“Ov, Nany Ukeza Kangovish Am Wom?”

“Anch njit janlankinip nchik, nikez kiman ni ruchingej ram.”—KUS. 27:3.

KWAMBATAN NICH MAVERSE MINAM CHOM IK CHIKEZA KUKUKWASH KUKUDISH MUSHIKU?

Kuseng 27:1

Kuseng 27:4

Kuseng 27:11

1. Chom ik chitukwashinay Kuseng wa 27 kutesh?

OV, MULONG WAK mudimu wetu wa kulejan uyil kurutu chikalap nchik mikadil yiyimp yipandiken mu mangand? Mulong wak tupanin chisu ni usu wetu pakad difut pamenau antu avud mar ma kuburen nfalang? Mutapu ik tukutwisha kudandamen kwikal nich musangar pakatau antu avud kwov wom wa machuku ma kurutu? Muminy wapepilau wa Mwant David, wafundau mu Kuseng 27, utwinkishin yakul.

2. Ov, wom ukutwish kwikal nich usu ik pa muntu, ni ruchingej ik tukweta?

² David usambishin kuseng winou nich mazu minam: “[Yehova] udi kutok kwam ni dipandish diam; nany unikez am kwov wom? [Yehova] udi usu wa mwom wam, ov nany ukeza kangovish am wom?” (Kus. 27:1) Anch kwakam kukat kumuziyish muntu, kwov wom kudi kuyimp nakash. Pakwez wom ukutwishap kumwakamish muntu umwovila Yehova wom. (1 Pita 3:14) Pitusadila anch Yehova ikala kwikang kwetu, tukez “kushakam wakad kwakam.” (Jinsw. 1:33; 3:25) Ov, mulong wak?

“[YEHOVA] UDI KUTOK KWAM NI DIPANDISH DIAM”

3. Ov, Yehova udi mu mutapu ik chitokish chetu, pakwez chom ik tufanyidina kusal?

³ Chifanikesh “[Yehova] udi kutok kwam” chipwitin manangu pa mulong wa kwel anch Yehova utudioshin ku kuburen kwijik ni ku mididim ya muspiritu. (Kus. 27:1) Chimunyik chikutwish kumekesh kudia ubaj ap chom chiyimp chidia pa njil jetu, pakwez chikutwishap kuchidiosh. Tufanyidin kusal ni manangu kwambatan ni yitumena. Chilik chimwing, Yehova utulejin kurumburik kwa yinship yisadikina pa mangand. Ndiy utubabeshin mulong wa ubaj wa ditenchik dined dia yom. Utwinkishin yany ya Bibil yichidia ya usey, pakwez tufanyidin kusadil yitukata kwilej. Anch twasal mwamu, tukutwish kusal yom nich manangu kupandakanamu akankuny ni alej netu.—Kus. 119:98, 99, 130.

4. (a) Ov, mulong wak David walonda nich kashinsh anch: “[Yehova] udi . . . dipandish diam”? (b) Ov, chisu ik chikezay Yehova kwikal pakampwil dipandish dietu?

⁴ Mazu ma David mafunday mu Kuseng 27:1 malejen anch tufanyidin kuvurik mutapu wamukolay Yehova, ap kumupandish yisu yivud. Kupwa, Yehova wamukamunina “ku kan kwa ntambu ni kwa nnam wa chidiany.” Yehova wamukwasha kand chakwel amujipa Goliat. Kupwa, Mwant Saul wapakisha kumwas David murumbu, pakwez yisu yivud Yehova wamukamunina. (1 Sam. 17:37, 49, 50; 18:11, 12; 19:10) Chishimokishinap anch David washikena ku kulond nich kashinsh anch: “[Yehova] udi . . . dipandish diam”! Yehova ukez kwikal kand—dipandish kudi atushalapol end mudi mwadingay kudi David. Mutapu ik? Pakezay kuyipandish in kumwifukwil end “mu mar makash mapandakena.”—Kuj. 7:14; 2 Pita 2:9.

VURIK YOM YAWONSU WATWISHAY

5, 6. (a) Ov, mudimu ik ukweta manangu metu mu kukudish mushiku? (b) Mutapu ik rusangu ra Yehova piur pa kushakam kwend ni atushalapol end kukasikeshin mushiku wetu?

