“Babalany”

“Disudiel dia yom yawonsu didi piswimp. . . . Babalany, chakwel ukutwishany kulembil.”—1 PITA 4:7, MM.

1. Wisu wadinga mutu wa mulong wa malejan ma Yesu?

PADINGAY Yesu Kristu panap pansh, Want wa Nzamb wawiy wadinga mutu wa mulong wa malejan mend. Kusutil ku Want winou, Yehova ukez kulondil ukaleng wend wa mangand ni kutumbish dijin diend. Chawiy lel, Yesu wayileja in kwilej end chakwel alembilang anch: “Want wey weza. Rukat rey arusala pansh mudi mwiur.” (Mat. 4:17; 6:9, 10) Want winou ukupwish piswimpap kamu mangand ma Satan ni kupwa ukwimanyin chakwel rukat ra Nzamb risadika pansh. Mudi mwasambelay Daniel kulond, Want wa Nzamb “ukez kushesh mant makwau mawonsu, chad wawiy ukez kushakam chikupu.”—Dan. 2:44.

2. (a) Ov, mutapu ik ukwijikau in kwilej a Yesu anch ndiy udiaku mu uyaj wa Want? (b) Chijingidij chikumekesh chom ik chikwau?

² Kwez kwa Want wa Nzamb kwadinga kwa usey ujim kudi in kwilej a Yesu, chawiy chamwelau anch: “Chijingidij ik cha kwez kwey? Ni cha kwisudiel kwa mangand?” (Mat. 24:3) Kukwikal chijingidij chikumekana ku mes mulong kwikalaku kwa Kristu mu uyaj wa Want wend kukezap kumekan kudi antu akwikala pansh. Chijingidij chinech chikez kwikal nich yom kushalijan mudi mwasambelau kuchilond mu Mifund. Chawiy lel, in kwilej a Yesu akwikala aom pa chisu chinech akutwish kujingunin anch ndiy wasambishin kal kuyikel mwiur. Chikez kwijikish kand nsambishil ya chirung cha chisu chijimbwilau mu Bibil anch “machuku ma kwisudiel” ma ditenchik dia yom yiyimp diyikedila katat pansh.—2 Tim. 3:1-5, 13; Mat. 24:7-14.

Babalany mu Machuku ma Kwisudiel

3. In Kristu afanyidin kubabal mulong wak?

³ Kambuy Pita wafunda anch: “Disudiel dia yom yawonsu didi piswimp, chawiy ilamany ayinen, babalany, chakwel ukutwishany kulembil.” (1 Pita 4:7, MM) In kwilej a Yesu aswiridina kwikal ababela, kucha ku mes mulong wa kutal yishiken ya mangand yilejena anch Yesu udiaku mu uyaj wa Want. Ni kubabal kwau ku kuyishikij kusal yom swa-swa mulong disudiel dia ditenchik dia yom dia katat didi piswimp. Yesu wayileja in kwilej end anch: “Lamany, mulong en kiwijanyip pa muten ukwezay mwant wa chikumbu [mulong wa kurumburish mangand ma Satan].”—Marko 13:35, 36.

4. Lejan kushalijan kudia pakach pa mutapu wa kuman wa antu adia mu mangand ma Satan ni kuman kwa atushalapol a Yehova. (Tal kamushet.)

⁴ Antu avud adi mwishin mwa winyikel wa Satan, ni kalaminap kwau mulong wa kutesh kurumburik kwa yishiken ya mangand. Kamenap kwau kwikalaku kwa Kristu mu uyaj wa Want. Pakwez in kwilej akin a Kristu ababel ni ajingunin uyakin wa yom yasadikina mu chitot cha mivu yasutila ey. Kudiosh mu muvu wa 1925, Atuman a Yehova ijika anch Njit ja Mangand ja 1 ni yishiken yalondulaku yidi uman wakin ulejena anch kwikalaku kwa Kristu mu uyaj wa Want wa mwiur kwasambisha mu muvu wa 1914. Chawiy, machuku ma kwisudiel ma ditenchik diyimp dia yom didia mu winyikel wa Satan masambisha. Antu avud atadila muyisadikina yom, ap anch kijap kwau chiyirumburikina, amen kushalijan kujim kudiap pa machuku ma kurutu kwa Njit ja Mangand ja 1 ni machuku ma kupwa kwa njit.—Tal kamushet “Chirung cha Kanrumbangesh Chasambisha.”

