Ov, Mazu Ma Yesu Mayikedil Malembil Mey?

“Yesu chapwishay kulond mazu mend minam, yisak ya antu yashimoka ku malejan mend.”—MAT. 7:28.

1, 2. Mulong wak yisak ya antu yashimoka malejan ma Yesu?

TUFANYIDIN kwitiyij mazu ma Yesu Kristu, Mwan kapokal wa Nzamb, ni kumasadin mu mwom wetu. Chakin kamu ndiy kalondap mudi muntu mukwau. Ov, mulong wak antu ashimoka pa mutapu wayilejay mu Mafundish ma pa Mukandu!—Tang Mateu 7:28, 29.

² Mwan wa Yehova kafundishap mudi mwafundishangau in kufund, adinga ni kushindamen pa mazu mau mavud-mavud makad kurumburik ma malejan ma antu akayitil. Kristu wayileja ‘mudi muntu ukweta ulabu’ mulong yom yalonday yawiy yamulejau kudi Nzamb. (Yoh. 12:50) Komb, tutalany mazu makwau ma Yesu madia mu Mafundish ma pa Mukandu mutapu makutwisha kuyikel malembil metu.

Kangal Walembilany Mudi in Rubabek

3. Let chitongijok chijim chidia mu mazu ma Yesu madia mu Mateu 6:5.

³ Malembil madi chikunku cha usey mu difukwil diakin, ni tufanyidin kumulembil Yehova chisu chawonsu. Pakwez mazu ma Yesu madia mu Mafundish ma pa Mukandu mafanyidin kuyikel malembil metu. Ndiy walonda anch: “Ni piukulembilanya kangal wez wikalany mudi in rubabek, mulong awiy akatil kwiman piur ni kulembil mu masinagog ni mu mansang a njil, mulong ayimana kudi antu. Chakin kamu nakulejany anch: Awiy akil kal difut diau.”—Mat. 6:5.

4-6. (a) Mulong wak Afarise akata “kwiman piur ni kulembil mu masinagog ni mu mansang a njil”? (b) Ov, mutapu ik wadingau in rubabek inay “akil kal difut diau”?

⁴ Chisu chadingau in kwilej a Yesu ni kulembil, kadingap ni kuyimburij Afarise in “rubabek” adinga ni kwiman ayinau anch atentamin, ayidimbanga akwau nich kuyovil riy ra ku mes. (Mat. 23:13-32) In rubabek inay akata “kwiman piur ni kulembil mu masinagog ni mu mansang a njil.” Mulong wak? Mulong “ayimana kudi antu.” Ayuda a mu mivu chitot ya kusambish adinga ni chaku cha kulembil mudi mu chikumangen pa chisu cha kulambul milambu ya kwosh mu tempel (pa muten wa chidivu pamanch ni urel pa muten wa kasatu). Antu avud adinga ashiching mu Yerusalem adinga ni kulembil pamwing ni chisak cha in kwifukwil mukach mwa jimpang ja tempel. Pol pa musumb, Ayuda in kwifukwil adinga ni kulembil tupamp twaad pa dichuku ni dichuku ‘iminy mu masinagog.’—Isikej nich Luka 18:11, 13.

⁵ Antu avud kadingap ashich piswimp ni tempel ap ni sinagog mulong wa malembil misambinau kal kwiur oku, chawiy chadingau ni kulembil kwawonsu kukwikalau pa yisu yiney. Amwing adinga ni kukat anch yisu yiney ya kulembil yiwanyina anch ashik “mu mansang a njil.” Adinga ni kusot chakwel “ayimana kudi antu” adinga ni kusutin pa mansang minima. In rubabek inay adinga ni “kulepish kulembil” chakwel ayimana kudi in kusut. (Luka 20:47) Kangal twikalany nich mwikadil mudi winou.

