Ansand—ikalany Atakedilau Kudi Dizu Dia Nzamb

“Tambul manangu, ni ronganyin.”—JINSW. 4:5.

1, 2. (a) Ov, chom ik chamukwasha kambuy Paul kurish nich yikokujol yadinga mu muchim wend? (b) Ov, mutapu ik ukutwisha kwikal nich manangu ni ronganyin?

“PINIKUTONGA anch, ing nasalang yom yiwamp, nikat kutwish kutong kusu kusal yom yiyimp.” Ov, umwij muntu walonda mwamu? Kambuy Paul ndiy walonda mwamu. Ap anch Paul wamukata Yehova, ndiy warisha yisu yimwing chakwel asala yom yitentamina. Ov, ndiy wiyova nchik piur pa kupwitijan kwading mu muchim wend? Ndiy wafunda anch: “Yowo, nayindam!” (Rom 7:21-24) Ov, ukutwish kurumburil chateshay Paul? Ov, chikukasikedining yisu yimwing kusal yom yitentamina? Ov, chinech chikat kukwakamish mudi Paul? Anch chidi mwamu, kangal waziy. Paul watwisha kurish nich yikokujol yamushikena, niyey ukutwish kusal mwamu.

² Paul watwisha mulong wilikidina amwinend chakwel amutakela kudi “mazu makin.” (2 Tim. 1:13, 14, TMK) Mudi chibudikin, ndiy watambula manangu ni ronganyin yifanyidina yamukwasha kurish nich yikokujol ni kukwat mipak yiwamp. Yehova Nzamb ukutwish kukukwash chakwel utambula manangu ni ronganyin. (Jinsw. 4:5) Ndiy wapana chiyul chiwamp nakash mu Dizu diend, Bibil. (Tang 2 Timote 3:16, 17.) Tal mutapu ukutwisha kutaninamu mu yany yidia mu Bibil mu kushakam ni anvajey, pa mutapu wa kulam nfalang, ni piudia amwiney.

Atakelau Kudi Dizu dia Nzamb mu Dijuku

3, 4. Ov, mulong wak chikukasikedining kuziyil ku yijil ya anvajey, pakwez mulong wak anvaj atekining yijil?

³ Ov, umen anch chikukasikedining kuziyil ku yijil ya anvajey? Ov, mulong wak ukutwish kwiyov mwamu? Diyingish dimwing didi dikutwish kwikal anch usotin chilik chimwing cha want ipau. Chibachikin chinech choviken. Chimekeshin anch ukat kupam chakwel wikala mukurump. Pakwez, piudia ku chikumbu, ufanyidin kuziyil kudi anvajey.—Efes 6:1-3.

⁴ Kwikal nich chitong chiwamp piur pa yijil ni yitiyij yiletinau anvajey kukutwish kukukwash chakwel chikuswapela kuziyil. Chakin, ukutwish chisu chimwing kwiyov mudi mwiyovay Brielle,a changadim umwing wa mivu 18 walonda piur pa anvajend anch: “Awiy avuramena nakash anch ading niyawiy ansand mudi am. Kasotinap anch nikala niyam ni mbil ja kulond, nikwata chiyul, ap nikala mukurump.” Mudi Brielle, ukutwish kuman anch anvajey akukangeshin kwikal nich want ipau chinyim ni yiutongina anch akutwish kusal. Pakwez, anvajey akutwish kutek yijil pa ndond ya kusambish mulong akubangidin. Chikwau kand, anvaj in Kristu ij anch akez kayirumburish kudi Nzamb piur pa mutapu uwanyishinau maswir mey.—1 Tim. 5:8.

5. Ov, mutapu ik ukutwisha kutaninamu mu kuyiziyil anvajey?

⁵ Chakin kamu, kuziyil ku yijil ya anvajey kudi mudi kufut dibaz wafanyidina kufut ku bank—anch ukat kufut nawamp mabaz mey, bank niyend ukez ka kusondjik. Chilik chimwing niyeye, ufanyidin kuyilimish anvajey ni kuyiziyil. (Tang Jinswir 1:8.) Anch wayiziyil nakash, anvajey niyawiy akez ka kwinkish chilik chijim cha want ipau. (Luka 16:10) Chakin kamu, anch udandamedin kubwambwil ku yijil, kangal washimok anch anvajey akepish ap alik ku “kusondjik want ipau.”

