BIBLIOTEK Udia pa Kapend
BIBLIOTEK
UDIA PA KAPEND
Uruund
  • BIBIL
  • MIKAND
  • YIKUMANGAN
  • w09 1/12 map. 24 ​-​ 28
  • Tukudishany Rukat Rakad Kukangany

Kwikil video ukimbina

Video winou umukimbinap amboku nawamp.

  • Tukudishany Rukat Rakad Kukangany
  • Chinong cha Kalam Chilejen Want wa Yehova—2009
  • Tumitu twa milong
  • Yom Yifanakena
  • Tukudishany Rukat ra Yehova
  • Chitumukatidina Nsalejetu Yesu Kristu
  • Dandamenany Kulondul Njil Yipandakenamu Kuwap ya Rukat
  • Rukat Rikat Kujamish mu Yom Yawonsu
  • Rukat Kirikunganyangip
  • “Chifanyidin En Kwikal Nich Rukat”
    Sejany Piswimp Kudi Yehova
  • Mukata Nzamb Ukukatina
    Chinong cha Kalam Chilejen Want wa Yehova—2006
Chinong cha Kalam Chilejen Want wa Yehova—2009
w09 1/12 map. 24 ​-​ 28

Tukudishany Rukat Rakad Kukangany

‘Rukat rikat kujamish mu yom yawonsu. Rukat kirikukanganyangip.’—1 KOR. 13:7, 8.

1. (a) Chisu ni chisu rukat arimekeshining nchik? (b) Antu avud amekeshidin rukat rau padiay nany ni pa chom ik?

AFUNDIL kal yom yivud piur pa rukat. Ngikadil yiney akat kuyitumbish ni kuyiwangin mu miminy ya rukat. Rukat ridi maswir majim ma muntu. Pakwez mikand ni mafilim yikat kwisambin ngikadil yiney mudi jingany ja rukat, ni yom yiney yizwil too mu yaku. Chikalap nchik mwamu, chidi cha ushon nakash anch rukat rakin ra Nzamb ni mukwetu muntu riburedin kwau. Tumen mutapu usadikina yom yiney yabwakau mu machuku manam ma nsudiel. Antu ikadil kal “in kwikat ayinau, in kukat nfalang, . . . akwisangarish ayinau, Nzamb bwat.”—2 Tim. 3:1-5.

2. Bibil uletin dibabesh ik piur pa rukat rakad kufanyin?

2 Antu akwet ukaliweny wa kumekesh rukat, pakwez Dizu dia Nzamb ditubabeshin pantaliken nich rukat riyimp. Ni Bibil ulejen yikata kushiken anch rukat riner rikal ni mij mu muchim wa muntu. (1 Tim. 6:9, 10) Uvurikinany yafunday kambuy Paul piur penday Demas? Ap anch ndiy wadinga mbay wenday Paul, Demas wakarumuka wakakat yom ya mangand. (2 Tim. 4:10) Kambuy Yohan niyend wayiyula in Kristu pantaliken nich chak chinech. (Tang 1 Yohan 2:15, 16.) Kukat mangand ni yom yidiamu yisutina ni jinjil ja mangand kwambatenap ni kumukat Nzamb ni yom yidiokila kudiay ndiy.

3. Chom ik turishina nich, ni chilangwishin yipul ik?

3 Kitudiap a mangand minam, ap anch tushichamu. Chawiy, turishin mulong wa kwipuk mutapu uyimp wa mangand piur pa rukat rakad kufanyidin. Chidi cha usey anch twipuka kangal twawil mu rukat rakad kufanyin. Chawiy lel, tufanyidin tukudisha ni kumekesh rukat rengamidina pa yijil mulong wa nany? Yom ik yikututwishisha kukudish rukat rikutwisha kujijamen mu yom yawonsu ni pakad kukangany? Tukutaninamu ik katat ni mu machuku metu ma kurutu mu mwom wa mutapu winou? Tuswiridin yakul yikwatijadina nich kuman kwa Nzamb chakwel anch yitutakela.

