Ringany Rimwing Riletin Rikwau

KAMBUY Paul wayifundina in Kristu adingaku mu mivu ya kwinsudiel kwa chitot cha kusambish mu C.C. anch: “Babalany.” Wayibabesha mulong wak? “Chakwel kangal muntu wakukwatany mu mupit wa manangu ma antu ma kudimban makad usey.”—Kolosay 2:8, Manswik Masu.

Chikalap nchik dibabesh dia Paul, kusambishin kamu pakach pa chitot cha kaad mu C.C., in Kristu amwing asambisha kusadil yitongijok yadingau ni kulejan afilozof chakwel arumburila yitiyij yau. Mulong wak? Adinga ni kusot chakwel ayitiyija kudi antu in kwilej adinga mu Want wa Rome ni chakwel ayishikija antu avud ku kwitiyij.

Justin Martyr, umwing wa in Kristu inay adinga ijikena nakash, wadinga witiyijin anch Katum wa Nzamb wayibudikina amwinend afilozof in Grek ni padinga pasutil kal mivu yivud kushik ni pezinay Yesu. Kukwatijan nenday Justin ni alej akwau adinga ni kulejan yitongijok mudi yiney, kwandjik filozofi ni mitoloji mu Ukristu kwasala mulad winou wa relijon wijikana mu mangand mawonsu.

Mulad wa Ukristu wa Justin Martyr wasala anch antu avud itiyija. Pakwez, kwitiyij kwa ringany rimwing kwashikija ku kwikalaku kwa jingany jikwau ni kwaleta chijikena katat anch malejan ma Ukristu. Pakwel anch usaula patok jingany jinej, shinshikin yilondila mabuku manam ni yom yilejenay Bibil chakin kamu.