“Chifanyidin Rusangu Ruwamp ra Want wa Nzamb Ez Arulejan Bil”

“Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.”—MATEU 24:14.

Chirumburikin ik: Mwin kufund rusangu ruwamp Luka wafunda anch Yesu “wendangana mu misumb ni mu mal mulong wa kurumburil Rusangu Ruwamp ra Want wa Nzamb.” (Luka 8:1) Yesu amwinend walonda anch: “Chifanyidin am kurumburil Rusangu Ruwamp ra Want wa Nzamb mu mal makwau kand, wawiy mulong wantuminay Nzamb.” (Luka 4:43) Wayituma in kwilej end kulejan rusangu ruwamp mu misumb ni mu mal ni kupwa wayileja anch: “ukez kwikalany atuman amam . . . djat ni kusudiedila mangand.”—Midimu 1:8; Luka 10:1.

Mutapu Wasalau In Kristu Akusambish: In kwilej a Yesu aswapala kusal yom yayilejay Yesu. “Awiy adandamena pichuku pichuku kulejan mu chikumbu cha Nzamb ni mu yikumbu ya antu. Ading ni kulejan ni kurumburil Rusang Ruwamp ra Yesu Kristu Uzizidilau Many.” (Midimu 5:42) Antu awonsu mu chikumangen adinga in kulejan, kangal kusu ka chisak ka pakampwil. Mwin kwilej jinsangu ja pasak August Néander walonda anch: “Celse, mwin kufund wa kusambish walonda nayimp piur pa Win Kristu mulong wa in kubwit mavuj ma anam ma kusal nich maswin, in kuchim yilat, in kusal masun ma ndand, antu akad kwijik nakash kutang ni kufund ni akad manangu, adinga in kulejan rusangu ruwamp nich mushiku.” Mu buku wend Les premiers siècles de l’Église, Jean Bernardi wafunda anch: “[In Kristu] adinga ni kubudik ni kulejan ndond yawonsu ni kuyilej antu awonsu. Mwin njil ni mu misumb, mwin ndond ya antu awonsu ni ku yikumbu. Ayaka ap bwat. . . . Kushik ni kwinsudiel kwa divu.”

Ov Anany Ayimburijina Nlel? Mwin kupesh David Watson wa mu egliz Anglican wafunda anch: “Kukangany kwa egliz kusend nich usey mudimu wa kulejan nich kufundish chidi chom chiyisadila antu avud alika kusanger kumusadil Nzamb nlel.” Mu buku wend wa mutu wa mulong ulondin anch Pourquoi les catholiques s’en vont ?, José Luis Pérez Guadalupe wafunda piur pa mijikit ya in Evangelist, in Adventist, ni akwau ni washinshikina anch “kakatap kuya ku chikumbu ni chikumbu.” Piur pa Atuman a Yehova, wafunda anch: “Ayil mu mutapu ufanyidina ku chikumbu ni chikumbu.”

Kushinshikin kukasikeshina ni kwovikena kwa Jonathan Turley kudi mu Cato Supreme Court Review, 2001-2002: “Anch muntu wajimbul Atuman a Yehova, antu avud kapamp kamwing a kutongijokin pa in kulejan ezina kutwendil ku yikumbu yetu pa yisu yakad kuchingejin. Mulong kudiau Atuman a Yehova, kulejan ku chis ni chis kudiap ching kusu mulong wa kuyish kurutu ritiy rau pakwez kudi kwa usey nakash mulong wa ritiy rau ayinau.”

[Kamushet kadia pa paj wa 7]

Ov, Wajingunin Kal Chijingidij?

Kulondulijan nich chijingidij cha Mukand wa Nzamb twisambinang mu mitu ya milong yiney yilondulijadina, ov, anany nlel, utongidina, akweta chijingidij cha Win Kristu wakin? Ap anch kudi tunan makum twa yisak ni marelijon mafila mukan anch madi ma in Kristu, vurik yom yayilejay Yesu in kwilej end anch: “Kadiap antu awonsu akata kwintazuk anch: ‘Nsalejetu, Nsalejetu,’ akeza kwandam mu Want wa Mwiur, pakwez ching antu akata kusal mudi musotilay Tatukwam udia mwiur.” (Mateu 7:21) Kuyijingunin antu asadila yisotinay Tatuku—kwikal nich chijingidij cha Win Kristu wakin—ni kwinung nau pamwing kukutwish kutwal ku yiyukish ya chikupu mu Want wa Nzamb. Tukwitin uyipula Atuman a Yehova, akuletinang gazet winou, mulong wa jinsangu jivud piur pa Want wa Nzamb ni yiyukish yikezau kulet.—Luka 4:43.