5. Ov, mulong wak chidi cha usey anch tudandamena kubabal?

⁵ Katat pasut kal mivu piswimp chitot, yishiken yikash yisadikina mu mangand yidi uman ulejena anch tushich mu machuku ma kwisudiel. Kwashal kal kachisu kakemp nakash chakwel Yehova amwinkisha Kristu mbil ya kuya pamwing ni amasalay angel akash mulong wa kumataliken mangand ma Satan. (Kubur. 19:11-21) Chawiy chiyilejinau in Kristu akin anch alama. Chawiy, tudandamena kusal mwamu swa-swa mulong tuchingedin nsudiel nich impu yikash. (Mat. 24:42) Tufanyidin kushal achila ku mes, ni mwishin mwa umutakel wa Kristu, tufanyidin kuwanyish mudimu kanang pa mangand mawonsu.

Mudimu wa pa Mangand Mawonsu

6, 7. Mutapu ik uyila kurutu mudimu wa kulejan mu machuku ma kwisudiel?

⁶ Mudimu usadilau atushalapol a Yehova asambela kuwisambin mudi chikunku cha chijingidij chikumekesha anch tushich mu machuku ma kwisudiel ma ditenchik dia yom yiyimp dia katat. Yesu wawisambina mudimu winou ukusadika pa mangand mawonsu pa chisu chajimbulay yom kushalijan yikeza kusadik pa chisu cha kwisudiel. Mu uprofet wend winou mwadinga mazu manam ma usey nakash: “Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.”—Mat. 24:14, MM.

⁷ Tongin bil pa yom yikwau yisambidinau mu uprofet winou wa Yesu. Uvud wa antu alejena rusangu ruwamp wadinga ukemp nakash pa chisu chasambisha machuku ma kwisudiel mu muvu wa 1914. Pakwez katat uvud winou wikadil kal ujim nakash. Kudi piswimp Atuman a Yehova 7 000 000 ni kusut alejena mu mangand mawonsu, ayikumangejin mu yikumangen 100 000 ni kusut. Kudi kand piswimp antu 10 000 000 akumangena pamwing ni Atuman a Yehova mu muvu wa 2008 ku Chivurikish cha rufu ra Kristu. Kwinoku kwadi kwiwejin kwa antu avud kupandakanamu muvu wadiap ou.

8. Ov, mulong wak rupompat ritwishinap kukangesh mudimu wetu wa kulejan kuya kurutu?

⁸ Uman ujim mudi ik piur pa Want wa Nzamb ulejenau mu michid yawonsu kurutu kwa disudiel dia ditenchik dined dieza! Chikalap nchik mutapu udiay Satan ‘nzamb wa mangand minam.’ (2 Kor. 4:4) Yid yawonsu ya chipolitik, ya relijon ni ya wingend-a-mushing ya mangand minam pamwing ni yisaj yau ya kupalangeshin jinsangu, Satan ndiy uyiyikedila. Ov, mulong wak lel mudimu wa kulejan upandaken mwamu? Chidi mulong Yehova amwinend uusadishina. Chawiy lel, mudimu wa kulejan Want uyil kurutu mu mutapu umwing wamushena chikalap nchik yawonsu yisadilay Satan mulong wa kuujidik.

9. Ov, mulong wak mazang metu ma muspiritu madi chilay?

⁹ Kupandakan kwa mudimu wa kulejan Want ni kwiwejinaku kwa uvud wa antu ni kuzangam muspiritu kwa antu a Yehova chitwishikin kukwisambin anch chidi chilay. Pakad ukwash wa Nzamb, mudi umutakel wend ni kuyilam antwend, ing mudimu wa kulejan kiusadikinap. (Tang Mateu 19:26.) Tukutwish twikal nich kashinsh anch mwiku utumbila wa Nzamb usadil mu michim ya antu ababela asotina ayinau kusal, mudimu winou wa kulejan ukez kusadik djat ni kuupwish kamu, “chad lel disudiel dia mangand dieza.” Chisu chinech chezin swa-swa.

