Malembil Mey Malejen Ik Padi ey?
“Antu a mitapu yawonsu akwez kudi ey ukata kutesh malembil.”—KUS. 65:2, NW.
1, 2. Mulong wak atushalapol a Yehova akat kumwilembil ndiy nich ruchingej?
YEHOVA kakatap kujik matu ku malembil ma atushalapol end ashinshamena. Tukutwish niyetu twikal nich kashinsh anch ututeshining. Ap anch mamiliyon ma Atuman a Yehova mamulembil Nzamb pa chisu chawiy chimwing, kwikil ulejiningau anch: ‘chingel bil.’
2 David nfund a kuseng, wadinga nich kashinsh anch Nzamb uteshin malembil mend, chawiy wawang anch: “Antu a mitapu yawonsu akwez kudi ey ukata kutesh malembil.” (Kus. 65:2, NW) Yehova wakula malembil ma David mulong ndiy wadinga mwin kwifukwil wend ushinshamena. Tukutwish twasal nawamp anch twiyipul anch: ‘Malembil mam mamekeshin anch nimuchingejidin Yehova ni anch nikat kubangin difukwil diend dishitwila? Malembil mam malejening ik padi am amwinam?’
Mulembilany Yehova ni Kwikepish
3, 4. (a) Mwikadil ik tufanyidina kwikal nich pitumwilembidila Nzamb? (b) Chom ik tufanyidina kusal anch tukwet ‘yitongijok yirumbangena’ mulong wa chitil chikash?
3 Anch twamwilembil Nzamb ni kwikepish, ukutwakul ku malembil metu. (Kus. 138:6) Tukutwish twamwit Yehova chakwel atupapata, mudi mwamwitay David anch: “Mpapata A Nzamb, wijik muchim wam; mpaka, wijik yitongijok yam. Ntalamu bil anch mu am mudi chom chiyimp, ni wintakel mwi njil mwakad kushemunikang.” (Kus. 139:23, 24) Kangal twimena kusu pa kulembil pakwez tumulikany Nzamb atupapata ni atuyula nich Dizu diend. Yehova ukutwish watutakel “mwi njil mwakad kushemunikang,” ni ukutukwash chakwel twikala nich mashakamin ma mwom makutwisha kututwal djat ni ku mwom wa chikupu.
4 Chadi chikwikal nchik anch tukwet ‘yitongijok yirumbangena’ mulong wa chitil chikash? (Tang Kuseng 32:1-5.) Kupakish kuyingish kom kafila nich kukutwish kwatupwish usu, mudi muukata kupwa mutond mem mau pa chirung cha ngem yikash. David washadisha musangar wend mulong wa chitil chend ni chimeken anch wayela ni mayej. Pakwez weza kwitudishaku pa chisu chitay dilikish kudiay Nzamb! Tongijokin pa musangar wova David pa chisu chovay anch: ‘Amulikishin kal chitil chend’ ni anch Yehova wamulikishin kal. Kwit dilikishin kudi Nzamb kuletining kwitudishaku, ni ukwash wa amakurump in Kristu niwawiy ukutwish wamukwash muntu warumbukina alanka muspiritu.—Jinsw. 28:13; Yak. 5:13-16.
Mulembilany ni Kumujikitish Nzamb
5. Kwilemb kudiay Yehova kurumburikin ik?
5 Anch runeng rikash ratukwat mulong wa diyingishin kanang, tufanyidin kusadil chiyul cha Paul chilondila anch: “Kangal wanenganany; pakwez lembilany mu yom yawonsu, ni kujikitish ni kumwijikish Nzamb yom yawonsu yiusotilany.” (Filip. 4:6) “Kwilemb” kurumburikin “kwit kwa kalimish.” Pakampwil pa chisu cha chak ap cha kuzengol tufanyidin kumwilembil Yehova chakwel atukwash ni atutakela.
6, 7. Chidi mulong wa mayingishin ik mitufanyidina kutek kujikitish mu malembil metu?
