Kumushejin Nzamb Piswimp

Yehova Watwinkisha Mbil ya Kwitondin

2 ANT 18:1-7

ANVAJ afanyidin kuyishil anau chilakej chiwamp. Chibachikin chiwamp cha nvaj chikutwish kumukwash mwan kukudish ngikadil yiwamp ni kukwat mipak ya manangu mu mwom wend. Cha ushon, anvaj avud akat kuyishilang anau chilakej chiyimp. Ov, chirumburikin anch an inay kakutwishap kuya kurutu? Tutanin chakul mu uyakin umwing ukasikeshina nakash—Yehova Nzamb watwinkisha muntu ni muntu pakach petu mbil ya kwitondin. Shinshikin yamushikena Ezekias, yilejenau mu 2 Ant 18:1-7.

Ezekias wading “mwan ikundj wa Akaz, wikala mwant wa in Yuda.” (Verse wa 1) Akaz wayitwala antwend kulemp ni difukwil dishitwila dia Yehova. Mwant winou muyimp wasadila difukwil dia Bal, ni yisal yend ya kulambul antu. Ndiy washikena ku kuyijip ni anamakwend a Ezekias. Akaz wapata yis ya tempel ni “wasala yintamb ku mitambu yawonsu ya njil ya Yerusalem.” Ndiy “wasarumuna ujim wa [Yehova].” (2 Jinsangu 28:3, 24, 25) Chimeken patok anch, tatukwend a Ezekias wading muntu muyimp nakash. Ov, Ezekias wafanyidina ni ndiy kusambish kusal yom yiyimp mudi tatukwend?

Pamuswikanay Akaz pa want, Ezekias kalondulap yisal yiyimp ya tatukwend. Ezekias “wasala yom yitentamina ku mes kwa [Yehova].” (Verse wa 3) Ezekias wamuchingejina Yehova, ni “kwadingap mwant umwing wa pakach pa ant a in Yuda a kusambish, ap alondula kwinyim, adinga mudi ndiy.” (Verse wa 5) Mu muvu wa kusambish wa kutakel kwend, Mwant nsand winou wasambisha kutenchik difukwil diakin ni kudiosh jindond ja piur kwadingau ni kwifukwil akish. Afungula kand tempel, ni kutenchik kand difukwil diakin. (Verse wa 4; 2 Jinsangu 29:1-3, 27-31) Ezekias “walamata kudi [Yehova] . . . , [Yehova] wading nend.”—Verse wa 6, 7.

Ov, chom ik chamukwasha Ezekias chakwel alika kwimburij chilakej chiyimp cha tatukwend? Ov, chitwishikin kwikal pamwingap makwend, Abija—rusangu rend rijikenap nawamp—wadinga nich chibachikin chiwamp piur pa mwanend? Ov, chikutwish kwikal pamwing ap chilakej chiwamp cha Isay, wasambisha uprofet wend kurutu kwa kuvadik kwa Ezekias, wading ni chibachikin chiwamp pantaliken ni nsand winou mwan a mwant?a Bibil kalejenap. Pakwez, chimeken anch: Ezekias wakwata chiyul cha kulondul mwikadil wadinga chinyim ni wa tatukwend.

Chilakej cha Ezekias chidi dikasikesh kudi muntu mwawonsu wamana yikokujol yikash mu wanikanch wend mulong wa chilakej chiyimp cha anvaj au. Chitwishikinap kuchirikin yasutina kal; tukutwishap kudiosh mar twamena pasak. Pakwez yom yiney yatushikena yifanyidinap kutukangesh kuya kurutu. Tukutwish kwitondil nlel unou chakwel twikala mu musangar mu machuku ma kurutu. Mudi mwasalay Ezekias, tukutwish kutond kumukat ni kumwifukwil Nzamb wakin, Yehova. Mwikadil winou ukez kulet mwom usangareshina nlel unou ni ukutwish kutuletin mwom wa chikupu mu mangand masu ma Nzamb. (2 Pita 3:13; Kujingunik 21:3, 4) Tumujikitishin nakash mudi ik Nzamb wa rukat watwinkisha muntu ni muntu pakach petu chipan chinech cha usey nakash—mbil ya kwitondin!

[Dizu didia kwishin kwa paj]