“Mar Makash”

10. Mutapu ik warumburilay Yesu mar makash mezina?

¹⁰ Disudiel dia ditenchik dined diyimp dikez kwez mu chitazukinau anch: “Mar makash.” (Kubur. 7:14) Bibil katulejinap anch mar makash minam makez kusal machuku minch, pakwez Yesu walond anch: “Kukez kikal mar mapandakena, mar madia mwamu kand kal mamekanangip kudiokal pa kusambish kwa mangand ni katat ou, bwat, ap kurutu kukwikalip kand mar mwamu.” (Mat. 24:21) Anch twashinshikin mar mamena mangand manam, mudi Njit ja Mangand ja 2 jilondilingau anch jajipa antu piswimp mamiliyon 50 ap 60, mar makash mezinaku am makez kwikal chakin kamu makash chipandakena. Makez kupandakan kwikal makash djat ni kwi njit ja Armagedon. Pa chisu chinech chawiy chikezay Yehova kuyilikish amasalay end chakwel ashesha shitit yishadilaku yawonsu ya ditenchik dia pa mangand dia Satan.—Kubur. 16:14, 16.

11, 12. Chishiken ik chikeza kwikal nsambishil ya mar makash?

¹¹ Uprofet wa Bibil kiutulejinap dichuku dia ngond dikeza kusambish chikunku cha kusambish cha mar makash minam, pakwez utulejin chishiken chamushena chikeza kusadik chikwikal mudi nsambishil. Anyikel a chipolitik akez kushesh relijon mwawonsu wa makasu. Mu uprofet udia mu Bibil mu Kuburik shapitre wa 17 ni wa 18, relijon wa makasu amufanikeshin ni mband mwin kusotan usadila masandj ni ditenchik dia chipolitik dia pa mangand mawonsu. Kuburik 17:16 ulejen anch chisu chikez kwez pakezau anyikel inay a chipolitik “akez kamukis mband wa kusotan, akez kamwikadish tany ni kanzikis, akez kamudia mbij ni kumwosh ni kasu.”

¹² Chisu chikeza kuwanyin cha yom yiney, Nzamb ukez kutek “mu michim yau [anyikel a chipolitik] kusal rusot rend” ra kushesh marelijon mawonsu ma makasu. (Kubur. 17:17) Chawiy chitwishikina kulond anch kusheshik kwinoku kudiokil kudi Nzamb. Didi dirumburish diend pantaliken nich relijon ukweta rubabek wadinga mu kusut kwa mivu yivud kulejan malejan madia chinyim nich rusot ra Nzamb ni madinga ni kuyimesh atushalapol end mar. Antu avud adia mu mangand kijap kwau anch kurutu oku akumushesh relijon wa makasu. Pakwez mwamu mwijau atushalapol ashinshamena a Yehova. Ni mu machuku ma kwisudiel minam mawonsu, ayilejining antu chom chinech.

13. Ov, chom ik chimekeshina anch disudiel dia relijon wa makasu dikez kusadik mu kachisu kakemp nakash?

¹³ Chikez kwikal chisal chikash kudi antu pa kuman chikusheshikay relijon wa makasu. Uprofet wa Bibil ulejen anch: “Ant a pansh” akez kulond piur pa kusheshik kwinoku anch: “Riyind, riyind, . . . chisu chimwing kusu ni kwez kurumburish kwey.” (Kubur. 18:9, 10, 16, 19) Kulond kwa Bibil anch “chisu chimwing” kumekeshin anch chishiken chinech chikez kusadik mu kachisu kakemp nakash.

