Awiy Adia Ni “Kumulondul Mwan A Mukoku”

“Inang awiy adia ni kumulondul Mwan a mukoku kwawonsu kwadingay ni kuya.”—KUBUR. 14:4.

1. Ov, mutapu ik wiyovilingau in kwilej akin a Yesu pa mulong wa kumulondul?

PADINGA pasutil kal mivu yaad ni chikunku kusambishil palejanay Yesu “mu sinagog, mudi chadiay ni kulejan mu Kapernaum” pasalay mudimu wend. Chateshau anch mazu mend makasiken, “in kwilej avud achirika panyim, kendap kand nend.” Yesu wayipula atwimbuy end a 12 anch niyawiy adinga asotin kuya kwau, Simon Pita wamwakula anch: “Mwant, tukuya kudi nanyi? ey yey ukweta mazu ma mwom wa chikupu; ni yetu twitiya kal, twij anch ey yey Umwing Utumbila wa Nzamb.” (Yoh. 6:48, 59, 60, 66-69) In kwilej akin a Yesu kalikap kumulondul. Kupwa kwa kuyizizil many ma spiritu utumbila, adandamena kuziyin ku umutakel wa Yesu.—Mid. 16:7-10.

2. (a) Ov, nany “kashalapol ushinshamena ni kubabal” ap anch “mwin kulam yom ubabela”? (b) Mutapu ik ukwetay kashalapol ntumb yiwamp ya “kumulondul Mwan a mukoku”?

² Yom ik tukutwisha kulond piur pa in Kristu azizidilau many a mu yisu ya katat? Mu uprofet wend piur pa ‘chijingidij cha kwez kwend ni cha kwisudiel kwa mangand,’ Yesu wisambina piur pa chisak cha in kwilej end azizidilau many ma muspiritu adia pa divu mudi “kashalapol ushishamena ni kubabal,” ap anch “mwin kulam yom ubabela,” ushinshamena. (Mat. 24:3, 45; Luka 12:42) Mudi chisak, chisak cha kashalapol chikwet ntumb yiwamp ya “kumulondul Mwan a mukoku kwawonsu kwadingay ni kuya.” (Tang Kuburik 14:4, 5.) Antu inay adi ajik muspiritu, mulong kakatap kwijondish ayinau nich yitiyij ni yisalijok ya “Babilon mujim,” want wa pa mangand wa relijon wa makasu. (Kubur. 17:5) Kwikil malejan ma makasu “mukan mwau,” ni “kakwetap mulong” mu mangand ma Satan. (Yoh. 15:19) Kurutu oku, ashadilap azizidilau many amwing adia pansh akez “kumulondul” Mwan a mukoku mwiur.—Yoh. 13:36.

3. Ov, mulong wak chidi cha usey anch tuchichingejidina chisak cha kashalapol?

³ Yesu wamuteka kal kashalapol ushinshamena ni kubabal “pa mutu pa a mu chikumbu,” charumburik anch, piur pa yid ya chisak cha kashalapol, mulong a kuyinkish “yakudia pa chisu chau.” Wamuteka kand kashalapol “piur pa yom yend yawonsu yikwetay.” (Mat. 24:45-47) Mu “yom” yiney mudi “chisak chipandiken kujimb” cha “amikoku akwau.” (Kubur. 7:9; Yoh. 10:16) Ov, chifanyidinap anch yid ya azizidilau many ni ya “amikoku akwau” amuchingejina kashalapol watekau piur pau? Kudi mayingish mavud malejena mulong wak tufanyidina kuchingej chisak cha kashalapol. Mayingish maad majim mawiy am: (1) Yehova uchingejidin chisak cha kashalapol. (2) Yesu niyend uchichingejidin chisak cha kashalapol. El tushinshikina uman ulejena anch Yehova Nzamb ni Yesu Kristu amuchingejidin kamu nakash kashalapol ushinshamena ni kubabal.

