Talany Mes Pa Chom Cha Usey

“Chawiy chiniyidila mau salal djat ni kwisudiel chakwel nitambul chom cha usey.”—FILIP. 3:14, Manswik Masu.

1. Chom ik cha usey chadinga chimuchingedina kambuy Paul?

KAMBUY Paul, wadinga wijikena kand anch Saul wa Tarsus, wadinga wa mu dijuku dia ampich. Amufumba mu relijon wa angakend kudiay Gamaliel mulej mujim wa Chijil. (Mid. 22:3) Paul wadinga nich chadingau ni kujimbul anch mudimu uwamp wadinga umuchingedina kurutu; pakwez ndiy walika relijon wend ni wikala mwin Kristu. Chawiy chasambishay kutal mes mend pa chom cha usey chadinga kurutu cha mwom wa chikupu—cha kwikal mwant ni mwin kupesh wakad kufang mu Want wa mwiur wa Nzamb. Want winou ukez kuyikel divu diawonsu pidikeza kwikal paradis.—Mat. 6:10; Kubur. 7:4; 20:6.

2, 3. Paul wakwata chom cha usey cha mwom wa mwiur nich usey ik?

² Paul walonda, mutapu wadinga ukwatinay nich usey ukash chom chinech cha usey anch: “Yom yiney yadingap nchik kwisak kudi am, nayisheshil kal mulong wa Kristu. Chakin, nikat kuchind yom yawonsu anch yamwamu, mulong wa kumwijik Yesu Kristu Nsalejam kwapandikan yawonsu kuwap. Nasheshil kal yom yawonsu mulong wendendiy, nikat kuyichind mudi chom chamwamu.” (Filip. 3:7, 8) Yom yivud yimenau antu anch yidi ya usey yidi—mwaz, dipit, mudimu wa nfalang, ntumb—Paul wayimana kwikal ya chamwamu pilejay uyakin piur pa rutong ra Yehova mulong wa antu.

³ Kudiosh kamu pinipa, chom chadinga cha usey ujim kudiay Paul chadinga ronganyin ra usey ra Yehova ni Kristu, Yesu walonda piur pa ronganyin riner mu malembil mamulembilay Nzamb anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.” (Yoh. 17:3) Impu ya Paul ya kutambul mwom wa chikupu yimeken patok mu mazu mend mafundinau mu Filip. 3:14, MM anch: “Chawiy chiniyidila mau salal djat ni kwisudiel chakwel nitambul chom cha usey chikupanay Nzamb, kwawiy kamu kutazuk kwa Nzamb mu Kristu Yesu kwa kutambul mwom wa mwiur.” Mwaning mes mend madinga matadil pa chom cha usey chawiy mwom wa chikupu ukezay kutambul mwiur mudi chid cha Want wa Nzamb.

Kushakam Chikupu pa Divu

4, 5. Chom ik cha usey chiyichingedina mamiliyon ma antu asadila rusot ra Nzamb ilel unou?

⁴ Mulong wa antu avud atondina kusal rusot ra Nzamb, chom cha usey chikezau kutambul chidi mwom wa chikupu mu mangand masu ma antu a Nzamb. (Kus. 37:11, 29) Yesu walonda anch riner ridi ruchingej rakin. Ndiy walonda anch: “Ayuk kwau itudishila, mulong awiy akez kuswan ngand.” (Mat. 5:5) Yesu amwinend udi wa kusambish kuswan divu dietu, mudi mulondilau mu Kuseng 2:8, ni ukez kwikal ni antu 144 000 akeza kuyikel pamwing nend mwiur. (Dan. 7:13, 14, 22, 27) Antu adia mudi amikoku akeza chakin kamu kushakam pa divu akez ‘kuswan’ mangand ma Want ‘wayirijekinau kal kudiokal kwisambishil kwa mangand.’ (Mat. 25:34, 46) Ni tukwet chizu anch yom yiney yawonsu yikez kusadik mulong Nzamb, washilamu, udi “wakad kutwish kudimban.” (Titus 1:2) Tukutwish niyetu twikal nich ruchingej ra chilik chimwing mu yakushilamu ya Nzamb mudi radingay nich Yoshua pa chisu chayilejay in Isarel anch: “Kushilamu kwawonsu kuwamp kwashilayimu [Yehova, NW] Nzamb wen mulong wenen, kwikil chom ap kusu chimwing chaburena kuwanyin. Yawonsu yasadika mulong wenen. Kwikil chom ap chimwing chaburena, bwat.”—Yosh. 23:14.