14. Chisu chikezau akankuny a Yehova kuyirishish atushalapol a Yehova, ov, chom ik chikezay Nzamb kusal?

¹⁴ Tuteshin anch kachisu kakemp kupwa kwa kumushesh relijon wa makasu, kukez kwikal kuyirishish atushalapol a Yehova, akata kulejanang uruu wa dirumburish diend. (Ezek. 38:14-16) Chisu chikeza kusambish kuyirishish kwinoku, in kuyirishish akez kura ni Yehova, ushidilamu kuyilam antwend ashinshamena. Yehova ulondil anch: “Mulong wa mukau ni ujim am nalonda anch. . . . Chad awiy akez kwijik anch am yam [Yehova, NW].” (Tang Ezekiel 38:18-23.) Nzamb ulondil mu dizu diend anch: “Ukukupukunanyaku en [atushalapol end ashinshamena] upukwin ku kan a dis kam.” (Zak. 2:8, NW) Chawiy lel, chisu chikezau akankuny nend kusambish kuyirishish atushalapol end mu mangand mawonsu, Yehova ukez kusal cha kusal. Ukez kusal chisal, chikez kushikij kwinsudiel ya mar makash—Armagedon. Mwin mwa winyikel wa Kristu, amasalay akash a angel akez kulet dirumburish dia Yehova pa mangand ma Satan.

Usu Kukweta Padi Etu

15. Kwijik anch disudiel dia ditenchik dined didi piswimp kukwet usu ik padi etu?

¹⁵ Ov, kwijik anch disudiel dia mangand minam mayimp diezin swa-swa kukwet usu ik padi etu? Kambuy Pita wafunda anch: “Talany mudi yom yiney yawonsu yikujiy, en ufanyidinany kushakam mu yom yiwamp ni yom yawonsu yitumbila!” (2 Pita 3:11) Mazu minam makasikeshidin maswir ma kudandamen kucha ku mes chakwel tushinshikina mashakamin metu kukwatijan nich yom yitinay Nzamb ni anch mu mwom yetu tufanyidin kusal yom yitumbila, yimekeshina anch tumukatin Yehova. Mu yisal yiney mudi usu wetu wawonsu tukusala mulong wa kulejan rusangu ruwamp ra Want kurutu disudiel dieza. Pita wafunda kand anch: “Disudiel dia yom yawonsu didi piswimp. . . . Babalany, chakwel ukutwishany kulembil.” (1 Pita 4:7, MM) Tukat kumushejin Yehova ni kumumekeshin rukat retu kusutil kumulembil chisu ni chisu, kumwitang chakwel atutakela kusutil ku mwiku wend utumbila ni kusutil ku chikumangen chend cha pa mangand mawonsu.

16. Ov, mulong wak tuswiridina kulam ba ku chiyul cha Dizu dia Nzamb?

¹⁶ Mu yisu yiney yikash, tuswiridin tulamata nakash ku chiyul cha Dizu dia Nzamb chilondila anch: “Babalany mudi muukata kwendangany kangal wendany mudi antu akad kubabal, pakwez ching ababela; lamany chisu cha muten, mulong machuku mayimp madi kwaku.” (Efes 5:15, 16) Tuyimp tuvulijadin ilel kupandakanamu muchadinga pasak mu rusangu rawonsu ra muntu. Satan watenchikin kal yom yivud kushalijan mulong wa kuyikangesh antu kangal asala rusot ra Yehova ap mulong kusu wa kuyipumbwil kulemp. Chitudia atushalapol a Nzamb, twij nawamp chom chinech, ni kitusotilap tulikina chom ap chisu chishesha kushinshaman kwetu kudi Nzamb. Twij kand chom chikusadika piswimpap kamu, ni tumuchingejidin Yehova ni yakushilamu yend.—Tang 1 Yohan 2:15-17.

17. Rumburil chikezau kusal antu akeza kupand ku Armagedon pakeza kusambish disanguk.

¹⁷ Yakushilamu yamushena ya Nzamb ya kusangul afu yikez kuwanyin, mulong “kukez kikal disanguk ni kudi ayingila ni kudi afila nich.” (Mid. 24:15) Shinshikin chidia kushilamu kwinoku kukash: “Kukez kikal disanguk”! Kwikil kwidjidjek piur pa mulong winou, mulong Yehova amwinend walondamu kal! Isay 26:19 ushidilamu anch: “Afu etu akez kapand kand! . . . Antu awonsu alela mu jinzay akez kalank ni kuwang miminy ya musangar. Mudi maum chimakata kutalesh divu, mwamu kand mukez kapizurishay [Yehova, NW] antu afa kal pakur.” Mazu minam mawanyina kapamp ka kusambish chisu chachirikau antu a pasak a Nzamb mwingand yau, matwinkishin kashinsh anch makuwanyin kurutu oku mu mutapu umekena ku mes mu mangand masu. Kukez kwikal musangar ujim mudi ik pakezau kutanijan antu aom ni akatish nau akezau kusangul! Inge, disudiel dia mangand ma Satan didi piswimp, ni mangand masu ma Nzamb madi piswimp. Chidi cha usey mudi ik anch tubabala!