6. Ov, mutapu ik ukutwishau anvaj kuyikwash ansand chakwel ikala in kuziyil?

⁶ Mutapu umwing ukutwishau anvaj kuyikwash ansand chakwel aziyila ku yijil yitekinau udi kusutil kupan chilakej. Rusot rau ayinau ra kuziyil ku yitiyij ya Yehova rifanyidin kumekesh anch yijil ya Nzamb yoviken. Chawiy chikeza kusal anch chiyiswapela ansand kuman anch chiwapidil kuziyil ku yijil yitekinau anvajau. (1 Yoh. 5:3) Chikwau kand, Bibil wisambidin piur pa yisu yayinkishay Yehova atushalapol end chisu cha kulond yadinga yitonginau piur pa yom yimwing. (Dis. 18:22-32; 1 Ant 22:19-22) Ov, kukutwish kwikal yisu yiyinkishinau anvaj anau chisu cha kwisambin pa mitu ya milong yishalijadina?

7, 8. (a) Ov, yikokujol ik yirishinau nich ansand amwing? (b) Ov, chom ik chikutwisha kukukwash chakwel utaninamu mu dipup?

⁷ Ansand akutwish kand kurish nich yikokujol yikata kuyishiken pakatau kuyifish nich pakad mulong kudi anvajau. Yisu yimwing, ukutwish kwiyov, mudi mwiyovay nsand umwing utazukinau anch Craig, walonda anch: “Makwam wading mudi mpurish ukweta mudimu wa kukimbijol—wadinga ni kukimb kwisu nikutwisha kusadin uyimp.”

⁸ Yisu yivud dipup dikat kumekanang mu mulad wa kumusupish muntu. Pakwez, Bibil ulejen anch dipup, ap anch diwanyidin, dikasikening kuditiyij. (Heb. 12:11) Ov, chom ik chikutwisha kukukwash chakwel utaninamu mu dipup utambwila? Chom chimwing cha usey chiufanyidina kuvurik chidi anch chiyul cha anvajey chiding chibachikinau nich rukat rau pad ey. (Jinsw. 3:12) Asotining kukukwash chakwel wipuka kuwil mu yisal yiyimp ni kukukwash chakwel ukudisha yaku yiwamp. Anvajey amening pamwing ap anch ang akangany kukukand, chikwikal mudi akukisin! (Tang Jinswir 13:24.) Chikwau kand, ijik anch mu kwilej mudi kurumbuk. Chawiy lel, anch utambwil dipup, sal usu wa kupwit manangu mu yom yilondinau? “Kupit kudiokila ku manangu kupandakenamu kuwap kupit kukudiokala ku utad wa argent.”—Jinsw. 3:3, 14.

9. Ov, chom ik chikutwishay kusal nsand, pa ndond pa kudandamen kutongin pa yom yimenay anch yiwapilap?

⁹ Pakwez, anvaj akat kurumbukang niyawiy. (Jak. 3:2) Pakatau kukukand, akutwish kulond yisu yimwing pakad manangu. (Jinsw. 12:18) Ov, chom ik chikutwish kuyibachik anvajey kusal mwamu? Akutwish kwikal nich yakamish ap kutong anch kurumbuk kwey kumekeshin anch akangeny ku kupup. Pa ndond pa kudandamen kutongin pa yom umena anch yiwapilap, ov, mulong wak ukutwishap kuyijikitish mulong wa rusot rau rikash ra kukukwash? Ukaliweny wa kwitiy dipup ukez kakukwash piukeza kupam.

