Yidil ya in Kristu Yiding ya Kalimish, Yipipela, ni Yimusangareshin Nzamb
UKUTWISH wateshin kulemp mazu ma kudil. Antu afishina adjit masun ma kanyik ujal wa pakampwil, abumburok lel pansh kudil mulong wa ushon. In kuja alondwil mu chidjimin cha muzik. Akwau adil ni masip mudi asadin musambu. Akwau akemp alel pansh, alewang kal chikur ni rutuk. Chishiken ik chidiaku? Mu jindond jimwing ja mangand, yiney yawiy yom yisadikininga pa chidil padia yitot ya antu akumangena mulong wa kumudil mufu.
Atuman a Yehova avud ashiching mu mal mudia anamakwau ni akwau antu alimishininga nakash yishankur ni ayovilinga wom afu. Mamiliyon ma antu itiyijin anch pafilingay muntu, ukwikal spiritu mudi wa angak ukwikala nich usu wa kukwashan ap kusal uyimp. Chitiyij chinech chikwatijadin nich yishankur yivud ya chidil. Chakin kamu, chidi chiwamp kumudil ufila. Pa yisu yimwing, Yesu ni in kwilej end ayidila akatish nau afa. (Yohan 11:33-35, 38; Midimu 8:2; 9:39) Pakwez, kamekeshap kamu ushon upandakena nakash wa kudil mudi muchadinga chaku cha antu avud a mu machuku mau. (Luka 23:27, 28; 1 Tesalonika 4:13) Mulong wak? Diyingishin didi anch, adinga ij uyakin piur pa afu.
Bibil ulondil kamu patok anch: “Mulong antu aom ij anch, kwisudiel tukez kafa, pakwez antu afu kijap chom . . . Rukat rau, ni kukis kwau, ni maku mau, yawonsu yafil kal nau pamwing . . . Mulong ku rufu kuukuya kwikiling midimu, ap yitongijok, ap ronganyin, ap manangu.” (Mulej 9:5, 6, 10) Maverse minam madia mu Bibil mapepilau movikeshin patok anch, anch muntu wafa, kijingap kand chom ap chimwing. Kakutwishap watong, kwovu kuswan, kwambamb, ap kutesh chom kanang. Kutesh uyakin winou wa usey udia mu Bibil kusadil anch yidil ya in Kristu yikala mutapu ik?
“Kangal Wapukunany ku Chom Chijondila”
Chikalap nchik muchid wau ap chishankur chau, Atuman a Yehova ipukining kamu yishankur yawonsu yambatena nich yitiyij yilondila anch afu adiaku ni akwet cha kuyisal antu adia aom. Yishankur mudi kulal pa ntand, misambu ya rufu, misambu ya kuvurik dichuku diafay muntu, milambu ya afu, ni yishankur ya kumwok mufir yawonsu yiney Nzamb uyikisin mulong yidi yom yijondila, yikwatina ku malejan makad kwikal mu Mifund, ma ayilembil malondilinga anch mupim ap anch spiritu kafilingap. (Ezekiel 18:4) In Kristu akin ‘Kakutwishap adia ku mes ma Mwant ni ku mes ma ayilembil,’ chawiy kakatap kusal yishankur yiney. (1 Korint 10:21) Aziyidil mbil yilondila anch: “Kangal wapukunany ku chom chijondila.” (2 Korint 6:17) Chiswapelingap kukwat mupak mudi winou.
