Ov, Yesu Udi Nzamb Mwin Dikand Diawonsu?
Yakul yituteshininga chisu chawonsu:
▪ “Inge, Yesu udi Nzamb Mwin Dikand Diawonsu.”
▪ “Yesu wadinga ndiy Nzamb win kamu mu mujimbu wa mbij.”
Yom ik yalonday Yesu?
▪ “Anch en winkatilany am, ing wasangarany mulong niyil kudi Tatuku; mulong Tatuku wimpandakenumu am.” (Yohan 14:28) Yesu wadinga wij anch ndiy ni Tatukwend kisikenap.
▪ “Am naya kal kudi Tatukwam Tatu- kwen, Nzamb wam Nzamb wen.” (Yohan 20:17) Yesu kilondilap amwinend anch udi Nzamb pakwez walonda ya Nzamb mudi Muntu windjing.
▪ “Kinilondilip yidiokila kudi amwinam; pakwez ching ya Tatuku wantuma, ndiy wangikisha kal am chijidik cha kulond ni cha kulejan.” (Yohan 12:49) Malejan ma Yesu kimadingap mendendiy; madiokala kudi Tatuku.
YESU walonda patok anch udi Mwan a Nzamb, kadingap Nzamb Mwin Dikand Diawonsu. Anch Yesu wadinga Nzamb, ov, kudi nany kwadingay ni kulembil padingay panap pa divu? (Mateu 14:23; 26:26-29) Chakin kamu Yesu kadingap ni kuyambangesh mudi anch ulondil ni muntu windjing!
Chisu chamwitau kudi in kwilej end aad anch ayinkisha ndond ya pakampwil mu Want wend, ndiy wayakula anch: “Ya kushakam ku chikas cham cha katatuku ni chikas cham cha kamaku, kichidip kudi am kupan; pakwez chidi cha awiy arijekidinau kal kudi Tatukwam.” (Mateu 20:23) Ov, Yesu wadinga uyidimbin palonday anch kakwetap ulabu wa kuyinkish ndond yitinau? Chakapuk chaya mwa! Pakwez, ndiy witiyija nich kwikepish anch ching kusu Nzamb ndiy ukweta ulabu wa kukwat mipak yiney. Yesu weza kand kurumburil anch kwadinga kand yom yikwau yadingay ndiy ap angel yakadiau kwijik pakwez ching kusu Tatukwend ndiy wadinga uyija.—Marko 13:32.
Ov, Yesu wadinga mwishin mwa Nzamb ching kusu padingay panap pa divu? Bwat. Ap kwinyim kwa rufu rend ni kusanguk kwend, Yesu amwisambidin mu Bibil anch udi mwishin mwa Nzamb. Kambuy Paul utuvurishin anch: “Mutu wa Kristu ndiy Nzamb.” (1 Korint 11:3) Bibil ulondil anch mu machuku ma kurutu “yom yawonsu yikepishidil kudiay ndiy, chawiy ni Mwan kand ukepishidil kudiay ndiy ukat kukepishil yom yawonsu, chakwel Nzamb ukwikal yawonsu kudiay wawonsu.”—1 Korint 15:28.
Choviken patok kamu, Yesu kadiap Nzamb Mwin Dikand Diawonsu. Chawiy chimutazukinay Tatukwend anch “Nzamb wam.”—Kuburik 3:2, 12; 2 Korint 1:3, 4.a
[Mazu madia kwishin kwa paj]
a Mulong wa kutan jinsangu jivud pa rusangu riner, tal paj wa 201-204 mu buku Chom Ik Chakin Kamu Chifundishinay Bibil? wapalangeshau kudi Atuman a Yehova.
[Chipich chidia pa paj wa 7]
Yesu walonda anch kudi kand yom yikwau yakadiay ndiy ap angel kwijik pakwez ching kusu Tatukwend ndiy wadinga uyija.