Ruchingej Ritwinkishinay Nzamb—Mwom Wa Chikupu Panap Pansh

“Yom yatangau [a]yiteka ku yom yamwamu . . . wayiteka mu ruchingej.”—ROME 8:20.

1, 2. (a) Ov, mulong wak ruchingej ra mwom wa chikupu panap pansh ridi ra usey ujim kudi etu? (b) Ov, mulong wak ukatau antu avud kwidjidjek pa mulong wa mwom wa chikupu panap pansh?

PAMWINGAP uvurikin musangar wova piwileja kapamp ka kusambish mu machuku ma kurutu madia piswimpap, antu kakezap kand kunanap ni kufa pakwez akez kushakam chikupu pansh. (Yoh. 17:3; Kubur. 21:3, 4) Pamwingap kand wova musangar wa kuyilej antu akwau ruchingej riner ridia mu Mifund. Tulonda anch, ruchingej ra mwom wa chikupu ridi chom chimwing cha usey nakash mu rusangu ruwamp ritulejena. Rikat kutenchik mutapu wetu wa kuman mwom wa kurutu.

² Mu yom yivud, marelijon ma Kristendom madiwil ruchingej ra mwom wa chikupu panap pansh. Ap anch Bibil ulejen anch mipim yifiling, pakwez maegliz mavud malejen malejan makad kwikal mu mifund anch muntu ukweting mupim wakad kufang ukata kupand ku rufu ni ukat kudandamen kushakam mwingand ya muspiritu. (Ezek. 18:20) Chawiy lel, antu avud akat kwidjidjek piur pa mwom wa chikupu panap pansh. Chawiy lel tufanyidin twiyipula anch: Ov, chakin kamu Bibil ukasikeshidin ruchingej riner? Anch mwawiy, chisu ik chayilejau antu kudi Nzamb piur pa ruchingej riner?

“[A]yiteka ku yom yamwamu . . . mu ruchingej”

3. Mutapu ik wamekana patok rutong ra Nzamb kudiosh kamu kwisambishil kwin kwa rusangu ra muntu?

³ Rutong ra Yehova mulong wa antu ramekena patok kudiosh kwisambishil kwin kamu kwa rusangu ra muntu. Nzamb walejana patok anch Adam wadinga ufanyidin kushakam chikupu anch waziyila. (Dis. 2:9, 17; 3:22) Pakad kwidjidjek, an a kusambish a Adam ileja mutapu washikenay muntu ku kuburen kuwanyin, kwamanau kusutil ku uman umekena ku mes. Njil ya kwandamin mu chir cha Eden ayijika, antu ananapa ni afa. (Dis. 3:23, 24) Mu kusut kwa chisu, uvud wa mivu ya muntu wasambisha kukep. Adam wasala mivu 930. Sem, muntu wapanda ku Mabeb wasala kusu mivu 600 ni mwanend Aripakishad wasala mivu 438. Tera, tatukwend a Abraham wasala mivu 205. Abraham wasala mivu 175, pakwez mwanend Isak wasala mivu 180 ni Yakob wasala mivu 147. (Dis. 5:5; 11:10-13, 32; 25:7; 35:28; 47:28) Antu avud akutwish ijik chirumburikina kukep kwa mivu kwinoku—chidi mulong anch ruchingej ra mwom wa chikupu rashadika! Ov, adinga nich diyingishin dia kuchingejin anch ruchingej ra mwom wa chikupu rikez kwikalaku kand?

4. Diyingish ik diadingau nich amakundj in ritiy a pasak ra kwitiyij anch Nzamb ukez kuchirish kand yiyukish yashadishay Adam?

⁴ Dizu dia Nzamb dilondil anch: ‘Antu atangau iteka ku yom yamwamu, pakwez mu rusot rendendiy wayiteka mu ruchingej.’ (Rome 8:20) Ruchingej ik? Uprofet win wa kusambish kamu udia mu Bibil wisambina piur pa “mbut” yikeza ‘kuuchany mutu wa nnak.’ (Tang Disambishil 3:1-5, 15.) Kudi antu ashinshamena, kushilamu kwa Mbut yiney kwadinga mufulandal wa ruchingej rakwel anch Nzamb kakutwishap walik rutong rend mulong wa antu. Rayinkisha amakundj mudi Abel ni Nowa diyingishin dia kwitiyij anch Nzamb ukez kuchirish kand yiyukish yashadishay Adam. Amakundj inay chimeken anch ijika anch ‘kusum ku kapolantundu kwa mbut’ kukez kusal anch mash michika.—Dis. 4:4; 8:20; Heb. 11:4.

