Mulong Wak Tukat Kuvurik Yakudia ya Mwant

1, 2. Ov, chom ik chasalay Yesu pa urel wa Nisan 14, 33 C.C.? (Tal chipich chidia kwinsambishil.)

UCHUKU wajal kal, pakwez ngond muwamp utokishin mu Yerusalem. Winou wawiy urel wa ngond wa Nisan 14, 33 C.C. Yesu ni in kwilejend asala Musambu wa Kusut kwa Yehova, mulong wa kuvurik kukolik mu uswik kwa in Isarel kudiokal mu Idjibit mwadiokalau kwasutil kal mivu 1 500. Yesu, pamwing ni atwimbuy 11 ashinshamena, wasala kapamp ka kusambish yakudia ya pakampwil​—yeza kwikal chivurikish cha rufu rafay kurutu kwa dichuku dined kupwa.a​—Mat. 26:1, 2.

² Yesu walembila mulong wa kumujikitish Nzamb ni wasutisha dibot diakad chivish kudi atwimbuy, ni wayileja anch: “Tambulany, diangany.” Wanona kand rupas ra nviny, wamujikitish kand Nzamb, ni wayilej anch: “Nangany en awonsu.” (Mat. 26:26, 27) Yesu kasutishap yakudia yikwau kudi awiy, pakwez wading ukwet yom yivud nakash ya kuyilej in kwilejend ashinshamena uchuku winiwa.

3. Ov, yipul ik yikwakulau mu mutu wa mulong winou?

³ Chawiy, Yesu wasala Chivurikish cha rufu rend, chitazukiningau kand anch “Yakudia ya Mwant.” (1 Kor. 11:20, TMK) Pa chinech, antu amwing akutwish kwiyipul anch: Ov, mulong wak chifanyidin kuvurik rufu ra Yesu? Ov, chom ik chirumburikina dibot ni nviny? Ov, mutapu ik tukutwisha kwitenchik mulong wa Chivurikish? Ov, anany afanyidina kudia Yakudia ya Mwant? Ni mutapu ik ukatau in Kristu kumekesh anch asendin ruchingej rau ni usey?

MULONG WAK TUKAT KUVURIK RUFU RA YESU

4. Ov, rufu ra Yesu ratwishikisha chom ik?

⁴ Mulong tudi an a Adam, twaswana chitil ni rufu. (Rom 5:12) Kwikil muntu ap umwing wakad kuwanyin ukutwisha kumwink Nzamb chakupesh cha difut mulong wa mwom wend ap wa antu akwau. (Kus. 49:6-9) Pakwez, kusutil ku rufu rend, Yesu wafuta usey wa chakupesh cha difut chiwanyidina chakin kamu​—mujimbu wend uwanyidina ni mash mend michilau. Patwalay kudi Nzamb usey wa chakupesh cha difut, Yesu wasala anch tukwolika ku chitil ni rufu ni tutambula chipan cha mwom wa chikupu.​—Rom 6:23; 1 Kor. 15:21, 22.

5. (a) Ov, mutapu ik twija anch Nzamb ni Kristu ayikatin antu? (b) Ov, mulong wak tufanyidina kwikalaku ku chivurikish cha rufu ra Yesu?

⁵ Chipan cha chakupesh cha difut chimekeshin anch Nzamb ukatin mangand. (Yoh. 3:16) Chakupesh cha difut dia Yesu chimekeshin anch Yesu niyend utukatin. Chawiy lel, kurutu kwendendiy kuvadik mudi muntu, Yesu wadinga ‘mwin mudimu’ wa Nzamb ‘wasangera antu.’ (Jinsw. 8:30, 31) Tufanyidin kumujikitish Nzamb ni Mwanend kusutil ku kukumangan ku chivurikish cha rufu ra Yesu, ni kuziyil ku mazu malonday anch: ‘Dandamenany kusal mwamu mulong wa kwinvurik am.’​—1 Kor. 11:23-25.