⁵ Chom cha usey mu kukudish mushiku chidi kushinshikin nakash pa Kuseng 27:2, 3. (Tang.) David wavurika yinship mwamanay dipandish nich ukwash wa Yehova. (1 Sam. 17:34-37) Yom yiney yamwinkisha ruchingej chakwel arisha nich yikokujol yiyimp. Ov, ukwet yitongijok yiney kusutil ku yom yakushikena? Chikwau kand, ov walembila nakash piur pa milong yakamishina ni wamana mutapu wakwinkishay Yehova manangu ap usu wa kupandakan yoziu yiney? Ap ukutwish kuvurik mutapu ik yikokujol ya mudimu wey usangareshina ayidiosha ap mutapu chis chijim cha mudimu chanzurika kudi ey? (1 Kor. 16:9) Ov, kuvurik yinship yiney kukutwish kwikal nich yibudikin ik padi ey katat? Ov, kuvurik kwinoku kukutwishap kudandamen kukwinkish kashinsh anch Yehova ukutwish kukukwash chakwel upandakana ni ujijamana ap mu yikokujol yikash?—Rom 5:3-5.

⁶ Ov, winyikel ik ukash ukutwisha kukwat chiyul cha kuyishesh Atuman a Yehova padiau mudi dirijek? Pa chirung chetu antu avud apakisha kusal mwamu pakwez akanganya. Kulejan mutapu Yehova wayikwasha antwend pasak kukez kutwinkish ruchingej chakwel turisha nich machuku ma kurutu.—Dan. 3:28.

SANGER DIFUKWIL DISHITWILA

7, 8. (a) Kwambatan nich Kuseng 27:4, ov, chom ik chitay David kudi Yehova? (b) Ov, chikumbu chijim cha Yehova chom ik, ni mutapu ik wadingau ni kumwifukwil mwinimwa?

⁷ Chom chikwau cha usey mu yisal yetu ya mushiku yidi dishin dietu dia difukwil diakin. (Tang Kuseng 27:4.) Mu chirung cha David, “chikumbu cha [Yehova]” chadinga dizang. David amwinend ndiy watenchika yom chakwel atunga chikumbu cha Nzamb pakwez mwanend Salomon ndiy wachitunga. Pasuta yitot ya mivu, Yesu walejana anch difukwil ditiyikina kudi Yehova diadingap dimedin pa kwikal nich chikumbu chijim chayukishau kudi Nzamb. (Yoh. 4:21-23) Kambuy Paul walejana mu Hebereu shapitre wa 8 kushik ku 10 anch chikumbu chijim cha Nzamb cha muspiritu chasambisha kwikalaku pa chisu cha dibatish dia Yesu mu muvu wa 29 C.C., pipanay amwinend pa chintamb cha rusot ra Yehova. (Heb. 10:10) Chikumbu chinech chijim cha muspiritu chidi ditenchik diasalay Yehova chakwel etu, kusutil ku ritiy retu mu difut dia yakupesh ya Yesu, tutwisha kumushejin Nzamb mu mutapu witiyijinay. Mutapu ik tukutwisha kwifukwil mwinimwa? Mu kulembil “nich michim yitentamina ni ritiy riwanyidina”; kusutil ku kulejan ruchingej retu patok pakad kushemunik; ni kusutil ku kutalijan, kukwashijan, ni kuyikasikesh ambay netu in kwifukwil pitukata kukumangan pamwing ku yikumangan ya chikumangen chetu ni pa chisu cha kwifukwil mu dijuku. (Heb. 10:22-25) Kusanger ditenchik dia difukwil diakin kukat kutukasikesh mu machuku minam makash mansudiel.

⁸ Pa divu diawonsu, atushalapol ashinshamena a Yehova akat kwipan nakash mu mudimu wa kulejan, mu kwilej jindim jisu, ni ayil mu jindond mudia kuswir kwa in kulejan Want. Yisal yau yimekeshin anch awiy, mudi nfund a kuseng, akwet chom chimwing cha kumwit Yehova. Asotin kusanger musangar wa Yehova ni kwipan mu mudimu utumbila chikalap nchik yikutwisha kuyishiken.—Tang Kuseng 27:6.

KUCHINGEJIN MU UKWASH WA NZAMB

9, 10. Ov, dikasikesh diletinau mu Kuseng 27:10 dirumburikin ik?

⁹ David wakasikesha ruchingej rend mu ukwash wa Yehova palonday anch: “Tatukwam ni makwam anch anlik, chawiy [Yehova] ukwintambul.” (Kus. 27:10) Tukutwish kulond anch kusutil ku yom yafundau mu 1 Samwel shapitre wa 22 anch anvaj enday David kamulikap. Pakwez, antu avud nlel unou ayilika kudi dijuku diau. Chikwau kand, antu avud alikau atana ukwash ni diking mu rukat ra chikumangen cha in Kristu.

¹⁰ Mulong Yehova udi tayad chakwel ayikasikesha atushalapol nend pakatau kuyilik kudi antu akwau, ov kakezap kuyikasikesh kand mu mitapu yikwau ya mar? Anch, chilakej, tutongin piur pa mutapu wa kuwanyish maswir ma kumujimbu ma majuku metu, ov, tukutwishap kwikal nich kashinsh anch Yehova ukez kutukwash? (Heb. 13:5, 6) Ndiy wij mikadil ni maswir ma atushalapol end ashinshamena.