5. Chom ik chimekeshina anch Abraham wadinga witiyijin disanguk?

⁵ Tushinshikinany rusangu ra Abraham. Pa chisu chamupakau, Abraham “chakwel amupesha Isak; . . . mwanend . . . kapokal kusu.” (Heb. 11:17) Ov, mulong wak wasotay kusal mwamu? (Tang Hebereu 11:19.) Ndiy wadinga witiyijin disanguk! Abraham wadinga utekin mufulandal wa ritiyij rend mu disanguk. Ap anch twalondap nchik, Yehova wamuchirishina kand Abraham usu wa ruvaj ni wasala chakwel chitwishika anch ndiy ni mukajend, Sara, avala mwan mu upal wau. (Dis. 18:10-14; 21:1-3; Rome 4:19-21) Abraham wadinga kand ni dizu dia Nzamb. Nzamb wamuleja anch: “Majuku mey akez kumatazukin ku Isak.” (Dis. 21:12) Chawiy lel, Abraham wadinga nich mayingish makash ma kuchingejin anch Nzamb ukez kumusangul Isak.

6, 7. (a) Manswik ik masukay Yehova nenday Abraham? (b) Kushilamu kwa Yehova kudiay Abraham kwayinkisha mutapu ik antu ruchingej?

⁶ Mulong wa ritiy rikash ra Abraham, Yehova wasuka nend manswik mulong wa anend, ap anch “mbut.” (Tang Disambishil 22:18.) Chikunku cha kusambish cha “mbut” yiney udi Yesu Kristu. (Gal. 3:16) Yehova wamuleja Abraham anch “mbut” yend yikez kuvulijan “mudi atutumbu a mwiur, mudi kand usukuril udia ku chikum cha karung”—uvud wakadiay Abraham kwijik. (Dis. 22:17) Pakwez, uvud winou eza kuwijikish. Yesu Kristu ni antu 144000, akeza kuyikel mu Want winou, awiy asadila “mbut” yiney. (Gal. 3:29; Kubur. 7:4; 14:1) Want wa Mesia wawiy ukezau kusadil mulong wa kuyukish “michid yawonsu ya pansh.”

⁷ Chimeken anch Abraham kadingap wovila kurumburik kwawonsu kwa manswik masukay nend Yehova. Ap mwamu, Bibil ulondil anch Abraham “wading uchingedil musumb ushichinga chikupu.” (Heb. 11:10) Musumb winou udi Want wa Nzamb. Chakwel anch tweza tutambula yiyukish yiney ya Want, Abraham ukez kwikal kand mwom. Ukez kutwish kwikal nich mwom wa chikupu panap pansh kusutil ku disanguk. Ni antu akeza kupand aom ku Armagedon ap akezau kusangul akez kwikal nich mwom wa chikupu.—Kubur. 7:9, 14; 20:12-14.

“Muchim Wam Wimbachikin”

8, 9. Ov, mulong wak mukand wa Yob kiudiap kwau kusu rusangu ra chamwamu ra muntu wadinga mu yoziu?

⁸ Pakach pa chirung cha chisu chadingayaku Yosef mwijikurend a Abraham kushik pikalayaku muprofet Moses, pakach padinga muntu umwing ukweta dijin dia Yob. Chimeken anch mukand wa Yob udia mu Bibil, aufunda kudiay Moses, wawiy urumburila mutapu Yehova wamulikay Yob chakwel amana mar ni ulejen kand mutapu wakarumuka yom ku mutambu wend. Pakwez, mukand wa Yob kiudiap kwau rusangu ra chamwamu ra muntu wadinga mu yoziu; wisambidin pa milong yimwing yijim mu mangand mawonsu. Mukand winou utwinkishin njingunin ya kutentam kwa Yehova mu mutapu wa kusadil ukaleng wend, ni ulejen anch kushinshaman ni ruchingej ra mwom ya atushalapol awonsu a Nzamb adia panap pansh yikwatiken ku mulong walanka mu Eden. Ap anch Yob kateshap kurumburik kwa yom yamutana, kayilikap arund nend asatu amushikija ku kutong anch wakangeny kulam kushinshaman kwend. (Yob 27:5) Chom chinech chifanyidin kukasikesh ritiy retu ni kutukwash chakwel twijika anch tukutwish kulam kushinshaman kwetu ni kukasikeshin ukaleng wa Yehova.

⁹ Papwishau kulond arund asatu enday Yob eza kumwongoj, “Elihu, mwan ikundj wa Barakel mwin Buz wakula.” Ov, chom ik chamubachika ku kulond? Ndiy walonda anch: “Nikwet mazu mavud, muchim wam wimbachikin.” (Yob 32:5, 6, 18) Ap anch yom yawonsu yalonday Elihu kusutil ku usu wa spiritu yawanyina padiay Yob, mazu mend madi kand ma usey kudi antu akwau. Madi nimawiy mufulandal wa ruchingej kudi antu awonsu alamina kushinshaman kwau.

