Ov, Ukutwish Kwitiyij mu Relijon Wey Piur pa Kwishitul?

Sylvia wading usadila mu mudimu wa milong ya ukash wa mujimbu, ulejen anch: “Naya ku shikol ni antu avud ading alondina anch akwet relijon wau, pakwez ading akat kwiy yakul pa chisu cha examen ni kuna damb. Relijon kadingap ni usu ap umwing padi awiy.”

Muntu umwing utazukinau anch Lionel ulejen anch: “Ambay nam a ku mudimu akat kudimbanang ni kulejan anch ayedin pakwez kayedinap kwau. Akwet relijon pakwez kamusadidinap​—kudi awiy relijon udi mud chom chimekeshinau kusu.”

Relijon kakwetap usu wa kukarumun mwom wa antu avud. Nlel unou antu avud akwet “yitongijok mud in kwitiyij” pakwez ‘alikin ukash wa ritiy rakin.’ (2 Timote 3:5) Antakel achirelijon kakatap kupan chilakej chiwamp; ap amwimpel au kakatap kuyinkish amikoku au yiyul ya usey yidiokila mu Mukand wa Nzamb, chakwel ikala nich mwom wishitwila. Chishimokishinap kwau pa kuman anch antu avud itiyijin anch Nzamb kakatap kubangin mashakamin mau.

CHILEJENAY BIBIL

Bibil ulejen anch Nzamb ukwet yovil ni mashakamin metu makwet usey nakash padi ndiy. Pamubwambwilau Nzamb kudi in Isarel a pasak, awiy “amwovisha kuyip mu muchim.” (Kuseng 78:40) Pakwez, kudi “musangar mwiur” anch muntu wakarumuk ni muchim umwing ni walik yisal yend yiyimp. (Luka 15:7) Anch muntu wasanger piur pa mikadil ya ufun ya Tatukwetu wa mwiur, rukat rend piur pa Nzamb rikez kukul, rikumubachik chakwel akata yikatinay Nzamb ni kukis yikisinay.​—Amos 5:15.

YISADINAU ATUMAN A YEHOVA

Jurnal umwing utazukinau anch Le Deseret News, wa ku Salt Lake City, udia mu Utah, mu États-Unis ulejen anch: “Atuman a Yehova “akasikeshining uumwing mu dijuku ni kusal anch anau ikala an angand a kashinsh ni in kusal midimu.” Jurnal winou ulejen kand anch: “Yid yau yitiyijin mu yijil ya piur nakash ya mwikadil. Itiyijin anch kuna ruwand, kukwachik maar, kuna damb, masengan ma nfalang, masandj ni usund wa amakundj ni amakundj ap wa amband ni amband yidi yisal yikata kuyipish mwikadil wa muspiritu.”

Ov, mutapu ik kwilej piur pa untu wa Nzamb kuyikwashin Atuman? Sylvia ulejenau kwinsambishil ulondin anch: “Mu mudimu wa kwokan, antu avud akat kwiy. Chiswapel kuyilondul. Pakwez, kwijik mutapu ik ukatay Yehovaa kutesh piur pa wij kukat kwinkwash chakwel nisala yom yitentamina. Nikwet musangar ni chisambu mu muchim.” Sylvia ukwet kashinsh anch kushakam mu kulondul yitiyij yend ya chirelijon kwawapisha mwom wend.