6 Pakwez, anch tukat kulembil ching kusu pa chisu chituswiridina chom kanang, chikumeken ik piur pa yibachikin yetu? Paul walonda anch tufanyidin tumwilembila Nzamb ‘ni kumujikitish.’ Chakin kamu tuyingin kumekesh yovil yetu mudi yamekeshay David palonday anch: “A! [Yehova, NW], kujimb, ni ukash, ni uyaj, ni kupandakan, ni kuwap, yawonsu yidi yeyey, mulong yawonsu yidia mu maur ni yidia pansh yidi yeyey. A! [Yehova, NW] want udi weyey, ey udi piur pa yom yawonsu. . . . Chawiy katat twakujikitish, amboku, Nzamb wetu, ni kushiman dijin diey dia uyaj.”—1 Jins. 29:11-13.
7 Yesu wamujikitisha Nzamb mulong wa yakudia, mulong wa mukat ni nviny yasadilay pa Yakudia ya Urel ya Nsalejetu. (Mat. 15:36; Marko 14:22, 23) Kuwejin pa kumekesh yovil mudi yiney, tufanyidin ‘kumujikitish Yehova’ mulong wa “midimu yend yijim kudiau an a antu,” mulong wa “marumburish [mend] matentamin,” mulong wa dizu diend, uruu wend, udiaku katat mu Bibil.—Kus. 107:15; 119:62, 105.
Yilembidilany ni Antu Akwau
8, 9. Mulong wak tufanyidina kuyilembidil akwetu in Kristu?
8 Pakad kwidjidjek tukat kulembil mulong wetwetu ayinetu, pakwez tufanyidin kand kuyilembidil ni antu akwau—pamwing ni in Kristu akwau atwakad etu kwijik pa majin. Ap anch kambuy Paul kadingap wij majin ma in kwitiyij awonsu adinga mu Kolosay, ndiy wafunda anch: “Etu twajikitish kudi Nzamb, Tatuku wa Nsalejetu Yesu Kristu, pitukat kunilembidilany machuku mawonsu, mulong tukat kuteshang ya ritiy ren mu Kristu Yesu, ni ya rukat riukwetanya kudi in Kristu awonsu.” (Kol. 1:3, 4) Paul walembila kand mulong wa in Kristu adinga ku Tesalonik. (2 Tes. 1:11, 12) Malembil ma mutapu winou malejening yom yivud piur petu ni piur pa mutapu tuyimeninga akadivar ni anambaz netu mu ritiy.
9 Kuyilembidil kwetu in Kristu azizidilau many ni ambay nau “amikoku akwau” kuletining uman ulejena anch tukat kubangin dirijek dia Nzamb. (Yoh. 10:16) Paul wayita ambay nend in kwifukwil alembila chakwel ‘amwinkisha ukaliweny wa kulond ujindj wa rusangu ruwamp.’ (Efes 6:17-20) Ov, tukat kuyilembidil in Kristu akwau pa mulong winou?
10. Kuyilembidil antu akwau kukutwish kwikal nich yibudikin ik padi etu?
10 Kuyilembil akwetu kukutwish kwaswimp manangu metu piur pau. Anch twamulembidil muntu utwakadia etu kukat nakash, ov, mutapu ik tukutwisha kumukis muntu winou? (1 Yoh. 4:20, 21) Malembil ma mutapu winou makasikeshining ni kutwikadish mu uumwing ni akadivar netu. Chipandakenamu, malembil minam malejening anch tukwet rukat mudi ra Kristu. (Yoh. 13:34, 35) Ngikadil yiney yidi chikunku cha dibuj dia spiritu wa Nzamb. Tukat kulembil ayinetu chakwel tutambula spiritu utumbila, kumwit Yehova chakwel atukwasha tumekesha rukat, musangar, chisambu, kushimpish muchim, kudimuk, kuwap, kujijaman, ritiy, kwitudish ni kwishitul yidia yibar ya dibuj dia spiritu? (Luka 11:13; Gal. 5:22, 23) Anch mwawiy, mazu metu ni yisal yetu yikumekesh anch twendining ni tushiching kulondulijan nich spiritu.—Tang Galatia 5:16, 25.