Yehova Umuchingejidin Kashalapol

4. Mulong wak tufanyidina kuchingejin yakudia ya muspiritu yitwinkishinay kashalapol ushinshamena ni kubabal?

⁴ Tushinshikinany yom yisadila anch kashalapol ushinshamena ni kubabal atwinkisha yakudia ya muspiritu ya pa chisu chau. Yehova walonda anch: “Am nikez kukwijidish ni kukulej mwi njil yiukeza kuya.” Wawejinaku kand anch: “Nikez kuyul padi ey ni dis diam.” (Kus. 32:8) Mwawiy, Yehova ndiy utakedina chisak cha kashalapol. Tufanyidin kamu kuchingejin nakash njingunin ya Mifund, chovu, ni umutakel utwinkishina chisak cha kashalapol.

5. Chom ik chimekeshina anch spiritu wa Nzamb uchikinkishin chisak cha kashalapol usu?

⁵ Yehova uchiyukishin kand chisak cha kashalapol nich spiritu wend utumbila. Ap anch spiritu wa Yehova kakumekanangap, pakwez yom yisadilay kusutil kudi antu asadidilay yimeken patok. Tongin bil pa yom yisadilay kashalapol ushinshamena ni kubabal piur pa kulejan uman mu mangand mawonsu mulong wa Yehova Nzamb, Mwanend, ni mulong wa Want. In kumwifukwil Yehova alejen nich mushiku uruu wa Want mu jingand 230 ni kusut ni mu matungu. Ov, winou kiudiap uman ulejena anch spiritu wa Nzamb umwinkishin kashalapol usu? (Tang Midimu 1:8.) Kusutil ku kuyinkish atushalapol a mu mangand mawonsu a Yehova yakudia ya muspiritu ya pa chisu chau kudi atushalapol, chisak cha kashalapol chifanyidin kukwat mipak yijim. Mu kukwatang mipak yiney ni kuyisadil, kashalapol umekeshin rukat, kwikepish, ni mikadil yikwau ya dibuj dia spiritu.—Gal. 5:22, 23.

6, 7. Yehova umuchingejidin kashalapol wend ushinshamena mu chipim ik?

⁶ Chakwel tutesha kujimb kwa ruchingej ritekinay Yehova mudiay kashalapol ushinshamena, tutongijokinany pa yom yayishilayimu yid ya kashalapol. Kambuy Paul wafunda anch: “Mpuny yikez kadjim ni afu akez kayilangwish mu mijimbu yakad kuvund, akez katukarumun. Mulong mijimbu yikata kuvund ey, awapidil kuyitek mu mijimbu yakad kuvund; ni yom ya rufu ey, awapidil kuyitek mu yom ya mwom.” (1 Kor. 15:52, 53) In kwilej azizidilau many a Kristu, amusadidina Nzamb nich kushinshaman ni afila mu mujimbu wa chiuntu uvundila, akat kuyisangul ikal antu a muspiritu ni kutambul mwom wa chikupu. Ayinkishining mwom wakad kufang—wakad nsudiel ni kusheshik. Chikwau, akez kutambul kuburen kuvund, akez kuyinkish mijimbu yakad kuvundang ni ya chikupu. Kuburik 4:4 uyilejen antu inay asangulau mudi anch ashich mu jinkwas ni adjit yibangul ya or ku mitu yau. Ntumb ya want yiyichingedin in Kristu azizidilau many. Pakwez kudi uman uvud ulejena anch Nzamb uyichingejidin azizidilau many.

⁷ Kuburik 19:7, 8 ulondil anch: “Uruu wa Mwan a mukoku wez kal, mukajend wirijekang kal. Amwinkish kudjal amwinend ni maswin ma linen mazutila ni kutok, mulong maswin ma linen mawiy kutentam kwa antu a Nzamb.” Yehova wayitonda in Kristu azizidilau many chakwel eza ikal kurutu oku mband a Mwanend. Kuburen kuvund, kuburen kufa, want, “uruu wa Mwan a mukoku”—yipan yamushena mudi ik! Yidi uman ukash ulejena anch Nzamb uyichingejidin nakash azizidilau many, akata “kumulondul Mwan a mukoku kwawonsu kwadingay ni kuya.”