⁵ Mwom mu mangand masu ma Nzamb ukezap kwikal mudi mwom wa katat wakad kulet musangar. Ukez kwikal ushalijadina kulemp kamu: wakad njit, kujipijan, uzwendj, kuburen kutentam, mayej, ni rufu. Pa chisu chinicha antu akez kwikal nich ukash wa mujimbu uwanyidina ni akez kushakam pa divu diakarumwinau kal dikala paradis. Mwom winou ukez kwikal usangareshina kupandakanamu mutapu tukata kuutongin. Chawiy lel, dichuku ni dichuku dikez kwikal dia musangar nakash. Chom cha usey chisangareshina mudi ik!

6, 7. (a) Ov, mutapu ik wamekeshay Yesu chom chitufanyidina kuchingejin chikeza kusadik mu mangand masu ma Nzamb? (b) Mutapu ik ukezau kuyinkish afu nsambishil yisu?

⁶ Padingay Yesu pa divu, spiritu utumbila wa Nzamb wamwinkisha usu chakwel amekesha yom yamushena yikeza kusadik pa divu diawonsu mu mangand masu. Chilakej, Yesu wamuleja ikundj umwing wadinga wakad kwendang mivu 38 anch tumbuk wenda. Bibil ulondil anch ikundj winou wasala mwamu. (Tang Yohan 5:5-9.) Dichuku dikwau, Yesu wamutana “muntu mputames wa kuvadik nich” ni wamwoka. Kupwa, muntu mputames winou amwipula anch, Nany wamwoka, niyend wakula anch: “Kudiok pimasambisha mangand kand kal kwovakanap, anch kudi umwing waburila kal mes ma muntu wavadika mputames. Anch mwin muntu ou kadiokalip kudi Nzamb ing kakutwiship kusal chom.” (Yoh. 9:1, 6, 7, 32, 33) Yesu watwisha kusal yom yiney yawonsu mulong Nzamb wamwinkisha usu. Kwawonsu kwadingay ni kuya, anch “kudi in kuswiriken kuyok, wayoka.”—Luka 9:11.

⁷ Chidiap kusu anch Yesu wadinga nich usu wa kwokan mayej ni ubid pakwez wadinga kand nich usu wa kuyisangul afu. Mudi chilakej, changadim wa mivu 12 wafa, chayiletina anvaj end ushon ujim. Pakwez Yesu walonda anch: “Mwan mband, nakwel anch lanka.” Ni walanka! Ov, ukutwish watongin chasalau anvaj ni antu akwau adingap? (Tang Marko 5:38-42.) Mu mangand ma Nzamb, kukez kwikal “musangar ujim” pakezau kusanguk mabiliyon ma antu, mulong “kukez kikal disanguk ni kudi ayingila ni kudi afila nich.” (Mid. 24:15; Yoh. 5:28, 29) Antu inay akez kuyinkish nsambishil yisu mu mwom nich ruchingej ra kushakam kudiosh kamu pinipa, ni chikupu ni chikupu.

8, 9. (a) Mu Winyikel wa Mivu Kanan wa Kristu, chikez kwikal nchik piur pa chitil chitwaswana kudiay Adam? (b) Afu akez kuyirumburishin pa dishin dia chom ik?

