Chisak Chimwing Ni Kafung Umwing

“Niyen . . . in kwinlondul am, ukez kashakamany pa matand ma kuyikel michid dikum ni yaad ya in Isarel.”—MAT. 19:28, MN.

1. Mutapu ik washakamay Yehova ni an a Aburaham, ni mutapu ik chirumburikinap anch wayilika antu akwau awonsu?

YEHOVA wamukata Aburaham, chawiy chayimekeshinay anend rukat rakin. Mu mivu chitot ni dikum ni yitan, waumana muchid wa in Isarel, wavadikina kudi Aburaham, mudi antu atonday, “antwend a pa kampwil.” (Tang Kuvurik Yijil 7:6, MN.) Ov chinech chirumburikin anch Yehova wayilika kamu antu a michid yikwau? Bwat. Pa chisu chinicha, akad kwikal in Isarel asota kumwifukwil Yehova ayilikidila chakwel inunga ayinau ku muchid winou wa pakampwil. Antu inay in kwitiyij, ap angez, ading ayimen mudi chikunku cha muchid. Ading ayimen mudi anamakwau. (Lev. 19:33, 34) Ni afanyidina kuziyil ku yijil yawonsu ya Yehova.—Lev. 24:22.

2. Ov, mazu ik ma kusambish malonday Yesu, ni malangwishin yipul ik?

² Pakwez, Yesu walonda mazu minam ma kusambish kudi in Yuda a pachirung chend anch: “Akez kakwamukany Want wa Nzamb, akez kaupan kudi antu a muchid ukwau akata kusal mudi musotilay Nzamb.” (Mat. 21:43, MN) Ov, anany ela kusal muchid winou usu, ni mutapu ik nlel unou tukwachikina nich kuswimp kwinoku?

Muchid Usu

3, 4. (a) Ov, kambuy Pita ujimbwil mutapu ik muchid usu? (b) Anany adia muchid winou usu?

³ Kambuy Pita waujingunina patok muchid winou usu. Ndiy wayifundina ambay nend in Kristu mazu minam anch: “Udiany muchid watonday Nzamb. Udiany chisak cha in kupesh a Mwant Nzamb, udiany muchid utumbila, udiany antu a Nzamb a pa kampwil, Ndiy wakutondanya en chakwel ukutwishany kurumburil yisalijok yikwamushena ya Nzamb, ndiy kamu wakuzukanya en kudiokal mu mididim, wandamany mu chimunyik chend chikwamushinena.” (1 Pita 2:9, MN) Mudi mwatakelau kulejan, in Yuda a chivadik amwitiyija Yesu mudi Mesia ading yidi ya kusambish ya muchid usu. (Dan. 9:27a; Mat. 10:6) Kupwa, antu avud akad kwikal in Isarel ayibombakesha niyawiy ku muchid winou, chawiy chalonday Pita anch: “Pakur en wadiany antu amwamu, pakwez katat en udiany antu a Nzamb.”—1 Pita 2:10, MN.

⁴ Ov Pita wading uyilejin a nany? Kwinsambishil kwa mukand wend, ndiy ulondin anch: “Ku riy rend [Nzamb] rijim twavadika kapamp kakwau mulong wa kuvumbuk kwa Yesu Kristu kwikal kand mwom. Mulong wa chom chinech tukwet ruchingej rujim ra kashinsh. Tuchingejin uswan wakad kuvund, ap kuyip, ap kusheshik, ulaminau mwiur kudi Nzamb mulong wenen.” (1 Pita 1:3, 4, MN) Chawiy lel muchid winou usu udi wa in Kristu azizidilau many, akweta ruchingej ra kushakam mwiur. Awiy adi “in Isarel akin a Nzamb.” (Gal. 6:16) Kambuy Yohan wayimana mu chishimushimu in Isarel inay a muspiritu mu uvud wa 144 000. Antu inay “ayikwola mukach mwa antu akwau chakwel akwikal mulambu wa kusambish kudi Nzamb ni kudi Mukoku” ikala “in kupesh” ni “akez kayikel pamwing nend Kristu mu mivu kanan.”—Kubur. 5:10; 7:4; 14:1, 4; 20:6; Yak. 1:18.

