Ov, Wij?

Ov, musong wa mak wisambidinau mu Bibil udi chilik chimwing ni musong udiaku ilel ujimbwilau nich dijin dined?

Dijin dia chimwing “mak” mudi mudisadidilau ilel disambidin piur pa musong wa atupwapu umukwatina muntu. Dokiter G.A. Hansens, ndiy wajingunina kapwapu winou (Mycobacterium leprae) mu muvu wa 1873. Kukimbijol kumekeshin anch kapwapu winou ukutwish washal mwom mu yikalal ap anch kadiap mu mujimbu machuku chidivu. Ajingunina kand anch antu adia piswimp-piswimp ni ayej a mak akwet chak chijim cha kukwachik musong ni anch maswin makweta musong winou makutwish mausamburish. Kukwatijan nich Organisation mondiale de la santé, mu muvu wa 2007 kwadinga antu 220000 ni kusut akweta musong usu wa mak.

Kwikil kwidjidjek anch mak mayimesha mar antu avud adinga mu yirung yafundau Bibil mu Asia wa Kwingangel wa Pakach, ni Chijil cha Moses chadinga chilondil anch muntu ukweta musong wa mak adinga ni kumutek pa ndond yend amwinend. (In Levi 13:4, 5) Pakwez, dizu dia Hebereu tsa·raʹʽath dikarumwiningau anch “mak” kidiadingap disambidina piur pa chimwingang. Tsa·raʹʽath wadinga kand ni kukwat ku maswin ni ku yikumbu. Mulad winou wa mak wadinga ni kumekan maswin ma ndand ap pa linen ap pa chom chin chawonsu chisalau nich mavuj. Pa yisu yimwing, akutwish audiosh kusutil kwau kutut, pakwez anch “musong wimekesh kal mudi mem ma matamb ap kusuzurik” udandamedin, chadinga chifanyidin kosh diswin ap chikit. (In Levi 13:47-52) Mu yikumbu, musong wadinga ni kwimekesh mudi “yibik yibik yijarikina ap yisuzurikina, anch wandamin kal kand mukach” mwa rubumbu. Mayal makweta musong ni pot-pot adinga ni kumadiosh kupwa kumadjibwil kulemp ni kushichau antu. Pakwez anch musong wachirik kand, chadinga chifanyidin kubumun chikumbu chawonsu ni kukungul mavu kuya kumadjibul. (In Levi 14:33-45) Antu amwing alondining anch mak ma maswin ap ma mu yikumbu makutwish mikal kwau musong utazukinau ilel anch kambukur. Pakwez, tukutwisha kulond nich kashinsh mwawiy.

Ov, Mulong wak in Kuchil Argent Aleta Kanvundangesh Palejanay Kambuy Paul mu Efes?

In kuchil argent adinga mu Efes adinga ampich mulong adinga ni kuchil “tuyikumbu kutwilikej Diana,” mwin kulam ul wa Efes, nzamb mband wa ubind, wa kufukish divu, ni wa ruvaj. (Midimu 19:24) Adinga ni kulond anch chirumbidij chend “chaturika mwiur” ni chawiy achilamina mu tempel wa Diana mu Efes. (Midimu 19:35) Tempel winou adinga chimwing cha yom sambwad yamushena ya mangand ma pasak. Yisak ya antu in kuya kutal yom yezanga ku Efes pa ngond wa Rish ni Ndol pa muvu ni muvu mulong wa kushik ku misambu ya kumutumbish Diana. Kwez kwa angendj kwasala anch antu inay ita tuyom tuvud twa kwifukwil, adinga ni kuyisadil mudi yom ya kuvurikinaku, mudi nkau, ap mulong wa kuyilambul kudi nzamb mband ap mulong wa kwifukwilay mu dijuku anch antu inay achirik kwolikwau. Yom yafundau pasak yidiokila ku Efes yisambidin piur pa tupwany wa or ap twa argent twa yirumbidij ya Diana, ni mifund yikwau yalonda patok mulong wa kufa nich kwa mwin kusal midimu ya argent.

Pakwez Paul walejana anch “anzamb aumbilau nich makas kadip anzamb.” (Midimu 19:26) Chawiy lel, in kuchil argent amana anch mwom wau ukwikal mu chak ni chawiy akwata mpung ya kutaliken malejan menday Paul. Demetrius, umwing wa in kuchil argent, ulejen ujim wovau palonday anch: “Pakwez kichidip kusu mulong wa kubabal nich mulong wa kufa kwa katumb ka mudimu wetu; pakwez kand chidi mulong wa tempel ya nzamb mband mujim Diana, kakumubangakup kand, akumudiosh katumb kend kakata kumwifukwilau kudi in Asia awonsu ni mu mangand.”—Midimu 19:27.