11. Mulong wak ukutwish walond anch chiwapin kuyit ni antu akwatu atulembidila?
11 Anch twatesh anch anetu adi mu choziu cha kwiy ma ekzamen ku shikol, tufanyidin kuyilembidil ni kuyinkish ukwash wa Mifund chakwel anch asadila uyakin ni kakezap kusal chom chiyimp ap chimwing. Paul wayileja in Kristu a ku korint anch: “Tukat kulembil kudi Nzamb chakwel en kiukusalanyip tuyimp.” (2 Kor. 13:7) Kulembil kwa kwikepish mu mutapu winou kukat kumusanger Yehova ni kulejening yom yiwamp padi etu. (Tang Jinswir 15:8.) Tukutwish twayit antu akwau chakwel alembila mulong wetwetu, mudi mwasalay kambuy Paul. Ndiy wafunda anch: “Tulembidilany, mulong twij kal anch tukwet kom katokila, tukat kusot kushakam ni kashinsh mu yom yawonsu.”—Heb. 13:18.
Malembil Metu Malejening Yivud
12. Yom ik ya usey ujim yifanyidina kwikal mu malembil metu?
12 Malembil metu malejening anch tudi Atuman a Yehova akweta musangar ni in mushiku? Malembil metu masidining ching kusu pa kuwanyish rusot ra Nzamb, kulejan uruu wa Want, kuchidij ukaleng wa Yehova ni kutumbish dijin diend? Yom yiney yidi yom ya usey ujim yifanyidina kwikal mu malembil metu, mudi muyimekedina mu malembil ma chilakej ma Yesu, masambishina nich mazu manam: “Tatukwetu udia mwiur, Dijin diey aditumbish. Want wey weza. Rukat rey arusala pansh mudi mwiur.”—Mat. 6:9, 10.
13, 14. Malembil metu malejen ik piur petu?
13 Malembil metu kudiay Nzamb malejening yibachikin yetu, yitusangaredina ni yitusotina. Yehova wij chitudia mukach. Jinswir 17:3 jilondil anch: “Nnung yidi ya kupakish nich utad wa usey ukash, ni riteng ra kasu ridi ra kupakish nich or, pakwez [Yehova, NW] ukat kupak michim.” Nzamb umen yidia mu muchim wetu. (1 Sam. 16:7, NW) Wij mutapu twovilinga piur pa yikumangan yetu, mudimu wetu wa kulejan ni piur pa akadivar ni anambaz netu a muspiritu. Yehova wij yitukata kuyitongin “akadivar” nend Kristu. (Mat. 25:40) Ndiy wij anch chakin kamu tusotin yitulembidina ap anch tukat kuchirokin kwetu mazu chamwamu. Yesu walonda anch: “Mu kulembil kwin, kangal wavudishany mazu mamwamu, mudi mukat kusalau in mangand; mulong awiy akat kutong anch kwij akututeshil mulong wa kuvudish mazu.”—Mat. 6:7.
14 Yitulondilinga mu malembil metu yilejening kand mutapu utumuchingejidina Nzamb. David walonda anch: “Ey [Yehova] uding ndond yam ya kwikangil, mpwembu yikash kudi akankuny nam. Nikez kashakam mu chikumbu chey chikupu, nikez kikangil kwishin kwa jimpur jey.” (Kus. 61:3, 4) Pakatay Nzamb ‘kututek mu chikumbu chey’ cha chifanikesh, tukat kusanger kushakam zoong ni kwikal mu diking diend. (Kubur. 7:15) Chitwongojin mudi ik pa kumushejin Yehova mu malembil ni kwijik anch ndiy ‘udi netu’ pa yisu yawonsu yidia ritiy retu mu choziu!—Tang Kuseng 118:5-9.