CHIRUMBURIKINA YIJINGIDIJ

6. Ov, mutapu ik tufanyidina kuman dibot ni nviny ya Chivurikish?

⁶ Pasalay Chivurikish kapamp ka kusambish, Yesu kakarumunap mu chilay dibot ni maar ma nviny kwikal mujimbu ni mash mend. Piur pa dibot, ndiy walonda anch: ‘Chinech chidi chifanikesh cha mujimbu wam.’ Piur pa nviny, walonda kand anch: ‘Chinech chidi chifanikesh cha mash mam ma manswik, michilau mulong wa antu avud.’ (Mar. 14:22-24) Chimeken patok anch, dibot ni nviny ayimana mudi yifanikesh, ap yijingidij.

7. Ov, chom ik chifanikeshinau ni dibot dikatau kusadin ku Chivurikish?

⁷ Pa chirungu chinech cha usey nakash mu muvu wa 33 C.C., Yesu wasadina dibot diakad chivish diashalaku ku yakudia ya Kusut kwa Yehova. (Kub. 12:8) Mu Mifund pasak, chivish chamekeshanga mwikadil wijondila ap chitil. (Mat. 16:6, 11, 12; Luka 12:1) Chawiy lel, dibot diakad chivish diasadilay Yesu diading dikwet usey mulong diading chifanikesh cha mujimbu wend wakad chitil. (Heb. 7:26) Chawiy chikatau kusadil dibot dia mutapu winou ku Chivurikish.

8. Ov, chom ik chifanikeshinau ni rupas ra nviny ra Chivurikish?

⁸ Nviny wasadinay Yesu pa Nisan 14, 33 C.C., ufanikeshin mash ma Yesu, mudi rupas ra nviny rikatau kusadin nlel ku Chivurikish. Ku Golgota, pol pa musumb wa Yerusalem, mash mend amichila ‘chakwel Nzamb ayilikishina antu yitil yau.’ (Mat. 26:28; 27:33) Mulong dibot ni nviny ya Chivurikish yifanikeshin mulambu wa usey wapanay Yesu mulong wa antu aziyidina ni tukwet musangar mulong wa chipan chinech cha rukat, chidi cha usey nakash twitenchika muntu ni muntu panrend mulong wa kukumangan ku Yakudia ya Mwant ya pa muvu.

YOM KANANG YIFANYIDINA KUSAL MULONG WA KWITENCHIK

9. (a) Ov, mulong wak chidi cha usey kubangin chikunku cha Bibil cha kutang chitinau mulong wa Chivurikish? (b) Ov, mutapu ik wiyovila piur pa chakupesh cha difut?

⁹ Anch twalondul program wa kutang Bibil mulong wa Chivurikish udia mu broshir Examinons les Ecritures Chaque Jour, tukutwish kutongijokin pa chasalay Yesu kurutu kwa rufu rend. Kupwa, kusal mwamu kukutwish kutukwash chakwel tutenchika muchim wetu mulong wa Yakudia ya Mwant.b Nambaz umwing wafunda anch, “Tuchingedin nakash Chivurikish. Chikat kwikal cha pakampwil muvu ni muvu. Nivurikin pinading niminy ku mushet wa tatukwam . . . pinading nimutadin tatukwam mukatish wading ufila, nikala ni musangar uvud mulong wa chakupesh. . . . Ah, Nading nij mifund yawonsu ni mutapu wa kuyirumburil! Pakwez, ching kusu pinova runeng nakash mulong wa rufu pawiy pasangara muchim wam mulong wa yom yiwamp yitutambwila kusutil ku chakupesh.” Chawiy lel, kutongijokin pa chakupesh cha difut dia Yesu kukutukwash etu awonsu kuman usey wa kutenchik chivurikish.