⁸ Antu akezau kusangul akez kuyinkish mutapu wa kutambul mwom. Antu akeza kusanguk kakezap kuyifish nich mulong wa yitil yasalau kurutu kwa kufa. (Rome 6:7) Mu Winyikel wa Mivu Kanan wa Kristu, antu akeza kwisakin chakupesh cha difut, antu aziyidila Want akez kuya djat ni ku kuwanyin, chakin kamu akez kushiken ku want ipau kudiokal ku yibudikin yawonsu ya chitil cha Adam. (Rome 8:21) Yehova “ukez kadiosh rufu chikupu, Nsalejetu [Yehova, NW] ukez kakuswol mansoj ku mes ma antu awonsu.” (Isay 25:8) Dizu dia Nzamb dilondil kand anch: “mikand yading ya kuburil,” chilejen anch antu akeza kwikalaku pa chisu chinicha akez kuyilej yom yisu. (Kubur. 20:12) Mudi mukarumwinau divu dikala paradis, “chad awiy akez kilej dirumburish ditentamina.”—Isay 26:9.

⁹ Antu akezau kusangul akez kuyirumburish, kichidiap kulondwish chitil chaswanau kudiay Adam, pakwez chikez kwikal kulondwish chikezau ayinau kutond kusal. Kuburik 20:12 ulondil anch: “Afu [ayirumburisha, NW] mu yom yading yifundilaumu mu mukand, mudi mwadinga midimu yau,” charumburik anch, yisal yau yikezau kusal kupwa kwa kuyisangul. Kutentam, riy ni rukat ramushena mudi ik ra Yehova! Chikwau, yom yayimesha mar mu mwom wau wa pasak mu mangand manam makur “akez kayivuramen.” (Isay 65:17) Nich jinsangu jisu jikeza kwikalaku ni mwom ukeza kwizulijan nich yom yiwamp, kakezap kand kunenganan mulong wa yom yiyimp yamanau pasak. Yom yiney yamanau pasak akez kayivuramen. (Kubur. 21:4) Chawiy chimwing kand chikeza kwikal ku mutambu wa “chisak chipandiken kujimb,” chikeza kupand ku Armagedon.—Kubur. 7:9, 10, 14.

10. (a) Mutapu ik ukeza kwikal mwom mu mangand masu ma Nzamb? (b) Chom ik ukutwisha kusal chakwel chikukwasha kutal mes pa chom cha usey?

¹⁰ Mu mangand mazu ma Nzamb, antu akez kutwish kushakam pakad kuyel ap kufa. “Kwikil muntu ap kusu umwing ushicha mwi ngand yetu ukeza kinan kand mulong wa kuyel.” (Isay 33:24) Chakin kamu, antu akeza kuswan divu disu akez kulankang pa dichuku ni dichuku nich mijimbu ya ngu, nich kuchingejin dichuku dikwau dia musangar. Akez kuswiriken mudimu usangareshina ni kwinung pamwing ni antu akwau ayisotidina ching yom yiwamp. Chakin kamu mwom mudi winou udi chom cha usey! Mudi chiyul, ov, mulong wak ulikina kuburil Bibil wey chakwel utanga uprofet winou mu Isay 33:24 ni 35:5-7? Tongin bil mudi anch udiamu kal. Kusal mwamu kukez kukukwash utala mes pa chom cha usey.

Antu Avuramena Chom cha Usey

11. Shimunin mutapu wadinga want wa Salomon uwamp kwinsambishil.

¹¹ Pitwileja piur pa chom cha usey, tufanyidin tusala usu ukash chakwel tutadisha mes metu pa chom cha usey chamwamu tukutwish twachivuramen. Chilakej, pikalay Salomon mwant mu Isarel wa pasak, ndiy wamulembila Nzamb nich kwikepish chakwel amwinkisha kutesh ni manangu chakwel atwisha kuyirumburish nawamp antu End. (Tang 1 Ant 3:6-12, NW.) Mudi chibudikin, Bibil ulondil anch, “Nzamb wadandamena kumwinkish Salomon manangu ni kutesh mu chilik chijim.” Chakin kamu, “Manangu ma Salomon madinga mavud kupandakanamu manangu ma in Kwingangel awonsu ni kupandakanamu manangu mawonsu ma mu Idjibit.”—1 Ant 4:29-32, NW.