Mu Afrik ni kwindond jikwau, antu itiyijining anch, ching kamu wasalany yishankur kanang, chamwamu spiritu wa angak ukujiman. Kulik kuyiziyil akumening mudi kurumbuk nakash kukutwisha kwalet mashing mu ul ap kuburen kwa mapit. Mulong wa kulik kusal yishankur yakad kukwatijan nich Mifund piur pa chidil, antu avud a Yehova akat kuyinyinyit, kuyisaal, kuyiswingish ni kuyopat mu mal mau ni mu majuku mau. Akwau ayifunda anch kakatiningap chisak ap anch kakatap kuyilimish afu. Pa yisu yimwing, antu akad ritiy akat kusend ku usu yitenchik ya chidil cha in Kristu. Chawiy lel, mutapu ik tukutwisha kwipuk matend ni antu akasikeshina anch ching wasalany yishankur yakad kumusangaresh Nzamb? Chipandakenamu usey, chom ik tukutwisha kusal chakwel twiyaurila ayinetu ku yishankur ni yisal yijondila yikutwisha kuyipish urund wetu ni Yehova?
Ijikish Mipak Yey Patok
Mu yikunku yikwau ya mangand, kuding chaku cha chishankur chisadilingau anamaku a ku mujimbu a mu dijiku ap a mu muchid alonda dizu kwi nzay kurutu kwa kumujik mufu. Chawiy lel mwin Kristu ushinshamena ufanyidin kulond patok anch chidil akuchitenchik ni kuchisal kudi Atuman a Yehova mudi mudia yijil ya mu Bibil. (2 Korint 6:14-16) Yom yikusadika ku chidil cha mwin Kristu kiyifanyidinap kunenganesh michim ya ambay akaritiy ap kuyipwakesh antu akwau ija yitiyij ni malejan metu piur pa afu.
Anch mukurump wa chikumangen cha Ukristu ukwimanyin chidil, amakurump atondau kal akutwish apan yitongijok ya ukwash ni kupan kand ukwash wa muspiritu, chakwel anch yitenchik yawonsu yambatana ni yijil yidia mu Mifund. Anch antu amwing akad kwikal Atuman asot kwandjik yishankur yijondila, chidi cha usey kujijaman nich kukapuk ni yirumburilany mwikadil wetu wa Ukristu mu mutapu uwamp ni wa kalimish. (1 Pita 3:15) Chad chikwikal nchik anch anamaku a ku mujimbu akasikeshin kusadil yishankur yijondila mu ditenchik dined? Chad yid ya dijuku yidia in kwitiyijin yikudiokal kwau mu ditenchik dined dia chidil. (1 Korint 10:20) Anch kwikal mulong winou, chitwishikin kusadil pamwingap diskur dia rufu ku Chot cha Want ap kwi ndond yikwau yifanyidina mulong wa kupan rongoj ra “mukand wa Nzamb” ni chakwel antu ijika uyakin mulong wa rufu ra mukatish netu. (Rome 15:4) Ap anch chital chidiakwap, ditenchik dined difanyidin dikal dia kalimish ni ditiyikina. (Kuvurik Yijil 34:5, 6, 8) Kwiyandjik kuyimp kwa anamaku akad kwitiyij mu milong yiney kukutwish kwawejinaku kand runeng, pakwez tukutwish twiyongoj pa kwijik anch kutakaman kwetu mulong wa kusal yom yiwamp Nzamb kakutwishap wakuvuramen, mulong ukutwish watwinkish “ukash upandakena ukash wawonsu.”—2 Korint 4:7, MM.
Fund Mupak Wey
Anch muntu wafund mipak yend piur pa mutapu ukezau kusal pa kumujik anch wafa, chiswapeling nakash kutongijokin pamwing ni anamakwend akad kwikal Atuman, mulong alimishining nakash mazu ma mufu. Ov, mutapu ik ufanyidina kusal chidil, pa ndond ik chifanyidina kuchisadil, ni mutapu ik udinga kwikal nich ulabu pa mutapu wa kutenchik ni wa kusal yom piur pa yin yifanyidina wafund? (Disambishil 50:5) Anch kudi buku wafunday, kumufachik kudi atuman, ukweting usu nakash. Antu akata kutal kurutu nich njingunin ni manangu mashindamedina pa Bibil kakwetap kuswir kwa kuchingel djat ni pakwikadilau amapal ap anch ayel musong ukash chad lel akwata mupak winou.—Jinswir 22:3; Mulej 9:12.