Tukudishany Rukat ra Yehova

4. Mutapu ik upamininga rukat ra Nzamb?

4 Kukudish kukutwish kwarumburik kwirijek ni kusal anch chom kanang chipama nawamp. Tonginany bil mwin kudim usadila mudimu ukash wa kudim divu ni wa kukun mbut. Ukuchingejin anch mbut jiminya. (Heb. 6:7) Chawiy chimwing, rukat retu mulong wa Nzamb rifanyidin kukul. Chom ik chifanyidina kusal chakwel rukat rukula? Tufanyidin kudim divu dia chifanikesh diwamp dia muchim wetu, mwakunau mbut ja uyakin wa Want. Tukutwish twasal mwamu kusutil ku kwilej nich mushiku Dizu dia Nzamb chakwel tumwijika nawamp. (Kol. 1:10) Kukumangan chisu chawonsu ni kwakulang ku yikumangan ya chikumangen kukez nikwawiy kutukwash twikala nich ronganyin. Ov, tusadiling ayinetu usu chisu chawonsu chakwel twikala nich ronganyin rikurikina?—Jinsw. 2:1-7.

5. (a) Yom ik tukutwisha kwilejin ku ngikadil yijim yinying ya Yehova? (b) Yom ik ukutwisha kulond piur pa kutentam, manangu ni dikand dia Nzamb?

5 Yehova utulejin untu wend kusutil ku Dizu diend. Kusutil ku kwilej Mifund ni kuya kurutu mu kumwijik Yehova, tukutwish twakul mu kusanger ngikail yend yijim—kutentam kwend, dikand diend, manangu mend ni chipandakenamu yawonsu, rukat rend rijim. Yehova wamekesha kutentam mu jinjil jawonsu ni mu chijil chend chiwanyidina. (Kuv. 32:4; Kus. 19:7) Tukutwish twatongijokin pa midimu yawonsu ya Yehova chawiy tukushikena ku kwov wom wa manangu mend. (Kus. 104:24) Mangand nimawiy malejen uman anch Yehova ndiy Musul wa ukash ujim ni usu upandakena.—Isay 40:26.

6. Mutapu ik watumekeshinay Nzamb rukat rend, ni rikukwatin ey nchik?

6 Chom ik tukutwisha kulond piur pa ngikadil yipandakenamu ya Nzamb: rukat rend? Ridi rijim nakash ni ritukwatin etu awonsu. Ndiy wamekesha rukat riner patekay difut mulong wa antu atwishikina kukol. (Tang Rome 5:8.) Ditenchik dined didi mulong wa antu awonsu adia mu mangand, pakwez ching kusu in itiyijina rukat ra Nzamb ni kumwitiyij Mwanend awiy akeza kutaninamu. (Yoh. 3:16, 36) Nzamb wamupana Yesu mudi mulambu wa kuchakwish nich mulong wa yitil yetu chakwel niyetu tushikena ku kumukat.

7, 8. (a) Chom ik chitwitinau chakwel tumekesha rukat ra Nzamb? (b) Antu a Nzamb alamin yijidik yend kwikalap nchik yom ik?

7 Mutapu ik tukumekesha anch tumukatin Nzamb mulong wa yom yawonsu yatusadilay kal? Chakul chapepilau chidi cha usey nakash chilondil anch: “Rukat ra Nzamb rawiy er, chakwel tukulam yijidik yend; ni yijidik yend kiyikutukasikenip.” (1 Yoh. 5:3) Mwaning, kumukat Yehova Nzamb kutubachikin tulama yijidik yend. Dined didi diyingishin dimwing ditukata kulejan uman mulong wa dijin diend ni Want wend, yikatau kwisakin antu akwau. Kusal mwamu nich muchim wetu wawonsu udi uman ulejena anch tulamin yijidik ya Nzamb nich manangu mawamp.—Mat. 12:34.

8 Akadivar netu mu mangand mawonsu adandamedin kulam yijidik ya Nzamb kwikalap nchik kuyidiurol ni kulik patok kusanger uruu wa Want. Kakatap kuziy mu mausu mau masadilau mulong wa kuwanyish mudimu wa kulejan mudi muchifanyidina. (2 Tim. 4:5) Chilik chimwing, niyetu tudi abachikinau kuyilej antu akwau ronganyin ra Nzamb pamwing ni kulam yijidik yend yikwau yawonsu.

Chitumukatidina Nsalejetu Yesu Kristu

9. Yom ik yajijamenay Kristu, ni chom ik chamubachika kusal mwamu?

9 Kuwejin pa kumukat Nzamb, kudi mayingishin mavud mitumukatidina Mwanend. Ap anch kandikal tumumanap Yesu, anch twilej yom yivud piur pend, tukumukat nakash. (1 Pita 1:8) Yisu yom yimwing yajijamenay Yesu? Padingay Yesu ni kusal rusot ra Tatukwend, amukisa pakad mulong, amuzengola, ni amufunda cha makasu ni amusala. Amusalijoka yom yikwau yakad kufanyin. (Tang Yohan 15:25.) Rukat radingay nich Yesu mulong wa Tatukwend wa mwiur ramubachika ku kujijamen yoziu yiney. Ni rukat rend ramubachika chakwel afa mulong wa kupan difut mulong wa antu avud.—Mat. 20:28.