Ov, Antu Akwau Adi Niyawiy mu Muchid Winou?

5. (a) Ov, dizu “in Isarel akin a Nzamb” disambididin anany? (b) Mulong wak dizu “in Isarel” dikwetingap kurumburik kusu kumwing?

⁵ Chimeken patok anch, dizu “in Isarel akin a Nzamb” didia mu Galatia 6:16 disambidin ching kusu in Kristu azizidilau many. Ov, kudi yisu Yehova yasadilay muchid wa in Isarel mu chifanikesh, ap chilikej, wawejaku ni in Kristu akwau akad kuzizil many? Chitwishikin kutan chakul mu yayilejay Yesu atwimbuy end ashinshamena anch: “Chawiy am nakutondidilany kal en want, mudi mwantondilau am kudi Tatuku, chakwel en ukudiany ni kunany ku mes mamam mu want wam; en ukez kashakamany mu jinkwas ni kurumburish michid ya Isarel dikum ni yaad.” (Luka 22:28-30) Yiney yikez kusadik pa chisu cha “kupim,” ap chisu cha mwom usu, mu Mivu Kanan ya kuyikel kwa Kristu.—Tang Mateu 19:28, NW.

6, 7. Ov, dizu “michid dikum ni yaad ya in Isarel” diyisambidin anany mu Mateu 19:28 ni mu Luka 22:30?

⁶ Antu 144 000 akez kusal mudi ant, in kupesh, ni in kurumburish mwiur mu Mivu Kanan ya Kuyikel. (Kubur. 20:4) Ov, akez kuyirumburish, ni kuyiyikel anany? Mu Mateu 19:28 ni mu Luka 22:30, atulejin anch akez kuyirumburish “michid dikum ni yaad ya in Isarel.” Ov, anany ayifanikeshinau nich “michid dikum ni yaad ya in Isarel” pinap? Ayifanikeshin antu awonsu akweta ruchingej ra kushakam pa divu—antu atekina ritiy mu yakupesh ya Yesu pakwez kadap mu chisak cha in kupesh a mwant. (Muchid wa in Levi kautekap pakach pa michid 12 ya in Isarel a chivadik.) Antu afanikeshinau pinap nich michid 12 ya in Isarel adi awiy akeza kutambul yiyukish ya muspiritu kusutil ku midimu ya win kupesh wa antu 144 000. Antu inay atambwila yiyukish akad kwikal in kupesh, niyawiy adi antu a Nzamb, ni Nzamb uyikatishin ni uyitiyijin. Chawiy chiyifanikeshinau nich antwend a pasak.

⁷ Chawiy lel, kupwa kwa kambuy Yohan kuyiman in Isarel a muspiritu 144000 atekau yijingidij rawonsu kurutu kwa mar makash mapandakena, ndiy wamana kand uvud wakad kuchind wa “chisak chipandikena kujimb,” cha “michid yawonsu.” (Kubur. 7:9) Inay akez kupand ku mar makash mapandakena ni kwandam mu Mivu Kanan ya Kuyikel kwa Kristu. Tutikit ni tutikit twa antu akuvumbuka tukwez kwinung ku chisak chinech. (Yoh. 5:28, 29; Kubur. 20:13) Awonsu inay akez kusal “michid dikum ni yaad ya in Isarel” mu chifanikesh, akez kayirumburish kudi Yesu ni antu akuyikelay nend 144 000.—Mid. 17:31; 24:15; Kubur. 20:12.

8. Mutapu ik yinship ya Dichuku dia Kwichakwil dia pa muvu yatakela kulejan urund wa pakach pa antu 144000 ni antu akwau mu mangand?