10. Ov, mutapu ik ukutwisha kuziyil nawamp ku yijil ni ku dipup dia anvajey?

¹⁰ Ov, ukutwish kusot anch chikuswapela kwitiyij ni kutaninamu mu yijil ni dipup dia anvajey? Anch chidi mwamu, ufanyidin kusal usu wa kuwapish ukaliweny wey wa kwambamb. Ov, mutapu ik ukutwisha kusal mwamu? Chakusambish chidi kutesh. Bibil ulondin anch: “Muntu . . . ufanyidin kuswakal kutesh, pakwez ashimpish muchim pa kulond, . . . wakad kujiman swa.” (Jak. 1:19) Pa ndond pa kwiyingish swa amwiney, pakish kutakel yovil yey ni tesh yilondinau anvajey. Shinshikin pa yom yilondinau, kangal pa mutapu ulondilau. Chawiy lel, ukutwish kuchirikin mazu ma anvajey mu mazu mey ni yileja nich kalimish yom yalondau. Anch wasal mwamu ukez kayijikish anch watesha yom yalondau. Ov, chikwikal nchik anch usotin kurumburil mazu mey ap yisal yey? Yisu yivud, chidi cha manangu ‘kukand milamu yey’ djat ni piukeza kwovijan nich rusot ra anvajey. (Jinsw. 10:19) Anch anvajey ajingunin anch wayitesha, ni awiy akez kusal usu wa kukutesh niyey. Kwovijan kwinoku kukez kumekesh anch udi utakedilau kudi Dizu dia Nzamb.

Atakedilau Kudi Dizu dia Nzamb Mu Kusadil Nfalang

11, 12. (a) Ov, Dizu dia Nzamb ditukasikeshin nchik piur pa nfalang, ni mulong wak? (b) Ov, mutapu ik ukutwishay anvajey kukukwash kusadil nfalang?

¹¹ Bibil ulondin anch: “Manangu makat kukukwash mudi nfalang.” Pakwez verse umwing ou ulejen kand anch manangu makwet usey nakash kupandakenamu nfalang. (Mul. 7:12) Dizu dia Nzamb ditukasikeshin kulimish nfalang, kujikat bwat. Ov, mulong wak ufanyidin kwipuk kukudish rukat ra nfalang? Shinshikin chilakej chinech: Mu chikas cha muntu ukweta ukaliweny wa kusal kwimpish, mpak yisomburikina chidi chom cha mudimu cha usey nakash. Pakwez, mpak yiney mu makas mwa muntu wakad ukaliweny ap kwijik kuyisadil ukutwish kwitap nayimp. Nfalang ni jawiy anch twajisadil nawamp, jikutwish kutukwash. Pakwez antu “asotila kwikal ampich” ayipishining yisu yivud urund ni akwau, urund mu dijuku, ni ap urund ni Nzamb. Mudi chibudikin, akat kwitap ayinau “nich yakamish yivud.”—Tang 1 Timote 6:9, 10, TMK.

¹² Ov, umutapu ik ukutwisha kwilej kusadil nfalang nawamp? Ov, mulong wak ukutwishap kuyit anvajey chakwel akwinkisha chiyul piur pa kulam nfalang jey? Salomon wafunda anch: “Mwin manangu atesha kand, ni kuwejaku kwilej kwend kakwau, ni muntu mwin kutesh wova jinkand.” (Jinsw. 1:5) Changadim umwing utazukinau anch Anna wita chakwel anvajend amutakela nich ukaliweny. Ndiy walonda anch, “Tatukwam wanleja mutapu wa kulam ni kusadil nfalang, ni wanleja piur pa usey wa kutenchik yom mu kulam ni kusadil nfalang ja dijuku.” Chilik chimwing, makwend a Anna wamuleja malejan mamwing ma usey nakash. Anna ulondin anch: “Ndiy wanleja usey wa kwilikej usey kurutu kwa kuland yom.” Ov, Anna wataninamu mutapu ik? Ndiy wakwil anch: “Katat nitwishin kulam nfalang jam. Nikat kujisadin nawamp, chawiy lel nikwet want ipau ni chisambu mu manangu chidiokila ku kwipuk mabaz makad usey.”

