Uyakin Piur pa Harmagedon
“Ayilembil . . . akat kuya kudi ant a mangand mawonsu . . . , ayikumangeja ant awonsu kwi ndond yipidilau mu win Hebereu anch, Harmagedon.”—KUJINGUNIK 16:14, 16.
HARMAGEDON, utazukinau yisu yimwing anch “Armagedon,” didi dijin dia ndond. Pakwez chimeken mudi anch kwikiling ndond yiney pa divu.
Chad, chom ik chirumburikina chakin kamu dizu “Harmagedon”? Ov, mulong wak yisu yivud dizu dined diambaten nich chinship, chimwing mudi njit?
Ayikumangeja Kwi Ndond Yipidilau Anch, Harmagedon
Dizu dia kusambish diafundau mu Hebereu anch Harmagedon dirumburikin “Mukandu wa Megido.” Ap anch kwadingap mukandu wadingau ni kutazuk mwamu, pakwez kwading ndond yadingau ni kutazuk anch Megido. Ndond yiney yading pa mansang ma njil kwiyand kwa ndond kwadinga muchid wa pasak wa in Isarel. Njit jikash jasadika piswimp ni ndond yiney. Chawiy lel, dijin dia Megido ading adinungin nich njit.a
Pakwez, kurumburik kwakin kwa Megido kulejenap njit ik jarishau kwin ndond yiney, pakwez mulong wak arisha njit. Megido chading chikunku cha Ngand ya Kushilamu yapanay Yehova Nzamb kudi in Isarel. (Kubudik 33:1; Joshua 12:7, 21) Ndiy wachipa kudi antu inay anch ukez kuyiking mulong wa akankuny nau, ni ndiy wasala mwamu. (Kuvurik Yijil 6:18, 19) Chilakej, ku Megido kwawiy kwayikwashay Yehova mu chilay pa ntaliken ni amasalay a Mwant Jabin mwin Kanan ni mukurump wend wa amasalay, Sisera.—Ankalansambu 4:14-16.
Pakwez, dizu “Harmagedon” dirumburikin chom chimwing chijim nakash. Adinungin nich kupwitijan, pakach pa makand ma usu maad, umwing ni mukwau.
Uprofet wa Kujingunik wisambidin piur pa machuku ma kurutu mutapu Satan ni ayilembil akeza kubachik winyikel wa antu chakwel akumangeja yisak yau ya amasalay, ni kupakish kuyakamish antu a Nzamb ni mudimu wau. Njit jiney jikez kujip mamiliyon ma antu, pakezay Nzamb kuyiwin in kuyirishish antwend.—Kujingunik 19:11-18.
Ov, mulong wak pisambidinay Bibil anch Nzamb udi ‘mwin riy, ni ranaken, wakad kujimanang swa,’ ukez kuyijip antu avud mwamu? (Nehemiy 9:17) Pakwel anch tutesha yisal ya Nzamb, tuswiridin kwakul ku yipul yiney yisatu: (1) Nany ukusambisha njit? (2) Ov, mulong wak amutekinamu Nzamb? (3) Ov, yibudikin ik ya chikupu yikeza kushiken mulong wa njit jinej pa divu ni antu adiap?
1. NANY UKUSAMBISHA NJIT?
Njit ja Harmagedon jidiap chisal cha chisum cha Nzamb. Pakwez, Nzamb ukez kuyiking antu awamp pantaliken ni antu akusota kuyishesh. In chisum mwinjit jinej adi “ant a mangand mawonsu,” anyikel a mangand. Mulong wak asin njit? Mulong, mudi mukatay kusal mwin kusengesh yifwatul, Satan ukez kusadil anyikel ni amasalay au chakwel asambisha kuyirishish in kumwifukwil Yehova Nzamb.—Kujingunik 16:13, 14; 19:17, 18.
