Ov, tukutwish twatongin anch jinsangu ja evanjil jidi kwau ringany ra kutongin? Chakin kamu, murund nam, kwikil chom chimekeshina anch ridi ra kutongin. Pakwez, rusangu ra Socrates, ritiyijinau piswimp antu awonsu, kwikil mukand urilejena nawamp win kamu mudi rusangu renday Yesu Kristu.”—Jean-Jacques Rousseau, mwin filozofi wa mu France.

Chakin kamu, anch kudi muntu usotila anch ikal chilik chetu mu mwom, udi ching kusu Yesu Kristu. Paul, muntu wileja nakash wa mu mivu chitot ya kusambish amutonda kudi Yesu chakwel ikala mwin kwilej Wend ni chakwel ayileja akamichid Yendendiy, utukasikeshin “Tumutalany” Yesu. (Hebereu 12:2; Midimu 9:3) Ov, chom chikutwishay Yesu kutulej piur pa mutapu wa kushakam? Ov, mutapu ik ukutwisha kutanyinamu mu mwom wend?