13. Ov, mutapu ik ukutwisha kwikand amwiney anch ufanyidin kusadin nfalang?

¹³ Ukutwish kukashimuk wiyandjikin kal amwiney mu mabaz anch waland yom mu mutapu usotina ap wasadin nfalang mulong akubachikin kudi arund ney. Ov, chom ik chikutwisha kukukwash kwipuk mipit yiney? Pichifanyidina kusadin nfalang, ufanyidin kwilej mutapu wa kwikand amwiney. Chawiy chasalay Ellena, padingay ni mivu 20. Ndiy ulondin anch: “Pinikata kubudik ni arund, nitenchikining kurutu kwa chisu ni kuchind uvud wa nfalang nifanyidina kusadil. . . . Nimening kand anch chidi cha manangu kuya kuland yom ching pamwing ni arund asadidininga nawamp nfalang jau ni akeza kwinkasikesh kwisikesh usey ni kulik kuland yom yinimena kapamp ka kusambish.”

14. Ov, mulong wak ufanyidin kwipuk “ris ra mapit”?

¹⁴ Kupat nfalang ni kujisadin chidi chom cha usey mu mwom. Pakwez, Yesu walonda anch musangar wakin uding kud antu “ija anch tukwet kuswir kwa yom ya Nzamb mu michim yetu.” (Mat. 5:3) Ndiy walonda anch yisakin ya muntu mu yom ya muspiritu akutwish kuyiyipish kudi yom mudi “ris ra mapit.” (Mar. 4:19) Chidi cha usey mud ik, anch walikidil chakwel akutakela kudi Dizu dia Nzamb ni walam chitongijok chisikena piur pa nfalang!

Atakedilau Kudi Dizu dia Nzamb Padiau Ayinau

15. Ov, chisu ik chikezau kupak kushinshaman kwey kudi Nzamb mu mutapu upandakena?

¹⁵ Ov, chisu ik utongininga anch kushinshaman kwey kudi Nzamb akez kukupak mu mutapu upandakena—piudia ni antu akwau anch piudia amwiney? Chakin, piudia ku shikol ap ku mudimu, mwikadil wey wa kwichidij muspiritu ufanyidin kwikal mudi ulankining. Uding ubabeshinau pantaliken ni ubaj wa muspiritu ukutwisha kukushiken. Pakwez, pa chisu cha kupim, pawiy ukat kukangany kurish ni kuburen usu wa kujijaman mu yoziu piur pa yijil yey.

16. Ov, mulong wak ufanyidin kusot kumuziyil Yehova ap anch udi pa amwiney?

¹⁶ Ov, mulong wak ufanyidin kusot kuziyil kudi Yehova ap anch udi amwiney? Vurik anch: Ukutwish kumwovish Yehova ushon ap kusangaresh muchim wend. (Dis. 6:5, 6; Jinsw. 27:11) Yehova ukwachikin ni yisal yey mulong “ukat kukulamany.” (1 Pita 5:7) Ndiy usotin anch ey umutesha chawiy lel ukutwisha kutaninamu. (Isay 48:17, 18) Mu Isarel wa pasak, pa chisu chavuramenau atushalapol a Yehova chiyul chend, awiy amunenganesha. (Kus. 78:40, 41) Chikwau kand, Yehova wamukata muprofet Daniel nakash, mulong mwangel umwing wamuleja anch “Nzamb ukukatil.” (Dan. 10:11) Mulong wak? Mulong Daniel kamekeshap kushinshaman kudi Nzamb ching kusu padingay pakach pa antu, pakwez wakumekesha kand padingay amwinend.—Tang Daniel 6:10.

