Chakatan 5

Wanyish Maswir Mey ma Muspiritu

OV, CHOM IK CHIFUNDISHINAY BIBIL? “Ayuk kwau antu ija anch: Tukwet kuswir kwa yom ya Nzamb.”​—Mateu 5:3.

OV, CHISU CHIKOKUJOL? Kudi tunan twa ma relijon kushalijan, mavud pakach pau makat kufundish mitapu ya kupwitijan mulong wa kuwanyish maswir mau ma muspiritu. Ov, mutapu ik ukutwisha kujingunin relijon ulejena uyakin ni umusangareshina Nzamb chakin kamu? In kufund amwing a katumb alejen anch kumuchingejin Nzamb ni kumwifukwil chidi chom cha kad manangu, ap chiyimp nakash. Gazet wa Maclean ulejen mu wiswimp yitongijok ya muntu umwing wakad kwitiy kwikalaku kwa Nzamb anch: “Chitongijok chinech cha in Kristu, chilejen anch kudi chom chimwing chipandakenamu siyans ni yovil yetu . . . chashadishin usey wa mwom tukweta ni chawiy chitubachikina ku chisum.”

OV, CHOM IK UKUTWISHA KUSAL? Shinshikin uman ulejen anch Nzamb udiaku. (Rom 1:20; Hebereu 3:4) Kangal walikidil muntu ap umwing a kukangesha kukimb yakul ku yipul ya usey, mudi yiney: Ov, mulong wak tudi pinap? Ov, kuding mwom kupwa kwa rufu? Ov, mulong wak kudi mar mavud mwamu? Ov, chom ik chitinay Nzamb kudi am? Kutan yakul yiwanyidina ku yipul yiney chidi chom cha usey chikeza kukukwash kudandamen kusanger yom ukweta.

Pakwez, kangal witiyij pakad kutong yikulejinau kudi antu akwau. Dizu dia Nzamb dikukasikeshin ‘kusadil spiritu’ chakwel ujingunina amwiney yom yitiyijinay Nzamb. (Rom 12:1, 2) Ukez kutambul difut mulong wa usu usadina. Anch witekin chisu cha kwilej Bibil ni kusadil yiyul yend ya usey, ukez kwipuk milong, kupwish yakamish, ni kwikal ni musangar upandakena mu mwom wey. Ukutwish kuchingejin kushilamu kwa Bibil. Tutikit twa antu adiokila ku jindond kushalijan atambula yiyukish kusutil ku kwilej uyakin piur pa Nzamb ni rutong rend. Chilakej, tang jinsangu ja mwom jidia pa paj wa 18 kushik ku 21 wa gazet winou.

Piumena yiyukish yidiokila ku kusadil chiyul cha manangu chidiokila mu Bibil, ukez kwipan nakash kudi Nzamb. Ov, mulong wa ukutwishap kwitiy pakutazukinau chakwel wileja Bibil pamwing ni Atuman a Yehova? Anch wasal mwamu, ukez kwitiyij yalonday kambuy Paul, wafunda anch: “Mwom wa kumulondul Nzamb ukat kulet mapit mavud kudi muntu ukata kusangar nich yom yikwetay.”​—1 Timote 6:6.

[Chipich chidia pa paj wa 8]

Jingunin amwiney yom yitiyijinay Nzamb