Mushejina Nzamb Piswimp

Ndiy Ukat Kushinshikin Yitentamina Mudiay Muntu

1 ANT 14:13

“YEHOVA ukat kusand mu michim yawonsu, ndiy ukat kwonganyin kurijek kwa muntu ni yitongijok yend yawonsu.” (1 Jinsangu 28:9, NW) Mazu minam mapepidilau amafunda mulong wa kwel anch twizula sens nich kujikitish mulong wa mutapu ujim nakash utubangindinay Yehova. Yehova ukat kushinshikin yitentamina mu michim yetu ap anch tudi akad kuwanyin. Chinech chidi chakin mu mazu mend pantaliken ni Abijam, madia mu 1 Ant 14:13.

Abijam washakama mu dijuku dia antu ayimp. Tatukwend, Jerobowam, wading ku mutu kwa want wa in kupumbwok.a Yehova wasota kushesh dijuku dia Jerobowam, “mudi mukat kukombau yiyimp.” (1 Ant 14:10) Pakwez Nzamb warijeka chakwel chid chimwing kusu cha mu dijuku dia Jerobowam, Abijam—wadinga uyedina nakash—Amujika nawamp mwi Nzay.b Mulong wak? Nzamb urumburil anch: “Mulong ching mwi ndiy kusu mwawiy mwatanyinay [Yehova] Nzamb wa Isarel yom yitentamina mu dijuku dia Jerobowam.” (1 Ant 14:1, 12, 13) Mazu minam matulejin chom ik piur pa Abijam?

Bibil kalondinap anch Abijam wadinga kashalapol ushinshamena wa Nzamb. Pakwez, mwi ndiy mwading yom yitentamina. Yom yiney yitentamina yadinga ‘pantaliken ni Yehova,’ pamwing ap yambatena ni difukwil Ndiend. Mwin kufund wa Rabbinic walonda anch pamwing ap Abijam waya ku tempel ku Jerusalem ap anch wayidiosha atulam atekay tatukwend chakwel kuyikangesh in Isarel kuya ku Jerusalem.

Ap anch twijap nawamp yom yitentamina yasala, yom yitentamina ya Abijam yading yimeken patok. Chakusambish, chading cha kin. Yom yitentamina yiney yadinga “mwi ndiy”—chirumburikina, mu muchim wend. Chakaad, chading cha pakampwil. Abijam wamekesha yom yitentamina yiney ap anch wading mu “dijuku dia Jerobowam.” Kashalapol umwing wa Bibil ulondin anch: “Chidi cha kushiman nakash kudi amakundj kulam yom yau yitentamina pashichau mwi ndond yiyimp ni mu majuku mayimp.” Mukwau ulondin anch yom yitentamina ya Abijam yading “yimekena patok . . . , mudi kamu mukata atutumbu kumunyik pajadina diur, ni mutond wa mukamb anch audiosh mitiy yiuyingumukina.”

Cha usey nakash, mazu ma 1 Ant 14:13 matufundishin chom chimwing chipandakena kuwap piur pa Yehova ni yikatay kushinshikin mukach mwetu. Matuvurishin anch chom kanang chitentamina ‘achitana mwi ndiy’ Abijam. Yehova chakin kamu ukat kusand mu muchim wa Abijam djat ni pataninay chijingidij cha yom yitentamina. Mu kwisikesh ni dijuku diend, Abijam wading, mudi mwafunday nfund umwing anch, mudi diyal dimwing kusu dia usey ukash “pakach pa muruzu wa mayal.” Yehova wasangera kutentam kwinoku ni wakuyukisha, wa mwovila riy chid chimwing chinech cha dijuku diyimp.

Ov, chitushimokishinap kwijik anch Yehova ukat kusand chakwel akwata nich usey kutentam kwetu chikalap nchik kuburen kuwanyin kwetu? (Kuseng 130:3) Kwijik chom chinech kukutubachik kumushejin Yehova piswimp, Nzamb ukata kushishikin nawamp muchim wetu mu kukimb ap kachijingidij kakemp ka yom yitentamina.

[Mazu madia kwishin kwa paj]