17. Ov, yipul ik yiukutwisha kwiyipul amwiney piutondina kwipuwangesh?

¹⁷ Chakwel udandamena kushinshaman kudi Nzamb piudia amwiney, ufanyidin kukudish nkeu jey ja kutwish “kwauril kuwap ni kuyip” ni piukata ‘kusadil’ nkeu jinej mu kusal yom yiwija anch yitentamin. (Heb. 5:14) Chilakej, piutondina kutesh muzik, kutal mafilim, ap kwandam mu ma site ma Internet, kudi yipul yikeza kukukwash kutond yom yitentamina ni kwipuk yom yiyimp. Iyipula amwiney yipul yiney anch: ‘Ov, yom yiney yinkasikeshin kwikal nich rukat ap yikez kwinbachik chakwel nisangara “pamenay mukwau mar”?’ (Jinsw. 17:5) ‘Ov, yikez kwinkwash “[kukat]” yom yitentamina ap kwinkangesh “[kukis]” yom yiyimp?’ (Amos 5:15) Yiusadina piudia amwiney yimekeshin yom yiukwatininga nich usey nakash.—Luka 6:45.

18. Ov, chom ik ufanyidina kusal anch wiyandjika mu ujindj mu yisal yiyimp, ni mulong wak?

¹⁸ Ov, chom ik ufanyidina kusal anch wiyandjika mu ujindj mu yisal yiwija anch yidi yiyimp? Vurik anch, “muntu mwin kujindjik kurumbuk kwend kakuzangijalap nawamp, pakwez mwin kwitiyil kurumbuk ni kukulik, akez kamwovil riy.” (Jinsw. 28:13) Chikwikal chom cha usup mudi ik anch twadandamen mu yisal yiyimp ni ‘kuunenganesh mwiku utumbila wa Nzamb’! (Efes 4:30) Ufanyidin chakin kamu kwit dilikishin kudi Nzamb, kudi anvajey, kudi amwiney, piur pa yisal yawonsu yiyimp. Pa chinech, “amakurump a chikumbu cha Nzamb” akutwish kukukwash nakash. Kambuy Jakob ulondin anch: “Amulembidil [mwin kusal chitil], ni kumupan many mu dijin dia [Yehova]. Ni kulembil kwinoku anch kwikal kwa ritiy, ukumwok muyej. Nsalejetu ukez kamulangwish, chad anch wasal yitil, akez kamulikishin.” (Jak. 5:14, 15) Chakin kamu, chinech chikutwish kukwovish usany pamwing ap kwikal nich yibudikin yakad kusangaresh. Pakwez anch ukwet mushiku wa kwit ukwash, ukez kwichidij ku ubaj ni kutambul rongoj ridiokila ku kwikal nich kom katok.—Kus. 32:1-5.

Sangaresh Muchim wa Yehova

19, 20. Ov, chom ik chisotinay Yehova kudi ey, pakwez chom ik ufanyidina kusal?

¹⁹ Yehova udi “Nzamb muwamp,” ni ndiy usotil ey wikala ni musangar. (1 Tim. 1:11) Ndiy ukubangidin nakash. Ap anch kwikil muntu umena usu usadina mulong wa kusal yom yitentamina, ndiy umen. Kwikil chom chijingamina ku mes kwa Yehova. Ndiy kakatap kusot mulong wa kuman uyimp usadina, pakwez usotin kukukwash chakwel usala yom yiwamp. Nzamb “wendishil mes mend pansh pawonsu, chakwel ayimanyin apanyina michim yau yawonsu kudi ndiy.”—2 Jsng. 16:9.

²⁰ Chawiy lel, ilikidila amwiney chakwel akutakela kudi Dizu dia Nzamb, ni usadila chiyul chend. Chawiy lel ukez kupat manangu ni ronganyin uswiridina chakwel upandakana milong yikash ni ukwata mipak yikash mu mwom. Ukezap kuyisangaresh ching kusu anvajey ni Yehova pakwez ukez kusanger kand mwom usangareshina wakin kamu.

[Dizu didia kwishin kwa paj]

Ov, Mutapu ik Ukutwisha Kwakul?

• Ov, chom ik chikutwishau ansand kusal chakwel asadila ni kutaninamu mu yijil ni dipup dia anvajau?

• Ov, mulong wak chidi cha usey kwikal ni chitongijok chisikena piur pa nfalang?

• Ov, mutapu ik ukutwisha kudandamen kushinshaman kudi Yehova ap anch udi amwiney?