10, 11. Rutong ik tukweta mulong wa yom yatusadilay Kristu?

10 Mwon wa Yesu utwinkishin chakul. Anch twatongijokin pa yom yatusadilay Kristu, tukushiken ku kumukat nakash. Kwikal kwetu in kwilejend, tufanyidin twitekina rutong ra kukudish ni kudandamen kumekesh rukat mudi ra Kristu chakwel niyetu tutwisha kujijamen mu kulam yijidik yend ya kulejan uman piur pa Want ni mulong wa kuyikadish in kwilej.—Mat. 28:19, 20.

11 Pa kwitiyij rukat ra Kristu mulong wa antu awonsu, twiyovil anch atushindidin chakwel tuwanyisha mudimu wetu kurutu kwa nsudiel yeza. (Tang 2 Korint 5:14, 15.) Rukat ramekeshay Kristu radinga rimedin pa kuwanyish kwend chom chantenchikay Nzamb mulong wa antu. Kristu watushila chilik chakwel etwawonsu tuchilondula ni chimutwishishin muntu ni muntu udia pakach petu asala chom kanang mu rutong ra Nzamb. Chom chinech chitwitin tukudisha muchifanyidina rukat ra Nzamb mu chilik chijim nakash mudi muchitwishikina. (Mat. 22:37) Kusutil ku kulam yom yalejanay Yesu ni kulam yijidik yend, tumekeshin anch tumukatin ni tukwatin mupak wa kukasikeshin ukaleng wa Nzamb kwikalap nchik chom chikutushikena, mudi mwasalay Yesu.—Yoh. 14:23, 24; 15:10.

Dandamenany Kulondul Njil Yipandakenamu Kuwap ya Rukat

12. Chom ik chasotay Paul kulond ku mazu manam malondilay anch: “Njil yipandakenamu kuwap”?

12 Kambuy Paul wamwimburija Kristu. Mulong wa kulondul kwend piswimp nakash mu jinzau ja Kristu, Paul wadinga nich kom katok pa kulond ni kuyikasikesh akadivar nend chakwel amwimburija. (1 Kor. 11:1) Ap anch wayikasikesha in Kristu a ku Korint chakwel akimba ni mushiku yipan yimwing ya spiritu yadingaku mu mivu chitot ya kusambish, mudi kwokan ni kulond mu jindim, Paul wayileja anch kudi chom chipandakenamu nakash kulondul. Ndiy walonda mu 1 Korint 12:31 anch: “Ni yam nikukulejany en njil yipandakenamu kuwap.” Maverse malondwilaku verse winou malejen anch njil yiney yadinga njil yipandakenamu ya rukat. Njil yiney yadinga yipandakenamu mu mutapu ik? Paul wasambela bil nich chilakej cha yom yadinga yilondilay. (Tang 1 Korint 13:1-3.) Anch wadinga nich ukaliweny kanang ujim ni wasala yom yijim ni anch kadingap ni rukat, ov, chela kumusadil ik? Kwikil chom ap chimwing! Spiritu wa Nzamb wamubachika, chawiy charumburilay uyakin unou wa usey ujim. Kubaz kwamushena mudi ik kwabazay pa tulejay chom chinech!

13. (a) Mazu ik makwikwla mufund wa muvu wa 2010? (b) Rukat kirikunganyap mu mutapu ik?

13 Kupwa Paul utulejin chidia rukat ni chakadia kwikal rukat. (Tang 1 Korint 13:4-8.) Katat, itekina chisu cha kushinshikin mutapu uwanyishina yom yilejena rukat. Anch twashinshikin nakash pa chikunku cha nsudiel cha verse wa 7 ni chikunku cha kusambish cha verse wa 8, yikunku yiney yawiy yikwikala mazu ma mufund wa muvu wa 2010 malondila anch: ‘Rukat rikat kujamish mu yom yawonsu. Rukat kirikukanganyangip.’ Talany anch mu verse wa 8, Paul ulondil mazu manam piur pa yipan ya spiritu, pamwing ni kubwak ni kulond mu jindim—yom yasadilau mu chikumangen cha Ukristu pachasambisha—anch yikez kusut. Yikez kupwa. Pakwez rukat rikushakam chikupu. Yehova amwinend udi rukat, niyend udi wa chikupu. Chawiy rukat kirikez kukanganyap, ni kirikezap kupwa. Rikez kwikalaku chikupu mudi ngikadil ya Nzamb wetu wa chikupu.—1 Yoh. 4:8.

