Mutapu Watumbishay Yesu Kutentam Kwa Nzamb

“Ni Nzamb wamuteka [Kristu] kwikal cha kuchakwish nich ku ritiy mu mash mend, chakwel alejan kutentam kwend.”—ROM 3:25.

1, 2. (a) Ov, chom ik chitufundishinay Bibil piur pa mwikadil wa antu? (b) Ov, yipul ik yikezau kwakul mu mutu wa mulong winou?

RUSANGU ra Bibil piur pa kubwambwil mu chir cha Eden rijiken nawamp. Etwawonsu tumening yibudikin ya chitil mudi mulejenau mu mazu minam anch: “Chawiy mudi chitil chandama mu mangand mulong wa muntu umwing, ni rufu randama mulong wa chitil, chawiy rufu rashika kudi antu awonsu mulong antu awonsu asala chitil.” (Rom 5:12) Ap anch tusadin usu mulong wa kupakish kusal yom yitentamina, tukat kurumbuk, chawiy chitufanyidina dilikishin dia Nzamb. Ap kambuy Paul winana anch: “Yiwamp yinisotila kusal kinikat kuyisalip, pakwez yiyimp yinikisila kusal yawiy yinikata kusal. Am muntu ntany!”—Rom 7:19, 24.

² Mwikadil wetu wa akayitil ulangwishin yipul yiney ya usey: Ov, mutapu ik chatwishika kudi Yesu wa ku Nazaret kuvadik pakad kuswan chitil, ni mulong wak amubatisha? Ov, mwom wa Yesu watumbisha mutapu ik kutentam kwa Yehova? Cha usey nakash, ov, rufu ra Yesu rawanyisha chom ik?

Kitiyap Kutentam Kwa Nzamb

3. Ov, Satan wamudimba Ev mutapu ik?

³ Anvaj etu akusambish, Adam ni Ev, alika cha usup ukaleng wa Nzamb chakwel asambisha kuyitakel kudi “Nnak mukur upidilau anch Djabul ni Satan.” (Kubuj. 12:9) Tal mutapu yashikena yom yiney. Satan watadika kutentam kwa witankel wa Yehova Nzamb. Ndiy wasala mwamu pamwipulay Ev anch: “Ov, komb Nzamb wakulejinany anch: ‘Kangal wadiany mitond ya mu chir?’” Ev wachirikina chijil chovikena patok anch kafanyidinap kuda ku mutond winou, mulong akez kufa. Pakwel Satan wamufisha nich Nzamb anch ukat kudimban. Djabul walonda anch: “Kiukufanyap kwen, bwat.” Ndiy wasambisha kumudimb Ev chakwel itiyija anch Nzamb wayijindjika chom chimwing chiwamp ni kusutil ku kudia dibuj ukez kwikal mudi Nzamb, ni kwikal nich want ipau.—Dis. 3:1-5.

4. Ov, mutapu ik wandamau antu mwishin mwa ukaleng wa Satan?

⁴ Chimekeshin anch, Satan wasota kulejan anch antu akez kwikal ni musangar anch alondul jinjil ja kulik kumuziyil Nzamb. Pandond pa kukasikesh kutentam kwa ukaleng wa Nzamb, Adam wamutesha mukajend ni wadia ni ndiy dibuj diayilikishau. Chawiy lel, Adam washadisha mwikadil wend uwanyidina kumes kwa Yehova ni watuteka mwishin mwa uswik ukash wa chitil ni rufu. Kudiosh pinipa, antu andama mu ukaleng wa Satan, ‘nzamb wa mangand minam.’—2 Kor. 4:4; Rom 7:14.

5. (a) Ov, mutapu ik mwamekeshay Yehova anch ushinshamen ku dizu diend? (b) Ov, rusot ik rayinkishay Nzamb anend a Adam ni Ev?