⁸ Urund winou pakach pa antu 144000 ni antu akwau mu mangand atakela kuumekesh pa yinship ya Dichuku dia Kwichakwil dia pa muvu. (Lev. 16:6-10) Mwin kupesh mujim wafanyidina, kusambish pakach pa awonsu, kulambul ikwal angomb kwikal yakupesh ya yitil “ya amwinend, ni kwichakwil amwinend ni in dijuku diend.” Chawiy lel, yakupesh ya Yesu yisadikin bil cha kusambish piur pa dijuku diend dia in kupesh pamwing nau, antu akeza kusal nend mwiur. Chikwau kand pa Dichuku dia Kwichakwil dia pasak, ading akat kulambul amakwal a ngomb aad mulong wa yitil ya in Isarel akwau. Pa chinech, ndond jifanikeshinau muchid wa in kupesh nich 144 000, in Isarel akwau ayifanikeshin nich antu awonsu akweta ruchingej ra kushakam pa divu. Chitongijok chinech chijimbishin kurumburik kwa dizu “michid dikum ni yaad ya in Isarel” kupwa kwa in kupesh a Yesu avadikina nich spiritu, kuwejaku ni antu awonsu atekina ritiy mu yakupesh ya Yesu.a

9. Ov, in kupesh a mu chishimushimu cha tempel cha Ezekiel adi anany, ni anany afanikeshinau nich in Isarel akad kwikal in kupesh?

⁹ Shinshikinany chilakej chikwau. Muprofet Ezekiel wamana chishimushimu cha chikumbu cha Nzamb mu mutapu upandakena kujimb. (Ezek., chap. wa 40-48) Mu chishimushimu chinech, wayimana in kupesh akat kusal mu tempel, akat kulejan, ni kutambul yiyul ni yijil ya Yehova. (Ezek. 44:23-31) Wayimana kand, yidi ya michid kushalijan yezin kwifukwil ni kulambul yakupesh. (Ezek. 45:16, 17) Pinap, anch in kupesh ayifanikeshin nich azizidilau many, pakwez in Isarel a michid yakad kwikal in kupesh ayifanikeshin nich antu akweta ruchingej ra kushakam pa divu. Chishimushimu chilejen anch yisak yiney yaad yisadil pamwing pakad kupwitijan, nich chisak cha in kupesh chitakedila mu difukwil didia zwang.

10, 11. (a) Ov, kuwanyin ik kwa mazu ma Yesu kukasikeshina ritiy kutwamena? (b) Ov yipul ik yilankina piur pa amikoku akwau?

¹⁰ Yesu walonda anch “amikoku akwau,” kadap mu “diyind” dimwing nich “chisak chikemp” cha in kumulondul end azizidilau many. (Yoh. 10:16; Luka 12:32) Ndiy walejana anch: “Nifanyidin kuyilet kand. Awiy akez katesh dizu diam, chad awonsu akez kikal chisak chimwing ni kafung wau umwing.” Chidi chom chikasikeshina ritiy mud ik pakuman kuwanyin kwa mazu minam! Yisak yaad ya antu ayinungin pamwing—kachisak kakemp ka azizidilau many ni chisak chipandakena kujimb cha amikoku akwau. (Tang Zakariy 8:23.) Ap anch amikoku akwau kasadinap mu chifanikesh mu chipang cha mukach cha tempel cha muspiritu, pakwez asadil mu chipang cha pol pa tempel winou.

¹¹ Pakwez anch Yehova wayisadila chisu ni chisu yidi yakad kwikal in kupesh ya Isarel wa pasak mulong wa kuyifanikesh amikoku akwau inay, ov antu akweta ritiy ra kushakam pa divu kafanyidinap niyawiy kudia ku yijingidij ya Chivurikish? Tonginany katat pa chakul ku chipul chinech.