Rukat Rikat Kujamish mu Yom Yawonsu

14, 15. (a) Mutapu ik ukutwisha rukat kutukwash tujijamena ku yoziu? (b) Mulong wak mukadivar umwing nsand walika kwitun ritiy rend?

14 Yom ik yikata kuyitwishish in Kristu kujamish kwikalap nchik yoziu, mikadil ya mar ni yikokujol yirishiningau nich? Chiding pakampwil rukat rengamidina pa yijidik. Rukat riner riyiling kulemp kupandakanamu pa kulik mapit metu ma ku mujimbu. Riyiling kulemp djat ni mu chilik cha kusot kulam kujijaman kwetu ni ap mu chilik cha kufa mulong wa Kristu. (Luka 9:24, 25) Kutongijokin pa mwom wa Atuman ashinshamena amana mar mu makompony ni mu yibeng ya mar, ni ayidjibwila mu rukan pa chisu chinicha ni kupwa kwa Njit ja 2 ja Mangand.

15 Nsand umwing Kaman wa mu Allemagne ukweta dijin dia Wilhelm udi chilakej chiwamp cha mikadil yiney. Pa ndond pa kwitun ritiy, ndiy washinshamana ap anch adinga ni kumulej kudi amasalay in Nazi anch akumuloz. Ndiy wafundina dijuku diend mu mukand wend wa kuyiladik, ndiy wafunda anch: “Tufanyidin kumukat Nzamb kupandakanamu yom yawonsu, mudi mwalonday Yesu Kristu Kalal wetu. Anch twalamat kudi ndiy, ukez kutufut.” Kupwa, mu mutu wa mulong wa mu Chinong cha Kalam, muntu umwing wa mu dijuku diend wafunda anch: “Mu chisu cha kanrumbangesh, twamana mu dijuku diend anch kumukat kwetu Nzamb kwadinga pa ndond ya kusambish.” Yawiy ngikadil yikwetau akadivar avud ajijamedina katat mu Arménie, Corée du sud, Érythrée, ni mu jingand jikwau. Akadivar inay ajijamen mu rukat rau mulong wa Yehova.

16. Yom ik yajijamenau akadivar netu a mu Malawi?

16 Mu jindond jivud, yoziu ya mutapu kushalijan yipakin ritiy ni kujijaman kwa akadivar netu. Atuman a Yehova a mu Malawi ajijamedin kuyilikish kudiay guvernema mu mivu 26, ni mar mavud kushalijan. Ayiyukisha mulong wa kujijaman kwau. Pa chisu chasambishau kuyizengol, kwadinga mwi ngand yawonsu Atuman 18000. Kupwa kwa mivu makum masatu ashikedin kal ku uvud wa 38393. Yawiy yibudikin ya chilik chimwing yimekena mu jingand jikwau.

17. Yom ik yirishinau nich antu amwing adia mu majuku maurikina mu ritiy, ni mulong wak ukatau kujijamen mar?

17 Chisu chivud kuding kuyirishish patok antu a Nzamb. Pakatau kuyipompat in Kristu umwing umwing kudiau anamakwau, chidi chishalijadina. Yid ya chikumbu ap anamaku akutwish alet yakamish nakash. Ov, Yesu kalondap anch yom yiney yikez kusadik? Mwaning, ni avud au ashikedin kal kuman uyakin wa mazu minam. (Mat. 10:35, 36) Ansand akat kujijamen rupompat rikash kudiokal kudiau anvajau akad kwitiyij. Amwing au ashikena ku kuyopat kwolikwau, pakwez ayaka kudi Atuman. Akwau niyau ayilika kal kwau. Chom ik chikata kuyitwishish antu mudi inay kujijamen ku yisal yiney yiyimp? Kichidiap ching kusu rukat rau mulong wa akadivar pakwez, chipandakenamu, chidi rukat rau rakin mulong wa Yehova ni Mwanend.—1 Pita 1:22; 1 Yoh. 4:21.