Chikat kuyikasiken antu avud kufund mipak yiney mu kabuku. Pakwez, kusalang mwamu kudi uman wa kupam muspiritu ni wa kuyikat antu . (Filipoi 2:4) Chipandaken nakash kuwap anch muntu washinshikin milong yiney amwinend pa ndond pa kuyishil anamaku anenganena ni akweta ushon chakwel akwata mipak yiney, mulong akutwish ashikij swa ku kwitiyij yisal yijondila yikutwishay mufu amwinend ap akaritiy akwau kuyilik kuyitiyij.
Salany Chidil Chipipela
Mu yikunku yivud ya mu Afrik, antu itiyijining anch chiwapil kusal chidil machuku mavud ni pa kudia ni kuna nakash chakwel angak kangal ajimana. Antu akwau akat kusadil yidil mudi yisu ya “kwibaz kwa yom” yikwetau ya ku mujimbu ni ya nfalang jau. (1 Yohan 2:16) Kuding kusadil chisu chijim ni usu ukash pamwing ni dipit dijim mulong wa kumujik ni kumudil mufu “mutapu uwamp”. Chakwel kuyisangaresh antu avud mudi muchitwishikina, kuding kulamik yipich yijim-yijim ya mufu mu jindond kushalijan mu ul, chiding mulong wa kwijikish rufu patok. Chitwishikining kand kusal mipil padia chipich cha muntu ufila, yikudjalau in kudil. Kuding kand kuland mishet ya usey nakash mulong chakwel in kwez kudil ashimoka. Mwi ngand yimwing ya mu Afrik, antu amwing ayiling kusadish mishet yidia mudi motak, ndek, waat, ni yifanikena nich yom kushalijan mulong wa kumekesh dipit dikwetau, ntumb ya mufu, ni kwibaz nich. Chital cha mufu akutwish achidiosh mu mushet ni kuchiladik pa ulal uwamp wa pakampwil. Anch mband wafa akutwish amudjik nkandj mutok udjadilingau ayangadim anch ayat ni akumudjik usang uvud ni yileng yikwau. Ov, chakin kamu antu a Nzamb afanyidin kusal yisal mudi yiney?
In Kristu aswila amening anch chidi cha manangu kwiyep kwiyandjik mu yisal ya antu akad kwijik ap kutongin pa yijidik ya Nzamb. Twij anch yishankur ni yisal yakad kukwatijan nich Mifund ‘kiyidiokilap kudi Nzamb, pakwez yidiokil ku mangand ni mangand mayil ni kujiy pamwing.’ (1 Yohan 2:15-17) Tufanyidin kucha ku mes chakwel kangal tuwila mu mupit wa mangand wa kusot kubechijan, kusot kupakish kuyiwin antu akwau. (Galatia 5:26) Uman umekeshin anch, wom wa afu wawiy udinga mulong wa yishankur ni yaku, yisu yivud ku yidil kuding runtu rujim ni chiding chikash kuyiyikel awonsu ni kukutwish kwikal kanvundangesh swa. Kwifukwil afu kukat kuyitwal antu akad kwikal in kwitiyij ku mwikadil wijondila. Ku yidil mudi yiney, kukutwish kwikal kudil kukash kupandakesh kukasikena kuninetish, kubwikat chital cha mufu, kumulej yom mudi udi mwom, ni kumusamun nfalang ni yom yikwau. Anch yom mudi yiney yasadik pa chidil cha mwin Kristu, chikwikal cha usany nakash pa dijin dia Yehova ni antu end.—1 Pita 1:14-16.
Kwijik mwikadil wakin mudiau afu kukutwish kwatwinkish chakin kamu usu wa kwimanyin yidil yetu pakad yisalijok ya mangand. (Efes 4:17-19) Ap anch yesu wadinga muntu mujim ni upandakena usey wa yisu yawonsu, amujika kwend mudi muntu mukemp ni mu mutapu uwamp. (Yohan 19:40-42) Kudi antu akweta “chiyul cha Kristu,” amening anch chidi cha kalimish kuyijik mu mutapu winou. (1 Korint 2:16) Chakin kamu, kusal yidil yipipela ya Ukristu nich kwikepish yidi njil yiwamp ya kwiyep kusal yom yakad kukwatijan nich Mifund ni kulam mashakamin mawamp ma kalimish, masangareshina, ni mayifanyidina antu amukatina Nzamb.
