Yehova Wafungula Mes Mam
Patrice Oyeka
Chadinga urel nakash. Nasutisha dichuku dikwau mu mididim yikash—mputames, nading pa amwinam niteshin ku radio—Kupwa nakwata mupak wa kwijip amwinam. Nateka ulemb mu dikop dia mem ni kutek dikop dined pa tebur chakwel nina. Nasota kowal bil men ni kudjal maswin mam mawamp kurutu kwa kuna ulemb winou chakwel nifa kwam. Ov, mulong wak nasota kwijip? Ni mutapu ik nidia mwom ni nlel muten chakwel nilejana rusangu riner?
NAVADIKA pa Kasan 2, 1958, mu teritwar wa Kasaï Oriental, mu République Démocratique du Congo. Tatukwam wafil pinadinga nsangarum wa mivu chidivu, kupwa yayam wankwasha chakwel nipama.
Pinapwisha shikol, nasambisha kusal mu chir cha hévéas. Dichuku dimwing pamanch mu muvu wa 1989, pinading nirijekina rapor umwing mu biro wam, nakashimuka kapamp kamwing anch mes mam mamenap kand. Pakusambish, namana mudi uchuku wandam kal ap anch kwikil kasu pakwez natesha anch groupe électrogène wading usadil ni twading pamanch! Nova wom nakash, namana anch nikutwishap kuman chom ap chimwing, ap mikand yadinga kurutu kwam!
Namutazuka kapamp kamwing muntu nadinga nitakedila mu mudimu wam chakwel antwala kudi muntu wadinga utakedila rupital. Kupwa ikundj winou wanleja anch nifanyidin kuya kudi mwingang mukwau ukweta ukaliweny mu musumb. Mwingang pamanay anch katwishinap ni mwikadil wam wadinga ukash, chawiy lel wantuma mu musumb ujim, Kinshasa.
Mwom Wam mu Kinshasa
Mu Kinshasa, namana amingang avud akata kwok mayej ma mes, pakwez kwikil ap umwing pakach pau watwisha kwinkwash. Kupwa nashakama machuku 43 mu rupital, dokter walonda anch nikwikal mputames mu mwom wam wawonsu! Kupwa yid ya dijuku diam yantwala ku ma egliz ma mitapu ni mitapu chakwel niyerika ap mu chilay, pakwez usu wau wading wa chamwamu.
Kupwa, nashadisha ruchingej ra kuyerik ap dichuku dimwing. Yom yawonsu yikala yiyimp mu mwom wam. Nashadisha mes mam, ni mudimu wam. Nashadisha kand mukajam, wanlika, ni kusend yom yawonsu twadinga nich mu chikumbu. Nasambisha kwov usany wa kubudik pol ap kuta urund ni antu akwau. Nasambisha kushakam kulemp ni antu akwau ni kusutish machuku ni machuku mu chikumbu. Niyova amwinam wakad usey.
Napakisha kwijip tupamp twaad. Kapamp ka kaad kawiy nilejena kwinsambishil kwa rusangu riner. Mwan mukemp kusu mu dijuku ndiy wapandisha ku rufu riner. Ndiy wasenda pakad kwijik dikop dia ulemb nateka pa tebur ni kudjibul ulemb winou pa divu pinadinga nikat kowal. Pakwez, ndiy kapakishap kuna yom yadinga mu dikop dined. Pakwez nova kuyip mulong namanap dikop dined. Kupwa nalejana patok mulong wak nading nidikimbin ni chinasota kusal.
Namujikitisha Nzamb ni dijuku diam mulong asambisha kwinlam. Mupak wa kwijip wakanganya.