[Kamushet/​Chipich chidia pa paj wa 16, 17]

Chirung Cha Kanrumbangesh Chasambisha

The Age of Turbulence: Adventures in a New World udi mutu wa mulong wa mukand wapalangeshau mu 2007 wafunday Alan Greenspan. Mu chirung cha mivu 20, ndiy wadinga ntakel wa ditenchik dia United States Federal Reserve Board, dikata kutal ditenchik diawonsu dia muchid dia kulamin yom dia pakach. Greenspan ukasikeshidin kushalijan kujim kwa mwikadil wa mangand mudi muwadinga kurutu kwa muvu wa 1914 ni kwa mivu yalondwilap:

“Ku jinsangu jawonsu jalondau antu adingaku kurutu kwa muvu wa 1914 jimekeshin anch antu adinga ni kuyilimish akwau ni kutwal kurutu mashakamin ma antu. Chitot cha dikum ni chidivu cha mivu chapwisha kwisak kwa kuyiland ni kuyisadil antu mu uswik. Chisum cha kumupwish muntu usey chamekana anch chipwil. . . . Winchij wa pa mangand mawonsu wayil kurutu mu chitot cha dikum ni chidivu cha mivu chawonsu, kwikal jinjil ja ndjandj, telefon, kasu ka nzembu, sinema, motak, ni yikumbu yiwamp-yiwamp ni yom yikwau yivud. Umwingang, kuwejinaku yakudia, kwangan mem mawamp ma kuna kwaletin kal ruchingej ra kuwejinaku mwom . . . Mu mangand mawonsu antu iyova anch yom yiney yiyil kamu kurutu.”

Pakwez . . . “Njit ja Mangand ja 1 jashesha yom ni mashakamin nakash kupandakanamu kusheshik kwasadika mwi Njit ja Mangand ja 2: njit ja kusambish jashesha chitong. Nikutwishap najimangesh chitong cha antu adingaku ku mivu ya kurutu kwa Njit ja Mangand ja 1, pa chisu chamekana anch antu ayil kurutu nakash. Nlel tumen yom mu mutapu ushalijadina nakash kupandakanamu muchadinga mu mivu chitot yasutina kal ey pakwez nich kuman pakemp mudi muyidia chakin kamu. Ov, chisum, chirungul cha divu, kuvulijan kwa atuzwendj kusadil anch chirung cha katat cha mwom usotila kusal mangand mikala chom chimwing chom chasala Njit ja Mangand ja 1 kudi antu adingaku? Kwikil muntu wija chakul.”

Greenspan wavurika padingay nsand a shikol, dizu diadingay ni kulond Benjamin M. Anderson Mulej wa Ekonomi (1886-1949) anch: “Antu apamina kal akutwisha kuvurik ni kwov kurumburik kwa mutapu wadinga mwom kurutu kwa Njit ja Mangand ja 1, akat kwinan anch auvurik chiwadinga. Kwadinga chakin kamu kushakam zoong kwakad kwikalaku ni ilel unou.”—Economics and the Public Welfare.

Chawiy chitongijok chimwing chidia mu buku A World Undone, wafunday G. J. Meyer, wabudishay mu muvu wa 2006. Tutanginamu anch: “Yishiken ya mu rusangu ra muntu ayilondining anch ‘yikat kuswimp yom yawonsu.’ Pa mulong wa Njit Jijim [1914-1918] chom chinech mwamu chidia kand chakin. Chakin kamu njit jakarumuna yom yawonsu: yidiap ching kusu mipak ya ngand, kiyidiap kusu maguvernema ni kuwa kwa michid, ni mutapu wadingau antu ni kuman mangand ni kwiman ayinau niyawiy yaswimpa. Dikala mudi diwombu dia chisu, kushakam mu mangand kupwa kwa njit kusadil anch antu akanganya kwijik yom muyadinga kwinyim.”

[Chipich chidia pa paj wa 18]

Pa Armagedon Yehova ukez kuyilikishaku amasalay akash a angel