Ov, Chakin Kamu Nzamb Udi Muntu?
Yakul yituteshininga chisu chawonsu:
◼ “Udi ndond yawonsu, mu yom yawonsu. Udi mudi rinkind.”
◼ “Udi mwin manangu nakash, usu wakad kumekanang.”
Yom ik yalonday Yesu?
◼ “Mu chikumbu cha Tatukwam mudi jindond jivud ja kushakam.” (Yohan 14:2) Yesu walonda piur pa Nzamb mudi anch ukwet chikumbu cha chifanikesh, ap anch ndond ya kushakam.
◼ “Am nadiokala kudi Tatuku, nez ku mangand; nikusha kand mangand ni kuya kudi Tatuku.” (Yohan 16:28) Yesu witiyija anch Nzamb udi muntu wakin ushichinga pa ndond kanang yijikena.
YESU kandikal isambinap piur pa Nzamb mudi usu wakad kumekan. Pakwez, wadinga ni kwisamb ni Nzamb ni wamulembila. Chisu ni chisu wadinga ni kumutazuk Yehova anch Tatukwend wa mwiur, dizu diamekesha urund wa piswimp wadingay ni Nzamb.—Yohan 8:19, 38, 54.
Chidi chakin anch “kwikil muntu wamumanap kal Nzamb” ni anch “Nzamb udi [spiritu].” (Yohan 1:18; 4:24) Pakwez mazu minam kimarumburikinap anch kakwetap mulad kanang wa mujimbu. Bibil utulejin anch: “Anch kudi mujimbu wa mbij kudi kand mujimbu wa spiritu.” (1 Korint 15:44) Ov, komb Yehova ukwet mujimbu wa spiritu?
Mwaning. Chisu chamusangulau Yesu, ndiy “wandama mwiur [mwin], wimana kurutu kwa mes ma Nzamb mulong wetwetu.” (Hebereu 9:24) Chom chinech chitulejin yom yaad yijim piur pa Nzamb. Cha kusambish, ukwet ndond yishichingay. Cha kaad, udi muntu, kadiap ching kusu usu wakad kumekan udinga ndond yin yawonsu.
Ov, mutapu ik lel usu wa Nzamb wovikening kwawonsu kwawonsu? Nzamb ukutwish watum spiritu wend utumbila, ap anch usu wend wa kusal nich, kwi ndond yin yawonsu yisotilay mu mangand. Mudi mukutwishay kusal tatuku mulong wa kuyongoj ni kuyikwash anend, Nzamb ukat kusadilang spiritu wend utumbila chakwel awanyish jintong jend.—Kuseng 104:30; 139:7.
Mulong Nzamb udi Muntu, ukwet kand untu wa kukat ni kukis yom—ukweting kand yovil. Bibil utulejin anch ndiy uyikatin antu end, ukat kusanger midimu yend, ukisining kwifukwil akish, ni ukat kunenganan mulong wa yitil. (Disambishil 6:6; Kuvurik Yijil 16:22; 1 Ant 10:9, Les Saintes Écritures — Traduction du monde nouveau; Kuseng 104:31) Mu 1 Timote 1:11, MM amutazukin anch: “Nzamb muwamp.” Pakad kwidjidjek Yesu walonda anch tukutwish twilej kumukat Nzamb nich muchim wetu wawonsu!—Marko 12:30.a
[Mazu madia kwishin kwa paj]
a Mulong wa kutan jinsangu jivud pa rusangu riner, tal shapitre wa 1 mu buku Chom Ik Chakin Kamu Chifundishinay Bibil? wapalangeshau kudi Atuman a Yehova.
[Tablo wa jinsangu udia pa paj wa 5]
Mudi mukutwishay kusal tatuku mulong wa kuyongoj ni kuyikwash anend, Nzamb ukat kusadilang spiritu wend utumbila chakwel awanyish jintong jend