Yesu Umuchingejidin Kashalapol

8. Ov, mutapu ik manswik ma Want masukay Yesu mamekeshin anch uyichingejidin in kwilej end azizidilau many?

⁸ Uman ik udiaku ulejena anch Yesu uyichingejidin nakash in kwilej end azizidilau many? Pa uchuku wa nsudiel wa mwom wend panap pansh, Yesu washilamu nau atwimbuy end ashinshamena 11. Wayileja anch: “En udiany in kudandamen nam mu yoziu yam; chawiy am nakutondidilany kal en want, mudi mwantondilau am kudi Tatuku, chakwel en ukudiany ni kunany ku mes mamam mu want wam en ukez kashakamany mu jinkwas ni kurumburish michid ya Isarel dikum ni yaad.” (Luka 22:28-30) Manswik masukay Yesu ni atwimbuy end 11 mayikwata in Kristu awonsu azizidilau many 144000. (Luka 12:32; Kubur. 5:9, 10; 14:1) Ov, Yesu wela kusuk nau manswik ma Want wend anch kadingap uyichingejidina?

9. Mu “yom [ya Kristu] yawonsu” mudi ik?

⁹ Chikwau, Yesu Kristu wamuteka kashalapol ushinshamena ni kubabal “piur pa yom yend yawonsu yikwetay”—pa yisakin yawonsu ya Want yidia pa divu. (Mat. 24:47) Mu yom yend mudi yikumbu yidia ku biro mujim wa Atuman a Yehova wa mangand mawonsu, ku mabiro ma mitiy yidia mu jingand kushalijan, Yot ya Yitentam ni Yot ya Want mu mangand. Mudi kand ni mudimu wa kulejan rusangu ra Want ni wakwikadish in kwilej. Ov, kudi muntu ukutwish kumwinkish muntu kanang wakaday kuchingejin kulam ni kusadin yom yend ya usey?

10. Ov, yom ik yimekeshina anch Yesu Kristu udi nau in kwilej end azizidilau many?

¹⁰ Ka chisu kakemp kurutu akandama mwiur, Yesu wasangulau wamekana kudi in kwilej end ashinshamena ni washilamu nau anch: “Talany, nidi nen machuku mawonsu, chikupu ni kwisudiel kwa mangand.” (Mat. 28:20) Ov, kushilamu kwinoku kudi kwakin? Mu mivu 15 yasuta kal ey, uvud wa yikumangen ya Atuman a Yehova a ngand ya kabuj wadinga wa 70000 wiwejinaku washik 100000—kwiwejin kwa yikumangen 40 pa chitot. Ov, in kwilej asu inch iwejinaku? Piswimp in kwilej 4,5 miliyon ababatishinau mu mivu 15 yasuta kal ey—kwiwejinaku kwa antu 800 pa chitot pa dichuku ni dichuku. Kwiwejinaku kwinoku kushimokishena kudi uman wa patok ulejena anch Kristu ukat kuyitakel in kwilej end azizidilau ku yikumangan ya chikumangen yau ni uyikwashining mu mudimu wau wa kuyikadish in kwilej.

Kashalapol Udi Ushinshamena ni Kubabal

11, 12. Ov, mutapu ik wimekeshinay kashalapol amwinend kwikal ushinshamena ni kubabal?

¹¹ Anch Yehova Nzamb nend Yesu Kristu amuchingejidin kashalapol ushinshamena ni kubabal, ov niyetu tukutwishap twamuchingejidin? Oku, kashalapol wimekesha amwinend anch ushinshamen ku kusal mudimu wend wamwinkishau. Chilakej, gazet Chinong cha Kalam ukwet mivu 130 kudiosh pasambishinay kubudik. Yikumangan, yitentam ya munyingumuku, ya pakampwil ya dichuku dimwing, ni ya distrik ya Atuman a Yehova yidandamedin kutukasikesh muspiritu.