10. Chom ik chimekeshina anch uruu wa Yehova kudi muntu umwing pa yisu yimwing akutwish ausadil kudi antu awonsu?

¹⁰ Pa yisu yimwing Yehova uletining uruu wa muntu umwing pakwez ukutwisha kand kusadilau kudi antu awonsu. Chom chinech chiswapel kuchiman mu uprofet wa Daniel piur pa chilat chamanay piur penday Mwant Nebukadinezar wa in Babilon cha mutond ujim wakatulau auwish pansh. (Dan. 4:10-27) Ap anch chilat chinech chadinga chifanyidin kuwanyin ching padiay Nebukadinezar, pakwez chadinga chisambidin kand chom chikwau chipandakenamu kujimb. Chadinga chilejen anch ukaleng wa Nzamb piur pa divu wadinga ufanikeshinau kusutil ku want wa mu dijuku dia Mwant David ukez kusambish kand kuyikel kupwa kwa chirung cha mivu 2520, kusambishin kuyichind pa muvu wa 607 K.C.C.a Ukaleng wa Nzamb piur pa divu dietu wasambisha kand mu mutapu ukwau usu pamutekau Yesu Kristu mudi Mwant mwiur mu muvu wa 1914. Tongin bil katat mutapu ukeza winyikel wa Want winou kuwanyish ruchingej ra antu in kuziyil!

‘Mukamunina! Kangal Andam mwi Nzay’

11. Mazu ma Elihu malejen chom piur pa Nzamb?

¹¹ Pamwakulay Yob, Elihu wisambina piur pa “muruu wa mwiur umwing, mwin kumulondilap, wez ndiy kamu umwing wa pakach pa kanan kamwing.” Kwela kwikal chom ik anch muruu winou “ukat kumulembil Nzamb, chad Nzamb ukat kumutesh”? Elihu ulondil anch: “Nzamb umwovidil riy ni kumulej muruu wa mwiur anch: ‘Mukamunina! Kangal andam mwi nzay, mulong natanyin chakumukwol nich.’ Mujimbu wend ukwikal sinin mudi mujimbu wa mwan, ukat kuchirikin kand ku machuku ma [wi]nsand wend.” (Yob 33:23-26) Mazu minam malejen anch Nzamb uding tayad kwitiyij ‘cha kukolan nich,’ ap anch cha “kubwik nich,” mulong wa antu itina dilikishin.—Yob 33:24.

12. Mazu ma Elihu mayiletina antu ruchingej ik?

¹² Chimeken anch, Elihu kateshap kurumburik kwa chom cha kukolan nich, mudi kamu mwakanganyau aprofet kutesh nawap kachom ni kachom kafundau. (Dan. 12:8; 1 Pita 1:10-12) Pakwez, mazu ma Elihu mamekesha ruchingej anch Nzamb ukez pa dichuku dimwing kwitiyij cha kukolan nich ni ukez kuyikol antu ku upal ni ku rufu. Mazu ma Elihu maletin ruchingej ramushena ra mwom wa chikupu. Mukand wa Yob ulejen kand anch kukez kwikal disanguk.—Yob 14:14, 15.

13. Chom ik chitaninau in Kristu mu mazu ma Elihu?

¹³ Ilel, mazu ma Elihu madandamedin kwikal movikena nawamp kudi mamiliyon ma in Kristu akweta ruchingej ra kupand ku disheshik dia ditenchik dia yom dia katat. Amapal akez kwikal mukach mwa antu akez kupand akez kuchirikin ku usu wa winsand wau. (Kubur. 7:9, 10, 14-17) Chikwau, ruchingej ra kuyiman akusangulau ikal kand ansand rikat kuyisangaresh nakash antu akaritiy. Chakin kamu, kulik kufa kukezau kutambul in Kristu azizidilau many mwiur ni mwom wa chikupu panap pansh mulong wa “amikoku akwau” a Yesu wengamidin pa mutapu umekeshinau ritiy rau mu cha kukolan nich cha Kristu.—Yoh. 10:16; Rome 6:23.

Rufu Akez Kuridiosh pa Divu

14. Chom ik chimekeshina anch kwadinga kuswiriken kwa chom chimwing chipandakenamu kulemp Chijil cha Moses chakwel anch in Isarel ikala nich ruchingej ra mwom wa chikupu?

¹⁴ An a Abraham ikala muchid panrau pasukau manswik ni Nzamb. Payinkishay Chijil, Yehova walonda anch: “En ukez kulamany yijil yam ni yijidik yam. Mwawonsu ukeza kuyiwanyish ukez kutanyinamu mwom.” (Lev. 18:5) Pakwez, katwishap kushakam kulondulijan nich yijidik yiwanyidina yadinga mu Chijil, chawiy in Isarel ayifisha nich kudi Chijil ni chawiy chaswirikedinau kuyikol adiokala mu kuyifish nich kwinoku.—Gal. 3:13.