⁵ Chidiay mwin kushinshaman ku dizu diend, Yehova wayirumburisha Adam ni Ev anch akez kufa. (Dis. 3:16-19) Pakwez, chinech chirumburikinap anch rutong ra Nzamb rela kukangany kusadik. Rela kusadik kamu! Payirumburishau Adam ni Ev, Yehova wayinkisha anau akeza kuvadik ruchingej ramushena. Ndiy wasala mwamu palejanay rutong rend ra kulet “mbut” yikezau kusum kudi Satan ku kapolantundu. Pakwez, Mbut ya kushilamu yikez kuyerik ku kapolantundu kend ni yikez ‘kamuchany [Satan] ku mutu.’ (Dis. 3:15) Bibil wimedin pa mutu wa mulong winou kusutil ku yom yiney piur pa Yesu Kristu anch: “Pa chinech Mwan a Nzamb weza, chakwel ndiy ukutwish kushesh mudimu wa Satan.” (1 Yohan 3:8) Ov, yisal ni rufu ra Yesu yatumbisha mutapu ik kutentam kwa Nzamb?

Kurumburik Kwa Dibatish dia Yesu

6. Ov, mutapu ik twija anch Yesu kaswanap chitil cha Adam?

⁶ Padingay mukurump, Yesu wadinga chilik chimwing ni Adam padingay uwanyidina. (Rom 5:14; 1 Kor. 15:45) Chinech chirumburikin anch Yesu wavadika mwin kuwanyin. Ov, chinech chashikena mutapu ik? Mwangwel Gaburiel wamurumburila Mariy makwend a Yesu patok anch: “Mwiku utumbila ukez kakushirikin ey, mwamu ukash wa Nzamb ukez kikal ni yeyey. Mulong wa chom chinech, mwan winou utumbila akez kamupil anch Mwan a Nzamb.” (Luka 1:35) Padingay Yesu mwanikanch, Mariy wamuleja chakin kamu Yesu yom yimwing piur pa kuvadik kwend. Chawiy, Mariy ni Tatukwend Yosef wamulila pamutanau Yesu mu tempel wa Nzamb, nsand [Yesu] wayipula anch: “Ov, kiwadianyap wijany anch nifanyidin kwikal mu chikumbu cha tatukwam?” (Luka 2:49) Chimeken patok anch kudiosh ku wanikanch, Yesu wading wija anch ndiy wading Mwan a Nzamb. Chawiy lel, kutumbish kutentam kwa Nzamb kwading kwa usey nakash kudi ndiy.

7. Ov, chom ik cha usey chadingay nich Yesu?

⁷ Yesu wamekesha kusanger kwend kukash kwa yisakin ya muspiritu kusutil ku kukumangan pakad kujing mulong wa kwifukwil. Nich manangu mend mawanyidina, wading wilejin ni kutesh nawamp yom yawonsu yadingay ni kutesh ni kutang mu Mifund ya Hebereu. (Luka 4:16) Ndiy wading kand ni chom chikwau cha usey nakash—mujimbu uwanyidina wafanyidinay kupan mulong wa antu. Pamubatishay, Yesu walembila ni watongijokina piur pa mazu ma uprofet madia mu Kuseng 40:6-8.—Luka 3:21; tang Hebereu 10:5-10.a

8. Ov, mulong wak Yohan mubatish wapakisha kumulikish Yesu kutambul dibatish?

⁸ Chakusambish, Yohan Mubatish wasota kumulikish Yesu kumubatish. Ov, mulong wak? Mulong Yohan wading uyibatishin Ayuda mudi chijingidij cha kukarumuk kwau yitil ya kulik kuziyil ku Chijil. Padingay mwanamakwend wa piswimp, Yohan wafanyidina kwijik anch Yesu wading utentamina ni kadingap nich kuswir kwa kukarumuk. Yesu wamuleja Yohan anch afanyidina ku mubatish. Ndiy wamurumburila Yohan anch: “Pakwez katat, sal bil kwey mwamu. Mulong mutapu winou tukutwish kuwanyish kutenchik kwawonsu kwa Nzamb.”—Mat. 3:15, MN.