15, 16. Malembil makutwish matukwash tujingunina yom ik piur pa maswir metu ma kusot kuwanyish yitinau mulong wa yisend ya mudimu?
15 Malembil makin mitukata kumulembil Yehova piur pa yibachikin yetu makutwish matukwash tushinshikina uyakin piur pa malembil minam. Chilakej, ov, madi maku ma kusot kwikal nich mwaz wa piur mukach mwa antu a Nzamb matubachikina bil anch maswir ma kwikepish ma kusot kuyikwash antu akwau ni kusot kusal yawonsu yitukutwisha kusal mulong wa kutwal yisakin ya Want kurutu? Ap anch chikutwish chikal anch nisotil nikala “mukurump” ap anch nisotil “kuyikel” antu? Winou kiwawiyap mutapu ufanyidina yom kusadik mukach mwa antu a Yehova. (Tang 3 Yohan 9, 10, Manswik Masu; Luka 22:24-27, MM.) Anch tukwet yitongijok yiyimp, anch twalembil chakin kamu kudi Yehova Nzamb ukutwish wayibudishin patok ni ukutukwash chakwel tukarumuka kurutu kandikal yikala ni mij yikash.
16 Amband in Kristu akutwish ikal ni maku makash chakwel anch anfumwau asala mudi ankwash a mudimu ni pamwingap kushiken ku kwikal atulam ap anch amakurump. Anambaz inay asal kukwatijan nich yovil yau yikatau kubudish mu malembil mau ayinau ma ku ujindj kusutil ku kwikal nich mashakamin mawamp. Chom chinech chidi cha usey nakash, mulong yilondiningay ikundj ni kusal yikwet chibudikin pa mutapu umumeningau mu chikumangen.
Kulembil mu Dijin dia Antu Akwau Patok
17. Mulong wak chidia cha usey kukimb ndond ya kuns kwa amwiney mulong wa kulembil?
17 Yesu wadinga ni kuya pa chisu ni chisu kuns kwa amwinend chakwel akamwilembila Tatukwend. (Mat. 14:13; Luka 5:16; 6:12) Niyetu tuswiridining kuya kuns kwa ayinetu tukalembila. Tukalembila kwi ndond kwa zong mu chisambu, tukutwish twakwat mipak yikutwisha kumusangaresh Yehova ni mulong wa kuwap kwetu muspiritu. Pakwez, Yesu wadinga kand ni kulembil patok kurutu kwa antu avud, ni chidi cha usey kudi etu chakwel tushinshikina mutapu uwamp ufanyidina kusal mwamu.
18. Yom ik yimwing yifanyidinau akadivar kwikal nich mu manangu pa chisu cha kulembidil patok mu dijin dia chikumangen?
18 Ku yikumangan yetu, amakundj ashinshamena akat kulembil patok mu dijin dia chikumangen chawonsu. (1 Tim. 2:8) Ambay akaritiy afanyidin kwikal tayad kwakul anch “amen,” dizu dirumburikina anch “chikala mwamu,” kwisudiel kwa malembil makulembilay muntu winou. Pakwez, chakwel anch itiyija mwamu, afanyidin kwitiyij anch yiulondila yidi yakin. Mu malembil ma chilakej ma Yesu, mwikil dizu diyimp ap dia kuburen kalimish. (Luka 11:2-4) Chikwau, kalondap kachom pa kachom ap kamulong ni kamulong ka muntu ni muntu wadinga umuteshina. Milong yimutadila muntu yipadil mu malembil ma panrend, kangal mu malembil ma patok mu dijin dia antu avud. Ni anch ukat kulembil mu dijin dia chisak, kitufanyidinap kwandjikamu yom ya milong ya ujindj.