Natan kal Kand Musangar mu Mwom
Diarubing dimwing mu muvu wa 1992, pinadinga ku chikumbu nikat kuna ruwand, Atuman a Yehova aad eza kudi am padingau mu mudimu wa chikumbu ni chikumbu. Pamanau anch nidi mputames, awiy antanga Isay 35:5: “Chad mes ma amputames makez kaburik, ni matu ma atujikamatu makez kajukuk.” Muchim wam wizula musangar pinatesha mazu minam! Chinyim ni yom natesha mu ma egliz, Atuman kanlejap anch nikuyerik mu chilay bwat. Pakwez, awiy arumburila anch mes mam makez kuman mu mangand masu mashilaumu kudi Nzamb, anch nasal usu wa kumwijik Nzamb. (Yohan 17:3) Kapamp kamwing, nasambisha kwilej Bibil ni Atuman, mu buku Vous pouvez vivre éternellement sur une terre qui deviendra un paradis. Nasambisha kand kukumangan ku yikumangan yawonsu ya in Kristu ku Chot cha Want, ni nakarumuna mwom wam. Kupwa nalika kand kuna ruwand.
Pakwez, wimputames wam wasambisha kukangesh kuya kwam kurutu muspiritu. Chawiy lel, nayil ku shikol wa amputames chakwel nileja kutang ni kufund mu Braye mulong wa amputames. Chinech chasala anch nitwisha kwilej nawamp ku Chot cha Want. Piswimp ap nasambisha kwipan mu mudimu wa kulejan kudi amutej nam. Nasambisha kutan kand musangar mu mwom wam. Nadandamena kuya kurutu ni napana mwom wam kudi Yehova. Natambula dibatish pa Ndol-Mem 7, 1994.
Pinasambisha kumukat nakash Yehova ni antu akwau, nakudisha kand rusot ra kwipan mu mudimu wa chisu chawonsu. Kudiosh pa Kachirikin 1, 1995, nikat kusal mudi chibol wa rawonsu, ap kashalapol wa chisu chawonsu. Nikala kand nich chisend cha kusal mudi mukurump mu chikumangen cham kudiosh pa Kasan 2004. Yisu yimwing antazuka chakwel nikasala ma diskur mimedina pa Bibil mu yikumangen yikwau. Yiyukish yiney yawonsu yaleta musangar ujim kudi am ni yasal anch nijika anch kwikal nich ulim ukutwishap kukangesh rusot retu ra kumusadil Yehova Nzamb.
Yehova Wangikishin “Mes”
Mudi munalejana kwinsambishil, mukajam wanlika mulong nadinga mputames. Pakwez natambwil yiyukish yivud kudi Yehova. Ndiy wangikishish mu mutapu wa pakampwil mes chakwel nimana. Anny Mavambu, witiya chakwel nikala nfumwend ap anch nidi mputames, ndiy wikala mes mam. Udi ni ndiy mwin kulejan wa chisu chawonsu, ukat kwintwalang chisu chawonsu mu mudimu wa kulejan. Ndiy winkwashining kutang yom ya diskur diam kurutu niya nikasala, chawiy lel pakatay kutang nikat kufund yitanginay mu Braye. Ndiy udi chiyukish cha pakampwil kudi am. Mulong wendendiy, namana uyakin wa mazu minam ma Jinswir 19:14: “Kudia tatuku kukat kudiokal uswan wa chikumbu ni dipit, pakwez mband wa manangu ukat kudiokal ching [kudi Yehova].”
Yehova watuyukisha etwawonsu ni Anny mulong twavala an aad—ikundj ni mband. Nisotin kuman yifu yau mu Paradis! Chiyukish chikwau chidi anch yayam watukwasha kushakam mu chikumbu chend, witiya uyakin wa Bibil ni watambula dibatish! Etwawonsu tudi mu chikumangen chimwing.
Ap anch nidi mputames, yinisotila mu muchim wam yidi kudandamen kumusadil Nzamb nakash mulong ndiy wanyukishin nakash. (Malaki 3:10) Dichuku ni dichuku nikat kulembil chakwel Want wend weza ni udiosha mar mawonsu pa divu. Mulong nashikena ku kumwijik Yehova, nikutwish kulond chakin kamu anch: “Chiyukish cha [Yehova] chawiy chikata kulet dipit, ni Ndiy kakuwejangikup ushon.”—Jinswir 10:22.
[Chipich chidia pa paj wa 29]
Nisadin diskur dimedina pa Bibil; nidi ni dijuku diam ni mwanamakwam