9. Ov, dibatish dia Yesu diafanikesha chom ik?

⁹ Chadingay muntu uwanyidina, Yesu wafanyidina kulond anch, mudi Adam, ndiy wading ni ukaliweny wa kuval an awanyidina. Pakwez, Yesu kasotap dikez dia mutapu winou mulong radingap rusot ra Yehova pantaliken nend. Nzamb wamutuma Yesu pa divu mulong wa kuwanyish chisend cha kwikal Mbut ya kushilamu, ap Mesia. Yesu wafanyidina kand kupan mwom wend wa chiuntu uwanyidina. (Tang Isay 53:5, 6, 12.) Chakin kamu, dibatish dia Yesu dikwetap kurumburik kumwing ni dibatish dietu. Yesu kipanap kudi Yehova, mulong ndiy wading mu muchid wa in Isarel wipana kal kudi Nzamb. Pakwez, dibatish dia Yesu diamekesha anch udi tayad mulong wa kusal rusot ra Nzamb mudi mwalejanau mu Mukand wa Nzamb piur pa Mesia.

10. Ov, chom ik chafanyidinay kusal mulong wa kuwanyish rusot ra Nzamb mudi Mesia, ni Yesu wova nchik pakusal mwamu?

¹⁰ Rusot ra Yehova piur pa Yesu rading ra kulejan rusangu ruwamp ra Want wa Nzamb, kwikadish in kwilej, chakwel niyawiy asala mudimu wa kuyikadish in kwilej mu machuku ma kurutu. Kwipan kwa Yesu amwinend kwamekesha kand rusot rend ra kujijaman mu yoziu ni mu rufu risansena mulong wa kukasikesh ukaleng utentamina wa Yehova Nzamb. Mulong Yesu wamukata chakin kamu Tatukwend wa mwiur, ndiy wasangera kusal rusot ra Nzamb ni wamana anch chidi chom chisangareshina nakash pa kupan mujimbu wend mudi yakupesh. (Yohan 14:31) Chamusangaresha kand kwijik anch usey wa mwom wend uwanyidina afanyidina ku upan kudi Nzamb mudi difut chakwel atulanda ni kutudiosh mu ubindj wa chitil ni rufu. Ov, Nzamb wela kwitiyij kwipan kwa Yesu amwinend mulong wa kusend yisend yiney yijim? Ndiy wela kwitiyij kamu!

11. Ov, mutapu ik wamekeshay Yehova anch ndiy wamwitiya Yesu mudi Mesia wa kushilamu ap Kristu?

¹¹ In kufund ma Evangil awonsu anying isambina piur pa mazu ma Yehova Nzamb malejenay patok anch ndiy wamwitiya Yesu pabudikay mu men ma kawit ka Yordan. Yohan Mubatish watambula uman walond anch: “Am naman spiritu ushirikin mwiur mudi iyemb, wamuwila [Yesu] . . . Am namen kal, nabudish uman anch, mwinou ndiy Mwan a Nzamb.” (Yohan 1:32-34) Chikwau kand, pa chisu chinicha Yehova walonda anch: “Ey udi Mwanam unikatila nakash.”—Mat. 3:17; Mar. 1:11; Luka 3:22.

Kushinshaman Djat ni ku Rufu

12. Ov, chom ik chasalay Yesu mu mivu yisatu ni chikunku kupwa kwa dibatish diend?

¹² Mu mivu yisatu ni chikunku, Yesu wipana amwinend mu kuyilej antu piur pa Tatukwend ni kutentam kwa ukaleng wa Nzamb. Ap anch kunyingumwok kwend ra pansh ndond yawonsu Mwingand ya Kushilamu kwamuziyisha, pakwez kwikil chom chamwimika chakwel alika kupan uman wa uyakin. (Yoh. 4:6, 34; 18:37) Yesu wayifundisha antu akwau piur pa Want wa Nzamb. Kusutil ku chilay wayoka ayej, ku kuyidish antu adinga ni nzal, ni ku kuyilangwish ap afu, ndiy wamekesha chikeza kusal Want mulong wa antu.—Mat. 11:4, 5.