¹² Kashalapol ushinshamena udi kand ubabela mulong kakatap kusal yom pakad kutong, kakatap kumumatik Yehova ap kuchirik kwinyim pa chisu chidinga umutakel wa Nzamb zwang pa mulong kanang. Chilakej, pakatau amakurump a chirelijon kwitiyij ap kudiul yom ya choy, mashakamin ma antu a mangand makad ma winzamb, kashalapol ukat kuyibabesh chakwel kangal awila mu mipit ya ditenchik diyimp dia Satan. Kashalapol uding tayad kulet dibabesh dia manangu ni dia pa chisu chau mulong Yehova Nzamb nend Yesu Kristu amuyukishining. Chawiy komb tufanyidin tumuchingejidina nakash kashalapol. Ov, mutapu ik tukutwisha kumekesh anch tumuchingejidin kashalapol ushinshamena ni kubabal?

‘Bombakan’ ni Azizidilau Many Pamulondwilau Mwan a Mukoku

13. Kulondwish uprofet wa Zakariy, chitwishikin nchik kumekesh anch tumuchingejidin kashalapol ushinshamena ni kubabal?

¹³ Mukand wa Zakariy udia mu Bibil wisambidin piur pa “antu dikum” ayila kudiay “mwin Yuda umwing” ni kumulej anch: “Tusotil kubombakan ni yeyey.” (Tang Zakariy 8:23.) Mulong “mwin Yuda umwing” amwedil anch ‘en antu,’ chimekeshin anch udi chisak cha antu. Mu chirung chetu chinech, uyifanikeshin ashadilaku a in Kristu azizidilau many mu spiritu—adi yid ya “in Isarel a Nzamb.” (Gal. 6:16) “Antu dikum a michid yikwau” afanikeshin chisak chipandakena kujimb cha amikoku akwau. Mudi mukatau in Kristu azizidilau many kumulondul Yesu kwawonsu kuyilay, chisak chipandikena kujimb ‘chibombin,’ ap anch chiyil, pamwing ni kashalapol ushinshamena ni kubabal. Antu adia mu chisak chipandakena kujimb kovilingap usany wa kwiyijikish ayinau mudi ambay nau antu atazukinau “mwiur.” (Heb. 3:1) Yesu kakatap kwov usany wa kuyitazuk azizidilau many anch “akadivar.”—Heb. 2:11.

14. Ov, mutapu ik tukutwisha kuyikwash nich kushinshaman akadivar a Kristu?

¹⁴ Yesu Kristu umening anch ukwash ushinshamena uyikwashiningau akadivar nend anch ndiy kamu ukwashinau. (Tang Mateu 25:40.) Chad mwi njil ik, mukutwishau antu akweta ruchingej ra kushakam pa divu, kuyikwash akadivar a Kristu azizidilau many ma muspiritu? Pakampwil chiding kusutil ku kukwash kusal mudimu wa kulejan rusangu ra Want. (Mat. 24:14; Yoh. 14:12) Ap anch uvud wa azizidilau many adia pa divu uyil ni kukep kusut kwa makum ma mivu, pakwez amikoku akwau avulijadin nakash. Chisu chikatau antu akweta ruchingej ra kushakam pa divu kusal mudimu wa kulejan, kusadil mudi in kulejan a chisu chawonsu, ayikwashining azizidilau many muspiritu kuwanyish mudimu wa kuyikadish in kwilej. (Mat. 28:19, 20) Kangal twavuramen kupan ukwash wa milambu ya nfalang mulong wa mudimu winou mu mitapu kushalijan.

15. Ov, mutapu ik witiyijiningau in Kristu umwing ni umwing ku yakudia ya muspiritu ya pa chisu chau ni mipak ya kutenchik nich dirijek yiletiningay kashalapol?

¹⁵ Chitudia in Kristu umwing ni umwing, ov, mutapu ik tumeninga yakudia ya muspiritu ya pa chisu chau yitwinkishiningay kashalapol ushinshamena kusutil ku mikand yishindamedina pa Bibil ni kusutin ku yikumangan ya Ukristu? Ov, tukat kuyidiang nich musangar ni kusadil yitukata kwilej? Ov, mutapu ik twitiyijininga mipak ya kutenchik nich dirijek yikwatiningay kashalapol? Kuziyin kwetu ku mipak ya umutakel kudi uman ulejena ritiy retu mulong wa ditenchik dia Yehova.—Yak. 3:17.