10. Ov, chom ik chikwau tufanyidina kusal mulong wa kwitenchik piur pa Chivurikish?

¹⁰ Kwitenchik mulong wa Chivurikish kukutwish kwit anch tusala yom kanang mulong wa kukudish mudimu wetu wa kulejan, pamwing ap kwikal chibol nkwash chisu cha Chivurikish. Pituyitazukina antu twilejina nau Bibil ni antu akwau ku Yakudia ya Mwant, tukwikal ni musangar wa kulond piur pa Nzamb, pa Mwanend, ni pa yiyukish yidiaku mulong wa antu amusangareshina Yehova ni akata kumushiman.​—Kus. 148:12, 13.

11. Ov, mutapu ik wadiau in Kristu amwing Yijingidij ya Chivurikish mu mutapu wa kumukwatish nsalejetu usany?

¹¹ Piwitenchikina mulong wa Yakudia ya Mwant, shinshikin yayifundinay kambuy Paul in mu chikumangen cha win Kristu cha mu Korint. (Tang 1 Korint 11:27-34.) Paul walonda patok anch muntu mwawonsu ukudia dibot ni kuna nviny mu mutapu wa kumukwatish nsalejetu usany, “muntu mwinou ukufa nich kwa chitil cha kuurumbukin mujimbu wa Nsalejetu ni mash mend,” Yesu Kristu. Chawiy lel muntu uzizidilau many ufanyidin “kwipak amwinend mu muchim” ni kupwa kudia chad yijingidij. Chamwamu, “muntu mwinou wifish kal nich padilay ni kuna.” Mulong wa mashakamin mayimp madingau nich, antu avud a mu Korint adinga ‘ayej ni aziyila ku mujimbu, ni akwau afa kal muspiritu.’ Pamwing ap, antu amwing adia ni ana mwamu kurutu ap chisu cha Chivurikish mulong mu manangu mau kadingap akwet uman ap umwing wa muspiritu umekeshina anch ading afanyidin kudia. Kudia ni kuna yijingidij mu mutapu winou wa kumukwatish nsalejetu usany kukat kusal anch antu inay ashadisha dilau dia Nzamb.

12. (a) Ov, chom ik chafanikeshay Paul ni Chivurikish, ni kubabesh ik kwayinkishay antu afanyidina kuyidia? (b) Ov, chom ik chafanyinau kusal in kudia yijingidij asala chitil chijim?

¹² Pafanikeshay Paul Chivurikish ni yakudia, wayibabesha in kuyidia anch: “Kiukutwishanyip kuna rupas ra Mwant ni kand rupas ra ayilembil. Kiukutwishanyip kudia ku mes ma Mwant ni kand ku mes ma ayilembil.” (1 Kor. 10:16-21, TMK) Anch muntu udila ni kuna yijingidij ya Yakudia ya Mwant wasadin kal chitil chijim, ufanyidin kukimb ukwash wa muspiritu. (Tang Jakobu 5:14-16.) Anch muntu uzizidilau many wasal ‘yom yikutwisha kumekesh anch, wakarumukin kal kudiokal ku yitil yend,’ ukumekesh anch ukwet kalimish mulong wa chakupesh cha difut dia Yesu pa kudia yijingidij ya Chivurikish.​—Luka 3:8.

13. Ov, mulong wak chidi cha usey kulembil piur pa ruchingej ratwinkishau kudi Nzamb?

¹³ Pitwitenchikina mulong Chivurikish, tufanyidin kulembil nakash piur pa kwijik usey wa richingej retu rakin ritwinkishinay Nzamb. Kwikil kashalapol ap umwing wipana kal kudi Yehova ni mwin kwilej wa Mwanend usotila kumekesh kuburen kalimish pantaliken ni chakupesh cha difut dia Yesu kusutil ku kudia ni kuna yijingidij ya Chivurikish anch chakin kakwetap uman umekeshina anch udi mwin Kristu uzizidilau many. Pakwez, ov, mutapu ik lel ukutwishay muntu kwijik anch ufanyidin kudia yijingidij ap bwat?