⁶ Yesu walonda anch in rubabek inay “akil kal difut diau.” Adinga aswiriken nakash anch antu ayijika ni ayitumbisha—yawiy yawonsu yadingau ni kusot. Awiy akil kal difut diau, mulong Yehova kakutwishap wakul malembil ma rubabek. Pakwez, Nzamb ukwakul ku malembil ma in kwilej akin a Kristu, mudi muchimekena mu mazu makwau malonday Yesu pa mulong winou.

7. Chiyul cha kulembil “mu kapalikany key ka mukach” chirumburikin ik?

⁷ “Pakwez ey chiukulembila, andam kwey mu kapalikany key ka mukach, wend upatuku chiy, walembil kudi Tatukwey udi mu ujindj, ni Tatukwey ukat kumen mu ujindj ukez kakufut.” (Mat. 6:6) Chiyul cha Yesu cha kwandam mu kapalikany ni kupat ku chiy mulong wa kulembil chirumburikinap anch muntu umwing kakutwishap walembil mulong wa chikumangen. Chiyul chinech chadinga mulong wa kulikish malembil ma patok malembilangau mulong wa kwipwitin manangu ma antu ni kusot anch antu akwau ayitumbisha. Tufanyidin kuchivurik chom chinech anch atwinkish chisend cha kulembil kurutu kwa antu a Nzamb. El tushakamany kukwatijan nich chiyul chinech cha Yesu piur pa malembil.

8. Kukwatijan ni Mateu 6:7, kurumbuk ik mu malembil kutufanyidina kwipuk?

⁸ “Ni mu kulembil kwin, kangal wavudishany mazu mamwamu, mudi mukat kusalau in mangand; mulong awiy akat kutong anch kwij akututeshil mulong wa kuvudish mazu.” (Mat. 6:7) Yesu wisambina mutapu ukwau uyimp wa malembil—kuchirokin mazu. Kasotap kulond anch kitufanyidinap twachirikin malembil madiokila ku muchim ni mazu ma kujikitish mu malembil. Padingay mu chir cha Getiseman pa uchuku wa kurutu kwa kufa, Yesu wachirokina “mazu mawiy mamwing” mu malembil.—Marko 14:32-39.

9, 10. Mu mutapu ik tufanyidina kwipuk kuchirokin malembil?

⁹ Chikwikal chiyimp kwimburij malembil ma “in mangand.” “Kangal wavudishany mazu,” awiy adinga ni kuchirokin mazu mamwamu mading makwatau kal mu mutu. Kichayikwashap in kwifukwil a Baal pamutazukau pa dijin diend nzamb winou wa makasu, “kusambish pamanch djat ni pa muten pa mutu, end alond anch: ‘A Baal, twakula!’” (1 Ant 18:26, NW) Ilel mamiliyon ma antu akat kulembil malembil mizwila mazu mamwamu, atongining anch kwij ‘akututesh.’ Pakwez Yesu utukwashin twijika anch “kuvudish mazu” mu malembil malemp ni ma kuchirokinang kimadiap ma usey ku mes ma Yehova. Yesu walonda kand anch:

¹⁰ “Chawiy kangal wilikejanyip mudi awiy, mulong Tatukwen wij kal kwend yom yiuswiridinanya piwakad kal kumwitany.” (Mat. 6:8) Amakurump Ayuda avud a relijon iyikadisha ayinau mudi Akamichid padingau ni kusadil mazu mavud ma chamwamu mu malembil. Mu malembil madiokila ku muchim muding kushiman, kujikitish, kwilemb kudi chikunku cha usey mu difukwil diakin. (Filip. 4:6) Chikwau kand, chikutwish chikal chiyimp kudi etu kuchirikinang yom yawiy yimwing-yimwing nich kutongin anch kuchirokin kudi kwa usey mulong wa kumulejang Nzamb maswir metu. Chisu tulembila, tufanyidin twijik anch tumulejin Muntu ‘wija yom yituswiridina kurutu ap anch kandikal tumwitay.’