Manswik Masu

12. Ditenchik ik disu diatakelay kulejan Yehova?

¹² Yehova watakela kulejan ditenchik disu mulong wa antwend palonday anch: “Manswik minam masu minikeza kasuk nau in Isarel makwikal mwamu. . . . Am nikez katek yijil yam mukach mwau, nikez kayifund mu michim yau. Am nikez kikal Nzamb wau, niyau akez kikal antwam.” (Yer. 31:31-33, MN) Kusutil manswik minam masu, kushilamu kwa Yehova kudi Aburaham kwading kwa kwikal nich chishiken cha ntumb ni cha chikupu.—Tang Disambishil 22:18.

13, 14. (a) Ov, anany asukina mu manswik masu? (b) Anany atambwila yiyukish, ni mutapu ik ‘ulaminau’ manswik minam masu?

¹³ Yesu wisambina pa manswik minam masu uchuku kurutu kwa rufu rend palonday anch: “Rupas riner rawiy manswik masu ma Nzamb, makasikeshinau nich mash mam, madjishau mulong wenen.” (Luka 22:20; 1 Kor. 11:25) Ov, in Kristu awonsu asuka manswik minam masu? Bwat. Amwing, mudi apostol anina ku rupas ra pa urel pinipa, adi mu manswik masu.b Yesu wasuka manswik makwau ni awiy chakwel ayikela nend mu Want wend. (Luka 22:28-30) Akez kuyikel nenday Yesu mu Want wend.—Luka 22:15, 16.

¹⁴ Chidi nchik piur pa antu akeza kushakam pa divu mu Want wend? Adi antu atambwila yiyukish ya manswik masu. (Gal. 3:8, 9) Ap anch kasukinap manswik, ‘alamin’ manswik minam kusutil ku kuziyil ku yitiyij yau, mudi mwatakelau kulejan kudi muprofet Isay anch: “Angez ibombila nau antwend, awiy kamu angez amukatila ndiy, ni kumusadil, ni kulimish dichuku dia kwiswedish, akweta kand kashinsh ka kulam manswik mend.” Ulondil kudi awiy anch: “Nikez kakutwalany ku Sion, ku mukandu wam utumbila. Nikez kakwinkishany musangar mu chikumbu cham cha kulembidil.” Kupwa Yehova walond anch: “Chikumbu cham akez kachitazuk anch, chikumbu cha kulembidil cha antu a michid yawonsu.”—Isay 56:6, 7, MN.

Ov, Anany Afanyidina Kudia Kuyijingidij?

15, 16. (a) Yik yilondinay kambuy Paul piur pa manswik masu? (b) Ov, mulong wak antu akweta ruchingej ra kushakam pa divu kafanyidinap kudia ku yijingidij ya Chivurikish?

¹⁵ Antu adia mu manswik masu ‘akwet want ipau wa kwandam mwin ndond yitumbila nakash.’ (Tang Hebereu 10:15-20.) Inay adi antu “atambwila want wakad kutwish kunyikek.” (Heb. 12:28) Chawiy lel, ching antu akeza kwikal ant ni in kupesh mwiur pamwing nend Yesu Kristu awiy afanyidina kuna ku “rupas” rifanikeshina manswik masu. In kusuk mu manswik masu adi antu atondau kusal uruw ni mwan a Mukoku. (2 Kor. 11:2; Kubur. 21:2, 9) Antu akwau akata kukumangan ku Chivurikish cha pa muvu akat kutalang kwau nich kalimish, awiy kakatap kudiang ku yijingidij.

¹⁶ Paul utukwashin kand twijika anch antu akweta ruchingej ra kushakam pa divu kakutwishap kuda ku yijingidij ya Chivurikish. Ndiy wayileja in Kristu azizidilau many anch: “Piukudianya mabot ni piukunany nviny mu rupas riner ra Mes ma Mwant, en ukat kwijikeshany patok rufu ra Nsalejetu djat ni pa kwezilay.” (1 Kor. 11:26) Ov, Mwant ‘wezin’ chisu ik? Pezinay kuchisend chisak cha nsudiel cha ngachik uzizidilau many ni kuchitwal kwol kwach kwa muspiritu. (Yoh. 14:2, 3) Chimeken patok anch, chivurikish cha pa muvu cha Yakudia ya Urel ya Mwant chikezap kudandamen chikupu. ‘Atushal’ a mbut ya mband achidia pa divu akez kudandamen kuda yakidia yiney kushik ni pakutambulau awonsu yiyukish yau ya mwiur. (Kubur. 12:17) Anch, antu akeza kushakam pa divu chikupu adinga nich mbil ya kudia ku yijingidij, yakudia ya Chivurikish yela kudandamen chikupu.

