Mutapu Ukutwisha Kumutesh Bibil

1. Mwita Nzamb Ukwash

Ninfa, udinga mu Italie ulondil anch: “Kwadinga chisu chimwing chinakata kutang Bibil kurutu kwa kulal. Nadinga ni kusal mwamu mulong nadinga nij anch didi Dizu dia Nzamb, ni ap anch kinadingap ni kusanger kutang, nasota kwijik yom yafundishay Nzamb mu Bibil. Chawiy nakwata mupak wa kumutang mwawonsu. Kwinsambishil chadinga chinswapedil, kupwa nashika ku yikunku yimwing yinamana anch yikasikena nakash, ni chawiy nalika kumutang.”

OV, WAMANAP kal chom mudi chamushikena Ninfa? Mwamu chikata kuyishiken antu avud. Mwaning, mudi mutwamanang mu mutu wa mulong wasutang ou, Muntu Wafundisha Bibil, Yehova Nzamb, ukusotidin anch uditesha Dizu diend. Ov, mutapu ik lel ukutwisha kushiken ku chovu chinech? Chom cha kusambish chifanyidina kusal chidi kumwit Nzamb ukwash.

Atwimbuy a Yesu adinga ni kuyiman anch: “Antu amwamu akad kwilej” mulong kilejap ku mashikol ja in rabi mulong wa kuyifumb malejan ma chirelijon. (Midimu 4:13, Manswik Masu) Chikalap nchik mwamu, Yesu wayinkisha kashinsh anch akutwish kutesh Dizu dia Nzamb. Mutapu ik lel? Yesu walonda anch: “Mwongoj, ndiy kamu [spiritu utumbila], ukeza katuminay Tatuku mu dijin diam, ndiy ukez kakulejany yom yawonsu.” (Yohan 14:26) Nzamb wasadila spiritu wend utumbila, ap anch usu wa Nzamb wa kusal nich, patangay divu ni yitang yawonsu yikweta mwom yidia pa divu. (Disambishil 1:2) Wamusadila kand mulong wa kuyipepil antu 40 chakwel afunda yitongijok yend mu Bibil. (2 Pita 1:20, 21) Spiritu ndiy umwing ou udiaku chakwel ayikwasha antu asotina kumutesh Bibil.

Ov, mutapu ik ukutwisha kutambul spiritu utumbila wa Nzamb? Ufanyidin wita nich ritiy rikash. Chakin kamu, ufanyidin kwit pakad kulik. Yesu walonda anch: “Itany, akez kaninkishany . . . Anch en . . . wijany mwa kupan yom yiwamp kudi anen, ing lel Tatukwen wa mwiur kakupandikeshimup kupan [spiritu utumbila] kudi awiy akata kumwit?” (Luka 11:9, 13) Yehova uding tayad kuyinkish spiritu utumbila antu amwitininga chakin kamu. Usu winou wa kusal nich ukutwish wakukwash utesha chirumburikina mazu mapepilau madia mu Bibil pasutil kal tunan twa mivu. Spiritu wa Nzamb ukutwish kand kukwinkish manangu uswirikedina chakwel usadila uruu wa usu udia mu Bibil mu mwom wey.—Hebereu 4:12; Yakob 1:5, 6.

Chisu chin chawonsu ushicha chakwel utanga Bibil, chawiy, mulembila Nzamb, mwita spiritu utumbila chakwel akukwasha mutapu wa kutesh Dizu diend.