11. Chom ik tufanyidina kuvurik anch tukwet chisend cha kulembil mulong wa antu avud?

¹¹ Mazu malonday Yesu piur pa malembil ma kulikau mafanyidin kutuvurish anch Nzamb kakatap kukashimuk mulong wa mazu makash ni mamwamu. Tufanyidin kand twijika anch, ang twalembil kurutu kwa antu avud kichiwapinap twimekesha mutwija yom ap kuzezik kulond mu chilik chakwel anch asambish kwiyipul chisu ik ukupwisha chakwel alonda anch “Amen.” Kusadil malembil mulong wa kulejan jinsangu jidiaku ap mulong wa kuyiyul antu akumangena chikwatijadinap nich mazu malonday Yesu mu Mafundish ma pa Mukandu.

Yesu Utulejin Mutapu wa Kulembil

12. Ukutwish warumburil nchik kwit anch “dijin diey aditumbish”?

¹² Ap anch Yesu wayulana piur pa kusadil nayimp dilau dijim dia malembil, ndiy wayileja in kwilej end mutapu wa kulembil. (Tang Mateu 6:9-13.) Malembil ma sampul kimadiap ma kulam mu mutu mulong wa kumachirikin chisu ni chisu. Pakwez, madi sampul ya malembil metu. Chilakej, Yesu umujimbwil Nzamb mu mazu masambishinay nich anch: “Tatukwetu udia mwiur, Dijin diey aditumbish.” (Mat. 6:9) Tuyingin kamu kumutazuk Yehova anch “Tatukwetu” mulong ndiy Sakatang wetu, udia “mwiur,” kulemp nakash ni divu. (Kuv. 32:6; 2 Jins. 6:21; Mid. 17:24, 28) Kusadil dizu dia mu uvud anch “etu” difanyidin kutuvurish anch ambay netu akaritiy niyawiy akwet kand urund wa piswimp ni Nzamb. Mazu “Dijin diey aditumbish” malejen anch Yehova amwinend ukwet cha kusal mulong wa kutumbish dijin diend ku majir mawonsu makatau kudipan kudiosh kamu ku wintombuj wa mu Eden. Mu kwakul ku malembil minam, Yehova ukez kudiosh uyimp wawonsu pa divu, chakwel itumbisha amwinend.—Ezek. 36:23.

13. (a) Kwit anch “want wey weza” kukez kuwanyin mutapu ik? (b) Mudi ik kand mu kusal rukat ra Nzamb pa divu?

¹³ “Want wey weza. Rukat rey arusala pansh mudi mwiur.” (Mat. 6:10) Kukwatijan nich malembil minam ma sampul, tufanyidin kuvurik anch “want” udi winyikel wa mwiur wa Umesia utakedilay Kristu ni “antu atumbila” akusangulau akuyikel nend pamwing. (Dan. 7:13, 14, 18; Isay 9:6, 7) Kulembil chakwel “weza” madi malembil mitina chakwel Want wa Nzamb weza kand kuyitaliken in kuupompat winyikel wa Nzamb adia pansh. Chom chinech chikez kurijek njil mulong wa paradis utentamina wa pa mangand mawonsu, chisambu, ni mazang. (Kus. 72:1-15; Dan. 2:44; 2 Pita 3:13) Rukat ra Yehova risadikin mwiur, chad kwit anch risadika pansh kudi kulembil kulejena anch Nzamb awanyisha jintong jend mulong wa divu, pamwing ni kuyishesh antu amupompatina ilel mudi mwasalay kand pakur.—Tang Kuseng 83:1, 2, 13-18.