12. Dibabesh ik diayinkishau antu adinga afanyidina kwikal ant mu Isarel kudiay Yehova?

¹² Pakwez, kwisambishil Yehova walonda anch muntu win mwawonsu ukwikala mwant “kangal wez wikal nich atubar end avud” ni anch “kangal wez wavudish amband end, chamwamu muchim wend ukez kurumbuk.” (Kuv. 17:14-17) Kuvudish atubar kukez kumekesh anch mwant wengamidin pa usu wa amasalay end chakwel alama muchid pa ndond pa kukungamen padiay Yehova, Rikibu rau. Ni kuvudish amband kukez kwikal chak mulong amband amwing akutwish ikal a ku michid ya apagan adinga mu difukwil dia makasu, ni amband inay akutwish amushikij mwant ku kudiokal ku difukwil diakin dia Yehova.

13. Ov, mutapu ik washikenay Salomon ku kuvuramen chom chamwinkishau?

¹³ Salomon kateshap dibabesh dined. Pakwez, ndiy wasala yom yin kamu yadinga yijidikinay Yehova anch ant kafanyidinap ayisal. Ndiy wivudishina tunan twa atubar ni in kuyikandam. (1 Ant 4:26, NW) Wikala kand ni amband 700 ni amband a kuns 300, avud au adiokala ku michid ya apagan yadinga yiyombilamu. Amband inay ‘aukarumuna muchim wend ni wayilondula anzamb akwau; ni kikalap kand nich muchim umwing kudiay Yehova.’ Salomon wandama mu difukwil dijondila dia michid ya apagan diezau nich amband end a ku michid yikwau. Mudi chibudikin, Yehova walonda anch ndiy ukez ‘kumutambul Salomon want.’—1 Ant 11:1-6, 11, NW.

14. Chibudikin ik chikalaku ku wintombuj wa Salomon ni muchid wa Isarel?

¹⁴ Salomon kasambishap kand kutal mes pa chisend cha usey chadingay nich cha kwikal ntimesh wa Nzamb wakin. Mwant wandama mutu ni mend mu difukwil dia makasu. Kurutu, muchid wawonsu wapumbukina mu difukwil dia makasu, chawiy chaleta disheshik dia mu muvu wa 607 K.C.C. Ap anch in Yuda achirisha kand difukwil diakin, pa kusut kwa yitot ya mivu Yesu washikena ku kulond anch: “Want wa Nzamb akez kaudiosh kudi en, akez kaupan kudi muchid ukata kusong mabuj mau.” Chawiy chom chasadika. Yesu walonda anch: “Talany bil, chikumbu chen chikushal chamwamu.” (Mat. 21:43; 23:37, 38) Mudi chibudikin cha kuburen kushinshaman kwau, muchid washadisha dilau diawitapila dia kwikal ntimesh wa Nzamb wakin. Mu muvu wa 70 C.C., amasalay a in Rome amushesha Yerusalem pamwing ni tempel, ni Ayuda avud ashalaku ikala aswik.

15. Let yilakej ya amakundj alika kutal mes mau pa yom ya usey ujim.

¹⁵ Yudas Isakariot wadinga umwing wa atwimbuy 12 a Yesu. Yudas watesha malejan mapandakena kuwap ma Yesu ni wimena amwinend yilay yasalay Yesu nich ukwash wa usu wa spiritu utumbila wa Nzamb. Pakwez, Yudas kaulamap muchim wend. Amwinkisha kulam chipau cha nfalang ja Yesu ni atwimbuy 12. Pakwez “ndiy wading mwij. Ndiy wading mwin kusend ntuk yanfalang, chad wading ni kunonamu.” (Yoh. 12:6, MM) Ris rend rapandakana nakash djat ni mu chilik cha kumupungan Yesu pamwing nau in kupesh in rubabek mulong wa nfalang ja argent 30. (Mat. 26:14-16) Demas niyend washadisha kuman kuwamp, wadinga mbay a mudimu wa kambuy Paul. Demas kaulamap muchim wend. Paul walonda anch: “Demas wanlikil kal, wakatil [kal] mangand minam mamekena ku mes.”—2 Tim. 4:10; tang Jinswir 4:23.