13. Ov, chom ik chafundishay Yesu piur pa malembil?

¹³ Pandond pa kwitumbish amwinend mulong wa malejan ni mudimu wend wa kwokan, Yesu wapana chilakej chiwamp nakash cha kupan katumbu kawonsu kudi Yehova nich kwitudish. (Yoh. 5:19; 11:41-44) Yesu walejana kand yom ya usey nakash piur pa yitufanyidina kulembil. Mu malembil metu tufanyidin kwit anch dijin dia Nzamb, Yehova, “aditumbish” ni ukaleng utentamina wa Nzamb ukez kaswinkan pa wintakel uyimp wa Satan chakwel “[rusot rend] arusala pansh mudi mwiur.” (Mat. 6:9, 10) Yesu watubabesha kand anch tufanyidin kusal yom kwambatan nich malembil minam kusutil ku kusambel bil “kusurib want wend ni kutentam kwend.”—Mat. 6:33.

14. Ov, mulong wak Yesu wafanyidina kwikasikesh mulong wa kuwanyish mudimu wend mu rutong ra Nzamb ap anch ndiy wading uwanyidina?

¹⁴ Padinga ni kushejin piswimp chisu cha rufu rend ra kwipan, Yesu wasambisha kutongijokin nakash pa kujimb kwa chisend chikash chadingay nich. Rusot ra Tatukwend ni katumb kend yading yimedin pa kujijaman kwa Yesu mu yoziu yakad kutentam ni ku rufu risansena. Mu machuku matan kurutu kwa kufa kwend, Yesu walembila anch: “Katat mupim wam wakam kal, ing nikulong nchik? Tatuku, nchidija am ku chisu chinech? Pakwez, pa mulong winou wawiy unezila am ku chisu chinech!” Kupwa kwa kumekesh yovil yiney ya chiuntu, Yesu washinshikina pakad choy pa yom ya usey nakash kupwa walembila anch: “Tatuku, tumbish dijin diey!” Yehova wamwakula kapamp kamwing anch: “Naditumbish kal, nikez kaditumbish kand.” (Yoh. 12:27, 28) Mwaning, Yesu witiyija kusut mu yoziu yijim nakash ni kandikal yimushikenap muntu ap umwing. Chawiy lel, kutesh mazu minam ma Tatukwend wa mwiur, kwamwinkisha chakin kamu Yesu ruchingej rikash anch ukez kutwish kutumbish ni kukasikesh ukaleng wa Yehova. Ni watwisha kusal mwamu!

Chawanyisha Rufu ra Yesu

15. Piswimp ni kufa, ov, mulong wak Yesu walonda anch: “Chawanyin kal”?

¹⁵ Padingay Yesu ku mutond wa mar kwamupampinau, pasambishay kukatul mupim ndiy walonda anch: “Chawanyin kal.” (Yoh. 19:30) Chidi chom chijim nakash mud ik chatwishay Yesu kuwanyish nich ukwash wa Nzamb mu mivu yisatu ni chikunku kudiosh pamubatishau djat ni ku rufu rend! Pafay Yesu, divu diazala nakash, ni Ntakel wa amasalay a in Rom wadinga winkishau mbil ya kumujip washikena ku kulond anch: “Chakin kamu, mwinou wading Mwan a Nzamb.” (Mat. 27:54) Ntakel wa amasalay wamana pamwing ap mutapu mwadingau ni kumusip Yesu mulong ndiy walejana anch udi Mwan a Nzamb. Chikalap nchik mar mawonsu mamanay, Yesu walama kushinshaman kwend ni wamekesha anch Satan udi mwin kudimban muyimp nakash. Pantaliken ni antu awonsu akasikeshina ukaleng wa Nzamb, Satan walonda anch: “Yom yawonsu yikwetay muntu ukuyipan mulong wa kuchidij mwom wend.” (Job 2:4) Kusutil ku kushinshaman kwend, Yesu wamekesha anch Adam ni Ev ela kushinshaman mu yoziu yivud yau yipipela. Cha usey nakash pa yawonsu, chid anch mwom ni rufu ra Yesu yatumbisha kutentam kwa ukaleng wa Yehova. (Tang Jinswir 27:11.) Ov, rufu ra Yesu rawanyisha kand chom chikwau? Mwaning rawanyisha!