14. Mulong wak chidi cha usey kwit “yakudia yetu ya pichuku pichuku”?

¹⁴ “Itwinkisha lel unou yakudia yetu ya pichuku pichuku.” (Mat. 6:11; Luka 11:3) Mukulembilang mwamu, tukat kumwit Nzamb atwinkisha yakudia “ya pichuku pichuku.” Chom chinech chimekeshin anch twitiyijin ukaliweny wa Yehova wa kuwanyish maswir metu ma pichuku pichuku. Minam madiap malembil mulong wa kwit yakudia yivud. Kulembil kwinoku mulong wa maswir metu ma pichuku pichuku kukutwish kwatuvurish anch Nzamb wayileja in Isarel kuya kukungul mana mawanyidina “dichuku ni dichuku.”—Kub. 16:4.

15. Rumburil chirumburikina kulembil anch: “Itulikishila milong yetu mudi etu tukat kuyilikish awiy akat kutusal nayimp.”

¹⁵ Chom cha kaad cha kwit chidia mu malembil ma sampul chipwitidin manangu metu pa chom tusotininga kusal. Yesu walonda anch: “Itulikishila milong yetu mudi etu tukat kuyilikish awiy akat kutusal nayimp.” (Mat. 6:12) Rusangu ruwamp rafunday Luka rilejen anch “milong” yiney yidi “yitil.” (Luka 11:4) Ching anch tukat ‘kuyilikishin’ antu akata kuturumbukin mwamu niyetu Yehova ukutulikishin kamu. (Tang Mateu 6:14, 15.) Tufanyidin kuyilikishin akwetu nich muchim wawonsu.—Efes 4:32; Kol. 3:13.

16. Mutapu ik tufanyidina kutesh kulembil piur pa choziu ni kukolik kudi muyimp?

¹⁶ “Kangal watutwal ku yoziu, pakwez tukol ku kuyip.” (Mat. 6:13) Mutapu ik tufanyidina kutesh yom yiney yaad yalejanay Yesu kwit mu malembil mend ma sampul? Chom cha kashinsh chidi chinech: Yehova kakumozangap muntu chakwel asala chitil. (Tang Yakob 1:13.) Satan—‘muyimp’—ndiy udi “Mwin Kwozan.” (Mat. 4:3) Pakwez, Bibil ulondin anch Nzamb usadil yom yilikidinay chakwel yisadika. (Rut 1:20, 21; Mul. 11:5) Chawiy lel, kulond anch “kangal watutwal ku yoziu” kudi kulembil anch Yehova kangal atulika tuwa anch twikal mu mwikadil wa kupakiu wa kusot kumubwambwil. Kwinsudiel, kulembil anch “tukol[a] ku kuyip” kudi kulembil kumekeshina anch tumwitin Yehova anch kangal amulik Satan atuwina. Ni tukutwish twikal nich kashinsh anch “Nzamb udi wakin, ndiy kakwitiyip en anozany kusut usu wen.”—Tang 1 Korint 10:13.

‘Itany, Suribany, Kokalany’

17, 18. Chirumburikin ik kudandamen ‘kwit, kusurib, ni kukokal’?

¹⁷ Kambuy Paul wayikasikesha ambay nend akaritiy anch: “Dandamenany mu kulembil.” (Rome 12:12) Yesu niyend waleta mbil ya usu pa mulong winou palonday anch: “Itany, akez kaninkishany; suribany, ukutanany; kokalany, akunanzurilany kwen. Mulong muntu mwawonsu ukwit, ukwak; ukata kusurib, ukutan; ni ndiy ukata kukokal, akez kumwanzuril.” (Mat. 7:7, 8) Chidi chiwamp kudandamen ‘kwit’ mulong wa chom chawonsu chikwatijadina nich rukat ra Nzamb. Mu kudandamen nich mazu ma Yesu, kambuy Yohan wafunda anch: “Rawiy ritiy ritukweta kudiay ndiy, chakwel anch twit chom ku rusot rend, ndiy ukutwov.”—1 Yoh. 5:14.