Malejan Kudi Etu

16, 17. (a) Rupompat rikata kuturishish rikwet usu ik? (b) Chom ik chikutwisha kutukwash tujijamena chom chin chawonsu chikutuletinay Satan?

¹⁶ Atushalapol awonsu a Nzamb afanyidin alama mu michim yau yilakej yidia mu Bibil, mulong atulejin anch: “Katat yom yiney yamekana kudi awiy mudi chijingidij; ayifundila mulong wa kutubabesh nich etu, katat kwisudiel kwa yirungu yawonsu kwez kal.” (1 Kor. 10:11) Ilel, tushich mu machuku ma kwisudiel ma ditenchik dined diyimp dia yom.—2 Tim. 3:1, 13.

¹⁷ Satan Djabul, nzamb “wa mangand minam,” wij anch “kwamushal kal chisu chikemp kusu.” (2 Kor. 4:4; Kubur. 12:12) Ukutwish wasal yawonsu yikutwishay mulong wa kuyishikij atushalapol a Yehova chakwel ashesha kushinshaman kwau kwa Ukristu. Satan uyikedil mangand manam, pamwing nich jinjil jend ja kupalangeshin jinsangu. Pakwez, antu a Yehova akwet chom chimwing cha usu nakash—“usu . . . ou udiokil kudi Nzamb.” (2 Kor. 4:7) Tukutwish twakungamen pa usu winou udiokila kudiay Nzamb chakwel utukwasha kujijamen chom chin chawonsu chikutwishay Satan kutuletin. Chawiy lel, atukasikeshin tulembilang chisu chawonsu, nich kuchingejin anch Yehova ukez ‘kupan spiritu utumbila kudi awiy akata kumwit.’—Luka 11:13.

18. Manangu ik tufanyidina kwikal nich pantaliken ni mangand ma katat?

¹⁸ Tukwet kand usu pa kwijik anch ditenchik diawonsu dia Satan dikusheshik piswimpap kamu pakwez in Kristu akin akez kupand. “Ngand yasut kal, ni maku mau mawonsu; pakwez wawonsu ukusadila rukat ra Nzamb ushich chikupu.” (1 Yoh. 2:17) Pa chinech, chikwikal cha usup mudi ik kudi umwing wa atushalapol a Nzamb, atonga anch kudi chom kanang mu ditenchik dined dia yom dia katat chikutwisha kwikal cha usey wa chikupu chipandakenamu urund wend ni Yehova! Mangand manam mayikedilay Satan madi mudi waat ujiyina. Yehova watenchikin kal yikumangen ya Ukristu mudi “kawaat ka kuchin nich” mulong wa atushalapol end ashinshamena. Mudi muyilau kushejin ku mangand masu, akutwish achingejin kushilamu kunoku: “In kusal nayimp akez kayikatul gwa, pakwez akata kumuchingel [Yehova, NW] akez kaswan ngand.” (Kus. 37:9) Chawiy lel, talany mes men pa chom chinech cha usey nakash!

Ov, Uchivurikin?

• Mutapu ik wiyovay Paul pa mulong wa chom cha usey chamutekinau?

• Antu akeza kushakam chikupu pa divu akez kuyirumburishin pa chom ik?

• Wisu mwikadil wa manangu kudi ey ilel unou?

[Chipich chidia pa paj wa 12, 13]

Ov, wimen amwiney anch utambwil chom chinech cha usey piutangina jinsangu jidia mu Bibil?