19. Ngikadil ik tufanyidina kwikal nich pa chisu cha kulembil patok kurutu kwa antu avud?
19 Anch kudi muntu ulembidila patok mu dijin dia chisak, tufanyidin kumekesh mwikadil wa kumwov “Nzamb wom.” (1 Pita 2:17) Kukutwish kwikal chisu ni ndond yifanyidina kusal yisal yimwing yakad pamwingap kufanyin kusal ku chikumangan cha Ukristu. (Mul. 3:1) Chilakej, antu amwing asotining anch chisak chawonsu chikwatijana ku makas ap kuzambul makas mwiur pa chisu cha malembil mudi minam. Chom chinech chikutwish chayovish antu amwing kuyip ap kuyisal azuwola, pamwing ni antu angendj ezina akad kwikal nich yitiyij yetu. Antu amwing atijadina akutwish akwatijan makas mu mutapu wakad kuyiman kudi antu avud, pakwez anch abwikatijan pa chisu cha malembil ma chisak ma patok, antu akutwisha kuman mwamu akutwish ipwakal. Akutwish atongin anch antu inay atijadina adi atongidin kwau pa rukat rau pa ndond pa kumwifukwil Yehova. Mulong wa kumulimish kwend ndiy, el tusalany lel “yawonsu . . . ku uyaj wa Nzamb” ni ipukany mwikadil ukutwisha kuyishikij antu akwau ku kuzuwol, kuyovish kuyip ap kuyipwakesh.—1 Kor. 10:31, 32; 2 Kor. 6:3.
Kulembil Mulong wa Yom Ik?
20. Mutapu ik ukutwisha kurumburil Rome 8:26, 27?
20 Pa yisu yimwing, tukutwishap twijik yom yitufanyidina kulond mu malembil ma kuns kwa ayinetu. Paul wafunda anch: “Mulong etu kitwijip kulembil mudi muchifanyidina; pakwez [spiritu] amwinend ukat kutulembidil etu nich kunungan kwakad kwovakan; ni ndiy [Nzamb] ukat kupak michim, ndiy wij kal manangu ma [spiritu].” (Rome 8:26, 27) Yehova wasala anch afunda malembil mavud mu Mifund. Ndiy witiyija malembil minam mudi kumwit kutukutwisha kumwit ni ukutwish watwitiyij. Nzamb utwij ni kurumburik kwa yom yisadilay anch spiritu wend alonda kusutil kudiau antu afunda Bibil. Yehova ukat kwakul ku malembil metu pakatay spiritu “kutulembidil,” ap anch kwit mulong wetwetu. Pakwez anch twijik nawamp Dizu dia Nzamb, yom yitukutwisha kwit yikubudik mu muchim wetu kamu.
21. Chom ik tukwileja mu mutu wa mulong ulondwilaku ou?
21 Mudi mutwileja kal, malembil metu malejening yom yivud piur petu. Chilakej, malembil malejena chilik chitumushejidina Yehova ni chilik chitwija Dizu diend. (Yak. 4:8) Mu mutu wa mulong ulondwilaku ou, tukulejamu malembil mamwing ni mazu mamwing ma malembil mafundau mu Bibil. Kushinshikin kwinoku Mifund kukwet yibudikin ik piur pa kumushejin kwetu Nzamb mu malembil?
Ukwakul Nchik?
• Mwikadil ik tufanyidina kwikal nich pa chisu cha kumulembil Yehova?
• Mulong wak tufanyidin kuyilembidil akwetu in kwitiyij?
• Malembil metu makutwish malejan chom ik piur petu ni piur pa yibachikin yetu?
• Mwikadil ik tufanyidina kwikal nich pa chisu cha kulembil patok mu chisak cha antu?
[Chipich chidia pa paj wa 11]
Ukat kumushiman ni kumujikitish Yehova chisu chin chawonsu?
[Chipich chidia pa paj wa 11]
Mwikadil wetu pa chisu cha malembil ma patok ufanyidin kumulimish Yehova