Chakaad 2

Ipuk Rusot ra Kwiyilikej Amwiney Nich Antu Akwau

OV, CHOM IK CHIFUNDISHINAY BIBIL? “Chifanyidin muntu mwawonsu kwirumburish amwinend. Anch yisalijok yend yidi yiwamp, ndiy ukutwish kwibaz amwinend wakad kwiyilikej ni yisalijok ya muntu mukwau.”​—Galatia 6:4.

OV, CHISU CHIKOKUJOL? Tukutwish kusot kwiyilikej ayinetu ni antu akwau​—yisu yimwing ni antu akweta yom yikemp kupandakenamu yitukweta, ap ni antu akweta usu nakash, ampich, ap akweta manangu kutupandakanamu. Chikalap nchik, chibudikin cha kwiyilikej ni antu akwau chiding chiyimp. Tukat kwidimb anch usey wa muntu udiokiling kudi yom yikwetay ap kusu ku yom yitwishinay kusal. Tukutwish kand kulangwish yovil ya ris ni spiritu wa kubambel.​—Mulej 4:4.

OV, CHOM IK UKUTWISHA KUSAL? Pakish kwital amwiney mudi kamu mukumenay Nzamb. Lik rutong rend ritakela chovil chey cha kwiyinkish amwiney kalimish. “Mulong muntu ukat kutal yimenay nich mes mend, pakwez [Yehovaa] ukat kutal ku muchim.” (1 Samwel 16:7) Yehova kapiminingap usey wey kusutil ku kwilikej ey ni antu akwau bwat, pakwez upimin usey wey kusutil ku kutal mu muchim wey, ku kushinshikin mu manangu, mu yovil, ni mu yisotinay muntu kusal. (Hebereu 4:12, 13) Yehova wij mipak yey ni usotil anch uyijika ni yey nawamp. Anch wisikesh usey wey kusutil ku kwiyilikej amwiney nich antu akwau, ukez kashiken ku kwibaz ap ku kudandamen kuburen musangar. Chawiy lel, itiyij nich kwikepish anch ukezap kutwish mu yom yawonsu ukusota kusal.​—Jinswir 11:2.

Ov, chom ik cha pakampwil ufanyidina kusal chakwel wikala ni usey ku mes kwa Nzamb? Muprofet Mika wapepilau kudi Nzamb wafunda anch: “[Yehova] watuleja kal yom ik yidia yiwamp. Ndiy usotil etu tusala yom yitentamina, ni kumekesh rukat ridimukina, ni kushakam ni Nzamb wetu nich kwitudish.” (Mike 6:8) Anch walondul chiyul chinech, Nzamb ukez kakulam. (1 Pita 5:6, 7) Ov, diyingish dijim mudi ik dikutwisha kwikal dia kusanger yom tukweta?

[Dizu didia kwishin kwa paj]

[Chipich chidia pa paj wa 5]

Yehova ukat kupim usey wetu kusutil ku kutal mu muchim wetu