¹⁸ Chiyul cha Yesu cha kudandamen ‘kwit ni kusurib’ chirumburikin anch tufanyidin kulembil pakad kulik. Chidi kand cha usey kudi etu tudandamena ‘kukokal’ chakwel twandama mu Want ni tusangera yiyukish yau, tutaninamu, ni atufuta. Ov, tukutwish twikal nich kashinsh anch Nzamb ukutwish wakul malembil metu? Mwawiy, tukutwish twikal nich anch tushinshamen kudiay Yehova, mulong Kristu walonda anch: “Mulong muntu mwawonsu ukwit, ukwak; ukata kusurib, ukutan; ni ndiy ukata kukokal, akez kumwanzuril.” Yom yamanau kal atushalapol avud a Yehova yimekeshin chakin anch Nzamb “Ukat kutesh kulembil.”—Kus. 65:2.

19, 20. Pa kutal mazu ma Yesu madia mu Mateu 7:9-11, mutapu ik udiay Yehova mudi tatuku mwin rukat?

¹⁹ Yesu wamufanakesha Nzamb ni tatuku wa rukat ukata kuyinkish anend yom yiwamp. Tongin bil anch wadinga pa Mukandu ni wamutesha Yesu walond anch: “Ap muntu ik wa pakach pen [ukweta] mwanend, anch wamwit dibot ndiy wamwink diyal; ap anch ukumwit insh, ndiy wamwink nnak? Chawiy en ayimp anch wijany mwakupanyin yom yiwamp kudi anen, ing lel Tatukwen udia mwiur kakupandikeshamup kupan yom yiwamp kudi awiy akata kumwit?”—Mat. 7:9-11.

²⁰ Tatuku wa chiuntu, ap anch udiaku ‘muyimp’ mulong wa chitil chaswanay, ukwet rukat ra chivadik padiau anend. Kakutwishap wayidimb anend pakwez ukusal usu wa kuyinkish “yom yiwamp.” Nich mwikadil wa tatuku padi etu, Tatukwetu wa rukat udia mwiur utwinkishining “yom yiwamp,” mudi spiritu wend utumbila. (Luka 11:13) Ukutwish watukasikesh chakwel tusala mudimu witiyijinay Yehova, Mwin Kulet “yom yawonsu yiwamp ni yiwanyidina.”—Yak. 1:17.

Dandamenay Kwisakin Mazu ma Yesu

21, 22. Chom ik chidia cha usey nakash piur pa Mafundish ma pa Mukandu, ni mutapu ik wiyovilap pa mulong wa mazu minam ma Yesu?

²¹ Mafundish ma pa Mukandu madinga kamu diskur dipadakena kujimb diakad kal kusadikangap pa divu. Mijiken nakash mulong wa malejan ma usey nakash ma muspiritu movikena madiamu. Mudi muchilejenau kusutil ku manans madia mu mitu ya milong yiney, tukutwish twisakin chipandakena anch twasadil yiyul yidia mu mafundish minam. Mazu minam ma Yesu makutwish mawapish mwom wetu wa katat ni kutwinkish ruchingej mulong wa musangar udia kurutu.

²² Mu mitu ya milong yiney, twashinshikin kal kwetu malejan makemp ma usey madia mu Mafundish ma Yesu ma pa Mukandu. Chidiap cha kushimok anch antu aditesha diskur dined ashimoka mulong wa “malejan mend.” (Mat. 7:28) Mwawiy mutukutwisha niyetu twasal anch twizwish mu manangu metu ni mu michim yetu mazu minam ni makwau ma usey ma Mulej Mujim, Yesu Kristu.

Ov, Ukwakul Nchik?

• Yom ik yalonday Yesu piur pa malembil ma rubabek?

• Mulong wak tufanyidin kulik kuchirikinang mazu chisu tulembila?

• Mu malembil ma sampul ma Yesu mudi yom ik ya kwit?

• Mutapu ik tukutwisha ‘kudandamen kwit, kusurib, ni kukokal’?

[Chipich chidia pa paj wa 15]

Ov, wij mulong wak chidi chiwamp kulembil mulong wa chakudia chetu cha pichuku pichuku?