“Akez Kwikwal Chakin Kamu Antwam”

17, 18. Ov, mutapu ik uprofet wafundau mu mukand wa Ezekiel 37:26, 27 wawanyina?

¹⁷ Yehova watakela kulond piur pa uumwing wa antwend mu mazu minam anch: “Nikez kasuk nau manswik ma kushilamu kwa kuyichidij chikupu, Nikez kayijamish, ni kuyivudish, chad nikez katek Chikumbu cha [Yehova] chitumbila mwi ngand yau chikupu. Am nikez kashakam nau mwinimwa. Yam nikeza kikal Nzamb wau, niyau akez kikal antwam.”—Ezek. 37:26, 27.

¹⁸ Antu awonsu a Nzamb akwez kutaninamu mu kuwanyin kwa kushilamu kwinoku kwamushena, manswik minam ma chisambu cha win Kristu. Chakin, Yehova wayilamidin kal atushalapol end awonsu aziyidina chisambu. Dibuj dia muspiritu dimeken patok pakach pau. Ndond yend yitumbila, yifanikeshinau pinap nich difukwil dia in Kristu didia zwang, yidi pakach pau. Ikadin kal chakin kamu antwend, mulong alikin kal milad yawonsu ya kwifukwil akish ni Yehova wikadin kal kusu Nzamb wifukwilau.

19, 20. Ov, anany andamina pakach pa antu atazukinay Yehova anch “antwam,” ni yik yasidina anch manswik masu matwishika?

¹⁹ Chading chamushena mudi ik pa kupan uman wa kwinung kwinoku kwa yisak yiney pa chirung chetu! Ap anch chisak chidandamedina kupandakan kujimb chikwetap ruchingej ra kuya mwiur, asangeridin kwinung nich antu akweta ruchingej rinira. Inunga ayinau kudi Isarel wa Nzamb. Kusutil ku kusal mwamu, andamin pakach pa antu atazukinay Yehova anch “antwam.” Kudi awiy tutanin kuwanyin kwa uprofet winou ulondina anch: “Michid yivud yikez chakin kamu kwinung kudi Yehova pa dichuku dinidia, ni akez kwikwal chakin kamu antwam; ni am nikez kashakam pakach pen.”—Zak. 2:11; 8:21, NW; tang Isay 65:22; Kuburik 21:3, 4.

²⁰ Kusutil manswik masu, Yehova wasala anch yiney yawonsu yitwishika kusadik. Mamiliyon ma angez a muspiritu mikala chikunku cha muchid wayukishau kudi Yehova. (Mike 4:1-5) Akwatin mupak wa kudandamen kulam manswik kusutil ku kwitiyij yitenchik yau ni ku kuziyil kwi mbil yau. (Isay 56:6, 7) Mu kusal mwamu, pamwing nau in Isarel a Nzamb, asangeridin yiyukish yivud ya chisambu cha rawonsu. El amboku yiney yikala yiyukish yey—katat ni pa yisu yawonsu yikweza!

[Mazu madia kwishin kwa paj]

Ov, Uvurikin?

• Ov, anany adia “michid dikum ni yaad ya in Isarel” ya antu 144000 akeza karumburish?

• Urund ik udia pakash pa azizidilau many ni amikoku akwau mu manswik masu?

• Ov, in Kristu awonsu afanyidin kudia ku yijingidij ya Chivurikish?

• Uumwing ik watakelau kulejan mulong wa chirung chetu?