Chitongijok cha kukasikesh want ipau wa kulond ni wa chirelijon mu jingand jimwing nlel unou, chitongijok cha winyikel winou cha kukwat mipak ap kupakish kukangesh midimu yawonsu ya chirelijon chikez kwikal cha chamwamu. Pakwez, rupompat riner rashikena mu chitot cha mivu cha 20 ni ridandamedin ni katat.b Ap mwamu, padi kushalijan kwaad pakach pa rupompat risambedila kusadik ni rikeza kukwatijan ni Harmagedon. Chakusambish, rupompat riner rikez kusadik pa mangand mawonsu. Cha kaad, njit ja Yehova jikez kwikal jikash nakash kupandakanamu chisal chin chawonsu chasalay pasak. (Jeremiy 25:32, 33) Bibil wisambidin piur pa njit jinej mudi “njit pa Dichuku dijim dikurumburishay Nzamb Mwin Dikand Diawonsu.”
2. OV, MULONG WAK AMUTEKINAMU NZAMB?
Yehova ulejen anch in kumwifukwil afanyidin kwikal antu a chisambu ni kuyikat akankuny nau. (Mike 4:1-3; Mateu 5:43, 44; 26:52) Chawiy lel, awiy kakezap kukwat mat mulong wa kwichidij ayinau pakeza kushiken rupompat riner rikash. Anch Nzamb kasadinap usu wa kuyikol antwend, akez kuyishesh awonsu. Chawiy lel, dijin dia Yehova Nzamb, ni katumb kend yikez kwikal mu ubaj. Anch antu ayimp ashiken ku kuyishesh antwend, Yehova ukez kumekan mudi kakwetap rukat, kutentam, ap kakwetap ukwash. Chinech chikutwishap kushiken!—Kuseng 37:28, 29.
Nzamb kasotilap kumushesh muntu ap umwing, chawiy chipaninay kubabesh mu mutapu wovikena piur pa yom yikezay kusal. (2 Pita 3:9) Kusutil ku jinsangu jafundau mu Bibil, ukat kuyivurish antu awonsu anch pasak ndiy wayishesha akankuny pasotau kuyishesh antwend. (2 Ant 19:35) Bibil ubabeshin kand anch mu machuku ma kurutu pakezay Satan ni antwend asadidilay mulong wa kurish ni antu a Nzamb, Yehova ukez kusadil kand usu wend mulong wa kuyishesh akeza kusot kuyishesh antwend. Chawiy lel, Dizu dia Nzamb diatakela kulejan anch Yehova ukez kuyishesh antu ayimp. (Jinswir 2:21, 22; 2 Tesalonik 1:6-9) Pa chisu chinicha, in kuyirishish akez kujingunin kamu anch akat kurish ni Mwin Dikand Diawonsu amwinend.—Ezekiel 38:21-23.
3. OV, YIBUDIKIN IK YA CHIKUPU YIKEZA KUSHIKEN MULONG WA NJIT JINEJ?
Njit ja Harmagedon jikez kukwol mamiliyon ma antu. Chawiy lel, jikez kutakel chisu cha chisambu pa divu.—Kujingunik 21:3, 4.
Buku wa Kujingunik wisambidin piur pa “runtu ruvud” rakad kwijikan uvud wau rikeza kupand kwin njit jinej. (Kujingunik 7:9, 14) Mu umutakel wa Nzamb, antu inay akez kupan ukwash chakwel divu dikala Paradis mudi mwasotay Yehova pakusambish.
Ov, twij chisu chikezau kuyirishish antu a Nzamb?
[Mazu madia kwishin kwa paj]
a Kunung kwa ndond yiney nich njit kwadingap kwa pakampwil. Chilakej, musumb wa mu Japon wa Hiroshima, washeshika nich bomb atomik, nlel unou udi chijingidij cha njit ja nikleyer.
b Yashikena pa chisu cha Holocauste yidi chilakej cha rupompat ra winyikel ra kupakish kushesh marelijon ni yisak ya michid. Pa chisu cha Union Soviétique, marelijon madinga mu URSS amapompata ni mawiy nakash. Tal mutu wa mulong “Un peuple paisible défend sa réputation”, udia mu Chinong cha Kalam cha Ndol-Mem 1, 2011 mu Français, wapalangeshau kudi Atuman a Yehova.
[Chipich chidia pa paj wa 6]
Pasak Yehova Nzamb wayichidija antwend
[Chipich chidia pa paj wa 7]
Yehova ukez kuyichidij kand antwend, pa chisu cha njit ja Harmagedon