18. Rukat rikata kujijamen yom yawonsu riyikwashining nchik in Kristu atijadina?

18 Kudi mikadil yivud mu mwom yitininga ching rukat chakwel kuyijijamen yom yiney yawonsu. Mu uruw, rukat rikat kuyitwishish atijadina chakwel alimisha mazu manam ma Yesu: “Chabombakeshay kal Nzamb wachinung, pikil muntu wachauril.” (Mat. 19:6) Pikudinga “milong,” in Kristu atijadina afanyidin kuvurik anch Yehova udi wa usey mu uruw wau. (1 Kor. 7:28) Dizu Diend dilondil anch: ‘rukat rikat kujamish mu yom yawonsu,’ ni ikundj ni mukajend akweta ngikadil yiney ayikasikeshin chakwel ashinshamana umwing kudi mukwau chakwel alama uruw wau ukash.—Kol. 3:14.

19. Chom ik chasadika mukach mwa antu a Nzamb kupwa kwa yak ya chitangil?

19 Rukat ritukwashining kujijamen yom yawonsu mu yisu ya mar ma yak ya chitangil. Mwamu chasadika pa chisu chazala divu mu Pérou ni pa chisu chasheshay Rinkind Mukash ujimbwilau anch Katrina yikunku ya teritwar wa Golfe mu États-Unis. Akadivar netu avud ashadisha yikumbu yau ni mapit mau mu yak yiney ya chitangil. Rukat rabachika chikumangen chawonsu cha pa mangand chakwel chiyikwasha, ni antu in kusal mudimu wa kwikatin ayikwasha kutunguril yikumbu ni kurijek Yot ya Want. Yisal yiney yamekesha anch tuyikatin akadivar netu ni kwibangin umwing ni mukwau pa yisu yawonsu ni mu mikadil ap yisu.—Yoh. 13:34, 35; 1 Pita 2:17.

Rukat Kirikunganyangip

20, 21. (a) Mulong wak rukat ridi ra usey nakash? (b) Mulong wak ukwatina mupak wa kulondul njil ya rukat?

20 Tumening manangu ma kulondul njil yipandakenamu kuwap ya rukat mukach mwa antu a nlel a Yehova. Chakin kamu, yipandakenamu kuwap mu mikadil yin yawonsu. Talany mutapu wakasikeshinay kambuy Paul uyakin winou. Cha kusambish, wisambina piur pa yipan ya spiritu anch yikez kusut ni anch chikumangen cha Ukristu chikukul kudiosh kwinsambishil kwach djat ni ku kukul. Ni wapwisha nich kulond anch: “Chawiy kudi ritiy, ruchingej, rukat, yom yiney yisatu, ni chipandakenamu ku yawonsu yiney, rukat.”—1 Kor. 13:13

21 Chakin kamu, yom yitukata kwitiyijin yikez kwikal uyakin, ni tukezap kand kuswiriken kwikal ni ritiy mu yom yiney. Kwashal kal ka chisu kakemp ni yakushilamu yitukata kuchingejin yikez kuwanyin pakeza kwikal yom yawonsu yisu. Pakwez chikez kwikal nchik piur pa rukat? Rukat kirikezap kukangany, ap anch kusul. Rikez kushal. Nich chitongijok cha mwom wa chikupu mu manangu, tukez kuman ni kutesh kurumburik kwa mitambu yikwau ya rukat ra Nzamb. Kusutil ku kusal rusot ra Nzamb ni kulondul njil yipandakenamu kuwap ya rukat rakad kwez kukangany, tukez kutwish kushakam chikupu.—1 Yoh. 2:17.

Ukwakul Nchik?

• Mulong wak tufanyidina kwilam palemp nich rukat rakad kufanyin?

• Rukat rikutwish ratukwash tujijamena ik?

• Rukat kirikatap kukangany mwi njil ik?

[Chipich chidia pa paj wa 27]

Mufund wa muvu wa 2010 ukez kwikal: ‘Rukat rikat kujamish mu yom yawonsu. Rukat kirikukanganyangip.’—1 Kor. 13:7, 8.

[Chipich chidia pa paj wa 26]

Rukat rakad kukangany rayitwishisha akadivar ni anambaz netu a mu Malawi kujijamen yoziu

    Mikand ya Uruund (1999-2025)
    Budik
    Andam
    • Uruund
    • Kwangan
    • Yom ukatina
    • Copyright © 2025 Watch Tower Bible and Tract Society of Pennsylvania
    • Mbil ja Kusadin
    • Mbil ja Ujindj
    • Paramètres de confidentialité
    • JW.ORG
    • Andam
    Kwangan