16, 17. (a) Ov, mulong wak chading chitwishikin kudi atuman a Yehova adingaku kurutu kwa Kristu chakwel ikala ni mwikadil utentamina pamwing ni Nzamb? (b) Ov, mutapu ik wayukishay Yehova kushinshaman kwa Mwanend, ni chom ik chidandamedinay Mwant Yesu Kristu kusal?

¹⁶ Atushalapol a Yehova amwing adingaku aom kurutu kwa Yesu kwez pa divu. Asangera mwikadil utentamina pamwing ni Nzamb ni ayinkisha ruchingej ra kuvumbuk. (Isay 25:8; Dan. 12:13) Pakwez, ov pa mufulandal ik ukutwishay Yehova Nzamb utumbila kuyiyukish antu akayitil mu mutapu wamushena mwamu? Bibil urumburil anch: “Nzamb wamuteka [Yesu Kristu] kwikal cha kuchakwish nich ku ritiy mu mash mend, chakwel alejana kutentam kwend payijimangeshilay yitil yasalau pasak mu kwitudish kwa Nzamb, mulong wa kumekesh kutentam kwend pa muten winou, ni kuyingish kwendendiy ukweta ritiy mudi Yesu.”—Rom 3:25, 26.b

¹⁷ Yehova wamuyukisha Yesu pamuvumbulay ni kumutek pandond ya piur kupandakanamu padingay kurutu kwa kwez pa divu. Nlel unou, Yesu usangaredin mwikadil wakad kufang mudi chitang cha muspirutu cha uyaj. (Heb. 1:3) Chidiay Mwin kupesh Mujim ni Mwant, Mwant Yesu Kristu udandamedin kuyikwash antu amulondwila chakwel atumbisha kutentam kwa Nzamb. Ov, tumujikitishin mudi ik Tatukwetu wa mwiur, Yehova, ndiy uyifutina antu awonsu amusadidila ndiy nich kushinshaman mu kumwimburij Mwanend!—Tang Kuseng 34:3; Hebereu 11:6.

18. Ov, mutu wa mulong ulondwilaku ukwimen pa chom ik?

¹⁸ Kudiosh pa chisu cha Abel, antu awonsu ashinshamena adinga mu urund wa piswimp ni Yehova mulong ijidisha ritiy ni ruchingej rau mwi Mbut ya kushilamu. Yehova wija anch Mwanend ukez kudandamen kwikal muntu ushinshamena ni rufu rend rikez kudiosh “yitil ya mangand” mu mutapu uwanyidina. (Yoh. 1:29) Rufu ra Yesu rikez kwikal kand ni yiyukish kudi antu nlel unou. (Rom 3:26) Chawiy lel, Ov, difut dia Kristu dikutwish kukuletin yiyukish ik ey? Yawiy yikeza kwikal mutu wa mulong wa mutu wa kwilej ulondwilaku.

[Mazu madia kwishin kwa paj]

Ov, Ukwakul Nchik?

• Ov, mutapu ik walikau kutentam kwa Nzamb?

• Ov, dibatish dia Yesu diafanikesha chom ik?

• Ov, rufu ra Yesu rawanyisha chom ik?

[Chipich chidia pa paj wa 15]

Ov, wij chafanikesha dibatish dia Yesu?