16. Ov, mulong wak ufanyidinau in Kristu awonsu kuyitesh akadivar a Kristu?

¹⁶ Yesu walonda anch: “Amikoku amam akat kutesh dizu diam, ni yam niyij, awiy akat kwinlondul am.” (Yoh. 10:27) Mwamu chidia ku mutambu wa in Kristu azizidilau many. Chad chikwikal nchik piur pa antu asotila “kubombakan” nau? Antu inay afanyidin kamu kumutesh Yesu. Afanyidin kand kuyitesh akadivar nend. Oku, awiy ikinshinau chisend chijim cha kuyidish antu a Nzamb muspiritu. Kutesh ku dizu dia akadivar a Yesu kurumburikin kand ik?

17. Ov, kuchitesh chisak cha kashalapol chirumburikin ik?

¹⁷ Nlel, Chisak Chitakedila chidi ntimesh wa kashalapol ushinshamena ni kubabal, chawiy chitakedila ni kwimanyin mudimu wa kulejan Want pa divu diawonsu. Yid ya Chisak Chitakedila adi amakurump azizidilau many, onganyina kal yom yivud. Chitwishikin kuyijimbul pakampwil mudi “in kutakel” etu. (Heb. 13:7) Mulong wa kuyibangin in kulejan a Want 7000000 ni kusut a mu mangand mawonsu mu yikumangen 100000 ni kusut, amakurump inay azizidilau many akwet yivud ya kusal “mu mudimu wa Mwant.” (1 Kor. 15:58) Kuchitesh chisak cha kashalapol chirumburikin kusal mu kwovijan nich Chisak Chitakedila.

Antu Amuteshina Kashalapol Ayukin

18, 19. (a) Ov, mutapu ik uyukinau antu amuteshininga kashalapol ushinshamena ni kubabal? (b) Mupak ik tufanyidina kukwat?

¹⁸ Kudiosh pamutondinau, kashalapol ushinshamena ni kubabal ukat ‘kuyikarumum antu avud ikal atentamina.’ (Dan. 12:3) Mu antu inay mudi ni antu achingejina kwez kupand ku disheshik dia ditenchik dia yom dia katat. Chidi chiyukish mudi ik kwikal utentamina ku mes kwa Nzamb!

¹⁹ Mu machuku ma kurutu, chisu chiukeza ‘musumb utumbila, Yerusalem musu [charumburik antu 144000], kushirik kudiokal mwiur kudi Nzamb, aurijekin mudi ngachik uyila kudi nfumwend,’ yom ik yikezau kutambul antu ateshininga dizu dia kashalapol ukweta ronganyin? Bibil ulondil anch Nzamb “ukez kikal Nzamb wau. Ndiy ukez kayikuswol mansoj mawonsu ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand; mulong yom yikur yasutil kal.” (Kubur. 21:2-4) Tukwet chakin kamu mayingishin mavud ma kutesh, chawiy lel, el tumuteshany Kristu ni akadivar nend akuchingejin azizidilau many ma muspiritu.

Yom ik Wileja Kal?

• Uman ik umekeshina anch Yehova umuchingejidin kashalapol ushinshamena ni kubabal?

• Uman ik umekeshina anch Yesu Kristu uchichingejidin nakash chisak cha kashalapol?

• Ov, mulong wak tufanyidin kumuchingejin mwin kulam ushinshamena?

• Ov, mutapu ik tumekeshina anch tumuchingejidin kashalapol?

[Chipich chidia pa paj wa 19]

Ov, wij watonday Yehova chakwel ikala mband a Mwanend mu machuku ma kurutu?

[Chipich chidia pa paj wa 20]

Yesu Kristu wamwinkisha kal kashalapol wend ushinshamena ni kubabal “yom yend”

[Chipich chidia pa paj wa 21]

Chisu tusadila mudimu wa kulejan, tuyikwashining azizidilau many ma muspiritu