OV, NANY UFANYIDINA KUDIA YIJINGIDIJ?

14. Ov, usey ik ukwet manswik masu kudi antu akata kudia yijingidij ya Chivurikish?

¹⁴ Antu akata kudia mu win yakin yijingidij ya Chivurikish akwet kashinsh adi mu manswik masu. Piur pa nviny, Yesu walonda anch: ‘Rupas riner rirumburikin manswik masu ma Nzamb, makasikeshau kal nich mash mam.’ (1 Kor. 11:25) Kusutil kudi muprofet Jeremiy, Nzamb watakela kulond anch Ufanyidin kusal manswik masu mashalijadina ni manswik ma Yijil masukay ni in Isarel. (Tang Jeremiy 31:31-34.) Nzamb waswika manswik masu ni in Isarel a muspiritu. (Gal. 6:15, 16) Manswik minam mikalaku kusutil ku chakupesh cha difut dia Kristu ni masambisha kusal kusutil ku mash mend michilay. (Luka 22:20) Yesu ndiy Mwin Kusankesh wa manswik masu, ni azizidilau many ashinshamena akutambul uswan wau mwiur.​—Heb. 8:6; 9:15.

15. Ov, anany andama mu manswik ma Want, ni chisend ik chiyichingedina anch ashal ashinshamena?

¹⁵ Antu adila yijingidij ya Chivurikish ij anch ayitiyijin mu manswik ma Want. (Tang Luka 12:32.) Antu akata kwikal in kwilej a Yesu azizidilau many ni ashinshamena kudi Yesu, akat kuman nend mar pamwing, afanyidin kuyikel nend pamwing mu want wend wa mwiur. (Fil. 3:10) Mulong adi mu manswik ma Want, azizidilau many ashinshamena akez kuyikel pamwing ni Kristu mwiur mudi ant chikupu. (Kuj. 22:5) Antu inay afanyidin kudia yijingidij pa chisu cha Yakudia ya Want.

16. Rumburil mu wiswimp kurumburik kwa Rom 8:15-17.

¹⁶ Ching antu akweta uman wakin wa mwiku anch adi an a Nzamb awiy afanyidina kudia yijingidij ya Chivurikish. (Tang Rom 8:15-17.) Ijik anch Paul wasadila “Abba,” dizu dia araméen dirumburikina anch “O Tatuku!” Mwan ukutwish kusadil dizu “tatuku” anch wambambin ni tatukwend, mulong didi dizu dimekeshina rukat ni kalimish nakash ku mutambu wa “mvaj.” Antu atambula ‘Mwiku Utumbila ukata kuyikadikadish an a uswan a Nzamb’ avadika ku usu wa mwiku wa Nzamb. Mwiku wa Nzamb ukat kupan uman kudi mwiku wau, kuyikwash chakwel ijika anch adi an azizidilau many a Yehova. Chidiap kwau anch kakatinap kushakam pa divu. Ij chakin anch akez kwikal pamwing ni Yesu mu Want wa mwiur anch ashal ashinshamena djat ni ku rufu. Lel, kushil ching kusu atushal a ku in kwilej a Kristu akemp pakach pa antu 144 000 ‘atambwila kal Mwiku Utumbila,’ wayinkishau kudi Yehova. (1 Yoh. 2:20; Kuj. 14:1) Chidi kusutil kudi mwiku wend pawiy palondinau anch, “Abba, Tatuku!” Urund uwamp mudi ik ukwetau ni Nzamb!