15. David amupepila chakwel afunda piur pa chiyukish ik cha machuku ma kurutu?

¹⁵ Kupwa kwa Moses, Yehova wayipepila antu akwau afunda Bibil chakwel niyau afunda piur pa ruchingej ra mwom wa chikupu. (Kus. 21:4; 37:29) Chilakej, David mwin kufund kuseng wapwisha kuseng kumwing kwafunday piur pa uumwing wa in kwifukwil akin adinga ku Sion anch: “Mwant Nzamb ukat kutum diyukish diend, diawiy mwom wa chikupu.”—Kus. 133:3.

16. Chom ik chashilayimu Yehova kusutil kudiay Isay, mulong wa machuku ma kurutu piur pa “mangand”?

¹⁶ Yehova wamupepila Isay chakwel abwaka piur pa mwom wa chikupu panap pansh (Tang Isay 25:7, 8.) Mudi disun “dibwikin[a]” ni ku muchim ti—mudi mbulangach—chitil ni rufu yiyilimidin nakash antu. Yehova uyinkishin antwend kashinsh anch ukez kuyidioshin chitil ni rufu, ap kunongish, “pa mangand.”

17. Mwaz ik wa uprofet wa Mesia wanzurila chis cha mwom wa chikupu?

¹⁷ Tushinshikinany kand mutapu wa kusal yom yisambidinau mu Chijil cha Moses piur pa ikwal a mpemb wa Azazel. Kapamp kamwing pa muvu, pa Dichuku dia Kuchakwish, mwin kupesh wa pa mutu ‘wanzuka makas mend mawonsu maad pa mutu wa ikwal a mpemb mwom ni kwitiyilap yitil yawonsu ni kurumbuk kwa in Isarel, ni ukuyitek pa mutu wa mpemb ni mpemb winou ukez kusend kuyip kwau kwawonsu kuya nich mwi mpay.’ (Lev. 16:7-10, 21, 22) Isay wabwaka kwez kwa Mesia, ukeza kusal chilik chimwing chakwel asendina kulemp “mar,” “kusansan,” ni ‘yitil ya antu avud,’ chawiy chanzurila chis cha mwom wa chikupu.—Tang Isay 53:4-6, 12.

18, 19. Ruchingej ik rikasikeshidinau mu Isay 26:19 ni Daniel 12:13?

¹⁸ Yehova wayileja antwend Isarel kusutil kudiay Isay anch: “Afu [ey] akez kapand kand! Mijimbu yau yikez kavumbuk kand. Antu awonsu alela mu jinzay akez kalank ni kuwang miminy ya musangar. Mudi maum chimakata kutalesh divu, mwamu kand mukez kapizurishay [ Yehova, Les Saintes Écritures — Traduction du monde nouveau] antu afa kal pakur.” (Isay 26:19) Mifund ya Hebereu yilejen patok anch ruchingej riner ra disanguk ni ra mwom pansh ridi rakin. Chilakej, padingay Daniel ni mivu piswimp 100, Yehova wamwinkisha kashinsh anch: “Ukez kufa, pakwez ukez kuvumbuk mulong wa kutambul difut diey kwisudiel kwa chisu.”—Dan. 12:13.

¹⁹ Mulong wa ruchingej ra disanguk, chawiy chamwelau Yesu kudiay Marta piur pa mwanamakwend wafa anch: “Am nij kal ndiy ukez kavumbuk kand mu disanguk ku dichukuk dia kwinsudiel.” (Yoh. 11:24) Ov, malejan ma Yesu ni yom yapepilau yafundau in kwilejend yaswimpa ruchingej riner? Ov, ni katat Yehova uchiyinkishin ruchingej ra mwom wa chikupu panap pansh? Tukez kushinshikin yakul ya yipul yiney mu mutu wa mulong ukulondulap ou.

[Mazu madia kwishin kwa paj]

Ov, Ukutwish Kurumburil?

• Antu “[a]yiteka ku yom yamwamu” mulong wa ruchingej ik?

• Chom ik chamekesha anch Abraham wadinga witiyijin disanguk?

• Mazu ma Elihu mamulejay Yob mayinkishin antu ruchingej ik?

• Ov, Mifund ya Hebereu yikasikeshidin mutapu ik ruchingej ra disanguk ni ra mwom wa chikupu pansh?

[Chipich chidia pa paj wa 11]

Mazu ma Elihu mamulejay Yob mateka mufulandal wa ruchingej rakwel anch muntu ukez kukolik ku upal ni ku rufu

[Chipich chidia pa paj wa 12]

Daniel wadinga nich kashinsh anch ‘ukez kuvumbuk mulong wa kutambul difut diend kwinsudiel kwa machuku’