11. Ov, ruchingej retu mudi Yehova rikutwish kwikal nich usu ik padi antu akwau? Let chilakej.

¹¹ Tal yamushikena Victoria, mwin kwilej Bibil mu Liberia. Pasambishay kuya kurutu chakwel atambula dibatish, ikundj wadinga ushicha nend wamulika wamusha ni an asatu. Ap anch washala pakad chikumbu ap mudimu, ndiy wadandamena kuya kurutu muspiritu. Kupwa kwa Victoria kutambul dibatish, mwanend wa mivu 13 watana ndond yimwing kasakosh mwizwila nfalang. Mulong wa kwipuk choziu, awiy alika kuchind nfalang jinej. Pakwez, amukimba swaa isalay washadisha kasakosh kinak. Ndiy wayileja anch, ang antu awonsu ading a kashinsh mudi Atuman a Yehova, mangand mawonsu mela kwikal mawamp nakash ni ma chisambu. Kusutil ku Bibil, Victoria wamuleja isalay winou piur pa kushilamu kwa Yehova kwa mangand masu. Mulong wa kushinshaman kwend, isalay wamwinkisha Victoria difut dijim mwi nfalang jatanau. Chikwau kand, ritiy rikash mu ukaliweny wa Yehova wa kupan ukwash wayinkisha Atuman a Yehova katumb kajim ka ukashinsh.

12. Ov, chom ik tumekeshina anch tudandamedin kumusadil Yehova pa ndond pa kuman mar ma kushadish yom ya ku mujimbu? Let chilakej.

¹² Ov, tongin bil mutapu wafanyidinay kwiyov Thomas, mwin kulejan wakad kubatishiu wadinga mu Sierra Leone. Ndiy wasambisha kusal mudimu wa kulejan ku shikol yimwing yikemp, pakwez ndiy katambulap difut diend piswimp muvu wakabuj djat ni kwinsudiel kwa midimu yend. Ov, chom ik chafanyidinay Thomas kusal kurutu kwa kutambul difut diend ni dia angond asuta? Wafanyidina kusal interview ni mukurump wa shikol—mwimpel umwing. Mwimpel walejana anch yitiyij ya Atuman a Yehova yadingap yambatena nich yitiyij ya Shikol. Ndiy wakasikesha anch Thomas ufanyidin kutond pakach pa mudimu wend ni yitiyij yend yimedina pa Bibil. Palikay mudimu winou ni kushadish difut diend dia piswimp muvu wa kabuj, Thomas watana mudimu ukwau, wa kurijek ma radio ni ma telefon. Mudi mumekeshina yilakej yiney ni yikwau yivud, wom wa kuyilik ukutwish kusal anch antu akwau asambisha kwakam, pakwez chikutwishap kwikal mwamu anch tukwet ruchingej rikash rimedina pa Sakatang wa yom yawonsu ni mwin Kuyiking antwend.

13. Ov, mutapu ik uyila kurutu mudimu wa kulejan Want mu jingand muburedina yom yivud ya ku mujimbu?

¹³ Mu mangand mavud, mukatau antu kuman mar, in kulejan Want yisu yivud asadining mudimu ukash. Mulong wak mwamu? Biro umwing wa mutiy wafunda anch: “In chikumbu avud akata kwitiyang malejan ma Bibil kakwetingap kwau mudimu ni kupwa akweting yisu yivud ya kwilej muten. Akadivar niyawiy akwet yisu yivud ya kulejan. Antu adia pakampwil mu jindond ja mar makash, kakwetap kuswir kwa kuyilej anch tudi mu machuku mansudiel; mulong amen yom yisadikina mu mikadil yau.” Mishoner umwing wasala mivu 12 mwingand mwadinga in kulejan atakedila malejan ma Bibil masatu ni kusut umwing ni mukwau wafunda anch: “Mulong in kulejan avud adinga ni mashakamin mau maswapela nich yom yikemp ya kwipuwangesh nich, awiy ading ni yisu yivud ya kusutish mu mudimu wa chingand ni malejan ma Bibil mavud.”

14. Ov, mu mitapu ik rikutwisha runtu ruvud kusanger piur pa diking dia Nzamb?

¹⁴ Yehova washilamu anch ukez kuyikwash, kuyiking ni kuyikol antwend adia mudi chisak, ku mujimbu ni muspiritu, ni tukat kumuchingejin. (Kus. 37:28; 91:1-3) Runtu riner rikeza kupand ku “mar makash mapandakena” rifanyidin kwikal rijim. (Kuj. 7:9, 14) Chawiy lel, runtu riner, mudi chisak akez kuriking ku kusheshik mu machuku mashalaku kal ma machuku mansudiel. Akez kuyinkish nich yom yawonsu yiswiridinau chakwel ajijamana yoziu ni kulam urund wau ni Yehova. Kupwa mu chirung cha nsudiel cha mar makash mapandakena, Yehova ukez kuyilam antwend.