KWAKUL KUKWATIJAN NI RUCHINGEJ REY RA MU MIFUND

17. Ov, risu ridia richingej ra azizidilau many, mutapu ik ukatau kuriman?

¹⁷ Anch udi mwin Kristu uzizidilau many, ‵ruchingej ra kuya mwiur chawiy chom cha usey ufanyidina kulembidil. Palondinay Bibil piur pa kwikal ‘mband watondinau kal mulong wa uruw’ kudi Ngatan wa mwiur, Yesu Kristu, ulondin mazu minam piur peyey, ni uchingejin nakash mulong wa kwikal niyey chidi cha “ngachik” wa Kristu. (2 Kor. 11:2; Yoh. 3:27-29; Kuj. 21:2, 9-14) Palondina Dizu Nzamb piur pa rukat rimekeshinay Nzamb mulong wa anend a muspiritu, ey niyey ukuman anch ukat kulond piur peyey. Anch Dizu dia Yehova dialet yany kudi anend azizidilau many, mwiku utumbila ukat kukubachik chakwel uziyila ni kulond mu muchim wey anch, “Mazu minam amafundin mulong wamam.” Mwiku wa Nzamb ni mwiku wey ukat kovijan mulong wa kupan uman anch ukwet ruchingej ra kuya mwiur.

18. Ov, ruchingej ik rikwetau “amikoku akwau”, ni mutapu ik wiyovila mulong wa ruchingej riner?

¹⁸ Ku mutambu ukwau, anch udi wa mu “chisak chipandiken kujimb” cha “amikoku akwau,” Nzamb ukwinkishin ruchingej ra kushakam pa divu. (Kuj. 7:9; Yoh. 10:16) Ey ukweta rusot ra kushakam chikupu mu Paradis, sanger kutongijokin pa yilondinay Bibil piur pa mutapu ukeza kikal mwom pa divu mu machuku ma kurutu. Uchingejin nakash kusanger chisambu chikwikalau nich in mu dijuku diey ni antu akwau atentamina. Uchingedin nakash chisu chikeza kupwa nzal, uzwendj, mar, mayej, ni rufu. (Kus. 37:10, 11, 29; 67:6; 72:7, 16; Isay 33:24) Ukwet kuswir nakash kwa kuyak antu akuvumbulau ku rufu mulong wa kushakam chikupu pa mangand. (Yoh. 5:28, 29) Musangar mudi ik mulong Yehova ukuyukishin nich ruchingej ra kushakam pa divu! Ap anch udilap yijingidij, ukumangen ku Chivurikish mulong wa kumekesh musangar uukweta piur pa mulambu wa chakupesh wa Yesu Kristu.

OV, UKWIKALAKU KU CHIVURIKISH?

19, 20. (a) Ov, chom ik ufanyidina kusal mulong wa kwikal nich mwom wa chikupu? (b) Ov, mulong wak ufanyidin kukumangan ku Yakudia ya Mwant?

¹⁹ Ap anch ruchingej rey ridi ra kushakam pa divu ap ra kuya mwiur, rikutwish kwikal rakin ching anch watek ritiy rey mudiay Yehova Nzamb, mudiay Yesu Kristu ni mu chakupesh cha difut. Anch wakumangan ku Chivurikish, ukwikal ni chisu cha kutongin pa ruchingej rey ni pa usey ukweta rufu ra Yesu. Chawiy lel, itekina rutong ra kwikal umwing wa pakach pa ma miliyon ma antu akukumangana ku Yakudia ya Mwant kupwa kwa muten kwandam Diakatan, pa Ndol 3, 2015, ku Chot cha Want pamwing ni antu akwau adia pa mangand mawonsu.

²⁰ Kukumangan ku Chivurikish kukutwish kupandikesh musangar wey uukweta mulong wa chakupesh cha difut cha Yesu. Kuta matu nawamp ku diskur kutwish kukubachik chakwel umekesha rukat kudiau amutej ney pa kuyilej yiwilejang piur pa rukat ra Yehova ni pa rutong rend rikwetay piur pa antu. (Mat. 22:34-40) Mu mitapu yin yawonsu, sal usu wa kwikalaku ku Yakudia ya Mwant.