Yipul ya in Kutang

Mu Nehemi 8:10, ayileja in Yuda anch yangany “udiany jinnam jikweta many,” ap anch Chijil chidia mu In Levi 3:17 chalonda anch: “Kangal wez wadiany many.” Mazu minam makwatijadin mutapu ik?

Mu dizu dia kusambish, mazu makarumunau anch: “jinnam jikweta many” mu Nehemi 8:10 ni “many” mu In Levi 3:17 mashalijadin. Dizu dia Hebereu che’lev, diakarumunau “many” mu In Levi 3:17, disambidin piur pa many ma annam ap ma antu. (Lev. 3:3; Ank. 3:22) Maverse madia kurutu kwa verse 17 malejen anch kichadingap chiyifanyidina in Isarel kudia many madia ku mil ni ku makund ma annam a kupan milambu ap ni many madia ku rutandantul mulong “many mawonsu madi ma [Yehova, NW].” (Lev. 3:14-16) Chawiy lel many ma annam adinga afanyidin kumalambul kudi Yehova kadingap kafanyidina kumadia.

Chikwau, dizu diakarumunau anch: “Jinnam jikweta many” mu Nehemi 8:10 didi mash·man·nimʹ, ni kawiy kapamp kamwing kusu dimekena dizu dined mu Mifund ya Hebereu. Didiokil ku chisal sha·menʹ, chirumburikina anch, “kwikal ni many, mujimbu wa many.” Chitong cha mazu madiokila ku chisal chinech chirumburikin kwikal mukash ni kwikal zoong. (Isikesh Isay 25:6.) Dizu dimwing dia mazu madiokila ku chisal chinech didi dijin sheʹmen, dikarumwiningau chisu chivud anch “many” ap kulond anch “many mawamp” ma mpach. (Kuv. 8:8; Lev. 24:2) Dizu mash·man·nimʹ mudi mudisadidilau mu Nehemi 8:10, dimeken anch disambidin piur pa yakudia yisukinau nich many mavud ni mukutwish mwikal mbij yikweta many pakwez kimwadingap yises ya many ma nnam.

Ap anch ayijidika in Isarel kudia yises ya many ma nnam, pakwez chadinga chiyifanyidin adia yakudia yiwamp, yitadila. Yadia yimwing mudi mikat ya mabuj, kadingap ni kuyosh nich many ma nnam, pakwez adinga ni kuyosh nich many ma mitond, chisu chivud madinga many ma mpach. (Lev. 2:7) Chawiy lel, buku Étude perspicace des Écritures urumburil anch: “Jinnam jikweta many” jisambidinau pinap “jidi yikunku ya many, yom yakad kwikal yiumina, pakwez yitadila, pamwing nich yakudia yikwau yitadila yakwisuk nich many ma mitond.”

Pakwez, ku mutambu wa in Kristu, ij anch chijidik cha kulik kudia many chadinga chimwing cha yijidik yadinga mu Chijil. Awiy kadiap mu Chijil, ni kudiap kand mu yijidik yach piur pa milambu ya annam.—Rome 3:20; 7:4, 6; 10:4; Kol. 2:16, 17.