“NLEJA NJIL YEY, A [YEHOVA] NZAMB”

15, 16. Mutapu ik tukutwisha kutaninamu anch twatesh malejan ma Nzamb? Let chilakej.

¹⁵ Chakwel tudandamena kwikal akash, tufanyindin kulondul yany ya Nzamb mu mutapu uyimenay. Chinech chimeken mu mazu malonday David anch: “Nleja njil yey, A Nzamb, ni kwintakel mwi njil yitokila, mulong wa akankuny nam.” (Kus. 27:11) Kusal yom kwambatan nich malembil mend kurumburikin kushinshikin nakash pa umutakel wawonsu wimedina pa Bibil ututambwila kusutil ku dirijek dia Yehova ni kuusadil kapamp kamwing. Antu avud avudisha mabaz makad usey akutwish kupan uman anch kusadil chiyul cha manangu cha kuswapesh mwom wau kwayinkisha yiyukish mu chirung cha katat cha kuburen nfalang. Pa ndond pa kwitekin yisend yilimina nich yom yivud yivud yakad kutwish kulam, akwet want ipau wa kupalangesh mudimu wau wa kulejan. Muntu ni muntu pakach petu ufanyidin kwiyipul anch, ‘Ov, nikat kusadil kapamp kamwing yom yawonsu nitangina mu Bibil ni mu mikand ya chisak cha kashalapol ushishamena ni kubabal, ap anch chifanyidin kwipan ayinetu?’—Mat. 24:45.

¹⁶ Anch twamulikidil Yehova chakwel atufundisha ni kututakel mwinjil jitentamina, kwikil chom chikeza kutwovish wom. Pasotay chibol umwing wa rawonsu wa mu États-Unis kuswimp ndond yend mu mudimu umwing chakwel yimukwasha kulam dijuku diend diawonsu mu mudimu wa chisu chawonsu, mukurump wend wamuleja anch kafanyidinap kuswimp ndond yend mulong kilejap shikol ya piur. Anch chinech chakushikena ey, ov, wela kwov ushon mulong wasala mudimu wa chisu chawonsu pakad kwilej ku shikol ya piur? Pasuta mbing jaad, mudimu wa mukurump winou wapwa, ni mukurump mukwau wamwipula mukadivar piur pa jintong jend. Ndiy wamurumburila anch ndiy ni mukajend adinga atushalapol a chisu chawonsu a Atuman a Yehova ni asota kudandamen nich mudimu winou. Kurutu kwa mukadivar alonda kand chom chikwau, mukurump wamuleja anch: “Nading nij anch kwading chom chimwing chishalijadina nich antu akwau kudi ey! Mulong padingay tatukwam piswimp ni kufa, ambay ney aad akaritiy ading akat kwez dichuku ni dichuku mulong wa kumutangin Bibil. Napana kushilamu amwinam anch pinikeza kwikal ni mutapu wa kumukwash Kaman ap umwing wa Yehova, nikez kumukwash.” Dichuku dialondulaku, amwinkisha mukadivar winou mudimu walikau kumwinkish kudi mukurump wadingaku pasak. Chawiy lel, anch twatek yisakin ya Want pa ndond ya kusambish mu mwom wetu, Yehova utukasikeshin anch ndiy kakezap kutulik pakad yom ya ku mujimbu.—Mat. 6:33.

RITIY NI RUCHINGEJ YIDI YA USEY

17. Ov, chom ik chikeza kutukwash chakwel turisha nich machuku ma kurutu ni ruchingej?

¹⁷ David ukasikeshin kand usey wa ritiy ni ruchingej palondinay anch: “Chakin, nidi ni ruchingej ra kuman kuwap kwa [Yehova] mwi ngand ya aom!” (Kus. 27:13) Chikwau kand, kwisu twela kwikal pakad ruchingej ratwinkishay Nzamb ni kusanger kwetu kwa yom yisambinau mu Kuseng 27! Dandamenany amboku kulembil nich ruchingej chakwel tutambula usu ni dipandish pitumena yinship yitwadila ku Harmagedon.—Tang Kuseng 27:14.

[Chipich chidia pa paj wa 23]

David wikala ni usu pavurikay yisal ya dipandish ya Yehova

[Chipich chidia pa paj wa 25]

Ov, twamen mar ma kuburen nfalang mudi chisu cha kujimbish mudimu wetu wa kulejan?