Ov, Kukutwish Kwikal Musangar?
Kupwa kwa kujikan, anamakwend a mufu, amutej nau, ni antu akwau akweting chaku cha kukumangan yirund yirund chakwel asala musambu ni kuja maj nich muzik ukash. Pa misambu yiney ya yidil pading kuna maar mavud ni masandj. Antu amwing alondining anch misambu yiney yitukwashining kuvuramen ushon wa rufu. Akwau niyawiy alondining anch mwamu chidinga mu chishankur chau. Pakwez, antu avud itiyijin anch musambu winou udi chishankur cha usey nakash chifanyidina kusal mulong wa kumulimish ni kumushiman mufu ni kuutwishish mupim wa mufu chakwel uya kudiau angak.
In Kristu akin amen usey wa chiyul cha manangu chidia mu Mifund chilondila anch: “Ushon uwapil kupandakan masip, ap anch chifu chikwet ushon, ushon winou ukutwish kulet ronganyin mu muchim.” (Mulej 7:3) Chikwau, ij kutaninamu pa kutongijokin pa kwiswimp kwa mwom ni kwa ruchingej ra disanguk. Chakin kamu, ku mutambu wa antu akweta urund wa piswimp nakash ni Yehova, “dichuku dia kufa dipandakenamu dichuku dia kuvadik.” (Mulej 7:1) Chawiy lel, kwijik anch ku misambu ya chidil kuding yitiyij ya aspiritu ayimp ni masandj chawiy komb chiyipin kamu kudiau in Kristu akin kuyisal ap kuya ku misambu yiney. Kwikal pamwing ni antu asadina misambu yiney kukumekesh kuburen kumulimish Nzamb ni mulong wa kom ka akwetu in kumwifukwil Yehova.
El Antu Akwau Amana Kushalijan
Tukwet musangar ujim mudi ik wa kukolik ku wom wa chamwamu wa afu ukwetau antu avud adia mu mididim ya muspiritu! (Yohan 8:32) Mudi an a “kutok,” tukat kumekesh ushon wetu ni kunenganan kwetu mu mutapu umekeshina chitokish cha muspiritu, mutapu upipela, wa kalimish, ukweta nich ruchingej ra disanguk. (Efes 5:8; Yohan 5:28, 29) Ruchingej riner rikutwish ratulamin palemp nich kunenganan kwakad mwinjil mudi mukatau kusal antu “kakwetip ruchingej.” (1 Tesalonika 4:13) Kukutwinkish kukapuk ni kujijaman kukash ku mutambu wa difukwil diakin, pakad kuwil mu kuyov antu wom.—1 Pita 3:13, 14.
Nich kutesh kwetu nawamp kwa yijidik ya Mifund kukez kuyinkish antu mutapu wa ‘kuman kwaurik kudia pakach pa antu akata kumusadil Nzamb ni akad kumusadil.’ (Malakiy 3:18) Dichuku dimwing, rufu kirikez kwikalakwap kand. (Kuburik 21:4) Pituchingedina kuwanyin kwa kushilamu kwinoku kujim, el Yehova atutana zwang wakad kufa nich kurutu kwend, ni iyaurila palemp nich mangand minam mayimp ni ku yisal yakad kumulimish Nzamb.—2 Pita 3:14.
[Chipich chidia pa paj wa 30]
Chidi cha manangu anch twafund ayinetu yom yitutongina mutapu ukezau kusal chidil chetu ni kutujik
[Chipich chidia pa paj wa 31]
Yidil ya in Kristu yifanyidin kwikal yipipela ni ya kalimish